យោងតាមសូចនាករសំខាន់ៗសម្រាប់អាស៊ីនិងប៉ាស៊ីហ្វិកឆ្នាំ ២០២៣ ដែលបានចេញផ្សាយនៅថ្ងៃនេះ បានឱ្យដឹងថា ប្រជាជនប្រមាណ ១៥៥,២ លាននាក់ក្នុងតំបន់ អាស៊ី និងប៉ាស៊ីហ្វិកកំពុងអភិវឌ្ឍ ឬ ៣,៩% នៃចំនួនប្រជាជនសរុបក្នុងតំបន់ បានរស់នៅក្នុងភាពក្រីក្រខ្លាំង គិតត្រឹមឆ្នាំមុន។

របាយការណ៍បានឱ្យដឹងទៀតថាចំនួននេះគឺ ៦៧,៨ លាននាក់ច្រើនជាងចំនួន ក្នុងករណីគ្មានជំងឺរាតត្បាត និងការកើន ឡើងនៃវិបត្តិថ្លៃទ្រទ្រង់ជីវភាព។ ភាពក្រីក្រខ្លាំងត្រូវបានកំណត់ថាជាការរស់នៅក្នុងស្ថានភាពដែលគិតជា ទឹកប្រាក់តិចជាង ២,១៥ ដុល្លារ ក្នុងមួយថ្ងៃ នេះផ្អែកលើមូលដ្ឋានតម្លៃឆ្នាំ ២០១៧ និងដែលត្រូវបានកែសម្រួលលើមូលដ្ឋានអំណាចទិញ និងអតិផរណា។

លោក Albert Park ប្រធានសេដ្ឋវិទូរបស់ ADB បានមានប្រសាសន៍ថា «អាស៊ី និងប៉ាស៊ីហ្វិកកំពុង ងើបឡើងវិញជាបណ្តើរៗពីជំងឺរាតត្បាតកូវីដ១៩ ប៉ុន្តែវិបត្តិថ្លៃទ្រទ្រង់ជីវភាពកើនឡើងកំពុងធ្វើឱ្យប៉ះពាល់ ដល់វឌ្ឍនភាពឆ្ពោះទៅរកការលុបបំបាត់ភាពក្រីក្រ។ តាមរយៈការពង្រឹងសំណាញ់សុវត្ថិភាពសង្គមសម្រាប់ ជនក្រីក្រនិងការជំរុញការវិនិយោគ និង ការច្នៃប្រឌិតដែលបង្កើតឱកាសសម្រាប់កំណើននិងការងារ រដ្ឋាភិបាលក្នុងតំបន់អាចស្តារស្ថានភាពឡើងវិញបាន»។

ប្រជាជនក្រីក្របានរងទុក្ខវេទនាបំផុតដោយសារវិបត្តិថ្លៃទ្រទ្រង់ជីវភាពកើនឡើង ដោយសារពួកគាត់មិនសូវមានលទ្ធភាពចំណាយច្រើនលើតម្រូវការចាំបាច់ដូចជាអាហារ និងប្រេងឥន្ធនៈ។ ការកើនឡើងនៃតម្លៃទំនិញ និងសេវាកម្មជាមូលដ្ឋានធ្វើឱ្យប្រជាជនក្រីក្រជាច្រើនមិនអាចសន្សំប្រាក់ ចំណាយលើការថែទាំសុខភាព ឬ វិនិយោគលើការអប់រំក៏ដូចជាឱកាសផ្សេងទៀតដែលអាចធ្វើឱ្យប្រសើរឡើងនូវស្ថានភាពរបស់ពួកគាត់ក្នុងរយៈពេលវែង។ ស្ត្រីក៏អាចទទួលរងផលប៉ះពាល់លើសពីនេះដែរ ព្រោះពួកគាត់ទំនងជារកចំណូលបានតិចជាងបុរស ខណៈដែលត្រូវទទួលរ៉ាប់រងការងារដែលគ្មានប្រាក់ខែផងដែរ។

