មហាសេដ្ឋីអាស៊ី

ត្រឹម ៨ខែដំបូងឆ្នាំនេះ ទ្រព្យសម្បត្តិមហាសេដ្ឋីកំពូលៗរបស់អាស៊ី ៥រូប ប្រែប្រួលយ៉ាងណាខ្លះ?

ឧកញ៉ាសាមញ្ញ — Mon, 25 Aug 2025 09:30:21 +0000

មហាសេដ្ឋីមានដាច់គេបំផុតទាំង៥ នៅក្នុងតំបន់អាស៊ី ត្រូវបានគេមើលឃើញថាទ្រព្យសម្បត្តិរួមរបស់ពួកគេ មានការកើនឡើង ១៩% រហូតដល់ចំនួនប្រមាណ ៣៧៦ពាន់លានដុល្លារ គិតត្រឹម ៨ខែដំបូងឆ្នាំនេះ។

បើទោះបីជាពន្ធគយនាំចូលរបស់សហរដ្ឋអាមេរិក កាលពីដើមឆ្នាំនេះ បានបង្កឲ្យមានការព្រួយបារម្ភក្នុងចំណោមអ្នកវិនិយោគលើភាគហ៊ុនជាច្រើន ក៏ដោយ ប៉ុន្តែទីផ្សារភាគហ៊ុននៅអាស៊ី ហាក់នៅតែបន្តមានការកើនឡើង នៅក្នុងពេលប៉ុន្មានខែថ្មីៗនេះ ដែលធ្វើឲ្យចំនួនទ្រព្យម្បត្តិរបស់ មហាសេដ្ឋីនៅក្នុងតំបន់នេះ មានការកើនឡើង ផងដែរ។

យ៉ាងណាមិញ ខាងក្រោមនេះ ជាបញ្ជីឈ្មោះមហាសេដ្ឋីទាំង៥ របស់អាស៊ី ដែលមានការប្រែប្រួលចំនួនទ្រព្យសម្បត្តិរបស់ពួកគេ ដោយផ្អែកតាមរបាយការណ៍ពី Bloomberg។

១. Mukesh Ambani ជាប្រធាន និងជានាយកប្រតិបត្តិរបស់ក្រុមហ៊ុន Reliance Industries ។ លោកបន្តជាប់ឈ្មោះជាអ្នកមានដាច់គេបំផុតនៅអាស៊ី ជាមួយទ្រព្យសម្បត្តិសរុប ១០២ពាន់លានដុល្លារ ពោលគឺបានកើនឡើង ១១,៧% គិតចាប់តាំងពីដើមឆ្នាំនេះមក។

២. Gautam Adani ជាប្រធានក្រុមហ៊ុនខ្នាតយក្សឥណ្ឌា Adani Group ។ ទ្រព្យសម្បត្តិរបស់លោក មានការកើនឡើង ២,៤% គិតរហូតមកដល់ពេលនេះ ដល់ចំនួនសរុបប្រមាណ ៧៩,២ពាន់លានដុល្លារ។

៣. Zhong Shanshan ជាស្ថាបនិក និងជាប្រធានក្រុមហ៊ុនភេសជ្ជៈ Nongfu Spring ដែលមានទ្រព្យសម្បត្តិសរុបចំនួន ៦៨,៥ពាន់លានដុល្លារ កើនឡើង ២៥% គិតចាប់តាំងពីដើមឆ្នាំនេះមក។

៤. Ma Huateng ជាសហស្ថាបនិក និងជានាយកប្រតិបត្តិនៃក្រុមហ៊ុនបច្ចេកវិទ្យាខ្នាតយក្សចិន Tencent លោកមានទ្រព្យសម្បត្តិសរុបចំនួន ៦៤,៣ពាន់លានដុល្លារ កើនឡើង ៣៤% គិតរហូតមកដល់ពេលនេះ។

៥. Zhang Yiming ជាសហស្ថាបនិកByteDance ដែលជាក្រុមហ៊ុនមេរបស់ TikTok ។ លោកជាមហាសេដ្ឋីដែលកើនទ្រព្យសម្បត្តិច្រើនបំផុត ៣៦% ដល់ចំនួនសរុប ៥៩,៥ពាន់លានដុល្លារ៕

The post ត្រឹម ៨ខែដំបូងឆ្នាំនេះ ទ្រព្យសម្បត្តិមហាសេដ្ឋីកំពូលៗរបស់អាស៊ី ៥រូប ប្រែប្រួលយ៉ាងណាខ្លះ? appeared first on .

