ប្រភពដែល បានបន្តថា រដ្ឋបាលខេត្តសៀមរាប បានសហការជាមួយមន្ទីរ​ អង្គភាព​ ក្រុង​ ស្រុក​ និងសហភាពសហព័ន្ធយុវនកម្ពុជាបានរៀបចំព្រះរាជពិធីបុណ្យអុំទូក​ បណ្តែតប្រទីប​ និងសំពះព្រះខែ​ អកអំបុកខេត្តសៀមរាបពេលរយៈពេល ៣ថ្ងៃ​ ចាប់ពីថ្ងៃទី១៤​ ដល់ថ្ងៃទី១៦ ខែវិច្ឆិកា ឆ្នាំ២០២៤ ទទួលបានភ្ញៀវទេសចរសរុបប្រមាណ ៣៤៨​ ២២៩នាក់ មានការកើនឡើងប្រមាណ ១៥,៩៣% បើប្រៀបធៀបនឹងរយៈពេលដូចគ្នាឆ្នាំ២០២៣ ក្នុងនោះ​ ៖ មានភ្ញៀវទេសចរបរទេសមានចំនួន ១៣​ ២២៩នាក់ ខណៈទេសចរជាតិ និងបងប្អូនប្រជាពលរដ្ឋក្នុងខេត្តសៀមរាប មានចំនួនប្រមាណ ៣៣៥​ ០០០នាក់។

ចំពោះលទ្ធផលនេះ រដ្ឋបាលខេត្តសៀមរាប បានថ្លែងអរគុណចំពោះគ្រប់ភាគីពាក់ព័ន្ធ ដែលបានយកចិត្តទុកដាក់រៀបចំព្រះរាជពិធីបុណ្យអុំទូក​ បណ្តែតប្រទីបប្រព្រឹត្តទៅដោយរលូន​តាមការគ្រោងទុក ខណៈរដ្ឋបាលខេត្ត ក៏បានថ្លែងអំណរគុណចំពោះសប្បុរសជនដែលរួមចំណែកឧបត្ថម្ភគាំទ្រដល់ព្រះរាជពិធីបុណ្យ នេះផងដែរ៕

The post ត្រឹមតែអុំទូក៣ថ្ងៃ៖ ខេត្តសៀមរាប ទទួលបានភ្ញៀវទេសចរជាង៣០ម៉ឺននាក់ កើនឡើងជិត១៦% appeared first on .

សម្តេចធិបតី ហ៊ុន ម៉ាណែត នាយករដ្ឋមន្រ្តីនឌកម្ពុជា កាលថ្ងៃទី១៧ ខែវិច្ឆិកា ឆ្នាំ២០២៤ បានលើកឡើងថា ព្រះរាជពិធីបុណ្យអុំទូក​​ បណ្តែតប្រទីប​ និងសំពះព្រះខែ​ អកអំបុក បានប្រព្រឹត្តទៅដោយរលូន​ និងប្រកបដោយភាពសប្បាយរីករាយ ជាមួយការរក្សាបាននូវប្រពៃណី និងវប្បធម៌ជាតិយ៉ាងសម្បូរបែប បង្កើតស្នាមញញឹមដល់មហាគ្រួសារខ្មែរ​ និងភ្ញៀវទេសចរមកពីគ្រប់ទិសទី​។

ដោយសម្តេចបានបន្តថា ៖«ភាពជោគជ័យនេះ​ អាចសម្រេចទៅបាន​ គឺដោយសារការចូលរួមចំណែកពីគ្រប់បណ្តាក្រុមការងារពាក់ព័ន្ធ​ទាំងអស់ ជាពិសេសកងកម្លាំងគ្រប់ប្រភេទ​ ដែលបានលះបង់ពេលវេលា​ និងកម្លាំងកាយចិត្តធ្វើយ៉ាងណាធានាឱ្យបានសន្តិសុខ​ សុវត្ថិភាព​ និងសណ្តាប់ធ្នាប់សាធារណៈ​ បង្កលក្ខណ:គ្រប់បែបយ៉ាង​ ដើម្បីបម្រើដល់ដំណើរការនៃព្រះរាជពិធីបុណ្យជាតិដ៏ធំមួយនេះ ឱ្យប្រព្រឹត្តទៅដោយភាពអធិកអធម និងសប្បាយរីករាយជាទីបំផុត ។

ក្នុងនាមប្រមុខរាជរដ្ឋាភិបាល​ និងក្នុងនាមខ្លួនសម្តេចផ្ទាល់​ ក៏សូមអរគុណដល់ក្រុមការងារ​គ្រប់លំដាប់ថ្នាក់ និងកងកម្លាំង​គ្រប់ប្រភេទ ដែលបានបំពេញភារកិច្ចប្រកបដោយការទទួលខុសត្រូវ​ខ្ពស់​ ទាំងក្នុងការរៀបចំដំណើរប្រព្រឹត្តទៅនៃកម្មវិធី និងការបោសសម្អាត គ្រប់គ្រងអនាម័យ ធានាបាននូវសោភ័ណភាព​ល្អប្រណិត។

