លោក សួង សោភ័ណ ម្ចាស់សិប្បកម្មកែច្នៃត្រី សោភ័ណសុម៉េង មានទីតំាងនៅភូមិកំពង់ចិន ឃុំកំពង់ចិនត្បូង ស្រុកស្ទោង ខេត្តកំពង់ធំ បានឱ្យដឹងថា សព្វថ្ងៃនេះខ្ញុំផលិតត្រីងៀត និងចែកចាយទៅតាមតំបន់មួយចំនួន មានដូចជានៅខេត្តកំពង់ចាម សួង អូររំាងឪជាដើម។

លោកបញ្ជាក់ថា «ក្នុងមួយថ្ងៃខ្ញុំផលិតត្រីងៀតសើមចំនួន៥០០គីឡូក្រាម ស្មើប្រមាណ២៥០គីឡូក្រាមស្ងួត ហើយចែកចាយទៅដៃគូឬម៉ូយជាង១០នាក់ ជារៀងរាល់ថ្ងៃទៅតាមតំបន់»។

បើតាមលោក សួង សោភ័ណ ក្នុងមួយខែសិប្បកម្មកែច្នៃត្រីរបស់លោកអាចផ្គត់ផ្គង់ត្រីងៀតស្ងួតទៅដៃគូចែកចាយចន្លោះពី៦ទៅ៧តោន ហើយផលិតផលរបស់លោកចែកចេញជាពីរប្រភេទ មានត្រីងៀតធ្វើពីត្រីរ៉ស់ ថ្លៃ២៥០០០រៀល និងត្រីងៀតឌៀបថ្លៃ២៩០០០រៀលក្នុង១គីឡូក្រាម ខណៈបច្ចុប្បន្ននេះលោកបាននិងកំពុងរៀបបង្កើតផលិតផលថ្មីទំាងរសជាតិ គុណភាពនិងការវេចខ្ចប់ដើម្បីឆ្លើយតបទៅនិងតម្រូវការទីផ្សារ។

លោកលើកឡើងថា «ទម្រាំដើរមកដល់ចំណុចមានដូចសព្វថ្ងៃនេះ ដំបូងឡើយខ្ញុំធ្វើការជាអ្នកបើកបររថយន្តឱ្យសណ្ឋាគារមួយកន្លែងនៅក្រុងភ្នំពេញអស់រយៈពេលជាង៣ឆ្នាំ ដោយមិនសូវទទួលបានផលល្អក៏លាឈប់ងាកមកធ្វើត្រីងៀតជាមួយម្តាយក្មេករហូតមានកន្លែងផលិតត្រីងៀតដោយខ្លួនឯងមកដល់សព្វថ្ងៃនេះ»។

លោកបន្តថា មុខរបរផលិតត្រីងៀតរបស់ខ្ញុំនេះ បានចូលរួមចំណែកជួយដល់អ្នកចិញ្ចឹមត្រីក្នុងស្រុក ឱ្យមានសកម្មភាពចិញ្ចឹម ដើម្បីទទួលបានប្រាក់ចំណូលផ្គត់ផ្គង់គ្រួសារ និងចូលរួមចំណែកផ្តល់ការងារនិងប្រាក់ចំណូលមួយចំនួនដល់ពលរដ្ឋក្នុងស្រុក។ជាង១០ឆ្នំាមកនេះ សិប្បកម្មត្រីងៀត របស់យើងមានការប្រែប្រួល និងមានភាពរីកចម្រើនជាបន្តបន្ទាប់ ខណៈមុខរបរមួយនេះ ខ្ញុំចាប់ផ្តើមដំបូងជាមួយដើមទុនប្រមាណ១០លានរៀល ប៉ុណ្ណោះសម្រាប់ផលិតត្រីងៀតផ្គត់ផ្គង់ក្នុងតំបន់។

តាមលោក សួង សោភ័ណ អាយុ ជាង៤០ឆ្នំា មានកូន២នាក់នៅក្នុងគ្រួសាររូបនេះ បានបង្ហាញអារម្មណ៍យ៉ាងដូច្នេះថា «ខ្ញុំមិននឹកស្មានថាខ្លួនឯងទទួលបានលទ្ធផលល្អប្រសើរយ៉ាងដូចនេះ។ប៉ុន្តែទម្រាំបានដូចសព្វថ្ងៃនេះ ខ្ញុំពីរនាក់ប្តីប្រពន្ធបានឆ្លងកាត់នូវឧបសគ្គជាច្រើន។ ខ្ញុំសប្បាយចិត្ត ហើយមានក្តីសង្ឃឹមថានៅថ្ងៃខាងមុខនេះ ខ្ញុំនឹងមានទីផ្សារថ្មីៗ ដែលអាចឱ្យខ្ញុំរកប្រាក់ចំណូលបានថែមមួយកម្រិតទៀត»៕

អត្ថបទ៖សារេត

The post លោក សួង សោភ័ណ ឈប់ពីការងារជាអ្នកបើកបររថយន្ត ងាកមករកប្រាក់ចំណូលពីផលិតត្រីងៀតពី៦ទៅ៧តោន ក្នុង១ខែ appeared first on .