ជប៉ុន បង្ហាញការចាប់អារម្មណ៍បង្កើតរោងចក្រកែច្នៃផលិតផលកសិកម្ម ក្នុងខេត្តបាត់ដំបង

កូនចៅឧកញ៉ា — Mon, 23 Jan 2023 02:01:00 +0000

ក្រុមហ៊ុនរបស់ជប៉ុន Shop Shindou Shigeharu Limited Company កាលពីថ្ងៃទី១៨ ខែមករា ឆ្នាំ២០២៣ ជួបជាមួយអភិបាលខេត្តបាត់ដំបង លោក សុខ លូ ដើម្បីពិភាក្សាការងារអំពីគម្រោងដែលក្រុមហ៊ុននេះ មានគម្រោងបោះទុនវិនិយោគ លើការកែច្នៃផលិតផលកសិកម្ម នៅក្នុងខេត្តបាត់ដំបងនាពេលខាងមុខ។

ក្រុមហ៊ុន Shindo Shigeharu Shop Co. Ltd. គឺជាក្រុមហ៊ុនផលិតអាហារដ៏ល្អបំផុតនៅខេត្តអិហិមិ នៃប្រទេសជប៉ុន ខាងផ្លែឈើស្ងួត ដូចជា ក្រូចឆ្មារ និងក្រូចពោធិ៍សាត់ដ៏ល្បីល្បាញរបស់ខេត្តអិហិមិប្រទេសជប៉ុន។

លើកឡើងក្នុងជំនួបនោះ លោក សុខ លូ បានប្រកាសស្វាគមន៍ ចំពោះក្រុមហ៊ុនជប៉ុនដែលមានបំណងក្នុងការវិនិយោគនៅខេត្តបាត់ដំបង ពាក់ព័ន្ធនឹងគម្រោងកែច្នៃផ្លែឈើនេះ ស្របពេលដែលខេត្តបាត់ដំបងជារៀងរាល់ឆ្នាំ ផលិតផលកសិកម្មមួយចំនួន ដូចជា ផ្លែស្វាយ ផ្លែមៀនប៉ៃលិន ឬម្នាស់ជាដើម មានចំនួនច្រើន ដែលសេសសល់ និងមានតម្លៃថោក ដោយសារគ្មានរោងចក្រក្នុងការកែច្នៃផលិតផលទាំងនោះ។

លោកថា ខេត្តបាត់ដំបងជាខេត្តដែលមានសក្ដានុពលខ្លាំង ប៉ុន្តែអ្វីដែលកែច្នៃចេញពីសក្ដានុពលទាំងនោះ គឺនៅមានលក្ខណៈតិចតួចប៉ុណ្ណោះ ដោយសារមិនទាន់មានរោងចក្រកែច្នៃគ្រប់គ្រាន់។

សូមជម្រាបថា ខេត្តបាត់ដំបង ពេលកន្លងមកមានក្រុមហ៊ុនបរទេសមកពីប្រទេសមហាអំណាចជាច្រើន ដូចជា ចិន អាមេរិក អូស្ត្រាលី ជប៉ុន បារាំង បាននឹងកំពុងចែចូវចាប់អារម្មណ៍ធ្វើការវិនិយោគរោងចក្រកែច្នៃផ្លែឈើ ដើម្បីផ្គត់ផ្គង់ទីផ្សារក្នុងស្រុកនិងធ្វើនាំចេញ ខណៈដែលក្រុមហ៊ុន មិសុតា ហ៊្វូដ អ៊ីផត អ៊ិចផត ឯ.ក ជាក្រុមហ៊ុនកែច្នៃនិងសម្ងួត ផ្លែឈើជាច្រើនមុខដ៏ធំដំបូងគេនៅក្នុងខេត្តបាត់ដំបង លើផ្ទៃដីប្រមាណជាង០១ហិកតា។

