ដូចនេះ​ហើយ​លោក​បណ្ឌិត  គិន ភា ដែល​ជា​ប្រធាន​វិទ្យាស្ថាន​ទំនាក់ទំនង​អន្តរជាតិ​នៃ​កម្ពុជា បាន​ចេញ​មុខ​មក​បកស្រាយ​ថា៖ «ឧកញ៉ា» ជា​គោរមងារ​ដ៏​ខ្ពង់ខ្ពស់​ឧត្ដុង្គឧត្ដម​បំផុត​ក្នុង​ប្រទេស​រាជា​និយម​ដូច​កម្ពុជា  ព្រោះ​ជា​គោរមងារ​ដែល​ជា​ព្រះរាជទាន​របស់​ព្រះមហាក្សត្រ​ចំពោះ​បុគ្គល​ទាំង​ឡាយ​ណា ដែល​មាន​ស្នាដៃ និង​កសាង​សមិទ្ធផល​ដ៏​ធំធេង ដើម្បី​ជាតិ សាសនា ព្រះមហាក្សត្រ និង ប្រជាជន។ ដូច្នេះ គោរម​វន្ត​ដែល​ទទួល​បាន​ការ​ប្រទាន​នេះ ត្រូវ​តែ​ជា​បុគ្គល​ខ្ពង់ខ្ពស់ ថ្លៃថ្នូរ ប្រកប​ដោយ​កិត្តិយស សីលធម៌ គុណធម៌ និង​សុចរិត​ក្នុង​មុខ​ជំនួញ។

ចំពោះ​ការ​ដកហូត​ងារ «ឧកញ៉ា» វិញ​នោះ លោក​បណ្ឌិត​រូប​នេះ​បាន​បញ្ជាក់​ថា ការ​ដក​ហូត​ងារ «ឧកញ៉ា» ពី​បុគ្គល​ទុច្ចរិត ខ្វះ​ភាព​ស្មោះត្រង់​ក្នុង​មុខ​ជំនួញ ឆបោក​រាស្ត្រ ភូត​កុហក​រដ្ឋ បំផ្លាញ​ធនធាន​ធម្មជាតិ កេង​ប្រវ័ញ្ច​ទ្រព្យ​សម្បត្តិ​រដ្ឋ និង​គ្មាន​សីលធម៌ និង​គុណធម៌, គឺ​ជា​រឿង​ដ៏​ត្រឹមត្រូវ​បំផុត ដែល​មិន​ត្រឹមតែ​ជួយ​ការពារ​កិត្តិយស និង​សេចក្ដី​ថ្លៃថ្នូរ​របស់​គោរម​វន្ត ដែល​ជា​ឧកញ៉ា​ល្អ​ៗ ដែល​បាន​រួម​ចំណែក​យ៉ាង​ធំធេង​ក្នុង​ការ​កសាង​សមិទ្ធផល​ធំ​ៗ ដើម្បី​ផល​ប្រយោជន៍​សាធារណៈ និង​បាន​លះបង់​ទ្រព្យធន​ផ្ទាល់​ខ្លួន​យ៉ាង​ច្រើន​សន្ធឹកសន្ធាប់ ដើម្បី​បុព្វហេតុ​ជាតិ សាសនា ព្រះ​មហាក្សត្រ និង​ប្រជាជន​ប៉ុណ្ណោះ​ទេ តែ​ថែម​ទាំង​អាច​ជួយ​លុប​បំបាត់​ក្រុម​​ជន​ទុច្ចរិត​ឆបោក​ពលរដ្ឋ​ជា​ប្រព័ន្ធ បំផ្លាញ​ទ្រព្យ​សម្បត្តិ​សាធារណៈ និង​ធនធាន​ធម្មជាតិ​ទៀត​ផង។ ពលរដ្ឋ​ពិត​ជា​សាទរ​នឹង​ចំណាត់​ការ​បែប​នេះ​របស់​រាជរដ្ឋាភិបាល ដែល​មិន​ត្រឹមតែ​លើក​សំណើ​ថ្វាយ​ព្រះមហាក្សត្រ ស្នើ​សុំ​ដក​ហូត​ងារ «ឧកញ៉ា» ពី​ជន​ទុច្ចរិត​ទាំង​នោះ​ប៉ុណ្ណោះ​ទេ តែ​ត្រូវ​ចាត់​វិធានការ​តាម​ផ្លូវ​ច្បាប់​ឱ្យ​តឹងរ៉ឹង​បំផុត និង​ដល់​ឫសគល់​ដោយ​គ្មាន​ការ​លើកលែង ដើម្បី​ឱ្យ​ជន​ដែល​កំពុង​ប្រព្រឹត្ត​រឿង​ដូចគ្នា ឬ​កំពុង​រៀបចំ​ផែន​ការ​ប្រព្រឹត្ត​រឿង​ដូចគ្នា ខ្លាច​រអា មិន​ហ៊ាន​ប្រព្រឹត្ត​តទៅ​ទៀត។