ទ្រព្យសម្បត្តិមហាសេដ្ឋីកំពូលៗនៅអាស៊ី ធ្លាក់ចុះអស់ជាង ៤៥ពាន់លានដុល្លារ ដោយសារពន្ធរបស់ ត្រាំ

ឧកញ៉ាសាមញ្ញ — Tue, 08 Apr 2025 07:57:34 +0000

ទ្រព្យសម្បត្តិរបស់មហាសេដ្ឋីកំពូលៗនៅក្នុងតំបន់អាស៊ី ត្រូវបានគេរាយការណ៍ថា បានធ្លាក់ចុះអស់ដល់ទៅរាប់សិបពាន់លានដុល្លារ ខណ:ពេលដែលទីផ្សារហ៊ុនរបស់ពិភពលោក កំពុងមានភាពរង្គោះរង្គើខ្លាំង បន្ទាប់ពីពីការប្រកាសដាក់ចេញវិធានការពន្ធគយទ្រង់ទ្រាយធំថ្មីបន្ថែម របស់ប្រធានាធិបតី លោក ដូណាល់ ត្រាំ ។

យោងតាមសន្ទស្សន៍មហាសេដ្ឋីរបស់ Bloomberg បានឲ្យដឹងថា បុគ្គលដែលមានបំផុតទ្រព្យសម្បត្តិច្រើនជាងគេបំផុតទាំង ២០ របស់អាស៊ី បានមើលឃើញទ្រព្យសម្បត្តិរួមរបស់ពួកគេ ធ្លាក់ចុះអស់ ៤៥,៩ពាន់លានដុល្លារ ពោលគឺបន្ទាប់ពីទីផ្សារហ៊ុនដ៏ធំបំផុតមួយរបស់អាស៊ី MSCI Asia Pacific បានធ្លាក់ចុះដល់ទៅ ៨,៥% ។

យ៉ាងណាមិញ សហស្ថាបនិកក្រុមហ៊ុន Tencent Holdings លោក Pony Ma ដែលត្រូវបានចាត់ទុកថាជាមហាសេដ្ឋីលំដាប់កំពូលមួយរបស់អាស៊ីនោះ ត្រូវបានគេមើលឃើញថាបានធ្លាក់ចុះទ្រព្យសម្បត្តិអស់ច្រើនជាងគេ ពោលគឺដល់ទៅប្រមាណ ៦,៨ពាន់លានដុល្លារ ឬស្មើ ១២% នៃទ្រព្យសម្បត្តិសរុបរបស់លោក។

ដោយឡែកនៅប្រទេសឥណ្ឌា មហាសេដ្ឋីរកស៊ីផ្នែកហេដ្ឋរចនាសម្ព័ន្ធ លោក Gautam Adani បានឃើញទ្រព្យសម្បត្តិរបស់ខ្លួនធ្លាក់ចុះចំនួន ៤,២ពាន់លានដុល្លារ ស្របពេលលោក Robin Zeng ដែលជាមហាសេដ្ឋីលំដាប់កំពូលរបស់ហុងកុង បានធ្លាក់ចុះទ្រព្យអស់ប្រមាណ ៤,១ពាន់លានដុល្លារ ផងដែរ។

ជម្រាបជូនផងដែរថា មហាសេដ្ឋីទាំង ៥០០ របស់ពិភពលោក ក៏ត្រូវបានគេរាយការណ៍ថា បានខាតបង់ទឹកប្រាក់សរុបអស់ដល់ទៅជាងកន្លះទ្រីលានដុល្លារឯណោះ នៅចន្លោះថ្ងៃបើកការជួញដូរដំបូង នៅថ្ងៃព្រហស្បតិ៍ និងថ្ងៃបិទទៅវិញ នៅថ្ងៃសុក្រសប្តាហ៍មុន ដែលជាការធ្លាក់ចុះដ៏ធំបំផុតមួយមិនធ្លាប់មាន ក្នុងរយៈពេលត្រឹមតែពីរថ្ងៃ៕

The post ទ្រព្យសម្បត្តិមហាសេដ្ឋីកំពូលៗនៅអាស៊ី ធ្លាក់ចុះអស់ជាង ៤៥ពាន់លានដុល្លារ ដោយសារពន្ធរបស់ ត្រាំ appeared first on .

ទ្វីបអាស៊ីធ្លាក់ដល់លេខរៀងទី៣ ជាជម្រកមហាសេដ្ឋីច្រើនរស់នៅច្រើនបំផុត

ឧកញ៉ាសំពៅ — Tue, 21 Nov 2023 02:02:00 +0000

យោងតាមរបាយការណ៍ពីគេហទំព័រ Statista បានបង្ហាញឲ្យដឹងថា ទ្វីបអាស៊ីលែងជាជម្រករបស់ក្រុមមហាសេដ្ឋីរស់នៅច្រើនបំផុតលើលោកទៀតហើយ ដោយបានធ្លាក់មកនៅលេខរៀងទី៣ ខណៈអាមេរិកខាងជើងនៅលំដាប់កំពូល និងអឺរ៉ុបឈរនៅបន្ទាប់។

ប្រភពដដែលបន្ថែមថា គិតនៅត្រឹមឆ្នាំ២០២២ ទ្វីបអាមេរិកខាងជើងមានចំនួនមហាសេដ្ឋីរស់នៅច្រើនបំផុតលើលោក ប្រមាណ ១ ០១១នាក់ ខណៈនៅអឺរ៉ុបមានមហាសេដ្ឋី ៩៣៣នាក់ និងនៅអាស៊ីមានប្រមាណ ៨៣៥នាក់។

មូលហេតុដែលធ្វើឲ្យអាស៊ីរបូតតំណែងជាជម្រករបស់ក្រុមមហាសេដ្ឋីរស់នៅច្រើនបំផុតលើលោក គឺដោយសារចិនរបូតអស់មហាសេដ្ឋីច្រើនសន្ធឹក ព្រោះតែវិបត្តិដែលមហាអំណាចអាស៊ីកំពុងជួបប្រទះ ដូចជាវិបត្តិអចលនទ្រព្យជាដើម។

