ហ្វីលីពីន បញ្ជាទិញនាវាឆ្មាំសមុទ្រ ៥ គ្រឿង ពីប្រទេសជប៉ុន ក្នុងតម្លៃជាង ៤០០លានដុល្លារ

ឧកញ៉ាសាមញ្ញ — Sat, 18 May 2024 00:55:00 +0000

យោងតាមរដ្ឋាភិបាលហ្វីលីពីន បាននិយាយកាលពីថ្ងៃសុក្រ ទី១៧ ខែឧសភាកន្លងទៅថា ប្រទេសរបស់ខ្លួន បានយល់ព្រមបញ្ជាទិញនាវាឆ្មាំសមុទ្រចំនួន ៥ គ្រឿង ពីប្រទេសជប៉ុន នៅក្នុងកិច្ចព្រមព្រៀងមួយដែលមានតម្លៃជាង ៤០០លានដុល្លារ ខណ:ពេលដែលប្រទេសក្នុងតំបន់អាស៊ានមួយនេះ កំពុងប្រឈមមុខទៅនឹងសម្ពាធកាន់តែខ្លាំងពីសំណាក់ចិន នៅក្នុងតំបន់សមុទ្រចិនខាងត្បូង។ នេះបើតាមការចុះផ្សាយពីសារព័ត៌មាន Reuters។

ក្រសួងការបរទេសហ្វីលីពីន បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលជប៉ុន នឹងផ្តល់ប្រាក់កម្ចីដល់ហ្វីលីពីន ចំនួន ៦៤,៣៨ពាន់លានយ៉េន (៤១៦លានដុល្លារ) ដើម្បីទិញនាវាពហុតួនាទី ចំនួន ៥ គ្រឿង និងការចំណាយសម្រាប់អភិវឌ្ឍឧបករណ៍ចាំបាច់ផ្សេងទៀត។

ជុំវិញការបញ្ជាទិញនាវានេះ អាចនឹងធ្វើឲ្យហ្វីលីពីន កាន់តែមានភាពប្រសើរឡើងបន្ថែមទៀត នូវសមត្ថភាពរបស់ខ្លួន សម្រាប់ប្រតិបត្តិការដែនសមុទ្រ ជាពិសេសក្នុងការដោះស្រាយទៅលើបញ្ហាឧក្រិដ្ឋកម្មឆ្លងដែន ជាដើម។

ជម្រាបជូនផងដែរថា បណ្តាប្រទេសជាច្រើន កំពុងស្វែងរកការពង្រឹងកិច្ចសហប្រតិបត្តិការសន្តិសុខរបស់ខ្លួនឲ្យកាន់តែស៊ីជម្រៅ ខណៈដែលប្រទេសចិនកាន់តែមានទំនុកចិត្តខ្ពស់ ក្នុងការទាមទារការគ្រប់គ្រងរបស់ខ្លួន នៅក្នុងដែនសមុទ្រចិនខាងត្បូង៕

The post ហ្វីលីពីន បញ្ជាទិញនាវាឆ្មាំសមុទ្រ ៥ គ្រឿង ពីប្រទេសជប៉ុន ក្នុងតម្លៃជាង ៤០០លានដុល្លារ appeared first on .

សហភាពអឺរ៉ុប ផ្តល់នាវាល្បាត៧គ្រឿងដល់ខេត្តកោះកុង ដើម្បីទប់ស្កាត់បទល្មើសនេសាទ

ឧកញ៉ា ឆ្នាំងដី — Wed, 04 May 2022 16:31:27 +0000

នាវាល្បាតចំនួន៧គ្រឿងស្ថិតក្រោមហិរញ្ញប្បទានឥតសំណងរបស់សហភាពអឺរ៉ុបនៃកម្មវិធី CAPFISH-Capture ត្រូវបានប្រគល់ជូនដល់អធិការដ្ឋានរដ្ឋបាលជលផល និងខណ្ឌរដ្ឋបាលជលផលតំបន់ឆ្នេរទាំង៤ ក្នុងខេត្តកោះកុង ដើម្បីទប់ស្កាត់បទល្មើស នេសាទនិងការពារធនធានធម្មជាតិ។

