ការប្រកាសអនុវត្តន៍គម្រោងសាកល្បងប្រព័ន្ធដឹកជញ្ជូនឆ្លាតវៃ (ITS) បានធ្វើឡើងកាលពីថ្ងៃទី១៥ ខែកក្កដា ឆ្នាំ២០២៦ ក្រោមវត្តមាន លោក នឹម សុធា អនុរដ្ឋលេខាធិការក្រសួងសាធារណការ និងដឹកជញ្ជូន ដោយមានការអញ្ជើញចូលរួមពីថ្នាក់ដឹកនាំក្រសួង តំណាងក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនសាធារណរដ្ឋកូរ៉េ តំណាងឯកអគ្គរដ្ឋទូតសាធារណរដ្ឋកូរ៉េប្រចាំកម្ពុជា និងក្រុមហ៊ុន សមាគម ព្រមទាំងមន្ត្រីបច្ចេកទេសពាក់ព័ន្ធប្រមាណជា៥០រូបផងដែរ។

គម្រោងនេះ រៀបចំឡើងក្នុងគោលបំណងដើម្បីអបអរសាទរក្នុងកម្រិតបច្ចេកទេស ក្នុងការប្រគល់ទទួលសម្ភារៈ និងដាក់ឱ្យប្រើប្រាស់សាកល្បងប្រព័ន្ធដឹកជញ្ជូនឆ្លាតវៃ (ITS) ផ្អែកលើទិន្នន័យចម្រុះ (BIG DATA) នៅកម្ពុជា។

ជុំវិញរឿងនេះ លោក នឹម សុធា បានថ្លែងអំណរគុណដល់សាធារណរដ្ឋកូរ៉េ ដែលជានិច្ចជាកាលតែងតែផ្ដល់ជាជំនួយហិរញ្ញវត្ថុ និងបច្ចេកទេស សម្រាប់អនុវត្តគម្រោងហេដ្ឋារចនាសម្ព័ន្ធនៅកម្ពុជា ក្រោមកិច្ចសហប្រតិបត្តិការដ៏ល្អរវាងក្រសួងដែនដី ហេដ្ឋារចនាសម្ព័ន្ធ និងដឹកជញ្ជូនសាធារណរដ្ឋកូរ៉េ និងក្រសួងសាធារណការ និងដឹកជញ្ជូន ប្រទេសកម្ពុជា។

សូមជម្រាបដែរថា គម្រោង ITS នេះ គឺបានបង្កើតមជ្ឈមណ្ឌលទិន្នន័យ សម្រាប់ប្រតិបត្តិការ និងបានអនុវត្តសាកល្បងបំពាក់ឧបករណ៍តាមដានចរាចរណ៍១៩ទីតាំង ប្រកបដោយជោគជ័យ នៅតាមខ្សែផ្លូវមេសំខាន់ៗមួយចំនួន ក្នុងតំបន់ភូមិសាស្ត្រ រាជធានីភ្នំពេញ ក្នុងការលើកកម្ពស់ប្រសិទ្ធភាពនៃការគ្រប់គ្រងចរាចរណ៍ បង្កើនចល័តភាព និងសុវត្ថិភាពក្នុងទីក្រុង ព្រមទាំងបង្កើតប្រព័ន្ធផ្តល់ព័ត៌មានចរាចរណ៍ឆ្លាតវៃ ដែលអាចផ្តល់ទិន្នន័យបានត្រឹមត្រូវ និងទាន់ពេលវេលា ជូនអ្នកប្រើប្រាស់ផ្លូវ និងដើម្បីសម្រួលដល់ការធ្វើដំណើរ កាត់បន្ថយការកកស្ទះ និងរួមចំណែកកាត់បន្ថយគ្រោះថ្នាក់ចរាចរណ៍ផងដែរ៕ អត្ថបទ៖ហ្សាលីន

The post កម្ពុជា-កូរ៉េ ប្រកាសអនុវត្តន៍គម្រោងសាកល្បងប្រព័ន្ធដឹកជញ្ជូនឆ្លាតវៃ ដើម្បីបង្កើនសុវត្ថិភាពនៅភ្នំពេញ appeared first on .