សូមជម្រាបដែរថា បច្ចុប្បន្ន មេធំក្រុមហ៊ុន Tesla គឺជាមហាសេដ្ឋីមានបំផុតនៅអាមេរិក និងនៅលើពិភពលោក ជាមួយទំហំទ្រព្យសម្បត្តិប្រមាណ ២៤១ពាន់លានដុល្លារ ខណៈអ្នកមានដាច់គេនៅអឺរ៉ុបគឺ មហាសេដ្ឋី Bernard Arnault មានទ្រព្យសម្បត្តិ ១៩២ពាន់លានដុល្លារ ស្របពេលមហាសេដ្ឋីមានប្រចាំទ្វីបអាស៊ីគឺ លោក Mukesh Ambani មានទ្រព្យសម្បត្តិប្រហែល ៩១,៤ពាន់លានដុល្លារ៕

The post ទ្វីបអាស៊ីធ្លាក់ដល់លេខរៀងទី៣ ជាជម្រកមហាសេដ្ឋីច្រើនរស់នៅច្រើនបំផុត appeared first on .

ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍

ឧកញ៉ាសំពៅ — Mon, 20 Nov 2023 03:11:00 +0000

ស្ដេចសុលតង់នៃប្រទេសប៊្រុយណេ ជាបុគ្គលមានឥទ្ធិពលមួយរូបនៅប៉ែកអាស៊ីអាគ្នេយ៍នេះ ហើយធ្លាប់ល្បីសុសសាយជាបុគ្គលមានបំផុតប្រចាំតំបន់ តែការពិតមិនអីចឹងទេ។

បើទោះជាទ្រង់ជាប់ងារជាបុគ្គលមានឥទ្ធិពលមួយរូបក្នុងចំណោមមនុស្សរាប់រយលាននាក់ក៏ពិតមែន តែបើនិយាយពីទំហំទ្រព្យសម្បត្តិវិញ គឺនៅចាញ់ស្ដេចត្រាញ់ឥណ្ឌូណេស៊ីនៅឡើយ គឺលោក Prajogo Pangestu ដែលមានទ្រព្យសម្បត្តិច្រើនបំផុតនៅអាស៊ីអាគ្នេយ៍។

ខាងក្រោមនេះ គឺជាបញ្ជីឈ្មោះមហាសេដ្ឋីមានបំផុតប្រចាំប្រទេសនៅតំបន់អាស៊ីអាគ្នេយ៍ សម្រាប់ឆ្នាំ ២០២៣ ផ្អែកតាមទិន្នន័យផ្ដល់ឲ្យដោយ Forbes៖

1/ មហាសេដ្ឋី Prajogo Pangestu នៃប្រទេសឥណ្ឌូណេស៊ី មានទ្រព្យសម្បត្តិប្រមាណ ៤៦,២ពាន់លានដុល្លារ

2/ ស្ដេចសុលតង់ Sultan Hassanal Bolkiah នៃប្រទេសប៊្រុយណេ មានទ្រព្យសម្បត្តិប្រមាណ ៣០ពាន់លានដុល្លារ

3/ លោក Li Xiting នៃប្រទេសសិង្ហបុរី មានទ្រព្យសម្បត្តិប្រមាណ ១៤,៦ ពាន់លានដុល្លារ

4/ បងប្អូនត្រកូល Chearavanont នៃប្រទេសថៃ មានទ្រព្យសម្បត្តិប្រមាណ ១២,៦ពាន់លានដុល្លារ

5/ លោក Tan Sri Robert Kuok នៃប្រទេសម៉ាឡេស៊ី មានទ្រព្យសម្បត្តិប្រមាណ ១០,៣ពាន់លានដុល្លារ

6/ មហាសេដ្ឋី Manuel Villar នៃប្រទេសហ្វីលីពីន មានទ្រព្យសម្បត្តិប្រមាណ ៩,២ពាន់លានដុល្លារ

7/ លោក Pham Nhat Vuong នៃប្រទេសវៀតណាម មានទ្រព្យសម្បត្តិប្រមាណ ៤,៤ពាន់លានដុល្លារ

បញ្ជាក់ដែរថា ដោយសារនៅប្រទេស ៤ផ្សេងទៀតដូចជា ប្រទេសឡាវ កម្ពុជា មីយ៉ាន់ម៉ា និងទីម័រខាងកើតមិនមានព័ត៌មានបញ្ជាក់ច្បាស់លាស់ពីទំហំទ្រព្យសម្បត្តិរបស់បុគ្គលមានបំផុតប្រចាំប្រទេស ទើបឧកញ៉ាញូវសន៍មិនអាចរកទិន្នន័យមកចុះផ្សាយបាន៕

The post ទម្លាយឈ្មោះមហាសេដ្ឋីមានបំផុតប្រចាំប្រទេស នៅតំបន់អាស៊ីអាគ្នេយ៍ appeared first on .