លោក​បាន​បញ្ជាក់​ថា អាជ្ញាធរ​មាន​សមត្ថកិច្ច​ត្រូវតែ​ធ្វើការ​នេះ​ដោយ​តម្លាភាព យុត្តិធម៌ និង​ការ​ទទួល​ខុស​ត្រូវ​ខ្ពស់ ជាពិសេស ត្រូវតែ​ស្រាវជ្រាវ​របាយការណ៍​ហិរញ្ញវត្ថុ ចរន្ត​សាច់​ប្រាក់ និង​ទ្រព្យ​សម្បត្តិ​ផ្សេង​ៗ​របស់​ជន​ទុច្ចរិត​ទាំងនោះ​ឱ្យ​បាន​ច្បាស់លាស់​បំផុត និង​ត្រូវតែ​រឹបអូស​តាម​នីតិវិធី​ច្បាប់ ដើម្បី​យក​មក​សង​ប្រជាពលរដ្ឋ​វិញ។ ពេល​នេះ​ជា​ពេល​វេលា​ដ៏​សមស្រប​បំផុត ដែល​រាជរដ្ឋាភិបាល​ត្រូវតែ​វាយ​មួយ​ព្រមាន ១០០  មិន​អាច​បណ្ដែតបណ្ដោយ​ឱ្យ​រឿង​បែបនេះ​កើត​ឡើង​ដដែល​ៗ រហូត​ក្លាយ​ជា​ជំងឺ​មហារីក​សង្គម​នោះ​ទេ៕

The post បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិនៃកម្ពុជា បកស្រាយការដកគោរមងារ «ឧកញ៉ា» appeared first on .

តាមស្ថិតិដែលចេញផ្សាយដោយក្រុមប្រឹក្សាអភិវឌ្ឍន៍កម្ពុជា (CDC) ការវិនិយោគផ្ទាល់ពីបរទេស (FDI) ដែលត្រូវបានអនុម័តក្នុងកំឡុងឆ្នាំ១៩៩៤-២០១៩ ភាគរយធំបំផុតគឺមកពីប្រទេសចិន (២១.៨១%)។

បណ្ឌិត គិន ភា បានថ្លែងថា នៅបណ្តាឆ្នាំដំបូងៗប្រទេសចិនបានធ្វើការវិនិយោគយ៉ាងសម្បើមសម្រាប់ការអភិវឌ្ឍហេដ្ឋារចនាសម្ព័ន្ធ ថាមពល និងធនធានធម្មជាតិ។ ក្នុងឆ្នាំ២០២១ ការវិនិយោគផ្ទាល់ពីបរទេសពីប្រទេសចិន បានជាប់ចំណាត់ថ្នាក់កំពូលជាមួយនឹងការវិនិយោគសរុបចំនួន ២,៣២៦លានដុល្លារអាម៉េរិក កើនឡើង៦៧% បើធៀបនឹងឆ្នាំ២០២០។ នៅឆ្នាំ២០១៧ កម្ពុជាទទួលជំនួយអភិវឌ្ឍន៍ផ្លូវការ (ODA) ប្រមាណជា ៤.២ពាន់លានដុល្លារអាម៉េរិក ដែលជាជំនួយឥតសំណង និងកម្ចីសម្បទានពីប្រទេសចិន។

