លោក ត្រាំ ទទូចចង់ឲ្យនាវាអាមេរិកអាចឆ្លងកាត់ព្រែកជីក Panama និង Suez ដោយសេរី

ឧកញ៉ាសាមញ្ញ — Sun, 27 Apr 2025 09:25:00 +0000

ប្រធានាធិបតីលោក ដូណាល់ ត្រាំ កាលពីពេលថ្មីៗនេះ បានបង្ហាញពីគោលបំណងចង់ឲ្យនាវាអាមេរិកទាំងអស់ អាចធ្វើដំណើរបានដោយសេរីតាមរយ:ព្រែកជីក Panama និង Suez ខណ:លោកថែមទាំងបានចាត់ឲ្យរដ្ឋមន្ត្រីការបរទេស លោក Marco Rubio ធ្វើការដោះស្រាយលើបញ្ហានេះឲ្យបានឆាប់រហ័ស ផងដែរ។ នេះបើតាមការចុះផ្សាយពីសារព័ត៌មាន AFP។

តាមរយ:សារបង្ហោះមួយលើបណ្តាញសង្គម Truth Social កាលពីថ្ងៃទី២៦ ខែមេសា លោក ត្រាំ បានសរសេរថា ៖” នាវារបស់អាមេរិកទាំងយោធា និងនាវាដឹកទំនិញ គួរតែត្រូវបានអនុញ្ញាតឲ្យឆ្លងកាត់ព្រែកជីក Panama និង Suez បានដោយឥតគិតថ្លៃ។ បើគ្មានសហរដ្ឋអាមេរិកទេ ព្រែកជីកទាំងនោះក៏នឹងមិនមាននោះឡើយ”។

ប៉ុន្តែទោះជាយ៉ាងណាក៏ដោយ ទាំងមន្ត្រីប៉ាណាម៉ា និងអេហ្ស៊ីប ហាក់នៅមិនទាន់បានធ្វើអត្ថាធិប្បាយណាមួយលើព័ត៌មាននេះនៅឡើយនោះទេ។

គួរឲ្យដឹងថា ប្រឡាយប៉ាណាម៉ា មានប្រវែងសរុបជាង ៨០គីឡូម៉ែត្រ ដែលជាផ្លូវទឹកដ៏សំខាន់តភ្ជាប់រវាងមហាសមុទ្រប៉ាស៊ីហ្វិក ជាមួយមហាសមុទ្រអាត្លង់ទិក ដែលបានជួយកាត់បន្ថយរយ:ពេលនៃការធ្វើដំណើររវាងតំបន់ទាំងពីរបានយ៉ាងច្រើន។ ប្រហែល ៥% នៃចរាចរណ៍ផ្លូវសមុទ្រពិភពលោក គឺត្រូវបានឆ្លងកាត់ព្រែកជីកប៉ាណាម៉ា ជារៀងរាល់ឆ្នាំ។

ព្រែកជីកប៉ាណាម៉ា គឺជាផ្លូវទឹកដ៏សំខាន់មួយសម្រាប់នាវាកងទ័ពជើងទឹកអាមេរិក នាវាផ្លូវការ និងនាវាដឹកទំនិញជាច្រើនផ្សេងទៀត។ ៤០% នៃចរាចរណ៍កុងតឺន័ររបស់សហរដ្ឋអាមេរិក គឺត្រូវបានឆ្លងកាត់ព្រែកជីកនេះ។ កន្លងមក ប្រធានាធិបតីលោក ត្រាំ ក៏ធ្លាប់បានព្រមានថា លោកនឹងយកព្រែកជីកប៉ាណាម៉ាមកគ្រប់គ្រងវិញផងដែរ។

យ៉ាងណាមិញ ចំពោះព្រែកជីកស៊ុយអេ ដែលមានប្រវែងសរុបជាង ១៩០គីឡូម៉ែត្រ គឺជាផ្លូវដឹកជញ្ជូនខ្លីបំផុតរវាងទ្វីបអឺរ៉ុប និងអាស៊ី។ វាភ្ជាប់ពីទីក្រុង Suez របស់អេហ្ស៊ីបដែលនៅសមុទ្រក្រហម ទៅកាន់ Port Said ដែលស្ថិតនៅលើសមុទ្រមេឌីទែរ៉ាណេ។ ប្រហែល ១០% នៃពាណិជ្ជកម្មពិភពលោកគឺត្រូវឆ្លងកាត់ព្រែកជីកស៊ុយអេនេះ៕

The post លោក ត្រាំ ទទូចចង់ឲ្យនាវាអាមេរិកអាចឆ្លងកាត់ព្រែកជីក Panama និង Suez ដោយសេរី appeared first on .

