ស្ថាប័នបណ្តាញអាជីវកម្មអន្តរជាតិប្រចាំប្រទេសកម្ពុជា (CC Cambodia) ចុះ MoU និយ័តករបរធនបាលកិច្ច (ន.ប.ធ.) នៅសណ្ឋាគារ Sun & Moon Riverside

Kun Tey — Sat, 07 Mar 2026 03:56:50 +0000

(ភ្នំពេញ)៖ ឯកឧត្តម សុខ ដារ៉ា អគ្គនាយកនៃនិយ័តករបរធនបាលកិច្ច (ន.ប.ធ.) អមដោយសហការី បានចូលរួមជា អធិបតី និងជាសាក្សីក្នុងពិធីចុះហត្ថលេខាលើអនុស្សរណៈនៃការយោគយល់គ្នា (MoU) រវាងសមាគមបរធនបាលកម្ពុជា និងស្ថាប័នបណ្តាញអាជីវកម្មអន្តរជាតិប្រចាំប្រទេសកម្ពុជា (CC Cambodia) នៅសណ្ឋាគារ Sun & Moon Riverside នាថ្ងៃទី៦ ខែមីនា ឆ្នាំ២០២៦នេះ ដោយមានការចូលរួមពីថ្នាក់ដឹកនាំ និងមន្រ្តីជំនាញនៃ ន.ប.ធ. សមាជិក-សមាជិកា នៃ CC Cambodia ក្រុមហ៊ុនបរធនបាល និងសមាជិក-សមាជិកា នៃសមាគមបរធនបាលកម្ពុជា។ MoU នេះ មានគោលបំណងពង្រឹងកិច្ចសហប្រតិបត្តិការរវាងសហគមន៍អាជីវកម្ម និងវិស័យបរធនបាលកិច្ច ព្រមទាំងដើម្បីគាំទ្រដល់ការចែករំលែកចំណេះដឹង និងលើកកម្ពស់ការយល់ដឹងឱ្យកាន់តែស៊ីជម្រៅក្នុងចំណោមសហគ្រិន និងវិនិយោគិនអំពីវិស័យបរធនបាលកិច្ច។

កម្មវិធីនេះក៏មានកិច្ចពិភាក្សាលើប្រធានបទ “បរធនបាលកិច្ចគឺជាថ្នាលសម្រាប់ការវិនិយោគប្រកបដោយទំនុកចិត្ត” ផងដែរ ដើម្បីបង្កើនការយល់ដឹងយន្កការបរធនបាលកិច្ច និងអត្ថប្រយោជន៍នៃការប្រើប្រាស់យន្តការនេះក្នុងការគ្រប់គ្រងទ្រព្យ គាំពារការវិនិយោគនិងការធ្វើផែនការវិនិយោគរយៈពេលវែង និងការការពារទ្រព្យសម្បត្តិគ្រួសារ។ កិច្ចពិភាក្សានេះ មានការសម្របសម្រួលដោយ ឧកញ៉ា ប៉ិច បូឡែន ប្រធាន និងជានាយកប្រតិបត្តិនៃក្រុមហ៊ុន Westline Education Group និងជាសមាជិកប្រធាននៃ Corporate Connections Cambodia និងមានវាគ្មិនដែលជាអ្នកជំនាញក្នុងវិស័យបរធនបាលកិច្ច រួមមាន លោកស្រី ឈាន សុខារី ប្រធាននាយកដ្ឋានកិច្ចការគតិយុត្ត និងអធិការកិច្ច លោក ព្រឿង សុភាព នាយកគ្រប់គ្រងទូទៅក្រុមហ៊ុន Phillip Trustee (Cambodia) Co., Ltd. និងលោក គង់ ប៊ុននរិន្ទ អគ្គនាយកក្រុមហ៊ុន Lion Trust (Cambodia) Co., Ltd.៕

The post ស្ថាប័នបណ្តាញអាជីវកម្មអន្តរជាតិប្រចាំប្រទេសកម្ពុជា (CC Cambodia) ចុះ MoU និយ័តករបរធនបាលកិច្ច (ន.ប.ធ.) នៅសណ្ឋាគារ Sun & Moon Riverside appeared first on .