របាយការណ៍ក៏កត់សម្គាល់ដែរថាអ្នកក្រមិនត្រឹមតែ រកប្រាក់ចំណូលបានតិចប៉ុណ្ណោះទេ ពួកគាត់ក៏ខាតបុព្វលាភដើម្បីទទួលបានទំនិញ និង សេវាកម្មសំខាន់ៗជាច្រើន ព្រោះត្រូវបង្ខំចិត្តជ្រើសរើសអ្វីដែលអាចនឹងកាន់តែខាតបង់ក្នុងរយៈពេលយូរ។ ជាឧទាហរណ៍ គ្រួសារដែលមានចំណូលទាបអាចត្រូវទិញទំនិញក្នុងបរិមាណតិច ដែលអាចថ្លៃជាងការទិញក្នុងបរិមាណច្រើន។ ពួកគាត់ក៏អាចត្រូវបង្ខំចិត្តរស់នៅក្នុងលំនៅបណ្តោះអាសន្ន ដែលអាចនាំមកនូវបញ្ហាប្រឈមកាន់តែខ្ពស់ដល់សុខភាព ដែលនឹងបង្កើនតម្លៃថែទាំសុខភាពរបស់ពួកគាត់ ហើយដែលពួកគាត់អាចត្រូវធ្វើដំណើរកាន់តែឆ្ងាយ និង ពិបាក។

ADB បានប៉ាន់ប្រមាណកាលពីឆ្នាំ ២០២១ ថាជំងឺរាតត្បាតបានជំរុញឱ្យមនុស្សពី ៧៥ ទៅ ៨០ លាននាក់បន្ថែមទៀតធ្លាក់ចូលទៅក្នុងភាពក្រីក្រខ្លាំងត្រឹមឆ្នាំមុននេះ បើធៀបនឹងការព្យាករមុនជំងឺរាតត្បាត។ ពេលនោះ ភាពក្រីក្រខ្លាំងត្រូវបានកំណត់ថាជាការរស់នៅក្នុងស្ថានភាពដែលគិតជាទឹកប្រាក់តិចជាង ១,៩០ ដុល្លារក្នុងមួយថ្ងៃ ដែលវាមានមូលដ្ឋានលើតម្លៃក្នុងឆ្នាំ ២០១១។

ប្រទេសក្នុងតំបន់អាស៊ីនិងប៉ាស៊ីហ្វិកកំពុងអភិវឌ្ឍ ត្រូវបានព្យាករថា នឹងបន្តធ្វើឲ្យមានការរីក ចម្រើនប្រឆាំងនឹងភាពក្រីក្រ។ ទោះជាយ៉ាងនេះក្តី នៅឆ្នាំ ២០៣០ ប្រជាជនក្នុងតំបន់ប្រមាណ ៣០,៣% ឬ ប្រហែល ១,២៦ ពាន់លាននាក់ នឹងនៅតែត្រូវបានចាត់ទុកថាងាយរងគ្រោះផ្នែកសេដ្ឋកិច្ច ដែលជាការកំណត់ថា ជាជីវភាពរស់នៅក្នុងស្ថានភាពដែលគិតជាទឹកប្រាក់គឺ ៣,៦៥ ដុល្លារ ទៅ ៦,៨៥ ដុល្លារ ក្នុងមួយថ្ងៃ ផ្អែកលើមូលដ្ឋានតម្លៃឆ្នាំ ២០១៧ ។

បើយោងតាមរបាយការណ៍នេះ ដើម្បីជួយដោះស្រាយវិបត្តិថ្លៃទ្រទ្រង់ជីវភាពកើនឡើងនេះ រដ្ឋាភិបាលក្នុងតំបន់អាស៊ីនិងប៉ាស៊ីហ្វិក អាចពង្រឹងប្រព័ន្ធគាំពារសង្គម បង្កើនការគាំទ្ររបស់ពួកគេសម្រាប់ ការអភិវឌ្ឍកសិកម្ម កែលម្អលទ្ធភាពទទួលបានសេវាហិរញ្ញវត្ថុរបស់ប្រជាជន ផ្តល់អាទិភាពដល់ការវិនិយោគហេដ្ឋារចនាសម្ព័ន្ធ និងលើកកម្ពស់ការច្នៃប្រឌិតបច្ចេកវិទ្យានិងការអភិវឌ្ឍធនធានមនុស្ស៕ អត្ថបទ៖សារេត