ជាមួយគ្នានេះ​ សម្តេចក៏សូមអរគុណដល់ក្រុមការងារសម្តែងសិល្បៈគ្រប់ប្រភេទ ក៏ដូចសិល្ប:ករ​ សិល្បៈ​ការិនីទាំងអស់​ ដែលបានផ្តល់នូវផ្ទាំងទស្សនីយភាពសប្បាយរីករាយ​ និងការរាំលេងកម្សាន្ដគ្រប់ទីកន្លែងជូនដល់មហាជន​ ប្រកបដោយភាពស្រស់ស្រាយសប្បាយអឺងកង។

សូមបញ្ជាក់ថា សម្រាប់ឆ្នាំ២០២៤នេះ រាជរដ្ឋាភិបាលកម្ពុជា បានប្រារព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ប្រព្រឹត្តទៅចាប់ពីថ្ងៃទី១៤ ដល់១៦ ខែវិច្ឆិកា ឆ្នាំ២០២៤។ ពិធីបុណ្យអុំទូក នេះ មានប្រព្រឹត្តិនៅពីរទីតាំង គឺនៅរាជធានីភ្នំពេញ ធ្វើនៅតាមដងទន្លេសាប មុខព្រះបរមរាជវាំង និងមួយទីតាំងទៀត គឺធ្វើនៅតាមបណ្តោយស្ទឹងសៀមរាប ក្រុងសៀមរាប នៅខេត្តសៀមរាប៕

The post សម្តេចធិបតី ៖ពិធីបុណ្យអុំទូកឆ្នាំនេះ ប្រព្រឹត្តទៅដោយរលូន និងបង្កើតស្នាមញញឹមដល់មហាគ្រួសារខ្មែរ appeared first on .

លោកស្រី ដោ សម្ផស្ស បានឱ្យដឹងថា ភ្ញៀវទេសចរអន្តរជាតិជាង ៦លាននាក់ បានមកទស្សនាការប្រណាំងទូក នៅមាត់ទន្លេផងការដើរទិញទំនិញតាមស្តង់តាំងពិពរណ័ទំនិញជាច្រើន នៅតាមទីតាំងនីមួយៗ ក្នុងរាជធានីភ្នំពេញ ព្រមទាំងទស្សនាការប្រគំតន្ត្រីតាមទម្រង់សិល្បៈបុរាណ និងសម័យ នៅតាមសួនសាធារណៈផងដែរ ដើរលេងកំសាន្តសប្បាយប្រកបដោយទឹកមុខរីករាយក្រោមម្លប់នៃសន្តិភាព។

នេះបើតាមការបញ្ជាក់ឱ្យដឹងពីលោកស្រី ដោ សម្ផស្ស នាយិការងរដ្ឋបាល និងជាអ្នកនាំពាក្យ រដ្ឋបាលរាជធានីភ្នំពេញ។ ប្រភពដដែលបញ្ជាក់ថា សម្រាប់ថ្ងៃទី១ មានអ្នកចូលរួម ទស្សនាកម្សាន្ត ជាង១លាន១សែននាក់, ថ្ងៃទី២ មានប្រមាណជាង ២លាន ២សែននាក់ និងថ្ងៃទី៣ ដែលជាថ្ងៃបញ្ចប់នៃព្រះរាជពិធីបុណ្យអុំទូក មានប្រមាណជាង ២លាន៩សែននាក់ ។

លោកស្រីអ្នកនាំពាក្យ បានបន្តថា ចំពោះការងារ រក្សាសន្តិសុខ សណ្តាប់ធ្នាប់ និងរៀបរយវិញ មានការការពាររក្សាសន្តិសុខសុវត្ថិភាព ដោយយកចិត្តទុកដាក់ ពីបងប្អូនមន្ត្រីរាជការ កងកម្លាំង មានសមត្ថកិច្ច ក្រោមការដឹកនាំ របស់សម្ដេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា។

សូមបញ្ជាក់ថា សម្រាប់ឆ្នាំ២០២៤នេះ រាជរដ្ឋាភិបាលកម្ពុជា បានប្រារព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក ប្រព្រឹត្តទៅចាប់ពីថ្ងៃទី១៤ ដល់១៦ ខែវិច្ឆិកា ឆ្នាំ២០២៤ នៅតាមដងទន្លេសាប មុខព្រះបរមរាជវាំង៕

The post ភ្ញៀវជាតិ និងភ្ញៀវទេសចរអន្តរជាតិជាង ៦លាននាក់ បានមកទស្សនាពិធីបុណ្យអុំទូកនៅរាជធានីភ្នំពេញ appeared first on .

