ម៉ូតូ

វៀតណាម ហក់ឡើងលេខបី ជាប្រទេសលក់ម៉ូតូអគ្គិសនីច្រើនបំផុត នៅលើពិភពលោក

ឧកញ៉ាសាមញ្ញ — Wed, 13 Aug 2025 05:51:34 +0000

យោងតាមទិន្នន័យចុងក្រោយមួយ បានបង្ហាញថា ប្រទេសវៀតណាម ជាប់ចំណាត់ថ្នាក់លេខ២ លើពិភពលោក ក្នុងការលក់ម៉ូតូអគ្គិសនីច្រើនបំផុត នៅឆមាសទី១ ឆ្នាំ២០២៥ នេះ ពោលគឺតាមពីក្រោយប្រទេសចិន និងឥណ្ឌា ប៉ុណ្ណោះ។ នេះបើតាមការចុះផ្សាយពីសារព័ត៌មាន VN Express។

ទំហំទីផ្សារម៉ូតូអគ្គិសនីនៅវៀតណាម បានកើនឡើងទ្វេដង ដល់ចំនួនសរុប ២០៩ ០០០ គ្រឿង បើធៀបទៅនឹងរយ:ពេលដូចគ្នាកាលពីឆ្នាំមុន។ ប្រទេសចិន បន្តនាំមុខគេ ជាមួយការលក់សរុបបានចំនួន ៣,២លានគ្រឿង តាមពីក្រោយដោយឥណ្ឌា លក់បានចំនួន ៦៥៧ ០០០ គ្រឿង ស្របពេលការលក់ជាសកលកើនឡើងដល់ ៤,៤ លានគ្រឿង។ នេះបើតាមទិន្នន័យពី Motorcycles Data។

គួរឲ្យដឹងថា នៅប្រទេសវៀតណាម មានតែក្រុមហ៊ុន VinFast ប៉ុណ្ណោះដែលបង្ហាញជាសាធារណៈនូវតួលេខលក់ម៉ូតូអគ្គិសនី របស់ខ្លួន ដែលត្រូវបានប៉ាន់ស្មានថាមានចំនួន ១០០ ០០០ គ្រឿង ខណៈដែលម៉ាកយីហោផ្សេងទៀត ដូចជា Honda, Yamaha, Dat Bike, Yadea និង Selex Motor មិនមាននោះទេ។

ជម្រាបជូនថា Conglomerate ដែលជាម៉ាកយីក្នុងស្រុករបស់ក្រុមហ៊ុន Vingroup ស្ថិតក្នុងចំណោមក្រុមហ៊ុនផលិតម៉ូតូអគ្គិសនីកំពូលទាំង១០ នៅលើពិភពលោក។ កាលពីឆ្នាំមុន ក្រុមហ៊ុននេះបាននាំមុខទីផ្សារវៀតណាម ជាមួយនឹងការលក់ជិត ៧១ ០០០ គ្រឿង៕

The post វៀតណាម ហក់ឡើងលេខបី ជាប្រទេសលក់ម៉ូតូអគ្គិសនីច្រើនបំផុត នៅលើពិភពលោក appeared first on .

អត្រាលក់ម៉ូតូនៅក្នុងប្រទេសវៀតណាម មានការថយចុះ១៦,២%

monyokn — Tue, 09 Jan 2024 03:40:58 +0000

សមាជិកនៃសមាគមក្រុមហ៊ុនផលិតម៉ូតូវៀតណាមបានរាយការណ៍មកថា ម៉ូតូចំនួន ២,៥លានគ្រឿងត្រូវបានលក់នៅក្នុងទីផ្សារប្រទេសវៀតណាមកាលពីឆ្នាំ២០២៣ ខណៈចំនួននេះបានធ្លាក់ចុះដល់ទៅ១៦,២% បើប្រៀបធៀបកាលពីឆ្នាំ២០២២ ។ នេះបើតាមការចុះផ្សាយពីសារព័ត៌មាន VN Express ។

សមាជិកទាំងប្រាំនៃសមាគមក្រុមហ៊ុនផលិតម៉ូតូវៀតណាមដែលរួមមាន ក្រុមហ៊ុន Honda, Yamaha, Piaggio, Suzuki និងក្រុមហ៊ុន SYM បានលក់ម៉ូតូរបស់ខ្លួនសរុបចំនួន ៦៣៤ ៦៨៨គ្រឿងនៅត្រីមាសទីមួយកាលពីឆ្នាំ២០២៣ ហើយក៏លក់បានចំនួន ៥៨៨ ៩២៦គ្រឿងនៅត្រីមាសទីពីរ ខណៈត្រីមាសទីបីលក់បានចំនួន ៦១០ ៦៣៥គ្រឿង និងត្រីមាសបួនក្រុមហ៊ុនក៏លក់ម៉ូតូបានចំនួន ៦៨១ ៩៦៣គ្រឿងផងដែរ។

ទន្ទឹមនឹងនេះ ទីផ្សារម៉ូតូវៀតណាមក៏មានម៉ាកយីហោដែលមានការពេញនិយមផ្សេងៗទៀតផងដែរដូចជា VinFast, Kymco, BMW Motorrad, Ducati, Triumph, Kawasaki, Royal Enfield, Harley-Davidson, KTM និង Yadea ។

