រោងចក្រផលិតរថយន្ត

Toyota បោះទុន ៧៨លានដុល្លារ ផលិតរថយន្តស៊េរីថ្មី នៅទឹកដីហ្វីលីពីន

monyokn — Thu, 24 Aug 2023 11:04:00 +0000

ក្រុមហ៊ុនផលិតរថយន្តជប៉ុន Toyota Motor បាននិយាយកាលពីថ្ងៃអង្គារកន្លងទៅថា ខ្លួននឹងជំរុញនូវការវិនិយោគប្រមាណ ៧៨,២លានដុល្លារ ដើម្បីបង្កើតម៉ូឌែលថ្មីពីរ ក្នុងរោងចក្រដែលមានមូលដ្ឋាននៅប្រទេសហ្វីលីពីន។ នេះបើតាមការចុះផ្សាយពីសារព័ត៌មាន Nikkei Asia ។

ប្រធានក្រុមហ៊ុន Toyota លោក Akio Toyoda បាននិយាយនៅកម្មវីធីរំលឹកខួបលើកទី ៣៥នៃការបង្កើតក្រុមហ៊ុនបុត្រសម្ព័ន្ធ Toyota Motor Philippines (TMP) ថា “ខ្ញុំពឹតជាជឿជាក់ថា វានឹងមានសក្តានុពលដ៏ធំសម្បើម ទាំងអាជីវកម្ម និងបច្ចេកវិទ្យានៃការរីកចម្រើននៅហ្វីលីពីននេះ”។

ក្នុងនោះផងដែរ ការវិនិយោគនៅរោងចក្រក្នុងខេត្ត Lagnuna ភាគខាងត្បូងនៃទីក្រុងម៉ានីលនេះ នឹងសំដៅឆ្ពោះទៅរកពហុគោលបំណងនៃការច្នៃប្រឌិតរបស់ក្រុមហ៊ុន ដែលជាយុទ្ធសាស្ត្រផលិត និងលក់រថយន្តដែលមានតម្លៃសមរម្យ សមស្របនឹងតម្រូវការក្នុងស្រុកនៃសេដ្ឋកិច្ចដែលកំពុងរីកចម្រើនដូចជាហ្វីលីពីន។

សូមជម្រាបផងថា ក្រុមហ៊ុន TMP ដែលទទួលខុសត្រូវក្នុងការផ្គុំ និងចែកចាយរថយន្តនៅហ្វីលីពីននេះ បង្កើតឡើងចាប់តាំងពីឆ្នាំ ១៩៨៨មកម្លេះ ដោយបានលក់រថយន្តប្រមាណ ២,២លានគ្រឿងហើយនៅក្នុងប្រទេសនេះ ខណៈក្នុងនោះរថយន្ត ១លានគ្រឿងត្រូវបានផលិតនៅក្នុងស្រុក៕

The post Toyota បោះទុន ៧៨លានដុល្លារ ផលិតរថយន្តស៊េរីថ្មី នៅទឹកដីហ្វីលីពីន appeared first on .

អត្រាលក់រថយន្តនៅរុស្ស៊ី ថយចុះជាង ១០% កាលពីខែមុន

ឧកញ៉ាសំពៅ — Thu, 06 Apr 2023 11:24:00 +0000

ការលក់រថយន្តនៅប្រទេសរុស្ស៊ី មានការធ្លាក់ចុះរហូតដល់ប្រមាណ ១០,៦% កាលពីខែមីនា បើធៀបនឹងឆ្នាំទៅ ពោលលក់ចេញប្រមាណ ៤៨ ៤១៤គ្រឿងប៉ុណ្ណោះ។ នេះបើតាមរបាយការណ៍ពីសមាគមធុរកិច្ចអឺរ៉ុប ហៅកាត់ AEB។

ការលក់នៅត្រីមាសទីមួយ ធ្លាក់ចុះ ៤៤,៧% ដោយសារទណ្ឌកម្មសេដ្ឋកិច្ចពីលោកខាងលិច ដែលបានដាក់មកលើក្រុមហ៊ុនរុស្ស៊ី ជុំវិញការឈ្លានពានរបស់ពួកគេទៅកាន់ប្រទេសអ៊ុយក្រែនកាលពីឆ្នាំមុន។

របាយការណ៍លក់រថយន្តសរុបកាលពីឆ្នាំ ២០២២ មានការធ្លាក់ចុះរហូតដល់ ៥៩% ដ្បិតក្រុមហ៊ុនធំៗជាច្រើន បានផ្អាកសង្វាក់ផលិតកម្មអស់ជាច្រើនខែ ព្រោះតែកង្វះខាតគ្រឿងបង្គុំពីលោកខាងលិច។

