ប្រធានាធិបតីហ្វីលីពីន

អតីតប្រធានាធិបតីហ្វីលីពីន និងកូនប្រុសពីរនាក់ គ្រោងឈរឈ្មោះក្នុងការបោះឆ្នោតសមាជិកព្រឹទ្ធសភា នៅឆ្នាំក្រោយ

ឧកញ៉ាសាមញ្ញ — Thu, 27 Jun 2024 10:55:00 +0000

យោងតាមអនុប្រធានាធិបតីហ្វីលីពីន លោកស្រី Sara Duterte បាននិយាយកាលពីថ្ងៃអង្គារ ទី២៥ ខែមិថុនាកន្លងទៅថា អតីតប្រធានាធិបតី លោក Rodrigo Duterte និងកូនប្រុសពីរនាក់របស់លោក គ្រោងនឹងឈរឈ្មោះក្នុងការបោះឆ្នោតជ្រើសរើសសមាជិកព្រឹទ្ធសភារបស់ប្រទេស នៅឆ្នាំ២០២៥ ខាងមុខ។ នេះបើតាមការចុះផ្សាយពីសារព័ត៌មាន Reuters។

លោកស្រី Sara Duterte ដែលបច្ចុប្បន្នជាអនុប្រធានាធិបតីហ្វីលីពីន និងជាកូនស្រីរបស់លោក Rodrigo Duterte បានប្រាប់អ្នកយកព័ត៌មានចំពោះគម្រោងប្រកួតប្រជែងការបោះឆ្នោតខាងលើនេះ គឺតិចជាងមួយសប្តាហ៍ប៉ុណ្ណោះ បន្ទាប់ពីលោកស្រី បានសម្រេចចិត្តការលាលែងពីតំណែងគណៈរដ្ឋមន្ត្រី ក្នុងជួររដ្ឋាភិបាលរបស់ប្រធានាធិបតី លោក Ferdinand Marcos Jr។

គួរឲ្យដឹងផងដែរថា ការលាលែងពីតំណែងរបស់លោកស្រី Sara Duterte បានបញ្ជាក់ពីអ្វីដែលអ្នកសង្កេតការណ៍នយោបាយ ធ្លាប់បានព្យាករទុកថា សម្ព័ន្ធភាពរវាងក្រុមគ្រួសារទាំងពីរ ដែលបានជួយលោក Marcos និងលោកស្រី Sara ឲ្យឡើងកាន់អំណាចនៅឆ្នាំ២០២២ នោះ ច្បាស់ជាអាចនឹងត្រូវដួលរលំវិញ ដោយសារតែភាពខុសគ្នាលើការធ្វើនយោបាយ និងគោលនយោបាយផ្ទុយគ្នា។

បញ្ជាក់ផងដែរថា អាណត្តិប្រធានាធិបតីរបស់លោក Rodrigo Duterte បានបញ្ចប់ទៅនៅក្នុងឆ្នាំ២០២២។ កូនប្រុសច្បងរបស់លោក គឺលោក Paolo Duterte គឺបច្ចុប្បន្នជាសមាជិកសភា ខណៈកូនប្រុសម្នាក់ទៀតគឺលោក Sebastian Duterte ជាអភិបាលក្រុង Davao ដែលស្ថិតនៅភាគខាងត្បូងប្រទេសហ្វីលីពីន។

ទន្ទឹមនឹងនេះ លោកស្រី Sara Duterte បានបញ្ជាក់ទៀតផងដែរថា ចំពោះលោក Sebastian Duterte ក៏គ្រោងនឹងឈរឈ្មោះប្រកួតប្រជែងសម្រាប់តំណែងជាប្រធានាធិបតីហ្វីលីពីន នៅឆ្នាំ២០២៨ ផងដែរ៕

The post អតីតប្រធានាធិបតីហ្វីលីពីន និងកូនប្រុសពីរនាក់ គ្រោងឈរឈ្មោះក្នុងការបោះឆ្នោតសមាជិកព្រឹទ្ធសភា នៅឆ្នាំក្រោយ appeared first on .