ល្បីចិនពូកែរកស៊ី តែមហាសេដ្ឋីមានបំផុតនៅអាស៊ីបែរជាជនជាតិឥណ្ឌាវិញ

ឧកញ៉ាសំពៅ — Thu, 14 Sep 2023 08:57:00 +0000

ទ្វីបអាស៊ី គឺប្រមូលផ្ដុំមហាសេដ្ឋីច្រើនបំផុតលើលោក ប្រមាណ ៩៥១នាក់ ដែលក្នុងនោះចិន និងឥណ្ឌាសំបូរមហាសេដ្ឋីច្រើនជាងគេ ពោលចិនមានប្រមាណ ៤៤០ នាក់ ខណៈឥណ្ឌាមាន ១៦១ នាក់ ដោយក្នុងនោះអ្នកមានបំផុតប្រចាំទ្វីបគឺលោក Mukesh Ambani ម្ចាស់ក្រុមហ៊ុន Reliance Industries Limited។

ខាងក្រោមនេះគឺជាបញ្ជីឈ្មោះមហាសេដ្ឋីមានបំផុតប្រចាំទ្វីបអាស៊ី ផ្អែកតាមការចុះផ្សាយពីទស្សនាវដ្ដី Forbes៖

1/ Mukesh Ambani

បុគ្គលឈរនៅកំពូលតារាងរូបនេះ គឺជាមហាសេដ្ឋីជនជាតិឥណ្ឌាដែលមានទំហំទ្រព្យសម្បត្តិប្រមាណ ៩៥,៧ពាន់លានដុល្លារ ហើយលោកគឺជាម្ចាស់ភាគហ៊ុនធំបំផុតនៃក្រុមហ៊ុនថាមពល និងទូរគមនាគមន៍ Reliance Industries ដែលក្ដោបក្ដាប់វិស័យផ្សេងៗដូចជា គីមីឥន្ធនៈ ប្រេង ឧស្ម័ន ទូរគមនាគមន៍ជាដើម។

2/ Zhong Shanshan

បុរសដែលមានរហស្សនាមថា “ស្ដេចទឹកបរិសុទ្ធ” Zhong Shanshan គឺជាស្ថាបនិកនៃក្រុមហ៊ុនផលិតទឹកបរិសុទ្ធ Nongfu Spring គឺជាមហាសេដ្ឋីមានបំផុតទី ២ ប្រចាំទ្វីបអាស៊ីដោយលោកមានដើមកំណើតជាជនជាតិចិន។

បច្ចុប្បន្ន លោកមានទ្រព្យសម្បត្តិប្រមាណ ៦២,២ពាន់លានដុល្លារ។

3/ Gautam Adani

មហាសេដ្ឋីឥណ្ឌាទី ២ គឺលោក Gautam Adani ដែលលោកគឺជា CEO នៃក្រុមហ៊ុន Adani Groups ដែលកាន់កាប់មុខជំនួញជាច្រើនដែលមានដូចជា កំពង់ផែ Mundra Port, Adani Enterprises, Adani Green, Adani Total Gas, Adani Power ជាដើម។

បច្ចុប្បន្ន Adani គឺជាមហាសេដ្ឋីមានបំផុតទី ២ នៅប្រទេសឥណ្ឌា ដែលមានទំហំទ្រព្យសម្បត្តិប្រមាណ ៥៦,៣ពាន់លានដុល្លារ។

4/ Zhang Yiming

សហស្ថាបនិក និងជាអតីត CEO ក្រុមហ៊ុន ByteDacne ដែលជាក្រុមហ៊ុនមេកម្មវិធីល្បីល្បាញ TikTok មានទ្រព្យសម្បត្តិប្រមាណ ៣៩,១ពាន់លានដុល្លារ។

5/ Li Ka-shing

បុរសដែលមានរហស្សនាមថា Superman និងជាមហាសេដ្ឋីហុងកុងតែម្នាក់គត់ក្នុងបញ្ជីមួយនេះ មានទ្រព្យសម្បត្តិប្រមាណ ៣៧,៨ពាន់លានដុល្លារ និងមានអាជីវកម្មជាច្រើននៅក្នុងដៃ។

6/ Tadashi Yanai

ជាជនជាតិជប៉ុនតែម្នាក់គត់ ក្នុងបញ្ជីឈ្មោះមួយនេះ ហើយលោកគឺជាស្ថាបនិក និងជា CEO ក្រុមហ៊ុន Fast Retailing ក្រុមហ៊ុនមេ Uniqlo ខណៈទ្រព្យសម្បត្តិរបស់លោកមានប្រមាណ ៣៥,៩ពាន់លានដុល្លារ។

7/ Pony Ma Huateng

ជានាយកប្រតិបត្តិក្រុមហ៊ុនយក្ស Tencent Holdings ដែលជាប់ឈ្មោះជាក្រុមហ៊ុនធំបំផុតប្រចាំប្រទេស បើផ្អែកតាមមូលធនទីផ្សារ។

បុរសរូបនេះមានដើមកំណើតជាជនជាតិចិន ដែលមានទំហំទ្រព្យសម្បត្តិសរុប ៣៥,២ពាន់លានដុល្លារ។