ក្រោយការប្រកួតយ៉ាងស្វិតស្វាញអស់រយៈពេល ៣ថ្ងៃពេញ ក្នុងនោះគេឃើញមានទូកដែលមានកេរ្តិ៍ឈ្មោះល្បីល្បាញចំនួនបី ដែលមានល្បឿនលឿនជាងគេ ដោយចំណាត់ថ្នាក់លេខ១ គឺបានទៅលើទូកមានឈ្មោះថា «តេជោកែវវិជ័យបារមីចៅសែន» មកពីខេត្តពោធិ៍សាត់​ ប្រើប្រាស់ថេរវេលាសរុប (គិតទាំងជើងទី១ និងទី២ នៃការប្រកួតទាំងបីថ្ងៃ) ចំនួន ២៨ៈ០៩.៩៨នាទី ឯចំណាត់ថ្នាក់លេខ២ គឺបានទៅលើទូកមានឈ្មោះថា «សារាយតេជោសែនជ័យ» មកពីខេត្តកណ្តាល​ ប្រើប្រាស់ថេរវេលាសរុបចំនួន ២៨ៈ១៦.០៦នាទី និងចំណាត់ថ្នាក់លេខ៣ គឺបានទៅលើទូកមានឈ្មោះថា ​ «កោះកេរធិបតី» មកពីខេត្តព្រះវិហារ ប្រើប្រាស់ថេរវេលាសរុបចំនួន ២៨ៈ១៩.៨៧នាទី។ នេះបើយោងតាម គណៈកម្មាធិការជាតិ រៀបចំបុណ្យជាតិ-អន្តរជាតិ។

គួររំលឹកថា (នៅឆ្នាំ២០០៥) ម្ចាស់ជើងឯកថ្នាក់ជាតិគឺបានទៅលើទូក «ឧដុង្គម៉ែជ័យបារមីវាំងចាស់» មកពីខេត្តកំពង់ស្ពឺ (នៅឆ្នាំ២០០៦) បានទៅលើទូក «អធិរាជចក្រភពរង្សី» មកពីខេត្តកណ្តាល​ (នៅឆ្នាំ២០០៧) បានទៅលើទូក «ច័ន្ទសោមសែនមង្គល» មកពីខេត្តតាកែវ (នៅឆ្នាំ២០០៨) បានទៅលើទូក «ព្រះទីនាំងចង្ហាន់ហុយចេស្តា» មកពីខេត្តកណ្តាល (នៅឆ្នាំ២០០៩) បានទៅលើទូក «ជ្រៃមាសសាគរតេជោសែនជ័យ» (នៅឆ្នាំ២០១០) បានទៅលើទូក «ស្រីម៉ៅក្រាំងយ៉ូវ» មកពីខេត្តកណ្តាល (នៅឆ្នាំ២០១៤) បានទៅលើទូក «ស្រីស្រស់គៀនជ្រៃបារមីតេជោ» មកពីខេត្តកំពង់ចាម (នៅឆ្នាំ២០១៦ និងឆ្នាំ២០១៧) បានទៅលើទូក «សារាយតេជោសែនជ័យ» មកពីខេត្តកណ្តាល (នៅឆ្នាំ២០១៨) បានទៅលើទូក «កោះកេរសែនជ័យបារមីព្រះអង្គខ្មៅ» មកពីខេត្តព្រះវិហារ (នៅឆ្នាំ២០១៩) បានទៅលើទូក «សារាយតេជោសែនជ័យ» មកពីខេត្តកណ្តាល និងនៅឆ្នាំ២០២៣ បានទៅលើទូក «មហាទន្សាយតេជោសែនជ័យ» មកពីខេត្តកំពង់ចាម៕

The post ឆ្នាំនេះ​ «ទូកង» ល្បីៗប្រចាំខេត្តចំនួន៣​ ពិតជាមានល្បឿនលឿនដូចគេថា​មែន appeared first on .

ក្រសួងការងារ កាលព្រឹកថ្ងៃទី១៣ ខែវិច្ឆិកា ឆ្នាំ២០២៤ បានឱ្យដឹងថា ប្រទីបរបស់ក្រសួងការងារ និងបណ្ដុះបណ្ដាលវិជ្ជាជីវៈ ដែលត្រៀមចូលរួមព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក គឺបង្ហាញសោភ័ណភាពបែបសហសម័យ។

លោកស្រី សួស រដ្ឋាវី រដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ប្រទីបរបស់ក្រសួងការងារ ត្រូវបានតុបតែងលម្អរំលេចនូវសោភ័ណភាពបែបសហសម័យ បង្ហាញអត្ថន័យធំធេងពាក់ព័ន្ធនឹងវិស័យការងារ វិស័យសន្តិសុខសង្គម និងវិស័យបណ្ដុះបណ្ដាលវិជ្ជាជីវៈ។