ប្រធានាធិបតីហ្វីលីពីន៖ សង្គ្រាមស៊ីវិលនៅមីយ៉ាន់ម៉ា ជាបញ្ហាចាក់ស្រែះសម្រាប់អាស៊ាន

ឧកញ៉ាសំពៅ — Mon, 20 Nov 2023 04:58:00 +0000

សង្គ្រាមស៊ីវិលដែលកំពុងផ្ទុះនៅមីយ៉ាន់ម៉ា គឺជាបញ្ហាដ៏ចំបងសម្រាប់សមាគមប្រជាជាតិអាស៊ីអាគ្នេយ៍ ហៅកាត់អាស៊ាន ក្នុងការរកដំណោះស្រាយដ៏សមប្រកបមួយ។ នេះបើតាមការស្រង់សម្ដី របស់ប្រធានាធិបតីហ្វីលីពីន លោក Ferdinand Marcos Jr ពីបណ្ដាញសារព័ត៌មាន CNA។

ថ្លែងនៅលើវេទិកាមួយនៅកោះហាវៃ លោក Marcos បាននិយាយថា អាស៊ានមានឆន្ទៈក្នុងការដោះស្រាយបញ្ហានៅមីយ៉ាន់ម៉ា ប៉ុន្តែបញ្ហាមួយនេះមានភាពចាក់ស្រែះខ្លាំង ដែលសូម្បីតែការបញ្ជូនជំនួយមនុស្សធម៌ ក៏មានភាពរអាក់រអួលផងដែរ។

គួររំលឹកបន្តិចថា តាំងពីមានការធ្វើរដ្ឋប្រហារ កាលពីឆ្នាំ២០២១ ប្រជាជនមីយ៉ាន់ម៉ាច្រើនជាង ១លាននាក់ បានរត់ភៀសខ្លួន ផ្លាស់ប្ដូរទីជម្រក ខណៈប្រទេសមួយនេះក៏ត្រូវបានគ្រប់គ្រងដោយរបបយោធាវិញ។

ប៉ុន្តែកាលពីខែមុន កងទ័ពជនជាតិភាគតិច បានងើបឡើងបះបោរជាមួយរបបយោធាមីយ៉ាន់ម៉ា ដែលធ្វើឲ្យស្ថានការណ៍នៅក្នុងប្រទេស កាន់តែយ៉ាប់យ៉ឺន ខណៈមេដឹកនាំហ្វីលីពីនបង្ហើបថា រដ្ឋាភិបាលមីយ៉ាន់ម៉ា ហាក់លែងទទួលបានការគាំទ្រពីរបបយោធារបស់ខ្លួនហើយ៕

The post ប្រធានាធិបតីហ្វីលីពីន៖ សង្គ្រាមស៊ីវិលនៅមីយ៉ាន់ម៉ា ជាបញ្ហាចាក់ស្រែះសម្រាប់អាស៊ាន appeared first on .

ក្នុងដំណើរទស្សនកិច្ចផ្លូវការទៅចិនតំបូង ប្រធានាធិបតីហ្វីលីពីនប្ដេជ្ញាពង្រឹងទំនាក់ទំនងទ្វេភាគី

ឧកញ៉ាសំពៅ — Wed, 04 Jan 2023 11:57:00 +0000

កាលពីថ្ងៃទី ០៤ មករាកន្លងទៅ ប្រធានាធិបតីហ្វីលីពីន Ferdinand Marcos Jr. បានទម្លាយថា លោកសង្ឃឹមថានឹងអាចពង្រឹងទំនាក់ទំនងទ្វេភាគី ជាមួយរដ្ឋាភិបាលចិន អំឡុងពេលធ្វើទស្សនកិច្ចផ្លូវការលើកតំបូងទៅទីនោះ តាំងពីលោកឡើងកាន់អំណាច។

គួររំលឹកថា បច្ចុប្បន្នចិន និងហ្វីលីពីនកំពុងមានភាពចម្រូងចម្រាសជុំវិញបញ្ហា “សមុទ្រចិនខាងត្បូង” ហើយគោលដៅនៃដំណើរទស្សនកិច្ចមួយនេះ គឺដើម្បីរកដំណោះស្រាយដោយសន្តិវិធីជាមួយចិន។ នេះបើតាមការចុះផ្សាយពី CNA។

រដ្ឋាភិបាលហ្វីលីពីនជឿថា កត្តាសំខាន់បំផុតគឺពង្រឹងទំនាក់ទំនងរវាងចិន និងហ្វីលីពីន ខណៈលោក Marcos ក៏រំពឹងដែរថា ការជួបសំណេះសំណាលជាមួយប្រធានាធិបតី ស៊ី ជិនពីង នឹងទទួលបានផ្លែផ្កាល្អ ពោលភាពជាដៃគូរវាងប្រទេសទាំង ២ នឹងពង្រឹង និងស្ដារទំហំសេដ្ឋកិច្ចឡើងវិញ។