ចិនកំពុងបង្កើតសមិទ្ធផលថ្មី ជីកព្រែកតម្លៃជាង ១០ពាន់លានដុល្លារ ប្រជែងប្រឡាយ Suez របស់អេហ្ស៊ីប

monyokn — Tue, 09 Jul 2024 06:00:00 +0000

ដោយផ្អែកតាមកិច្ចខិតខំប្រឹងប្រែងជំរុញហេដ្ឋារចនាសម្ព័ន្ធ ប្រទេសចិនកំពុងតែបង្ហាញនូវគម្រោងព្រែកជីកថ្មីមួយទៀត ដើម្បីប្រកួតប្រជែងជាមួយប្រឡាយព្រែកជីក Suez របស់អេហ្ស៊ីប។ គម្រោងដ៏មានសារៈសំខាន់សម្រាប់វិស័យដឹកជញ្ជូននេះ មានឈ្មោះថា Pinglu លាតសន្ធឹងប្រវែង ១៣៤គីឡូម៉ែត្រ ពីអាងស្តុកទឹក Xijin ជិតរដ្ឋធានី Nanning របស់ទីក្រុង Guangxi ទៅកាន់កំពង់ផែ Qinzhou ភាគខាងត្បូងប្រទេស។

សារព័ត៌មាន Express បានចុះផ្សាយថា ភក់ និងថ្ម ដែលកប់ក្នុងបាតទន្លេ នឹងត្រូវបានគេស្តារយកចេញដល់ទៅចំនួន ៣៤០លានម៉ែត្រគូប ខណៈការចំណាយលើការជីកប្រឡាយ Pinglu ព្រមទាំងការចំណាយលើការពង្រីក ឬសាងសង់ផ្លូវហាយវេ និងផ្លូវដែកសម្រាប់ដឹកជញ្ជូនទំនិញមកកាន់កប៉ាល់ ឲ្យកាន់តែងាយស្រួលជាងមុននោះ នឹងត្រូវចំណាយទំហំទុនវិនិយោគអស់ខ្ទង់ចំនួន ៧២,៧ពាន់លានយ័ន (ជាង ១០ពាន់លានដុល្លារ) ផងដែរ។

គួរឲ្យដឹងថា ប្រឡាយ Pinglu ត្រូវបានចាប់ផ្តើមគម្រោងតាំងតែពីឆ្នាំ២០១៩ មកម្លេះ ហើយប្រសិនបើដំណើរការរលូនទៅតាមផែនការ វាអាចនឹងត្រូវបានបញ្ចប់គម្រោងជាស្ថាពរនាឆ្នាំ២០២៦ ខាងមុខ ។ ម្យ៉ាងវិញទៀត ផ្លូវទឹកថ្មីរបស់ចិន Pinglu ត្រូវបានគេរំពឹងទៀតថា នឹងកាត់បន្ថយចម្ងាយដឹកជញ្ជូនពីប្រព័ន្ធទន្លេ ទៅកាន់សមុទ្របានរហូតដល់ទៅ ៥៦០គីឡូម៉ែត្រឯណោះ បើធៀបនឹងការធ្វើដំណើរឆ្លងកាត់តាមខេត្ត Guangzhou ។

សូមជម្រាបជូនថា នៅប្រទេសចិន គម្រោងសាងសង់ និងហេដ្ឋារចនាសម្ព័ន្ធធំៗដូច្នេះ សឹងតែមិនមែនជារឿងចម្លែកទៅហើយ ដោយថាប្រទេសជាមហាអំណាចសេដ្ឋកិច្ចធំលំដាប់ទីពីររបស់ពិភពលោកមួយនេះ តែងតែបន្តស្វែងរកមធ្យោបាយ ជំរុញសកម្មភាពសេដ្ឋកិច្ច និងធ្វើឲ្យផលិតផលក្នុងស្រុកសរុបកើនឡើងជាលំដាប់៕

The post ចិនកំពុងបង្កើតសមិទ្ធផលថ្មី ជីកព្រែកតម្លៃជាង ១០ពាន់លានដុល្លារ ប្រជែងប្រឡាយ Suez របស់អេហ្ស៊ីប appeared first on .