8/ Colin Zheng Huang

ស្ថាបនិកក្រុមហ៊ុន Pinduoduo ដែលឥឡូវនេះជាវេទិកាកសិកម្មដ៏ធំបំផុតនៅក្នុងប្រទេសចិន ខណៈបច្ចុប្បន្នទ្រព្យសម្បត្តិរបស់លោក មានប្រមាណ ៣៤,៦ពាន់លានដុល្លារ។

9/ William Lei Ding

ស្ថាបនិក និងជា CEO ក្រុមហ៊ុន NetEase ដែលជំនាញលើការផលិតហ្គេម ផ្គត់ផ្គង់សេវាកម្មអ៊ីនធឺណិត និងការធ្វើពាណិជ្ជកម្មអេឡិចត្រូនិច មានទ្រព្យសម្បត្តិប្រមាណ ៣២,១ឹពាន់លានដុល្លារ

10/ Robin Zeng

ជាស្ថាបនិកក្រុមហ៊ុន CATL ដែលជាអ្នកផលិតអាគុយលីចូម – អ៊ីយ៉ុងសម្រាប់រថយន្តអគ្គិសនី ធំបំផុតមួយលើពិភពលោក ហើយទ្រព្យសម្បត្តិរបស់លោកមានប្រមាណ ៣៤ពាន់លានដុល្លារ។

សូមជម្រាបដែរថា ចំណែកឯមហាសេដ្ឋីនៅតំបន់អាស៊ីអាគ្នេយ៍វិញមានសរុប ១១៤ នាក់ តៃវ៉ាន់មាន ៤៥ នាក់ កូរ៉េខាងត្បូងមាន ២៨ នាក់ និងជប៉ុនមាន ២៧ នាក់។ នេះបើតាមការចុះផ្សាយពីសារព័ត៌មាន Nikkei Asia៕

The post ល្បីចិនពូកែរកស៊ី តែមហាសេដ្ឋីមានបំផុតនៅអាស៊ីបែរជាជនជាតិឥណ្ឌាវិញ appeared first on .

លាតត្រដាងរហស្សនាមគ្រួសារមានទ្រព្យច្រើនបំផុតប្រចាំតំបន់អាស៊ី

ឧកញ៉ាសំពៅ — Sat, 02 Sep 2023 02:00:00 +0000

ទ្វីបអាស៊ី គឺមានផ្ទៃដីធំបំផុតលើលោក ដូច្នេះចំនួនប្រជាជនក៏ច្រើនលើសលុប បើធៀបនឹងទ្វីបដទៃទៀត ខណៈចំនួនមហាសេដ្ឋីក៏មានរាប់រយនាក់ដូចគ្នា។

កន្លងមក ឧកញ៉ាញ៉ូវស៍ធ្លាប់តែលើកឡើងពីបុគ្គលមានលុយច្រើនបំផុតនៅអាស៊ី ប៉ុន្តែសម្រាប់អត្ថបទមួយនេះវិញ ពួកយើងនឹងមកចែករំលែកពីគ្រួសារមហាសេដ្ឋី មានលុយច្រើនបំផុតប្រចាំតំបន់អាស៊ីវិញម្ដង។

ក្នុងចំណោមគ្រួសារទាំង ១០នោះ គ្រួសារត្រកូល Ambani មានលុយច្រើនបំផុត ខណៈត្រកូល Hartono ស្ថិតនៅលំដាប់លេខរៀងទី ២។

ខាងក្រោមនេះគឺជាបញ្ជីឈ្មោះ គ្រួសារមានបំផុតទាំង ១០ គ្រួសារនៅទ្វីបអាស៊ី ផ្អែកតាមរបាយការណ៍ផ្សាយដោយ Prestige៖

1/គ្រួសារត្រកូល Ambani ប្រទេសឥណ្ឌា មានទ្រព្យសម្បត្តិប្រមាណ ៧៩,៣ ពាន់លានដុល្លារ

2/គ្រួសារត្រកូល Hartono ប្រទេសឥណ្ឌូណេស៊ី មានទ្រព្យសម្បត្តិប្រមាណ ៣៨,៨ពាន់លានដុល្លារ

3/គ្រួសារត្រកូល Kwok ទីក្រុងហុងកុង មានទ្រព្យសម្បត្តិប្រមាណ ៣៤,៨ ពាន់លានដុល្លារ

4/គ្រួសារត្រកូល Mistry ប្រទេសឥណ្ឌា មានទ្រព្យសម្បត្តិប្រមាណ ២៨,៤ ពាន់លានដុល្លារ

5/គ្រួសារត្រកូល Chearavanont ប្រទេសថៃ មានទ្រព្យសម្បត្តិប្រមាណ ២៨,២ ពាន់លានដុល្លារ

6/គ្រួសារត្រកូល Yoovidhya ប្រទេសថៃ មានទ្រព្យសម្បត្តិប្រមាណ ២៧,៤ ពាន់លានដុល្លារ

7/គ្រួសារត្រកូល Cheng ទីក្រុងហុងកុង មានទ្រព្យសម្បត្តិប្រមាណ ២៥,៩ ពាន់លានដុល្លារ

8/គ្រួសារត្រកូល Woo ទីក្រុងហុងកុង មានទ្រព្យសម្បត្តិប្រមាណ ២២,៦ ពាន់លានដុល្លារ

9/គ្រួសារត្រកូល Tsai កោះតៃវ៉ាន់ មានទ្រព្យសម្បត្តិប្រមាណ ២១,៤ ពាន់លានដុល្លារ

10/គ្រួសារត្រកូល Lee ប្រទេសកូរ៉េខាងត្បូង មានទ្រព្យសម្បត្តិប្រមាណ ១៨,៥ ពាន់លានដុល្លារ៕

The post លាតត្រដាងរហស្សនាមគ្រួសារមានទ្រព្យច្រើនបំផុតប្រចាំតំបន់អាស៊ី appeared first on .