គួររំលឹកដែរថា រដ្ឋាភិបាលក្រុងប៉េកាំងអះអាងថា សមុទ្រចិនខាងត្បូងគឺជាផ្នែកមួយនៃប្រទេសរបស់ខ្លួន ខណៈហ្វីលីពីន វៀតណាម ម៉ាឡេស៊ី និងប្រ៊ុយណេក៏សុទ្ធតែបញ្ជាក់ថា វាក៏ជាផ្នែកមួយនេះប្រទេសរបស់ពួកគេ ហើយបញ្ហាមួយនេះកំពុងចាក់ស្រែះខ្លាំង រកដំណោះស្រាយជាក់លាក់មិនទាន់បាន៕

The post ក្នុងដំណើរទស្សនកិច្ចផ្លូវការទៅចិនតំបូង ប្រធានាធិបតីហ្វីលីពីនប្ដេជ្ញាពង្រឹងទំនាក់ទំនងទ្វេភាគី appeared first on .

ប្រធានាធិបតីហ្វីលីពីន ស្នើឲ្យរោងចក្រក្នុងស្រុកកាត់បន្ថយតម្លៃស្ករសជិតពាក់កណ្ដាល

ឧកញ៉ាសំពៅ — Wed, 17 Aug 2022 12:55:00 +0000

នៅថ្ងៃពុធ ទី ១៧ សីហា ២០២២នេះ ប្រធានាធិបតីហ្វីលីពីន Ferdinand Marcos Jr បានជួបចរចាជាមួយនិងរោងចក្រស្ករសក្នុងស្រុក ដើម្បីស្នើឲ្យពួកគេកាត់បន្ថយតម្លៃទំនិញប្រមាណ ៤០% ដើម្បីសម្រួលដល់ការប្រើប្រាស់របស់ប្រជាពលរដ្ឋ។ នេះបើតាមការចុះផ្សាយពី CNA។

ប្រភពដដែលបានបន្ថែមថា ទីផ្សារស្ករសក្នុងប្រទេសហ្វីលីពីនគឺកំពុងឡើងថ្លៃខ្លាំង ពោលតម្លៃរបស់វាកើនឡើងស្ទើរទ្វេដងនៅឆ្នាំនេះ ដោយចន្លោះពី ១០០ ទៅ ១១៥ ប៉េសូ/គក (ប្រមាណ ១,៧៩-២,០៦ ដុល្លារ)។

“ពួកយើងកំពុងចរចាជាមួយក្រុមពាណិជ្ជករ ដោយពួកគេសុំតម្លៃឲ្យនៅសល់ប្រហែល ៨០ ប៉េសូ/គក ប៉ុន្តែខ្ញុំស្នើឲ្យចុះត្រឹម ៧០ ប៉េសូ/គក ហើយពេលនេះពួកយើងកៀកនឹងសម្រេចជោគជ័យហើយ”។ នេះបើតាមសម្ដីរបស់លោក Marcos បានប្រាប់ទៅកាន់សារព័ត៌មាន។

សូមជម្រាបដែរថា ថ្នាក់ដឹកនាំខាងលើបានទម្លាយឲ្យដឹងថា ហ្វីលីពីននឹងអាចនាំចូលស្ករសប្រហែល ១៥០ ០០០ តោននៅឆ្នាំនេះ ដើម្បីបំពេញតម្រូវការប្រើប្រាស់ក្នុងស្រុក ក៏ដូចជាសម្រួលដល់តម្លៃផងដែរ ខណៈស្ករសដែលនាំចូលមកភាគច្រើនគឺ ពីប្រទេសថៃ៕

The post ប្រធានាធិបតីហ្វីលីពីន ស្នើឲ្យរោងចក្រក្នុងស្រុកកាត់បន្ថយតម្លៃស្ករសជិតពាក់កណ្ដាល appeared first on .

ប្រទះឃើញផ្ទាំងគំនូរបាត់រយៈពេលជិត ១០ ឆ្នាំ នៅផ្ទះម្ដាយប្រធានាធិបតីហ្វីលីពីន

ឧកញ៉ាសំពៅ — Fri, 27 May 2022 07:49:45 +0000

កាលពីពេលថ្មីៗនេះ លោក Ferdinand Marcos Jr. បានជាប់ឆ្នោតជាប្រធានាធិបតីថ្មីហ្វីលីពីន ខណៈការធ្វើសច្ចាសម្បថចូលកាន់តំណែងនឹងប្រព្រឹត្តនៅថ្ងៃទី ៣០ មិថុនាខាងមុខ។