សូមជម្រាបដែរថា រុស្ស៊ីកំពុងស្វែងរកការវិនិយោគ និងដៃគូបន្ថែមពីប្រទេសសម្ព័ន្ធមិត្ត និងប្រទេសដែលមិនបានដាក់ទណ្ឌកម្មសេដ្ឋកិច្ចមកលើខ្លួន ហើយក៏កំពុងព្យាយាមចាប់ផ្ដើមសង្វាក់ផលិតកម្មផលិតរថយន្តមកវិញដូចគ្នា។

សម្រាប់ឆ្នាំ ២០២៣នេះ AEB បានព្យាករថា អត្រាលក់រថយន្តសម្រាប់ឆ្នាំ ២០២៣ អាចកើនឡើង ១២% ពោលអាចលក់ចេញប្រមាណ ៧៧០ ០០០គ្រឿង ដែលតិចជាងអត្រាលក់កាលពីឆ្នាំ ២០២១ ដែលធ្លាប់លក់បាន ១,៦លានគ្រឿង៕

The post អត្រាលក់រថយន្តនៅរុស្ស៊ី ថយចុះជាង ១០% កាលពីខែមុន appeared first on .

Nissan ប្រកាសលក់អាជីវកម្មនៅរុស្ស៊ីឲ្យទៅរដ្ឋ ជាមួយការខាតបង់ជិត ៧០០ លានដុល្លារ

ឧកញ៉ាសំពៅ — Tue, 11 Oct 2022 12:55:00 +0000

នៅថ្ងៃទី ១១ តុលានេះ ក្រុមហ៊ុនផលិតរថយន្តជប៉ុន Nissan បានទម្លាយថា ពួកគេសម្រេចចិត្តចាកចេញពីទីផ្សាររថយន្តនៅរុស្ស៊ី ដោយបានយល់ព្រមលក់ក្រុមហ៊ុននៅទីនោះឲ្យទៅរដ្ឋជាអ្នកគ្រប់គ្រង។

ដោយឡែក Reuters ក៏បានបន្ថែមដែរថា កិច្ចព្រមព្រៀងរវាង Nissan និងរដ្ឋាភិបាលរុស្ស៊ី គឺអនុញ្ញាតឲ្យ Nissan អាចទិញយកអាជីវកម្មរបស់ពួកគេវិញបាន ក្នុងអំឡុងពេល ៦ ឆ្នាំ។

បន្ថែមពីនោះ ក្រុមហ៊ុនផលិតរថយន្តដ៏ធំមួយនេះក៏បានបន្ថែមទៀតថា ការសម្រេចចិត្តដើរចេញពីទីផ្សាររថយន្តរុស្ស៊ី នឹងធ្វើឲ្យពួកគេមានការខាតបង់យ៉ាងច្រើន ប្រមាណ ១០០ ពាន់លានយ៉េន ឬ ៦៨៦,៧២ លានដុល្លារពីការផ្ទេរទ្រព្យសម្បត្តិ។

សូមជម្រាបដែរថា ក្រុមហ៊ុន Nissan គឺជាក្រុមហ៊ុនធំបំផុតមួយដែលបានសម្រេចចិត្តចាកចេញពីទីផ្សាររុស្ស៊ី បន្ទាប់ពីក្រុមហ៊ុនរថយន្តបារាំង Renault បានលក់ភាគហ៊ុនមួយភាគធំនៃក្រុមហ៊ុន Avatovaz ទៅកាន់វិនិយោគិនរុស្ស៊ីកាលពីខែឧសភា៕

The post Nissan ប្រកាសលក់អាជីវកម្មនៅរុស្ស៊ីឲ្យទៅរដ្ឋ ជាមួយការខាតបង់ជិត ៧០០ លានដុល្លារ appeared first on .