អតីតមហាសេដ្ឋីស្រីមានបំផុតនៅអាស៊ី បរិច្ចាគទឹកប្រាក់ច្រើនជាង ៨០០លានដុល្លារ

ឧកញ៉ាសំពៅ — Thu, 03 Aug 2023 07:35:32 +0000

បច្ចុប្បន្ន ក្រុមមហាសេដ្ឋីចិនជាច្រើនរូបហាក់បង្កើនការប្រុងប្រយ័ត្នជាខ្លាំង ចំពោះការវិនិយោគលុយ ក៏ដូចជាប្រើប្រាស់លុយរបស់ពួកគេ អំឡុងពេលសេដ្ឋកិច្ចរបស់មហាអំណាចអាស៊ី ជួបប្រទះវិបត្តិអលនទ្រព្យ។

យ៉ាងណា អតីតមហាសេដ្ឋីស្រី មានបំផុតនៅអាស៊ី Yang Huiyan បែរជាធ្វើផ្ទុយស្រឡះ ពីក្រុមមហាសេដ្ឋីដទៃ ពោលគឺថ្មីៗនេះ លោកស្រីបានបរិច្ចាគចំណែកភាគហ៊ុនផ្ទាល់ខ្លួន ប្រហែល ៥៥% ដែលមានតម្លៃស្មើនឹង ៨២៦លានដុល្លារ ទៅកាន់មូលនិធិសប្បុរសធម៌មួយកន្លែង បង្កើតឡើងដោយប្អូនស្រីបង្កើតរបស់លោកស្រី។ នេះបើតាមការចុះផ្សាយពីសារព័ត៌មាន MSN។

ដោយឡែក បើតាមរបាយការណ៍ផ្ទាល់ពីក្រុមហ៊ុនបានបង្ហាញថា លោកស្រី Huiyan បានបរិច្ចាគចំណែកភាគហ៊ុនប្រមាណ ៦៧៥លានហ៊ុន នៃក្រុមហ៊ុន Country Garden Services ទៅកាន់មូលនិធិ Guoqiang Foundation Hong Kong សម្រាប់គោលបំណងសប្បុរសធម៌។

សូមជម្រាបដែរថា លោកស្រី Yang គឺជាអតីតមហាសេដ្ឋីស្រីមានបំផុតនៅអាស៊ី ប៉ុន្តែទ្រព្យសម្បត្តិរបស់លោកស្រី បានធ្លាក់ចុះយ៉ាងខ្លាំង រយៈពេល ២ឆ្នាំចុងក្រោយ ពោលធ្លាក់ចុះប្រមាណ ៨០% ពីទំហំទ្រព្យសម្បត្តិ ៣៤ពាន់លានដុល្លារ ខណៈបច្ចុប្បន្នទ្រព្យសម្បត្តិរបស់លោកស្រីមានប្រហែល ៧ពាន់លានដុល្លារ៕

The post អតីតមហាសេដ្ឋីស្រីមានបំផុតនៅអាស៊ី បរិច្ចាគទឹកប្រាក់ច្រើនជាង ៨០០លានដុល្លារ appeared first on .

ទម្លាប់ល្អ ៥ យ៉ាងដែលអ្នកមានដាច់គេនៅអាស៊ី តែងតែប្រកាន់ខ្ជាប់

ឧកញ៉ាសំពៅ — Wed, 15 Mar 2023 08:28:00 +0000

Mukesh Ambani គឺជាមហាសេដ្ឋីមានបំផុតនៅអាស៊ី និងជាបុគ្គលមានបំផុតមួយរូបលើលោកផងដែរ ហើយបើទោះជាមានលុយរាប់ពាន់លានដុល្លារ ក៏មហាសេដ្ឋីម្នាក់នេះតែងតែប្រកាន់ខ្ជាប់នូវទម្លាប់ល្អៗ សាមញ្ញៗ ៥ យ៉ាងជានិច្ច។

យោងតាមការចុះផ្សាយពី Mensxp បានបង្ហាញថា ទម្លាប់ល្អទាំង ៥ យ៉ាងដែលអ្នកមានដាច់គេនៅអាស៊ីតែងតែធ្វើ គឺងាយៗ ហើយវាក៏ជួយធ្វើឲ្យលោកក្លាយជាមហាសេដ្ឋីផងដែរ។ តទៅនេះ គឺជាទម្លាប់ទាំង ៥ ដែលមហាសេដ្ឋីឥណ្ឌាតែងតែប្រកាន់ខ្ជាប់៖