លោក ឡេង ធនយុទ្ធា រដ្ឋលេខាធិការ ក្រសួងសាធារណការ និងដឹកជញ្ជូន ដែលបានដឹកនាំគណៈប្រតិភូក្រសួងសាធារណការ និងដឹកជញ្ជូន ចូលរួមវេទិកានោះ បានឱ្យដឹងថា វេទិកានេះត្រូវបានចូលរួមដោយ រដ្ឋមន្រ្តី និងអនុរដ្ឋមន្រ្តី គ្រប់គ្រងវិស័យដឹកជញ្ជូន មកពីបណ្តាប្រទេសអាស៊ី និងប៉ាស៊ីហ្វិក ចំនួន ១២ ប្រទេស និងបានរៀបចំកិច្ចពិភាក្សាតុមូលកម្រឹតខ្ពស់មួយ ដើម្បីចែករំលែកនូវសកម្មភាពការងារ ផែនការនាពេលអនាគត និងបញ្ហាប្រឈមរបស់បណ្តាប្រទេសរៀងៗខ្លួន។

ក្នុងកិច្ចពិភាក្សាតុមូលនេះ លោកប្រធានប្រតិភូកម្ពុជា បានបង្ហាញពីការចាប់ផ្តើមរបស់កម្ពុជា ក្នុងការប្រើប្រាស់ប្រព័ន្ធដឹកជញ្ជូនឆ្លាតវៃ ក្នុងការដោះស្រាយបញ្ហាដឹកជញ្ជូន មានជាអាទិ៍ ប្រព័ន្ធគ្រប់គ្រងចរាចរណ៍ឆ្លាតវៃក្នុងរាជធានីភ្នំពេញ និងតាមបណ្តាផ្លូវជាតិសំខាន់ៗ ប្រព័ន្ធផ្តល់ព័ត៌មានដល់អ្នកធ្វើដំណើរតាមរថយន្តក្រុង ប្រព័ន្ធទូទាត់ប្រាក់សម្រាប់អ្នកជិះរថយន្តក្រុង និងអ្នកប្រើផ្លូវល្បឿនលឿន ប្រព័ន្ធស្វែងរកស្ថានីយ៍សាករថយន្តអគ្គិសនី ។ល។

ក្នុងនោះផងដែរ នៅចំពោះមុខរដ្ឋមន្រ្តីកូរ៉េ លោក ក៏បានថ្លែងអំណរគុណដល់ក្រសួងដែនដី ហេដ្ឋារចនាសម្ព័ន្ធ និងដឹកជញ្ជូន នៃសាធារណរដ្ឋកូរ៉េ ដែលបាននឹងកំពុងផ្តល់ជំនួយបច្ចេកទេសដល់កម្ពុជាក្នុងការរៀបចំផែនការមេដឹកជញ្ជូនឆ្លាតវៃ រួមទាំងបញ្ចូលការអនុវត្តសាកល្បងលើកំណាត់ផ្លូវប្រវែង ១៥គ.ម នៃមហាវិថីព្រះមុនីវង្ស និងកំណាត់ផ្លូវជាតិលេខ១ ដោយភ្ជាប់ទៅនឹងមជ្ឈមណ្ឌលត្រួតពិនិត្យសកម្មភាពចរាចរណ៍តូចមួយក្នុងក្រសួង ដែលការសាកល្បងនេះនឹងផ្តល់បទពិសោធន៍ដល់កម្ពុជា ក្នុងការបន្តពង្រីកប្រព័ន្ធនេះនាពេលអនាគត។ ទោះជាយ៉ាងណា លោក ក៏បានបង្ហាញពីក្តីកង្វល់របស់កម្ពុជា លើកង្វះខាត ធនធានមនុស្ស និងធនធានហិរញ្ញវត្ថុ ផងដែរ។

សូមជម្រាបដែរថា តាមរយៈវេទិកាប្រព័ន្ធដឹកជញ្ជូនឆ្លាតវៃ អាស៊ី-ប៉ាស៊ីហ្វិក ឆ្នាំ២០២៥ នេះដែរ អ្នកជំនាញពាក់ព័ន្ធវិស័យនឹងប្រព័ន្ធដឹកជញ្ជូនឆ្លាតវៃ ដែលមកពីស្ថាប័នរដ្ឋ ឯកជន ស្ថាប័នសិក្សាស្រាវជ្រាវ និងអង្គការអន្តរជាតិ បានជួបជុំគ្នាដើម្បីចែករំលែក បទពិសោធន៍ ពិភាក្សាលំអិត ព្រមទាំងប្តេជ្ញាចិត្តក្នុងការស្វែងរកដំណោះស្រាយអភិវឌ្ឍន៍ ប្រព័ន្ធដឹកជញ្ជូនឆ្លាតវៃ តាមបណ្តាប្រទេសរៀងៗខ្លួនថែមទៀត៕អត្ថបទ៖ ហ្សាលីន

The post កម្ពុជា និង១២ ប្រទេសទៀត ប្តេជ្ញារួមគ្នាជំរុញការប្រើប្រាស់ប្រព័ន្ធដឹកជញ្ជូនឆ្លាតវៃ ដើម្បីដោះស្រាយបញ្ហាដឹកជញ្ជូន appeared first on .