យ៉ាងណា មុននឹងដល់ពេលធ្វើសច្ចាសម្បថនោះ មានផ្ទុះព័ត៌មានអាស្រូវមួយទាក់ទងនឹងម្ដាយរបស់លោក ពោលគឺបានប្រទះឃើញផ្ទាំងគំនូរមួយដែលបានបាត់បង់អស់រយៈពេលជិត ១០ ឆ្នាំ ខណៈតម្លៃរបស់វាគឺប្រមាណ ១៥០ លានដុល្លារឯណោះ។

ផ្ទាំងគំនូរដែលត្រូវបានសង្ស័យថា មានវត្តមាននៅផ្ទះរបស់អ្នកស្រី Marcos គឺជាស្នាដៃរបស់វិចិត្រករ Picasso ដែលគំនូរមួយផ្ទាំងនេះមានឈ្មោះថា Reclining Woman IV ហើយវាត្រូវបានរាយការណ៍ថា បានបាត់បង់ពីសារមន្ទីរនៅឆ្នាំ ២០១៤។

យ៉ាងណា ក៏មានមតិមួយចំនួនលើកឡើងថា គំនូរមួយផ្ទាំងនេះអាចជាវត្ថុក្លែងក្លាយ ដោយសារកាលពីអង្គភាពប្រឆាំងអំពើពុករលួយរឹបអូសទ្រព្យសម្បត្តិរបស់អតីតមេដឹកនាំផ្ដាច់ការ Marcos គេរកឃើញថា លោកមានចំណង់ចំណូលចិត្តទិញវត្ថុបុរាណ និងផ្ទាំងគំនូរក្លែងក្លាយមកទុកតាំងលំអ។

បញ្ជាក់ដែរថា បច្ចុប្បន្នក្រុមប្រឆាំងអំពើពុករលួយបានកំពុងធ្វើការស៊ើបអង្កេតពីករណីខាងលើ៕

ប្រភព: Celebritynetworth

The post ប្រទះឃើញផ្ទាំងគំនូរបាត់រយៈពេលជិត ១០ ឆ្នាំ នៅផ្ទះម្ដាយប្រធានាធិបតីហ្វីលីពីន appeared first on .

ដើរលើវិថីនយោបាយ ១៥ ឆ្នាំ ទីបំផុតកូនស្រីឌូទីតេជាប់ឆ្នោតជាអនុប្រធានាធិបតីហ្វីលីពីន

ឧកញ៉ាសំពៅ — Thu, 26 May 2022 08:36:29 +0000

Sara Duterte-Carpio ដែលជាកូនស្រីរបស់ប្រធានាធិបតី Rodrigo Durterte បានជាប់ឆ្នោតក្លាយជាអនុប្រធានាធិបតីនៃប្រទេសហ្វីលីពីនអាណត្តិថ្មី ស្របពេលលោក Ferdinand Marcos Jr បានជាប់ជាប្រធានាធិបតី ហើយការធ្វើសច្ចាសម្បថចូលកាន់តំណែងនឹងប្រព្រឹត្តនៅថ្ងៃទី ៣០ មិថុនាខាងមុខ។

សមិទ្ធផលដ៏ធំធេងមួយនេះ អាចនិយាយបានថាជាផ្លែផ្កាដែលបានមកពីការខិតខំអស់រយៈពេលជាច្រើនឆ្នាំរបស់ Sara ដោយសារលោកស្រីបានប្រឡូកចូលក្នុងវិស័យនយោបាយតាំងពីឆ្នាំ ២០០៧ មកម៉្លេះ។

ជំហានដំបូងក្នុងឆាកនយោបាយ លោកស្រីបានជាប់ឆ្នោតជាអនុបាលរងក្រុង Davao និងបានបន្តកាន់តំណែងមួយនេះដល់ឆ្នាំ ២០១០ ហើយនៅឆ្នាំដដែលនោះអ្នកស្រីបានឡើងតំណែងជាអភិបាលពេញសិទ្ធរហូតដល់ឆ្នាំ ២០១៣។

ដោយសារការដឹកនាំល្អរបស់លោកស្រី និងមានការគាំទ្រពីប្រជាពលរដ្ឋក្នុងតំបន់ផង កូនស្រីរបស់ប្រធានាធិបតីខាងលើបានជាប់ឆ្នោតជាអភិបាលក្រុង Davao ២ អាណត្តិទៀតពោលគឺនៅឆ្នាំ ២០១៦ និង ២០១៩។

Sara Duterte-Carpio អាចនិយាយបានថា ជោគជ័យលើឆាកនយោបាយ ដោយសារលោកស្រីជាមេធាវីផង ជាអភិបាលក្រុងស្ត្រីដំបូងនៃទីក្រុង Davao និងជាអនុប្រធានាធិបតីក្មេងបំផុតថែមទៀត។