ក្នុងនោះនៅលើប្រទីបរបស់ក្រសួងការងារ មានខ្លឹមសារសំខាន់ចំនួន៩ ចំនុចធំៗ ដូចជា៖ ទី១. “រូបសញ្ញារបស់ក្រសួងការងារ និងបណ្តុះបណ្តាលវិជ្ជាជីវៈ” ស្ថិតនៅកណ្តាលប្រទីប តំណាងឱ្យស្ថាប័នរបស់រាជរដ្ឋាភិបាលទទួលបន្ទុកក្នុងការដឹកនាំ និងគ្រប់គ្រងលើវិស័យការងារ សន្តិសុខសង្គម និងបណ្ដុះបណ្ដាលវិជ្ជាជីវៈ។ ចំណែក “រូបមនុស្ស ប្រុសស្រីក្នុងឯកសណ្ឋានជាអធិការការងារ” តំណាងឱ្យការធានានូវការអនុវត្តយ៉ាងម៉ឺងម៉ាត់នូវច្បាប់ស្ដីពីការងារនិងបទដ្ឋានគតិយុត្តពាក់ព័ន្ធសំដៅរក្សាឱ្យបាននូវលក្ខខណ្ឌការងារ និងលក្ខខណ្ឌសុវត្ថិភាពនិងសុខភាពការងារប្រសើរ និងការលើកកម្ពស់សិទ្ធិការងារនៅកម្ពុជាស្របតាមច្បាប់ជាតិ និងបទដ្ឋានអន្តរជាតិខាងការងារ។

ទី២. អក្សរ “TVET” តំណាងឱ្យការអប់រំបណ្ដុះបណ្ដាលបច្ចេកទេស និងវិជ្ជាជីវៈ ដែលធានាដល់ការអភិវឌ្ឍមូលធនមនុស្ស និងកម្លាំងពលកម្មឱ្យមានជំនាញដោយធានាថា “ពលរដ្ឋម្នាក់មានជំនាញមួយយ៉ាងតិចប្រចាំជីវិត” ឆ្លើយតបទៅនឹងតម្រូវការនៃការវិវត្តន៍យ៉ាងរហ័សនៃមូលដ្ឋានសេដ្ឋកិច្ច ឧស្សាហកម្មបច្ចេកវិទ្យាឌីជីថល។ “អក្សរ ១,៥លាន(មួយលានប្រាំសែន)” តំណាងឱ្យកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជន មកពីគ្រួសារក្រីក្រ និងគ្រួសារងាយរងហានិភ័យ។

ទី៣. រូបប័ណ្ណ ប.ស.ស. តំណាងឱ្យអត្ថប្រយោជន៍នៃរបបសន្តិសុខសង្គមផ្នែកហានិភ័យការងារ ផ្នែកថែទាំសុខភាព និងផ្នែកប្រាក់សោធន ដែលផ្តល់ជូនបងប្អូនកម្មករនិយោជិត មន្ត្រីរាជការសាធារណៈ បុគ្គលស្វ័យនិយោជន៍ និងអ្នកក្នុងបន្ទុកសមាជិក ប.ស.ស.។

ទី៤. អក្សរ “ទ.ជ.ម.ក. NEA” តំណាងឱ្យទីភ្នាក់ងារជាតិមុខរបរ និងការងារ នៃក្រសួងការងារ និងបណ្តុះបណ្តាល វិជ្ជាជីវៈ ដែលបាននិងកំពុងផ្តល់សេវាជួយស្វែងរកកាងារ ការចុះឈ្មោះ ប្រមូល និងផ្សព្វផ្សាយព័ត៌មានអំពីឱកាសការងារ ការប្រឹក្សាយោបល់ មគ្គទេសក៍ការងារនិងអាជីព ជូនដល់យុវជន សិស្សនិស្សិត និងអ្នកស្វែងរកការងារ និង ផ្គត់ផ្គង់កម្លាំងពលកម្មទៅឱ្យរោងចក្រ សហគ្រាស តាមរយៈមជ្ឈមណ្ឌលការងារនៅតាមរាជធានី ខេត្ត និងមជ្ឈមណ្ឌល ការងារចល័ត ដូច “រូបរថយន្ត” ដែលមានរំលេចពាក្យ៖ រកការងារ រើសបុគ្គលិក និងប្រឹក្សាយោបល់ការងារ។

ទី៥. “រូបអគារ” តំណាងឱ្យរោងចក្រ សហគ្រាសទាំងអស់នៅកម្ពុជា ដែលជាប្រភពនៃការបង្កើតការងារជូនប្រជាពលរដ្ឋនៅគ្រប់ទីកន្លែងទូទាំងប្រទេស។ ទី៦. “រូបមនុស្សប្រុសស្រី” ស្ថិតនៅខាងឆ្វេង និងខាងស្តាំ នៃអក្សរ ការងារសន្តិសុខសង្គម បណ្ដុះបណ្ដាលវិជ្ជាជីវៈ តំណាងឱ្យកម្មករនិយោជិត នឹងនិយោជក ជាតួអង្គដ៏សំខាន់នៃទំនាក់ទំនងវិជ្ជាជីវៈ ត្រូវតែមានការគោរព និងយោគយល់អធ្យាស្រ័យគ្នាទៅវិញទៅមក ដើម្បីប្រែក្លាយសហគ្រាសមួយទៅជាសហគមន៍សុខសាន្តមួយសំដៅ ធានាបាននូវសុខដុមនីយកម្មសង្គម។