ពិធីប្រគល់ទទួលនាវាល្បាត បានធ្វើឡើងកាលពីថ្ងៃទី០៤ ខែឧសភា ឆ្នាំ២០២២ ក្រោមអធិបតីភាព លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លោកស្រី Carmen Moreno ឯកអគ្គរដ្ឋទូតសហភាពអឺរ៉ុបប្រចាំកម្ពុជា លោកស្រី មិថុនា ភូថង អភិបាលខេត្តកោះកុង និងមានការចូលរួម និងភ្ញៀវកិត្តិយសជាតិ-អន្តរជាតិជាច្រើននាក់។

លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានបញ្ជាក់ថា សហភាពអឺរ៉ុបបានផ្តល់ហិរញ្ញប្បទានសម្រាប់គម្រោងកម្មវិធីជំរុញកំណើនវិស័យកសិកម្មប្រកបដោយចីរភាព និងបរិយាប័ន្ននៃអនុវិស័យជលផល និងអនុវិស័យផលិតកម្មសត្វ ចាប់ពីឆ្នាំ២០១៣ ដល់ឆ្នាំ២០១៨ ដែលបានរួមចំណែកជំរុញកំណើនក្នុងវិស័យកសិកម្ម ដោយផ្តោតជាសំខាន់លើការអភិវឌ្ឍអនុវិស័យជលផល និងផលិតកម្មសត្វ។

លោក វេង សាខុន បន្តថា ក្នុងរយៈពេល២ឆ្នាំនៃការអនុវត្តគម្រោងកម្មវិធី CAPFISH-Capture កន្លងមកនេះ សហភាពអឺរ៉ុបបានផ្តល់នូវមធ្យោបាយ នាវាល្បាត រថយន្ត ម៉ូតូ សម្ភារការិយាល័យ និងសម្ភារ សម្រាប់អនុវត្តសកម្មភាពនៅមូលដ្ឋានជាច្រើន ដល់អង្គភាពអនុវត្តសកម្មភាពផ្ទាល់ទាំងនៅថ្នាក់ជាតិ និងថ្នាក់ក្រោមជាតិ។ ទន្ទឹមគ្នានេះសហភាពអឺរ៉ុបក៏បានផ្តល់ហិរញ្ញប្បទានឥតសំណងសម្រាប់គម្រោងកម្មវិធីថ្មីចំនួន២ទៀតដែលបាននិងកំពុងអនុវត្តដោយរដ្ឋបាលជលផលគឺកម្មវិធី CaPFish-Aquaculture និង CAPFISH-Capture ដែលគម្រោងទាំង២នេះចាប់ផ្តើមពីឆ្នាំ២០១៩ និងត្រូវបញ្ចប់នៅឆ្នាំ២០២៤។

ជាមួយគ្នានេះ លោកស្រី មិថុនា ភូថង អភិបាលខេត្តកោះកុង ក៏បានណែនាំអោយមន្ត្រីជំនាញនិងសហគមន៍ ប្រើប្រាស់នាវាល្បាតទាំងនេះឱ្យបានត្រឹមត្រូវស្របតាមបច្ចេកទេស និងខិតខំចេញល្បាតដើម្បីការពារបទល្មើស និងបង្ក្រាបឱ្យបានទាន់ពេលវេលា។ ជាពិសេសអាជ្ញាធរមូលដ្ឋានសហគមន៍នេសាទ និងមន្ទីរអង្គភាពពាក់ព័ន្ធទាំងអស់ ត្រូវចូលរួមសហការគ្នា ដើម្បីទប់ស្កាត់បទល្មើសនេសាទទាំងឡាយ ដូចជា ការប្រើប្រាស់ឧបករណ៍ខុសច្បាប់ ការនេសាទនៅក្នុងតំបន់ហាមឃាត់ជាដើម ៕

The post សហភាពអឺរ៉ុប ផ្តល់នាវាល្បាត៧គ្រឿងដល់ខេត្តកោះកុង ដើម្បីទប់ស្កាត់បទល្មើសនេសាទ appeared first on .