Toyota គ្រោងផលិតរថយន្តក្នុងខែតុលា តិចជាងរាល់ខែ ១០ ម៉ឺនគ្រឿង ដោយសារបញ្ហាមួយ

ឧកញ៉ាសំពៅ — Thu, 22 Sep 2022 12:55:00 +0000

កាលពីថ្ងៃព្រហស្បតិ៍កន្លងតៅ ក្រុមហ៊ុន Toyota Motor Corp បានបង្ហើបថា ពួកគេមានគម្រោងនឹផលិតរថយន្តប្រហែល ៨០០ ០០០ គ្រឿងទូទាំងសកលលោកនៅខែតុលា ដែលចំនួនមួយនេះគឺតិចជាងរាល់ខែប្រមាណ ១០០ ០០០ គ្រឿង។

យោងតាមការចុះផ្សាយពី CNA បានឲ្យដឹងថា មូលហេតុដែលក្រុមហ៊ុនជប៉ុនសម្រេចផលិតរថយន្តតិចជាងរាល់ខែបែបនេះ គឺដោយសារកង្វះខាតបន្ទះឈីបរថយន្ត។

សូមជម្រាបដែរថា Toyota គឺជាក្រុមហ៊ុនផលិតរថយន្តធំបំផុតលើលោក បើតាមរបាយការណ៍ផ្នែកលក់របស់ពួកគេ ហើយកាលពីខែមុនពួកគេមានបំណងចង់ផលិតរថយន្ត ៩០០ ០០០ គ្រឿងពីខែកញ្ញាដល់វិច្ឆិកា។

ប៉ុន្តែដោយសារកង្វះខាតបន្ទះឈីប ធ្វើឲ្យក្រុមហ៊ុនសម្រេចចិត្តថា នឹងបន្ថយចំនួនមកត្រឹម ៨៥០ ០០០ គ្រឿងក្នុងមួយខែចន្លោះពីខែតុលា ដល់ធ្នូ។ យ៉ាងណា Toyota នៅតែប្រកាន់ខ្ជាប់ជំហរផលិតរថយន្តឲ្យបាន ៩,៧ លានគ្រឿងទូទាំងសកលលោក រហូតដល់ខែមីនា ២០២៣ ផងដែរ៕

The post Toyota គ្រោងផលិតរថយន្តក្នុងខែតុលា តិចជាងរាល់ខែ ១០ ម៉ឺនគ្រឿង ដោយសារបញ្ហាមួយ appeared first on .

រោងចក្រ Tesla នៅសៀងហៃបង្កើតជិត ៤ ឆ្នាំ ផលិតរថយន្តបានជាង ១ លានគ្រឿង

ឧកញ៉ាសំពៅ — Mon, 15 Aug 2022 07:06:12 +0000

កាលពីពេលថ្មីៗនេះ មហាសេដ្ឋី Elon Musk បានបង្ហោះសារនៅលើបណ្ដាញសង្គម Twitter ផ្លូវការរបស់លោក អំពីទិន្នន័យផលិតរថយន្តរបស់ Tesla ពោលមកទល់ពេលនេះ Tesla បានផលិតរថយន្តសរុបច្រើនជាង ៣ លានគ្រឿង។

យោងតាមការចុះផ្សាយពី Foxbusiness បានឲ្យដឹងថា ក្នុងចំណោមរថយន្តច្រើនជាង ៣ លានគ្រឿងដែល Tesla បានផលិត ក្នុងនោះរោងចក្រនៅសៀងហៃបានចូលរួមចំណែកធំជាងគេ ពោលប្រហែល ១/៣ នៃរថយន្តសរុប គឺចេញពីរោងចក្រសៀងហៃដែលបង្កើតនៅឆ្នាំ ២០១៨។

យ៉ាងណា ថ្វីបើសមិទ្ធផលដែលរោងចក្រនៅសៀងហៃបានបង្ហាញសក្ដានុពលដ៏អស្ចារ្យ ប៉ុន្តែមួយរយៈចុងក្រោយនេះ វាត្រូវបានផ្អាកការផលិតបណ្ដោះអាសន្ន ដោយសារការរាតត្បាតជំងឺកូវីដ ១៩ ហើយរដ្ឋាភិបាលចិនបានចាត់វិធានការយ៉ាងតឹងរ៉ឹងចំពោះបញ្ហាមួយនេះ ដោយបានបិទទីក្រុងសៀងហៃមួយរយៈពេលធំ។

សូមជម្រាបដែរថា ទិន្នន័យសម្រាប់ត្រីមាសទី ២ ឆ្នាំ ២០២២នេះ Tesla ផលិតរថយន្តបាន ២៥៨ ០០០ គ្រឿង តិចជាងត្រីមាសមុន ១៥% ដែលធ្លាប់ផលិតបាន ៣០៥ ០០០ ចន្លោះពីខែមករា ដល់មីនា ប៉ុន្តែបើធៀបនឹងឆ្នាំទៅ វាបានកើនឡើង ២៥%៕

The post រោងចក្រ Tesla នៅសៀងហៃបង្កើតជិត ៤ ឆ្នាំ ផលិតរថយន្តបានជាង ១ លានគ្រឿង appeared first on .