ទី៧. “រូបយន្ដហោះ” តំណាងឱ្យលំហូរនៃសកម្មភាពធុរកិច្ច ការវិវិយោគផ្ទាល់ពីបរទេស និងទីផ្សាការងារនៅក្នុងប្រទេស ដែលដើរតួជាកម្លាំងចលករស្នូលក្នុងការជំរុញកំណើនសេដ្ឋកិច្ចកម្ពុជា សំដៅសម្រេចបាននូវចក្ខុវិស័យកម្ពុជា ឆ្នាំ២០៥០។ ទី៨. “រូបដ្រូន” តំណាងឱ្យការរីកចម្រើនផ្នែកវិទ្យាសាស្ត្រ និងបច្ចេកវិទ្យាឌីជីថលនៅកម្ពុជា ដែលតម្រូវឱ្យមាននូវការចូលរួមយ៉ាងសកម្មក្នុងការធ្វើសមាហរណកម្មឌីជីថលនៅក្នុងទីផ្សារការងារកម្ពុជាតាមរយៈការជំរុញការអប់រំបណ្ដុះបណ្តាលបច្ចេកទេស និងវិជ្ជាជីវៈ។ ទី៩. “រូបនាគរាជ” គឺជាសត្វទីឃជាតិប្រកបដោយអានុភាព អំណាច និងមហិទ្ធិឫទ្ធិខ្លាំងពូកែ តំណាងឱ្យវឌ្ឍនភាព និងភាពរឹងមាំរបស់វិស័យការងារ សន្តិសុខសង្គម និងបណ្តុះបណ្ដាលវិជ្ជាជីវៈលើមាគ៌ាសន្តិភាព។

គួរបញ្ជាក់ផងដែរថា នៅក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ក្នុងឆ្នាំ២០២៤នេះ មានពិធីបណ្តែតប្រទីបរបស់ក្រសួង ស្ថាប័ន និងក្រុមហ៊ុននានា សរុបចំនួន៣៦ប្រទីប នៅទន្លេចតុមុខ មុខព្រះបរមរាជវាំង រយៈពេលទាំង៣ថ្ងៃ នៃព្រះរាជពិធី៕ អត្ថបទ៖ ហ្សាលីន

The post តោះមកដឹងពីអត្ថន័យសំខាន់៩ ចំនុច របស់ប្រទីបក្រសួងការងារ ដែលបង្ហាញក្នុងពិធីបុណ្យអុំទូកឆ្នាំនេះ appeared first on .

លោក ឈិន កេតនា អគ្គលេខាធិការ នៃគណៈកម្មាធិការជាតិរៀបចំបុណ្យជាតិ-អន្តរជាតិ បានឱ្យដឹងថា ប្រទីបទាំង ៣៦ នោះ ដែលត្រៀមបណ្ដែតខ្លួនដើម្បីអបអរសាទរពិធីបុណ្យអុំទូកឆ្នាំនេះ រួមមាន៖១.ប្រទីបព្រះបរមរាជវាំង ២. ប្រទីបព្រឹទ្ធសភា ៣.ប្រទីបរដ្ឋសភា ៤-ប្រទីបរាជរដ្ឋាភិបាល ៥-ប្រទីបក្រសួងយុត្តិធម៌ ៦-ប្រទីបក្រសួងការពារជាតិ ៧-ប្រទីបក្រសួងមហាផ្ទៃ ៨-ប្រទីបក្រសួងការបរទេស និងសហប្រតិបត្តិការអន្តរជាតិ ៩-ប្រទីបក្រសួងធម្មការ និងសាសនា ១០-ប្រទីបក្រសួងសេដ្ឋកិច្ច និងហិរញ្ញវត្ថុ ១១-ប្រទីបក្រសួងកសិកម្ម រុក្ខាប្រមាញ់ និងនេសាទ។

១២-ប្រទីបក្រសួងអភិវឌ្ឍន៍ជនបទ ១៣-ប្រទីបក្រសួងពាណិជ្ជកម្ម ១៤-ប្រទីបក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ១៥-ប្រទីបក្រសួងរ៉ែ និងថាមពល ១៦-ប្រទីបក្រសួងផែនការ ១៧-ប្រទីបក្រសួងអប់រំ យុវជន និងកីឡា ១៨-ប្រទីបក្រសួងសង្គមកិច្ច អតីតយុទ្ធជន និងយុវនីតិសម្បទា១៩-ប្រទីបក្រសួងរៀបចំដែនដី នគរូបនីយកម្ម និងសំណង់ ។២០-ប្រទីបក្រសួងបរិស្ថាន ២១-ប្រទីបក្រសួងធនធានទឹក និងឧតុនិយម ២២-ប្រទីបក្រសួងព័ត៌មាន ២៣-ប្រទីបក្រសួងអធិការកិច្ច ២៤-ប្រទីបក្រសួងប្រៃសណីយ៍ និងទូរគមនាគមន៍ ២៥-ប្រទីបក្រសួងសុខាភិបាល ២៦-ប្រទីបក្រសួងសាធារណការ និងដឹកជញ្ជូន ២៧-ប្រទីបក្រសួងវប្បធម៌ និងវិចិត្រសិល្បៈ ២៨-ប្រទីបក្រសួងទេសចរណ៍ ២៩-ប្រទីបក្រសួងកិច្ចការនារី ៣០-ប្រទីបក្រសួងការងារ និងបណ្តុះបណ្តាលវិជ្ជាជីវៈ។