គួរបញ្ជាក់ផងថា បើយោងតាម Seasia Stats ដែលជាផ្នែកមួយដ៏សំខាន់របស់វេទិកា Seasia បានផ្តល់នូវទិន្នន័យស្ថិតិ និងព័ត៌មានវិទ្យាថា ប្រទេសវៀតណាមមានអត្រាកម្មសិទ្ធម៉ូតូខ្ពស់បំផុតគឺមានចំនួនដល់ទៅ៧២,៨% ខណៈប្រទេសសិង្ហបុរីជាប្រទេសមួយដែលមានអត្រាកម្មសិទ្ធម៉ូតូទាបបំផុត ដោយមានចំនួនត្រឹម២,៤% ប៉ុណ្ណោះនៅក្នុងតំបន់អាស៊ីអាគ្នេយ៍៕

The post អត្រាលក់ម៉ូតូនៅក្នុងប្រទេសវៀតណាម មានការថយចុះ១៦,២% appeared first on .

ជិត ២០ ឆ្នាំ អាសង់មិនឃើញដូររាងរៅ តែលឺល្ហៀងៗអាចតម្លើងម៉ាស៊ីនដល់ 150cc?

ឧកញ៉ាសំពៅ — Tue, 09 Aug 2022 07:56:34 +0000

មួយរយៈពេលចុងក្រោយនេះ មានផ្ទុះចចាមអារ៉ាមថា Honda Dream ឆ្នាំ ២០២៣ នឹងមានការអាប់ដែតថ្មី គឺតំឡើងកម្លាំងម៉ាស៊ីនរហូតដល់ 150cc ខណៈកន្លងមកត្រកូល Dream របស់ក្រុមហ៊ុន Honda ធ្លាប់តែបំពាក់នូវម៉ាស៊ីន 125cc ប៉ុណ្ណោះ។

យ៉ាងណា ពាក់ព័ន្ធនឹងចចាមអារ៉ាមខាងលើ ភ្នាក់ងារលក់ម៉ូតូ Honda នៅរាជធានីភ្នំពេញមួយកន្លែងបានទម្លាយប្រាប់ឧកញ៉ាញ៉ូវស៍ថា ព័ត៌មានផ្លូវការចេញពីក្រុមហ៊ុនគឺមិនទាន់មាននៅឡើយ ខណៈបើតាមគំនិតរបស់លោកផ្ទាល់ ការបំពាក់នូវម៉ាស៊ីនកម្លាំង 150cc នេះ គឺមានភាគរយតិចណាស់ដែលអាចកើតឡើង។

មូលហេតុដែលលោកអះអាងបែបនេះ គឺដោយសារ Honda Dream ផលិតឡើងដើម្បីបំពេញតម្រូវការប្រជាពលរដ្ឋនៅកម្ពុជាជាពិសេស ជាមួយរូបរាងសាមញ្ញ កម្លាំងម៉ាស៊ីនល្មម ងាយស្រួលដល់ការបើកបរគ្រប់កាលៈទេសៈ ដូច្នេះបើសិនជាមានការផ្លាស់ប្ដូរអត្តសញ្ញាណ នោះក្រុមហ៊ុនអាចនឹងបាត់បង់អតិថិជនមួយចំនួន ដ្បិតកម្លាំងម៉ាស៊ីនខ្លាំង តម្លៃក៏រឹតតែថ្លៃដូចគ្នា។

ដោយឡែក បើយោងតាមមតិរបស់ប្រិយមិត្តនៅលើបណ្ដាញសង្គម Facebook វិញ ក៏បានបង្ហើបដែរថា បើសិនជា Honda Dream សេរីថ្មីបំពាក់ម៉ាស៊ីន 150cc មែន វាហាក់មិនស៊ីជាមួយរូបរាងរបស់ម៉ូតូ ស្របពេលអ្នកបើកបរចាំបាច់ធ្វើប័ណ្ណបើកបរថ្មីសម្រាប់ទោចក្រយានយន្តដែលមានម៉ាស៊ីនកម្លាំងធំជាង 125cc។

បន្ថែមពីនោះភ្នាក់ងារលក់ម៉ូតូ Honda Dream នៅរាជធានីភ្នំពេញមួយកន្លែងទៀតក៏បានបង្ហើបដែរថា ជាមតិផ្ទាល់ខ្លួន លោកយល់ថា បើសិន Honda Dream ២០២៣ បំពាក់មកជាមួយម៉ាស៊ីនកម្លាំង 150cc មែន នោះជម្រើស 125cc គឺនឹងមិនអាចលុបចោលឡើយ ពោលអតិថិជននឹងមានជម្រើសរវាង Honda Dream 125cc និង Honda Dream 150cc។

យ៉ាងណា វាគ្រាន់តែជាពាក្យចចាមអារ៉ាមប៉ុណ្ណោះ ដ្បិតព័ត៌មានជាក់លាក់ពីក្រុមហ៊ុនគឺមិនទាន់បញ្ចេញនៅឡើយ ដូច្នេះមានតែរង់ចាំមើលទាំងអស់គ្នាថា តើ Honda Dream អាចធ្វើឲ្យអតិថិជនមានការភ្ញាក់ផ្អើលកម្រិតណាសម្រាប់ម៉ូដែលចុងក្រោយបំផុតសារនេះ?

The post ជិត ២០ ឆ្នាំ អាសង់មិនឃើញដូររាងរៅ តែលឺល្ហៀងៗអាចតម្លើងម៉ាស៊ីនដល់ 150cc? appeared first on .