ជាមួយគ្នានេះ កម្ពុជានិងចិន បានចុះហត្ថលេខាលើកិច្ចព្រមព្រៀងពាណិជ្ជកម្មសេរី (CCFTA) នាខែតុលា ឆ្នាំ២០២០ ដែលជាការកត់សម្គាល់ការចាប់ផ្តើម នៃយុគសម័យថ្មីនៃកិច្ចសហប្រតិបត្តិការយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ។

លោកបណ្ឌិត គិន ភា បន្ថែមថា តួនាទីដ៏សំខាន់របស់កម្ពុជានៅក្នុងគំនិតផ្តួចផ្តើមខ្សែក្រវាត់និងផ្លូវ និងភាពជាដៃគូដ៏រឹងមាំជាមួយប្រទេសចិនលើវិស័យពាណិជ្ជកម្មនិងការវិនិយោគ ត្រូវបានបង្ហាញនៅក្នុងកិច្ចព្រមព្រៀងពាណិជ្ជកម្មសេរីកម្ពុជា-ចិន និងបានបង្ហាញពីការប្តេជ្ញាចិត្តរបស់កម្ពុជាចំពោះគំនិតផ្តួចផ្តើមអភិវឌ្ឍន៍សកល (GDI) គំនិតផ្តួចផ្តើមសន្តិសុខសកល (GSI) និងសហគមន៍ដែលមានអនាគតរួមគ្នា។

ប្រទេសកម្ពុជាគឺជាប្រទេសមួយក្នុងចំណោមប្រទេសដំបូងគេដែលគាំទ្រ និងទទួលយកគំនិតផ្តួចផ្តើមខ្សែក្រវាត់និងផ្លូវ (BRI) ដែលបង្កើតឡើងដោយប្រទេសចិននាឆ្នាំ២០១៣ ដោយទទួលស្គាល់ថា ឱកាសអភិវឌ្ឍន៍សេដ្ឋកិច្ចសំខាន់ៗនឹងត្រូវបានបង្កើតឡើង។

គួររំលឹកថា ក្នុងឆ្នាំ២០១៦ ប្រទេសទាំងពីរបានចុះហត្ថលេខាលើអនុស្សរណៈនៃការយោគយល់គ្នា ស្តីពីការបង្កើតផែនការសហប្រតិបត្តិការទ្វេភាគី ដើម្បីរួមគ្នាកសាងខ្សែក្រវាត់សេដ្ឋកិច្ចផ្លូវសូត្រ និងផ្លូវសូត្រសមុទ្រសតវត្សរ៍ទី២១។ មួយឆ្នាំក្រោយមក «គ្រោងនៃផែនការសហប្រតិបត្តិការទ្វេភាគី ដើម្បីរួមគ្នាកសាងខ្សែក្រវាត់សេដ្ឋកិច្ចផ្លូវសូត្រ និងផ្លូវសូត្រសមុទ្រសតវត្សរ៍ទី២១» ត្រូវបានចុះហត្ថលេខា។ វិស័យចំនួនប្រាំពីរត្រូវបានផ្តល់អាទិភាពសម្រាប់កិច្ចសហប្រតិបត្តិការ រួមមាន ហេដ្ឋារចនាសម្ព័ន្ធ កសិកម្ម ការកសាងសមត្ថភាព ឧស្សាហកម្ម វប្បធម៌និងទេសចរណ៍ ហិរញ្ញវត្ថុ និងការការពារបរិស្ថាន៕

The post បណ្ឌិត គិន ភា៖ ចិនជាម្ចាស់ជំនួយ,ដៃគូពាណិជ្ជកម្ម,វិនិយោគបរទេសធំជាងគេរបស់កម្ពុជា appeared first on .

បណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិកម្ពុជា នៃរាជបណ្ឌិត្យសភាកម្ពុជា បានសង្កេតឃើញថា រយៈជាង៣១ឆ្នាំមកនេះ ទំនាក់ទំនងអាស៊ាន-ចិនគឺមានការវិវឌ្ឍជាវិជ្ជមានជាខ្លាំង ផ្តល់ផលប្រយោជន៍ ដ៏មហាសាល សម្រាប់ទាំងភាគីអាស៊ាននិងចិន ហើយបានរួមចំណែកយ៉ាងសំខាន់ ក្នុងសន្តិភាព ស្ថិរភាព វិបុលភាព និងការអភិវឌ្ឍ នៅក្នុងតំបន់។ លោកវាយតម្លៃខ្ពស់ថា ទំនាក់ទំនងទ្វេភាគី រវាងសមាជិកអាស៊ាននីមួយៗនិង ប្រទេសចិនគឺ សុទ្ធតែមានការវិវឌ្ឍជាវិជ្ជមានគួរឲ្យកត់សម្គាល់ដែរ ព្រោះ តាមរយៈទំនាក់ទំនងល្អរវាងអាស៊ាននិងចិននេះហើយ ដែលឃើញមានការវិនិយោគរបស់ចិនកាន់តែច្រើន បានចូលមកតំបន់អាស៊ាន។

បណ្ឌិត គិន ភា ថ្លែងថា៖ «យើងដឹងហើយថា អាស៊ានគឺជាដៃគូពាណិជ្ជកម្ម ដ៏មានសារៈសំខាន់របស់ចិន រីឯចិន ក៏ជាដៃគូពាណិជ្ជកម្មដ៏មានសារៈសំខាន់របស់អាស៊ានផងដែរ ដែលយើងឃើញថា តួលេខជញ្ចឹងពាណិជ្ជកម្មរវាងអាស៊ាននិងចិនគឺមានទំហំធំមែនទែន ហើយប្រទេសដែលជាសមាជិកអាស៊ាននីមួយៗគឺសុទ្ធតែបានទទួលនូវផលប្រយោជន៍យ៉ាងធំធេង ពីទំនាក់ទំនងល្អ រវាងអាស៊ាននិងចិន»។

បើតាមរបាយការណ៍ ទំហំពាណិជ្ជកម្មទ្វេភាគីរវាងអាស៊ាននិងចិនបន្តកើនឡើងយ៉ាងឆាប់រហ័ស ក្នុងនោះ ចាប់ពីខែមករាដល់ខែកក្កដាឆ្នាំ ២០២២ ទំហំពាណិជ្ជកម្មរវាងចិននិងអាស៊ានបានឡើងដល់ ៥៤៤.៩ ពាន់លានដុល្លារអាមេរិក ដែលកើនឡើង១៣,១ភាគរយបើប្រៀបធៀបនឹងរយៈពេលដូចគ្នានាឆ្នាំមុន។

ផលប្រយោជន៍ដ៏សំខាន់មួយទៀត ដែលលោកបណ្ឌិត គិន ភា មើលឃើញដែរនោះ គឺទេសចរចិន ក្នុងនោះ បើនិយាយពីមុនពេលកើតមានជំងឺរាតត្បាតកូវីដ១៩ ប្រទេសដែលជាសមាជិកអាស៊ានទាំងអស់សុទ្ធតែបានទទួលនូវភ្ញៀវទេសចរចិន រាប់លាននាក់ ដែលជាចំណែកយ៉ាងសំខាន់ ក្នុងកំណើនសេដ្ឋកិច្ចជាតិរបស់ប្រទេសទាំងនោះ។

សម្រាប់ប្រទេសកម្ពុជា ដែលជាសមាជិករបស់អាស៊ាន គឺរឹតតែទទួលបានអត្ថប្រយោជន៍យ៉ាងធំធេង ពីការបង្កើតទំនាក់ទំនងសន្ទនានេះ ក្នុងនោះ ប្រទេសផ្តល់វិនិយោគធំលំដាប់ទីមួយរបស់កម្ពុជា គឺប្រទេសចិន ដៃគូពាណិជ្ជកម្មធំជាងគេរបស់កម្ពុជា ក៏ជាចិន រីឯអ្នកផ្តល់ជំនួយធំជាងគេរបស់កម្ពុជា ក៏ជាចិន។ ក្រៅពីនេះ កម្ពុជាទទួលបានការអភិវឌ្ឍហេដ្ឋារចនាសម្ព័ន្ធរូបវ័ន្តនានា ក៏ដូចជា ការវិនិយោគលើវិស័យអចលនទ្រព្យ ដែលអាចឃើញនូវការរីកចម្រើន រីកដុលដាលនូវអគារសំណង់ធំៗជាច្រើន នៅក្នុងរាជធានីភ្នំពេញ ក៏ដូចជា បណ្តាខេត្តមានសក្តានុពលសម្រាប់ការអភិវឌ្ឍ។