The post ADB៖ វិបត្តិថ្លៃទ្រទ្រង់ជីវភាពកើនឡើងកំពុងធ្វើឱ្យប៉ះពាល់ដល់វឌ្ឍនភាពឆ្ពោះទៅរកការលុបបំបាត់ភាពក្រីក្រ appeared first on .

ការណែនាំរបស់ឯកឧត្ដមរដ្ឋមន្ត្រីក្រសួងកសិកម្មនេះ ធ្វើឡើងបន្ទាប់ពីសម្តេចតេជោ  ហ៊ុន សែន បានអំពាវនាវ​ឱ្យ​ពលរដ្ឋត្រូវខិតខំធ្វើការដាំដុះ ជំរុញការផលិតក្នុងស្រុក​រួមមានការចិញ្ចឹមជ្រូក មាន់ ទា ត្រី និងដាំបន្លែ ដើម្បីផ្គត់ផ្គង់ឱ្យតម្រូវការក្នុងស្រុក ដោយយកឱកាសនេះ បង្កើតជាកាលានុវត្តភាព​សម្រាប់វិស័យកសិកម្ម ខណ:កម្ពុជា​កាត់បន្ថយការនាំចូលពីខាងក្រៅ ដើម្បីចូលរួមបង្ការ និង​ទប់ស្កាត់ការ​រីករាលដាលនៃជំងឺកូវីដ-១៩។ 

ក្នុងការចុះមកពិនិត្យសកម្មភាពជាក់ស្តែង និងវឌ្ឍនភាពនៃគម្រោងស្តីពី “កម្មវិធីផ្សព្វ​ផ្សាយបច្ចេកទេសកសិកម្មថ្មី ដែលធន់ទៅនឹងការប្រែប្រួលអាកាសធាតុ ហៅកាត់ថា ASPIRE” នៅស្រុកបន្ទាយមាស ខេត្តកំពត កាលពីថ្ងៃទី០៨ ខែមេសា ឆ្នាំ២០២០ ឯកឧត្ដម វេង សាខុន បានជំរុញដល់អង្គភាពអនុវត្តន៍ និងអ្នកទទួលផលពីគម្រោង​ត្រូវធ្វើបច្ចុប្បន្នភាពអំពីសកម្ម​ភាពថ្មីៗបន្ថែមទៀត ធ្វើយ៉ាងណាឱ្យស្របទៅ​នឹងស្ថាន​ការណ៍បច្ចុប្បន្ន ដើម្បីក្រសោបយក​ឱកាសមាសនេះ មកកាន់ក្នុងដៃឱ្យបាន​ដោយ​ត្រូវបង្កើនការផលិតទាំងបរិមាណ និងគុណភាព ធានាដល់ការ​ផ្គត់ផ្គង់​ទាំងក្នុង​ពេលបច្ចុប្បន្ន ក៏ដូចជាពេលអនាគត។

ឯកឧត្ដមបានណែនាំដល់​អាជ្ញាធរថ្នាក់ខេត្ត ស្រុក ឃុំ ត្រូវចូលរួមសហការឱ្យបាន​ពេញលេញជាមួយមន្ទីរកសិកម្ម រុក្ខា ប្រមាញ់ និងនេសាទខេត្ត ដើម្បីបង្កលក្ខណៈ​ងាយស្រួល និងឧបត្ថម្ភ គាំទ្រគ្រប់បែប​យ៉ាង​ក្នុងទិសដៅចម្បងគឺ​បង្កើនការផលិតក្នុង​ស្រុកឱ្យបានគ្រប់គ្រាន់ ក្នុងខណ:ដែលកម្ពុជា បិទការ​នាំចូល​កសិផលពីខាងក្រៅ។ 