៣១-ប្រទីបក្រសួងមុខងារសាធារណៈ ៣២-ប្រទីបរដ្ឋលេខាធិការដ្ឋានអាកាសចរណ៍ស៊ីវិល ៣៣-ប្រទីបរដ្ឋលេខាធិការដ្ឋានកិច្ចការព្រំដែន ៣៤-ប្រទីបរដ្ឋបាលរាជធានីភ្នំពេញ ៣៥-ប្រទីបសហភាពសហព័ន្ធយុវជនកម្ពុជា និងចុងក្រោយគេ គឺ៣៦-ប្រទីបក្រុមហ៊ុនវឌ្ឍនៈ៕

The post ប្រទីបចំនួន ៣៦ ត្រៀមបណ្ដែតខ្លួននៅលើផ្ទៃទន្លេ ដើម្បីអបអរសាទរពិធីបុណ្យអុំទូកឆ្នាំនេះ appeared first on .

ថ្លែងក្នុងឱកាសដឹកនាំកិច្ចប្រជុំ  លោកនាយឧត្តមសេនីយ៍ ស ថេត អគ្គស្នងការនគរបាលជាតិ ពិធីបុណ្យអុំទូក នៅឆ្នាំ២០២៤នេះ ត្រូវបានរៀបចំយ៉ាងអធិកអធមជាងបណ្តាឆ្នាំមុនៗ ដោយក្នុងនោះ មានទូកចូលរួមប្រណាំងចំនួន៣៤៦គ្រឿង ចំណុះទូកជាង២ម៉ឺននាក់ ប្រទីបចំនួន៣៦ប្រទីប ទីតាំងប្រគុំតន្ដ្រី ប្រដាល់ និងពិធីផ្សេងៗ ចំនួន១០កន្លែង។

ក្នុងន័យនេះ លោកនាយឧត្តមសេនីយ៍ ស ថេត បានសង្កត់ធ្ងន់ដែរថា គ្រប់កម្លាំងសមត្ថកិច្ចទាំងអស់ដែលមានតួនាទីភារកិច្ចការពារសន្ដិសុខ សណ្ដាប់ធ្នាប់ សុវត្ថិភាព ក្នុងព្រះរាជពិធីនេះ គឺត្រូវបំពេញការងារប្រកបដោយការទទួលខុសត្រូវខ្ពស់បំផុត សំដៅធានាដល់កិច្ចសហការការពារសុវត្ថិភាពក្នុងឱកាសប្រារព្ធព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុកឆ្នាំ២០២៤។

ជាមួយគ្នានេះ អគ្គស្នងការនគរបាលជាតិ ក៏សុំនូវការយោគយល់អធ្យាស្រ័យចំពោះប្រជាពលរដ្ឋ ដែលត្រូវធ្វើដំណើរឆ្លងកាត់តំបន់ដែលមានការបិទផ្លូវ ឬក៏បញ្ហាកកស្ទះចរាចរណ៍ ដោយសារតែការប្រមូលផ្ដុំនៅទីតាំងកម្សាន្ដសប្បាយផ្សេងៗ ប៉ុន្ដែទោះជាយ៉ាងណាកម្លាំងសមត្ថកិច្ចទាំងអស់ នឹងខិតខំប្រឹងប្រែងប្រើប្រាស់គ្រប់លទ្ធភាព ដើម្បីកាត់បន្ថយនូវផលរំខានដោយប្រការណាមួយ។

បើតាមអគ្គស្នងការនគរបាលជាតិ កងកម្លាំងសរុបទាំងជាង១ម៉ឺន៦នាក់នេះ មកពី១៦ស្ថាប័ន អង្គភាព ក្នុងនោះមានអគ្គស្នងការដ្ឋាននគរបាលជាតិ, បញ្ជាការដ្ឋានកងរាជអាវុធហត្ថ, បញ្ជាការដ្ឋានអង្គរក្ស, បញ្ជាការដ្ឋានជាតិកម្លាំងពិសេសប្រឆាំងភេរវកម្ម, បញ្ជាការដ្ឋានកងទ័ពជើងទឹក, យោធភូមិភាគពិសេស, ក្រសួងសុខាភិបាល, គណៈបញ្ជាការឯកភាពរដ្ឋបាលរាជធានីភ្នំពេញ, ការិយាល័យទី២ នៃកងទ័ពជើងគោក, អគ្គិសនីកម្ពុជា, ក្រុមបច្ចេកទេសរុករកជាតិផ្ទុះកែច្នៃ, អាជ្ញាធរជាតិអាវុធគីមី ជីវសាស្ដ្រ វិទ្យុសកម្ម នុយក្លេអ៊ែរ, គណៈកម្មាធិការជាតិប្រឆាំងភេរវកម្ម, អគ្គនាយកដ្ឋានស្រាវជ្រាវចារកិច្ច, ក្រសួងប្រៃសណីយ៍ និងទូរគមនាគមន៍ និងភ្នាក់ងារសន្ដិសុខឯកជន៕ អត្ថបទ៖ ហ្សាលីន

The post កងកម្លាំងជាង១ម៉ឺន៦នាក់ ត្រៀមការពារ សន្ដិសុខ សណ្ដាប់ធ្នាប់ ក្នុងពិធីបុណ្យអុំទូកឆ្នាំនេះ appeared first on .