ជាមួយគ្នានេះ ពេលកន្លងទៅ អភិបាលខេត្តបាត់ដំបង ក៏បានស្នើឱ្យជប៉ុនជួយស្វែងរកវិនិយោគិនជប៉ុន មកវិនិយោគបន្ថែមនៅក្នុងខេត្តបាត់ដំបងដើម្បីកែប្រែខេត្តមួយនេះ ជាតំបន់សេដ្ឋកិច្ចពិសេស ដើម្បីទាក់ទាញវិនិយោគិនក្នុងស្រុក និងក្រៅស្រុក មកវិនិយោគកាន់តែច្រើនឡើង ជាពិសេស ទាក់ទាញភ្ញៀវទេសចរកាន់តែច្រើនផងដែរ។

លោក សុខ លូ លើកឡើងថា «ខេត្តបាត់ដំបងមានផ្ទៃដីធំទូលាយ ដែលបង្កលក្ខណៈងាយស្រួលក្នុងការបង្កើតតំបន់សេដ្ឋកិច្ចពិសេស ដែលអាចបង្កើតជារោងចក្រផ្សេងៗ ពិសេសរោងចក្រកែច្នៃផលិតផលកសិកម្ម ព្រោះជាខេត្តកសិកម្ម ហើយផលិតផលកសិកម្មជាច្រើនមិនទាន់មានរោងចក្រកែច្នៃ វេចខ្ចប់បានល្អច្រើននោះទេ»។ ការស្នើសុំនេះធ្វើឡើងក្នុងប្រជុំគណៈកម្មាធិការចម្រុះលើកទី៣ (JCC) សម្រាប់គម្រោងការសិក្សាផែនការមេ សម្រាប់ការអភិវឌ្ឍទីក្រុងឆ្លាតក្នុងខេត្តបាត់ដំបង ជាមួយនឹងក្រសួងដែនដី ហេដ្ឋារចនាសម្ព័ន្ធគមនាគមន៍ និងទេសចរណ៍នៃប្រទេសជប៉ុនតាមប្រព័ន្ធZOOM កាលពីដើមឆ្នាំ២០២២៕

The post ជប៉ុន បង្ហាញការចាប់អារម្មណ៍បង្កើតរោងចក្រកែច្នៃផលិតផលកសិកម្ម ក្នុងខេត្តបាត់ដំបង appeared first on .

រដ្ឋាភិបាលសម្រេចផ្តល់ភ្លើងខៀវឲ្យវិស័យឯកជនបង្កើតរោងចក្រកែច្នៃផ្លែឈើច្រើនប្រភេទ មានទុនវិនិយោគ ១១,២លានដុល្លារ

ឧកញ៉ាកោះក្របី — Tue, 24 Aug 2021 04:44:27 +0000

រាជរដ្ឋាភិបាលកម្ពុជាតាមរយៈគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា បានសម្រេចចេញវិញ្ញាបនបត្រចុះបញ្ជីជាស្ថាពរ ជូនដល់ក្រុមហ៊ុន CAMBODIAN XING CAN SHI PIN CO., LTD. ក្នុងការបង្កើតរោងចក្រកែច្នៃផ្លែឈើ (ដំណាប់ស្វាយ, ម្នាស់, មៀន, ខ្នុរ និងស្វាយចន្ទី) ដែលមានតម្លៃប្រមាណ ១១,២លានដុល្លារអាមេរិក និងអាចបង្កើតការងារបានចំនួន ១៥៤កន្លែង។

គម្រោងបង្កើតរោងចក្រកែច្នៃផ្លែឈើ CAMBODIAN XING CAN SHI PIN CO., LTD. មានទីតាំងវិនិយោគស្ថិតនៅភូមិតាំងស្រឹង ឃុំសង្កែសាទប ស្រុកឱរ៉ាល់ ខេត្តកំពង់ស្ពឺ។

ជាមួយគ្នានេះដែរ ក្រុមប្រឹក្សាអភិវឌ្ឍន៍កម្ពុជា ក៏បានសម្រេចចេញវិញ្ញាបនបត្រចុះបញ្ជីជាស្ថាពរជូន ៦ក្រុមហ៊ុនវិនិយោគទៅលើវិស័យផ្សេងៗគ្នា៕

The post រដ្ឋាភិបាលសម្រេចផ្តល់ភ្លើងខៀវឲ្យវិស័យឯកជនបង្កើតរោងចក្រកែច្នៃផ្លែឈើច្រើនប្រភេទ មានទុនវិនិយោគ ១១,២លានដុល្លារ appeared first on .