រដ្ឋាភិបាល-សមាគមន៍GMAC ចុះ MOUរួមគ្នា លើគម្រោងរោងចក្រកាន់តែប្រសើរឆ្នាំ២០២៣-២០២៧

រ៉េត សុកធា — Tue, 11 Oct 2022 02:51:10 +0000

កាលថ្ងៃទី១០ ខែតុលា ឆ្នាំ២០២២ ក្រសួងការងារ និងបណ្តុះបណ្តាលវិជ្ជាជីវៈ តំណាងភាគីរាជរដ្ឋាភិបាល បានហត្ថលេខាលើអនុស្សរណៈនៃការយោគយល់គ្នា ស្តីពី «គម្រោងរោងចក្រកាន់តែប្រសើរនៅកម្ពុជា សម្រាប់ឆ្នាំ២០២៣-២០២៧» ជាមួយតំណាងសមាគមន៍រោងចក្រកាត់ដេរនៅកម្ពុជា (GMAC) និងតំណាងអង្គការអន្តរជាតិខាងការងារស្តីពីគម្រោងរោងចក្រកាន់តែប្រសើរនៅកម្ពុជា (ILO-BFC)។

ពិធីចុះ Mou នេះ គឺធ្វើឡើងនៅសណ្ឋាគារភ្នំពេញ ក្រោមវត្តមាន ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ឯកឧត្តម អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ និងអ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និងភ្ញៀវជាតិ-អន្តរជាតិប្រមាណជាង ៨០ រូប។

ថ្លែងក្នុងឱកាសនោះ ឯកឧត្តម ប៉ាន សូរស័ក្តិ បានគូសបញ្ជាក់ថា តាមរយៈការអនុវត្តគោលនយោបាយផ្សារភ្ជាប់ពាណិជ្ជកម្មជាមួយនឹងបទដ្ឋានការងារ កម្ពុជាបានបង្កើនទំនុកចិត្តដល់អ្នកបញ្ជាទិញម៉ាកយីហោល្បីៗក្នុងការដាក់បន្ថែមការបញ្ជាទិញផលិតផលសំខាន់ៗ រួមមាន សម្លៀកបំពាក់ វាយនភ័ណ្ឌ ស្បែកជើង និងកាបូបនៅកម្ពុជាពីមួយឆ្នាំ ទៅមួយឆ្នាំកាន់តែច្រើនឡើងៗ។

ឯកឧត្តមរដ្ឋមន្រ្តី បញ្ជាក់ថា បេសកកម្មនេះ គឺដើរស្របតាមផែនការជាយុទ្ធសាស្រ្តនិងផែនការសកម្មភាព កំណត់ក្រោម «យុទ្ធសាស្រ្តអភិវឌ្បន៍វិស័យកាត់ដេរ ផលិតស្បែកជើង និងកាបូបកម្ពុជា ២០២២-២០២៧»។

ឯកឧត្តម ក៏បានវាយតម្លៃខ្ពស់ចំពោះគ្រប់ភាគីពាក់ព័ន្ធ ជាពិសេសក្រុមការងារក្រសួងពាណិជ្ជកម្ម ក្រសួងការងារ និងបណ្តុះបណ្តាលវិជ្ជាជីវៈ សមាគមរោងចក្រកាត់ដេរនៅកម្ពុជា អង្គការអន្តរជាតិខាងការងារស្តីពីគម្រោងរោងចក្រកាន់តែប្រសើរនៅកម្ពុជា ដែលបានខិតខំប្រឹងប្រែងរហូតសម្រេចបាន នូវអនុស្សរណៈនៃការយោគយល់គ្នានេះ។

សូមបញ្ជាក់ដែរថា អនុស្សរណៈនៃការយោគយល់គ្នា ស្តីពី «គម្រោងរោងចក្រកាន់តែប្រសើរនៅកម្ពុជា សម្រាប់ឆ្នាំ២០២៣-២០២៧» នេះ គឺជាសមិទ្ធិផលថ្មីមួយទៀតរបស់រាជរដ្ឋាភិបាលកម្ពុជា តាមរយៈក្រសួងពាណិជ្ជកម្ម និងក្រសួងការងារ។ អនុស្សរណៈនៃការយោគយល់គ្នានេះ មានគោលបំណងស្នូលក្នុងបន្តការសហការគ្នាសំដៅធ្វើឱ្យលក្ខខណ្ឌការងារកាន់តែប្រសើរសម្រាប់កម្មករ នយោជិក ក្នុងវិស័យសម្លៀកបំពាក់ វាយនភ័ណ្ឌ សម្ភារៈធ្វើដំណើរ និងកាបូប តាមរយៈការអនុវត្តតាមច្បាប់ការងារនិងច្បាប់ពាក់ព័ន្ធរបស់កម្ពុជាក៏ដូចជាបទដ្ឋានការងារស្នូលដែលទទួលស្គាល់ជាអន្តរជាតិ ជាពិសេសលើសុវត្ថិភាព និងសុខាមាលភាពការងារ៕

The post រដ្ឋាភិបាល-សមាគមន៍GMAC ចុះ MOUរួមគ្នា លើគម្រោងរោងចក្រកាន់តែប្រសើរឆ្នាំ២០២៣-២០២៧ appeared first on .