ការចេញបញ្ជារបស់លោក ឃួង ស្រេង ធ្វើឡើងនៅក្នុងឱកាសនៃការបើកអង្គប្រជុំស្ដីពីការរៀបចំសន្តិសុខសណ្ដាប់ធ្នាប់តុបតែងលម្អរាជធានីភ្នំពេញក្នុងព្រះរាជពិធីបុណ្យអុំទូក នាព្រឹកថ្ងៃទី៨ ខែវិច្ឆិកា ឆ្នាំ២០២៤។

នាឱកាសនោះ លោក ឃួង ស្រេង បានលើកឡើងថា «ក្នុងនាមជាម្ចាស់ផ្ទះ យើងត្រូវគិតគូឱ្យបានគ្រប់ជ្រុងជ្រោយ ទាំងការគ្រប់គ្រងកម្លាំង ការងារសង្គ្រោះបន្ទាន់ បង្កើតទីបញ្ជាការស្រាលក្នុងកិច្ចប្រតិបត្តិការណ៍ ការពារសន្តិសុខ សុវត្ថិភាពក្នុងព្រះរាជពិធីបុណ្យអុំទូក ទប់ស្កាត់ការលំហូរចរាចរណ៍ ចំពោះរថយន្តមួយចំនួនចូលមកក្នុងរាជធានី ទប់ស្កាត់ ជនអាណាថា ចោរលូក ហោប៉ៅជាដើមនិងការបង្ការទប់ស្កាត់ហានិភ័យនៃគ្រោះអគ្គីភ័យ និងការគិតគូពីអនាម័យបរិស្ថាន»។

លោកបានបន្ដថា នៅក្នុងរាជពិធីបុណ្យអុំទូកឆ្នាំនេះ ទាំងខាងក្នុងនិងក្រៅព្រះរាជពិធី កម្លាំងសមត្ថកិច្ចត្រូវតែធានាឱ្យបាន សន្តិសុខ សុវត្ថិភាព១០០% ថ្វាយព្រះមហាក្សត្រ,ជូនថ្នាក់ដឹកនាំជាន់ខ្ពស់របស់ជាតិនិងប្រជាពលរដ្ឋដែលចូលមកដើរលេងកំសាន្ត។ បន្ថែមពីនោះ ទាំងកងកម្លាំងនិងសម្ភារៈផ្សេងៗ បើខ្វះខាតត្រូវរាយការណ៍ភ្លាម ដើម្បីយើងបានដោះស្រាយទាន់សភាពការណ៍ ធ្វើយ៉ាងណាឱ្យព្រះរាជពិធីបុណ្យអុំទូកឆ្នាំនេះ ដំណើរការទៅដោយរលូននិងទទួលបានជោគជ័យ។

សូមជម្រាបជូនផងដែរថា ក្នុងព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក ឆ្នាំ២០២៤ នឹងប្រព្រឹត្តទៅចំនួន ០៣ថ្ងៃ គឺនៅថ្ងៃទី១៤-១៥-១៦ ខែវិច្ឆិកា ឆ្នាំ២០២៤ មានទីតាំងនៅតាមដងទន្លេសាប ចាប់ពីស្ពានជ្រោយចង្វារ ដល់កោះពេជ្រ ក្រោមព្រះរាជាធិបតីភាពដ៏ខ្ពង់ខ្ពស់ ព្រះករុណាព្រះបាទសម្តេចព្រះបរមនាថ នរោត្តម សីហមុនីព្រះមហាក្សត្រ នៃព្រះរាជាណាចក្រកម្ពុជា៕

The post អភិបាលរាជធានីភ្នំពេញ​ បញ្ជាដល់ដល់ភាគីពាក់ព័ន្ធត្រៀមការពារសន្ដិសុខ សុវត្ថិភាពដល់ប្រជាពលរដ្ឋ ក្នុងឱកាសពិធីបុណ្យអុំទូក appeared first on .