មានប្រសាសន៍ ក្នុងពិធីបើកសម្ពោធពិព័រណ៍ចិន-អាស៊ាន លើកទី១៩ ឆ្នាំ២០២២ ថ្មីៗនេះ សម្តេចហ៊ុន សែន នាយករដ្ឋមន្ត្រីកម្ពុជាបានថ្លែងអំណរគុណចំពោះរដ្ឋាភិបាលចិន ដែលតែងតែផ្ដល់អាទិភាពខ្ពស់ដល់ការគាំទ្រកិច្ចអភិវឌ្ឍ និងការរីកចម្រើនរបស់អាស៊ាន ។ ក្នុងនាមជាប្រធានអាស៊ានសម្រាប់ឆ្នាំ២០២២ សម្តេចតេជោបានបញ្ជាក់ថា «កម្ពុជានឹងខិតខំបន្តពង្រឹងកិច្ចសហការអាស៊ានជាមួយសាធារណរដ្ឋប្រជាមានិតចិន ឱ្យកាន់តែប្រសើរឡើង ដើម្បីធានានូវចីរភាព បរិយាប័ន្ន និងភាពធន់នៃកិច្ចអភិវឌ្ឍសង្គម សេដ្ឋកិច្ច ក្នុងតំបន់ទាំងពីរ»។

សម្តេច ហ៊ុន សែន បញ្ជាក់ថា ឈរលើមូលដ្ឋាននៃភាពជោគជ័យនៃការអនុវត្តកិច្ចព្រមព្រៀងពាណិជ្ជកម្មសេរីអាស៊ាន-ចិន ទម្រង់ ១.០ និងទម្រង់ ២.០ កន្លងមក កម្ពុជាសូមគាំទ្រដល់គំនិតផ្ដួចផ្ដើមស្ដីពីការលើកកម្ពស់កិច្ចព្រមព្រៀងនេះ ទៅជាទម្រង់ថ្មី ៣.០ និងយល់ថា ត្រូវផ្តោតការយកចិត្តទុកដាក់បន្ថែមលើការពង្រីកវិសាលភាព នៃកិច្ចសហប្រតិបត្តិការសេដ្ឋកិច្ចរវាងអាស៊ាន និង ចិន ឱ្យកាន់តែទូលំទូលាយ និងស៊ីជម្រៅបន្ថែមទៀត ដោយផ្តោតលើការកាត់បន្ថយរបាំងពាណិជ្ជកម្មទំនិញសេវាកម្ម និងវិនិយោគនានា ព្រមទាំងជំរុញកិច្ចអភិវឌ្ឍសេដ្ឋកិច្ចឌីជីថល កំណើនបៃតង និងការបង្កើនសមត្ថភាពសហគ្រាសធុនតូច និងមធ្យម (SMEs)។

ពិព័រណ៍ចិន-អាស៊ាន លើកទី ១៩ ក្រោមប្រធានបទ «ការចែករំលែកកាលានុវត្តភាពថ្មីដែលទទួលបានពីភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (អាសិប)ដើម្បីស្ថាបនាតំបន់ពាណិជ្ជកម្មសេរី ចិន-អាស៊ាន ទម្រង់ ៣.០» ត្រូវបានសម្តេចតេជោ ហ៊ុន សែន បង្ហាញការជឿជាក់ថា ការចាប់ផ្តើមអនុវត្តអាសិបក្នុងឆ្នាំ២០២២នេះ នឹងនាំមកនូវកាលានុវត្តភាពពាណិជ្ជកម្ម និងវិនិយោគជាច្រើន សម្រាប់ប្រទេសក្នុងតំបន់៕

ផ្តល់សិទ្ធិដោយ៖ វិទ្យុមិត្តភាពកម្ពុជា-ចិន

The post បណ្ឌិត គិន ភា៖ អាស៊ានគឺជាដៃគូពាណិជ្ជកម្ម ដ៏មានសារៈសំខាន់របស់ចិន appeared first on .