1/ របបអាហារតឹងរ៉ឹង

លោក Ambani មិនដែលពិសារគ្រឿងស្រវឹង និងទទួលទានសាច់ឡើយ ពោលរបបអាហាររបស់លោកគឺតឹងរ៉ឹងណាស់ ដោយលោកពិសារតែអាហារបួសប៉ុណ្ណោះ។

2/ទម្លាប់ងើបពីព្រលឹម

ជារៀងរាល់ព្រឹក មហាសេដ្ឋីឥណ្ឌាតែងតែភ្ញាក់ពីដំណេកចន្លោះម៉ោង ៥ និងម៉ោង ៥៖៣០ នាទីព្រឹក និងចំណាយពេលហាត់ប្រាណ អានព័ត៌មាន និងស្រស់ស្រូបអាហារពេលព្រឹក។

3/ ចំណាយពេលជាមួយគ្រួសារ

ជារៀងរាល់ចុងសប្ដាហ៍ បើសិនជាមិនជាប់រវល់នឹងការងារចាំបាច់ អ្នកមានបំផុតនៅអាស៊ី តែងតែចំណាយពេលវេលាជាមួយក្រុមគ្រួសារ។

4/ការកំណត់ប្រាក់ខែផ្ទាល់ខ្លួន

Mukesh Ambani បានកំណត់ប្រាក់ខែរបស់លោក ដើម្បីធ្វើជាគំរូដល់បុគ្គលិកនានា និងធានាផ្ដល់ប្រាក់ខែយ៉ាងត្រឹមត្រូវ ដល់បុគ្គលិកគ្រប់ជាន់ថ្នាក់។

5/ ការប្រមូលរថយន្តថ្លៃៗ

លោកក៏ជាបុគ្គលម្នាក់ ដែលងប់នឹងការប្រមូលរថយន្តថ្លៃៗទុកផងដែរ ដោយក្នុងចំណោមរថយន្តដែលលោកធ្លាប់បានទិញមកតាំងមានដូចជា Rolls Royce, Maybach និង Bentley ជាដើម។

ចំណុចដ៏សំខាន់មួយទៀតដែលបុរសម្នាក់នេះ តែងតែធ្វើមិនដែលរំលងគឺ រាល់ពេលមុនចេញទៅធ្វើការ លោកតែងតែសំពះដល់ម្ដាយ និងសុំពរជ័យពីអ្នកមានគុណជារៀងរាល់ព្រឹក៕

The post ទម្លាប់ល្អ ៥ យ៉ាងដែលអ្នកមានដាច់គេនៅអាស៊ី តែងតែប្រកាន់ខ្ជាប់ appeared first on .

ស្ដេចត្រាញ់អាស៊ី រំកិលខ្លួនមកកាន់តំណែង Top 10 នៃបញ្ជីអ្នកមានបំផុតលើលោកវិញ

ឧកញ៉ាសំពៅ — Sat, 11 Feb 2023 05:50:00 +0000

កាលពីសប្ដាហ៍មុនបញ្ជីឈ្មោះមហាសេដ្ឋីមានបំផុតលើលោកទាំង ១០ រូប បាត់អស់មហាសេដ្ឋីអាស៊ី ជាពិសេសអតីតអ្នកមានដាច់គេនៅអាស៊ី Gautam Adani បានខ្ទាតតំណែងដល់លេខជាង ២០ ឯណោះ។

យ៉ាងណា សម្រាប់សប្ដាហ៍នេះវិញ Forbes បានរាយការណ៍ថា Mukesh Ambani មហាសេដ្ឋីមានបំផុតនៅឥណ្ឌា បានរំកិលខ្លួនមកកាន់តំណែង Top 10 នៃបញ្ជីអ្នកមានបំផុតលើលោកជាថ្មីម្ដងទៀត។

ខាងក្រោមនេះ គឺជាបញ្ជីឈ្មោះមហាសេដ្ឋីមានបំផុតលើលោកទាំង ១០ រូប គិតត្រឹមថ្ងៃទី ១១ កុម្ភៈ ២០២៣ ផ្អែកតាមទិន្នន័យផ្ដល់ឲ្យដោយ Forbes៖
1. Bernard Arnault ប្រធានក្រុមហ៊ុន LVMH មានទ្រព្យសម្បត្តិសរុបប្រមាណ ២១២,២ពាន់លានដុល្លារ

2. Elon Musk ប្រធានក្រុមហ៊ុន Tesla មានទ្រព្យសម្បត្តិសរុបប្រមាណ ១៨៨,៦ពាន់លានដុល្លារ

3.Jeff Bezos ស្ថាបនិកក្រុមហ៊ុន Amazon មានទ្រព្យសម្បត្តិសរុបប្រមាណ ១២០,៨ពាន់លានដុល្លារ

4.Larry Ellison ស្ថាបនិកក្រុមហ៊ុន Oracle មានទ្រព្យសម្បត្តិសរុបប្រមាណ ១១១,៦ពាន់លានដុល្លារ
5.Warren Buffett ស្ថាបនិកក្រុមហ៊ុន Berkshire Hathaway មានទ្រព្យសម្បត្តិសរុបប្រមាណ ១០៨,៤ពាន់លានដុល្លារ