តាមរយៈសារនៅលើបណ្តាញសង្គមហ្វេសប៊ុក របស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា នៅព្រឹកថ្ងៃទី២៩ ខែវិច្ឆិកា ឆ្នាំ២០២៣ បានលើកឡើងថា សម្តេចធិបតី និងភរិយាមានការសប្បាយរីករាយយ៉ាងខ្លាំងដែលបានចូលរួមនៅក្នុងព្រះរាជពិធីបុណ្យអុំទូក បណ្ដែតប្រទីប សំពះព្រះខែ អកអំបុកនៅឆ្នាំ ២០២៣ នេះ។

សម្តេចធិបតី ហ៊ុន ម៉ាណែត បានបន្តថា ឆ្នាំនេះមានបងប្អូនប្រជាពលរដ្ឋខ្មែរទាំងអ្នករាជធានីភ្នំពេញនិងអ្នកមកពីតាមបណ្ដាខេត្ត ក៏ដូចជាជនជាតិបរទេសដែលមានវត្តមាននៅព្រះរាជាណាចក្រកម្ពុជាបានចូលរួមយ៉ាងច្រើនកុះករ ក្នុងរយៈពេល ៣ថ្ងៃនេះ។

សម្តេចធិបតី បានសង្កត់ធ្ងន់បន្ថែមថា៖«ខ្ញុំសូមធ្វើការកោតសរសើរនិងវាយតម្លៃខ្ពស់ចំពោះគណៈកម្មការរៀបចំពិធីបុណ្យអុំទូក បណ្តែតប្រទីប សាលារាជធានីភ្នំពេញ សមត្ថកិច្ចគ្រប់អង្គភាព និងរាល់ក្រសួង ស្ថាប័នពាក់ព័ន្ធ ដែលបានសហការគ្នាក្នុងការរៀបចំពិធី ដែលបានប្រព្រឹត្តទៅដោយរលូន មានសន្តិសុខសណ្ដាប់ធ្នាប់ល្អ ដែលបង្កលក្ខណៈឱ្យប្រជាពលរដ្ឋយើងបានចូលរួមសប្បាយរីករាយ»។

ជាថ្មីម្តងទៀត​ សម្តេចធិបតី ក៏សូមសរសើរចំពោះបងប្អូនគណៈកម្មការគ្រប់គ្រងការប្រកួតក៏ដូចជាកីឡាករ កីឡាការនីដែលចូលរួមក្នុងការប្រណាំងទូក និងក្រុមការងារពាក់ព័ន្ធទាំងអស់ដែលបានខិតខំអស់កម្លាំងកាយចិត្តក្នុងការគ្រប់គ្រងការប្រកួត ក៏ដូចជាខិតខំប្រកួតដោយស្មារតីសាមគ្គីភាពនិងគោរពគ្នាទៅវិញទៅមក ដែលធ្វើឱ្យការប្រកួតអុំទូកនេះមានភាពជោគជ័យជារួម ទោះជាលទ្ធផលយ៉ាងណាក៏ដោយសម្រាប់ទូកនីមួយៗ។

ក្រៅពីនេះ សម្តេចធិបតី ក៏បានអរគុណដល់បណ្ដាក្រសួងស្ថាប័ន និងក្រុមហ៊ុនឯកជនដែលបានចូលរួមរៀបចំប្រទីបស្អាតៗទាំងសោភ័ណភាព ទាំងអត្ថន័យល្អៗ ដើម្បីបង្ហាញដល់បងប្អូនប្រជាពលរដ្ឋបានទស្សនាក្នុងពេលរាត្រី ក្រោយពេលប្រណាំងទូកបានបញ្ចប់ក្នុងថ្ងៃនីមួយៗ។ ជាមួយគ្នានេះដែរការរៀបចំកន្លែងកំសាន្ត និងការប្រគំតន្ត្រីជាច្រើនកន្លែង បានញ៉ាំងឲ្យពិធីនេះកាន់តែមានភាពអធិកអធម និងសប្បាយរីករាយសម្រាប់បងប្អូនប្រជាពលរដ្ឋយើង។

សូមរម្លឹកដែរថា ពាក់ព័ន្ធនឹងព្រះរាជពិធីបុណ្យអ៊ុំទូកនេះដែរ លោក ប៉ែន បូណា អ្នកនាំពាក្យរាជរដ្ឋាភិបាលបានគូសបញ្ជាក់ដែរថា ព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក រយៈពេល៣ថ្ងៃ បានប្រារព្ធធ្វើយ៉ាងអធិកអធម និងប្រកបដោយជោគជ័យ។ ប្រជាពលរដ្ឋខ្មែរនិងភ្ញៀវទេសចរបរទេសជាច្រើនលាននាក់បានចូលរួមកម្សាន្តសប្បាយនៅរាជធានីភ្នំពេញនិងតាមបណ្តាខេត្តក្រោមម្លប់សុខសន្តិភាពប្រកបដោយក្តីសប្បាយរីករាយក្រៃលែងក្នុងសណ្តាប់ធ្នាប់យ៉ាងល្អប្រសើរ។ នេះជាពិធីបុណ្យអុំទូកលើកដំបូងសម្រាប់រាជរដ្ឋាភិបាលបន្តវេនអាណត្តិទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត៕ អត្ថបទ៖ រង្សី

The post សម្តេចធិប​តី ហ៊ុន ម៉ាណែត៖ ពិធីបុណ្យអុំទូកឆ្នាំនេះ ប្រព្រឹត្តទៅដោយរលូន និងមានសន្តិសុខសណ្ដាប់ធ្នាប់ល្អ appeared first on .