ជាមួយគ្នានេះ ដើម្បីឱ្យការអនុវត្តគម្រោងកាន់តែមានប្រសិទ្ធភាព និងប្រសិទ្ធផល​ថែមទៀត ឯកឧត្ដមរដ្ឋមន្ត្រី បានស្នើឱ្យមន្រ្តីនៃអង្គភាពជំនាញពាក់ព័ន្ធ និងមន្រ្តីអន្តរ​ស្ថាប័ន​ពាក់ព័ន្ធទាំងអស់ ត្រូវរៀបចំយុទ្ធសាស្រ្ត ផែនការ សកម្មភាពធ្វើយ៉ាង​ណាឱ្យការ​អនុវត្ត​កម្មវិធី​បានល្អប្រសើរតាមគោលដៅរំពឹងទុក រួមជាមួយនឹងការប្រើ​ប្រាស់ហិ​រញ្ញប្បទាន ប្រកបដោយ​តម្លាភាពក្នុងស្មារតីទទួលខុសត្រូវ ឆ្លើយតបទៅនឹង​តម្រូវការពិតប្រាក​ដរបស់ប្រជាជន និង​យុទ្ធសាស្រ្តរបស់រាជរដ្ឋាភិបាល។ ឯកឧត្ដមបាន​ក្រើនរម្លឹកបងប្អូនប្រជាពលរដ្ឋទាំងអស់​ត្រូវ​តែបង្កើនការប្រុងប្រយ័ត្នដើម្បីរួមគ្នាបង្ការ និងទប់ស្កាត់ជំងឺកូវីដ-១៩ ឱ្យមានប្រសិទ្ធ​ភាព​ដោយ ត្រូវអនុវត្តន៍ឱ្យបាន​ខ្ជាប់ខ្ជួនតាមការ​ណែនាំរបស់ក្រសួងសុខាភិបាល។

ឯកឧត្ដមរដ្ឋមន្ត្រី វេង សាខុន ក៏បានថ្លែងអំណរគុណចំពោះរាជរដ្ឋាភិបាលតាមរយ: ក្រសួងសេដ្ឋកិច្ច​និងហិរញ្ញវត្ថុ និងមូលនិធិ IFAD ដែលបានគាំទ្រ និងឧបត្ថម្ភហិ​រញ្ញប្បទាន សម្រាប់អនុវត្តន៍​កម្មវិធី​ខាងលើទទួលបានលទ្ធផលគួរឱ្យកត់សម្គាល់។ បើតាមឯកឧត្តម វេង សាខុន ជំនួយសម្រាប់​អភិវឌ្ឍន៍វិស័យកសិ​កម្មដោយផ្តោតជា​សំខាន់លើការលើកកម្ពស់កម្រិតជីវភាព តាមរយៈការ បង្កើនផលិតភាពផលិតកម្ម ការជំរុញការអនុវត្តកសិកម្មចម្រុះដោយប្រើប្រាស់​បច្ចេកទេស​ទំនើប ឆ្លើយតប​ទៅនឹងការប្រែប្រួលអាកាសធាតុ ការអភិវឌ្ឍសមត្ថភាពរបស់ប្រជាកសិករ បណ្តុំ​អាជីវកម្ម និងសហគមន៍កសិកម្ម ដោយឈរលើសុឆន្ទៈនៃគំនិតផ្តួចផ្តើម និងចក្ខុវិស័យ​វែងឆ្ងាយរបស់រាជរដ្ឋាភិបាលនាឆ្នាំ២០៣០ និងឆ្នាំ២០៥០៕

The post ឯកឧត្តម វេង ​សាខុន ​ណែនាំ​ឱ្យ​ព​ល​​រដ្ឋបង្កើនការ​ដាំដុះដំ​ណាំ​កសិ​ក​ម្ម​ផ្គត់​ផ្គង់ក្នុងស្រុក ខណៈការនាំ​ចូ​ល​ត្រូវបានបិទ appeared first on .