ក្រៅពីត្រូវឡើងកាន់តំណែងជាអនុប្រធានាធិបតីទី ១៥ នៃប្រទេសហ្វីលីពីន Sara ក៏នឹងមានតួនាទីជាលេខាធិការអប់រំ ក្រោមការគ្រប់គ្រងរបស់ប្រធានាធិបតីថ្មី Ferdinand Marcos Jr. ផងដែរ៕

ប្រភព: Newsinfo

The post ដើរលើវិថីនយោបាយ ១៥ ឆ្នាំ ទីបំផុតកូនស្រីឌូទីតេជាប់ឆ្នោតជាអនុប្រធានាធិបតីហ្វីលីពីន appeared first on .

អ្នកជំនួញស្និទ្ធស្នាលប្រធានាធិបតីហ្វីលីពីន ប្រកាសលក់មុខជំនួញរាប់ពាន់លានដុល្លារ

ឧកញ៉ាសំពៅ — Fri, 13 May 2022 08:26:56 +0000

កាលពីថ្ងៃព្រហស្បតិ៍កន្លងទៅនេះ មានសេចក្ដីរាយការណ៍មកថា ស្ដេចត្រាញ់ជំនួញមួយរូបដែលមានទំនាក់ទំនងស្និទ្ធស្នាលជាមួយប្រធានាធិបតីហ្វីលីពីន Rodrigo Duterte កំពុងប្រញាប់ប្រញាល់ប្រកាសលក់មុខជំនួញដែលមានតម្លៃរាប់ពាន់លានដុល្លារ ក្រោយទទួលដំណឹងថាថ្នាក់ដឹកនាំខាងលើនឹងចុះចេញពីតំណែងនៅខែក្រោយ។

អ្នកជំនួញមួយរូបនោះគឺ Dennis Uy ដែលបានពង្រីកអាណាចក្រជំនួញរបស់ខ្លួនរយៈពេល ៦ ឆ្នាំអំឡុងពេលលោក Duterte នៅកាន់កាប់អំណាច ហើយបច្ចុប្បន្នមហាសេដ្ឋីម្នាក់នេះបានប្រកាសលក់ក្រុមហ៊ុនដូចជាស្ថានីយប្រេង Malampaya និង Clark Global City ក្នុងតម្លៃប្រហែល ១ ពាន់លានដុល្លារសម្រាប់មួយក្រុមហ៊ុន។ នេះបើតាមការបង្ហើបឲ្យដឹងពីប្រភពជិតស្និទ្ធទៅកាន់ Reuters។

ប្រភពដដែលនោះបានបង្ហើបទៀតថា ក្រុមអ្នកទិញក្រុមហ៊ុនទាំងនោះកំពុងសម្លឹងឃើញអាជីវកម្មមួយចំនួនទៀតរបស់បុរសវ័យ ៤៨ ឆ្នាំ រាប់បញ្ចូលទាំងក្រុមហ៊ុនលក់ប្រេងរាយ Phoenix Petroleum និងក្រុមហ៊ុនទូរគមនាគមន៍ DITO ក៏ដូចជាសាលាឯកជន និងអាជីវកម្មលក់អាហារ និងភេសជ្ជៈមួយចំនួនទៀត។

មកទល់នឹងពេលនេះ អ្នកតំណាងរបស់ Dennis នៅមិនទាន់បង្ហើបពីមូលហេតុនៃការដាក់លក់អាជីវកម្មដ៏មហាសាលរបស់លោកនៅឡើយទេ ខណៈកន្លងមកអ្នកជំនួញម្នាក់នេះធ្លាប់ច្រានចោលការចោទប្រកាន់ថា សន្ទុះនៃការកើនឡើងលឿនបែបនេះ ដោយសារតែមានប្រធានាធិបតីនៅពីក្រោយ។

បញ្ជាក់ដែរថា លោក Duturte នឹងចុះចេញពីតំណែងជាថ្នាក់ដឹកនាំកំពូលប្រចាំប្រទេសហ្វីលីពីន ក្រោយពេលលោក Ferdinand Marcos Jr ដែលត្រូវជាកូនប្រុសរបស់អតីតមេដឹកនាំផ្ដាច់ការដ៏ល្បីមួយរូបជាប់ឆ្នោតជាប្រធានាធិបតីកាលពីថ្ងៃច័ន្ទកន្លងទៅ៕

ប្រភព: CNA

The post អ្នកជំនួញស្និទ្ធស្នាលប្រធានាធិបតីហ្វីលីពីន ប្រកាសលក់មុខជំនួញរាប់ពាន់លានដុល្លារ appeared first on .