6.Bill Gates ស្ថាបនិកក្រុមហ៊ុន Microsoft មានទ្រព្យសម្បត្តិសរុបប្រមាណ ១០៥,៨ពាន់លានដុល្លារ

7.Carlos Slim Helu ស្ថាបនិកក្រុមហ៊ុន Grupo Carso មានទ្រព្យសម្បត្តិសរុបប្រមាណ ៨៨,៣ពាន់លានដុល្លារ

8.Steve Ballmer អតីត CEO ក្រុមហ៊ុន Microsoft មានទ្រព្យសម្បត្តិសរុបប្រមាណ ៨៤,៦ពាន់លានដុល្លារ

9.Mukesh Ambani ប្រធានក្រុមហ៊ុន Reliance Industries មានទ្រព្យសម្បត្តិសរុបប្រមាណ ៨២,៦ពាន់លានដុល្លារ

10.Larry Page សហស្ថាបនិក Google មានទ្រព្យសម្បត្តិសរុបប្រមាណ ៨២,២ពាន់លានដុល្លារ៕

The post ស្ដេចត្រាញ់អាស៊ី រំកិលខ្លួនមកកាន់តំណែង Top 10 នៃបញ្ជីអ្នកមានបំផុតលើលោកវិញ appeared first on .

ត្រឹមមួយសប្ដាហ៍ អ្នកមានដាច់គេនៅអាស៊ីរបូតលុយ ៣០ ពាន់លានដុល្លារ

ឧកញ៉ាសំពៅ — Sat, 28 Jan 2023 04:52:56 +0000

កាលពីពេលថ្មីៗនេះ មហាសេដ្ឋីមានបំផុតនៅអាស៊ី Gautam Adani បានរបូតលុយប្រហែល ៣០ ពាន់លានដុល្លារ ដោយសារការបណ្ដាក់ទុនខុសមួយគ្រា ហើយកំហុសមួយនេះបានធ្វើឲ្យលោករបូតតំណែង Top 3 នៃបញ្ជីមហាសេដ្ឋីមានបំផុតលើលោកទាំង ១០ រូបទៀតផង។

យោងតាមការចុះផ្សាយពី Forbes បានបង្ហាញថា បច្ចុប្បន្នមហាសេដ្ឋីឥណ្ឌាគឺឈរនៅលេខរៀងទី ៧ នៃបញ្ជីអ្នកមានដាច់គេលើលោក ១០ រូប ជាមួយទំហំទ្រព្យសម្បត្តិមិនដល់ ១០០ ពាន់លានដុល្លារផង។

តទៅនេះគឺជាបញ្ជីឈ្មោះមហាសេដ្ឋីមានបំផុតលើលោក គិតត្រឹមថ្ងៃទី ២៨ មករា ២០២៣ ផ្អែកតាមរបាយការណ៍ចុះផ្សាយដោយ Forbes៖

1. Bernard Arnault ប្រធានក្រុមហ៊ុន LVMH មានទ្រព្យសម្បត្តិសរុបប្រមាណ ២១៣,៩ ពាន់លានដុល្លារ

2. Elon Musk ប្រធានក្រុមហ៊ុន Tesla មានទ្រព្យសម្បត្តិសរុបប្រមាណ ១៨១,៣ ពាន់លានដុល្លារ

3.Jeff Bezos ស្ថាបនិកក្រុមហ៊ុន Amazon មានទ្រព្យសម្បត្តិសរុបប្រមាណ ១២៥,៤ ពាន់លានដុល្លារ

4.Larry Ellison ស្ថាបនិកក្រុមហ៊ុន Oracle មានទ្រព្យសម្បត្តិសរុបប្រមាណ ១១២,៧ ពាន់លានដុល្លារ
5.Warren Buffett ស្ថាបនិកក្រុមហ៊ុន Berkshire Hathaway មានទ្រព្យសម្បត្តិសរុបប្រមាណ ១០៧,៩ ពាន់លានដុល្លារ

6.Bill Gates ស្ថាបនិកក្រុមហ៊ុន Microsoft មានទ្រព្យសម្បត្តិសរុបប្រមាណ ១០៤,១ ពាន់លានដុល្លារ

7.Guatam Adani ស្ថាបនិកក្រុមហ៊ុន Adani Group មានទ្រព្យសម្បត្តិសរុបប្រមាណ ៩៦,៦ ពាន់លានដុល្លារ

8.Carlos Slim Helu ស្ថាបនិកក្រុមហ៊ុន Grupo Carso មានទ្រព្យសម្បត្តិសរុបប្រមាណ ៩២,៤ ពាន់លានដុល្លារ

9. Larry Page សហស្ថាបនិកក្រុមហ៊ុន Google មានទ្រព្យសម្បត្តិសរុបប្រមាណ ៨៦,៤ ពាន់លានដុល្លារ

១០.Mukesh Ambani ស្ថាបនិកក្រុមហ៊ុន Reliance Industries មានទ្រព្យសម្បត្តិសរុបប្រមាណ ៨៣,៦ ពាន់លានដុល្លារ៕

The post ត្រឹមមួយសប្ដាហ៍ អ្នកមានដាច់គេនៅអាស៊ីរបូតលុយ ៣០ ពាន់លានដុល្លារ appeared first on .