ក្រុមហ៊ុនផលិតរថយន្ត Volkswagen បង្ខំចិត្តបិទរោងចក្រ ២ កន្លែងនៅទីក្រុងធានជីងប្រទេសចិន

ឧកញ៉ាសំពៅ — Fri, 14 Jan 2022 02:23:48 +0000

អត្រាកើនឡើងនៃអ្នកឆ្លងជំងឹកូវីដ-១៩ នៅប្រទេសចិន បានធ្វើឲ្យក្រុមហ៊ុន Volkswagen សម្រេចចិត្តបិទរោងចក្រពីរកន្លែងជាបណ្តោះអាសន្ន។

ក្រុមហ៊ុនផលិតរថយន្ត Volkswagen បានសម្រេចចិត្តបិទរោងចក្រតំឡើងរថយន្ត ២ កន្លែងនៅទីក្រុងធានជីង ដែលមានចំងាយត្រឹម ១០០ គីឡូពីរដ្ឋធានីប៉េកាំង។

“ដោយសារការរាតត្បាតពីជំងឺកូវីដ-១៩ ថ្មីៗនេះ រោងចក្រ FAW-VW និង VW Automatic Transmission Tianjin ត្រូវផ្អាកដំណើរការពីថ្ងៃច័ន្ទតទៅ”។ នេះបើតាមអ្នកនាំពាក្យក្រុមហ៊ុនបានប្រាប់ទៅកាន់ Reuters។

ប្រភព: CNA

The post ក្រុមហ៊ុនផលិតរថយន្ត Volkswagen បង្ខំចិត្តបិទរោងចក្រ ២ កន្លែងនៅទីក្រុងធានជីងប្រទេសចិន appeared first on .

ប្រទេស ៤ នៅអាស៊ាន ដណ្តើមគ្នាធ្វើស្តេចត្រាញ់ ជាទីតាំងបោះមូលដ្ឋានផលិតរថយន្ត

ឧកញ៉ាសំពៅ — Thu, 23 Sep 2021 07:41:31 +0000

អ្នកណាៗក៏ដឹងដែរថា សង្វាក់ផលិតកម្មនៅប្រទេសតំបន់អាស៊ានគឺមានតម្លៃទាប បើធៀបនឹងប្រទេសនៅតំបន់អឺរ៉ុបជាច្រើន ដែលនេះគឺជាហេតុផលធំបំផុតមួយដែលធ្វើឲ្យតំបន់អាស៊ាន ក្លាយជាកន្លែងប្រមូលផ្ដុំរោងចក្រផលិតសម្ភារៈនានា រាប់ចាប់ពីសម្ភារៈតូចៗដល់គ្រឿងយន្តជាដើម។

ជាមួយគ្នានោះ វិស័យយានយន្តហាក់មានកំណើនខ្លាំងសម្រាប់រយៈកាលមួយទសវត្សចុងក្រោយ ដែលធ្វើឲ្យប្រទេសនៅតំបន់អាស៊ានមួយចំនួនត្រូវប៉ាន់ផងដែរ ព្រោះក្រុមហ៊ុនផលិតឡានជាច្រើនបានចាប់ផ្ដើមវិនិយោគ បង្កើតរោងចក្រផលិតនៅក្នុងប្រទេសទាំងនោះ។

ខាងក្រោមគឺជាប្រទេស ៤ ដែលកំពុងមានសម្ទុះផលិតរថយន្តខ្លាំងបំផុតនៅអាស៊ាន

1/ប្រទេសថៃ

ប្រទេសថៃអាចរាប់បានថាជាប្រទេសមានសេដ្ឋកិច្ចលូតលាស់ឆាប់រហ័សមួយប្រចាំតំបន់អាស៊ាន ខណៈវិស័យផលិតរថយន្តនេះទៀតសោត ក៏កំពុងរីកធំធាត់ខ្លាំងផងដែរនៅទីនោះ។ គិតត្រឹមឆ្នាំ ២០១៨ ឡានប្រមាណ ២ លានគ្រឿងត្រូវបានផលិត និងបាននាំចេញទៅក្រៅជាង ១០០ ប្រទេសនៃជាងពាក់កណ្ដាលចំនួនផលិត។

ដោយឡែកបើតាមរបាយការណ៍ពី Marklines បានឲ្យដឹងទៀតថា តួលេខនៃការផលិតមានការកើនឡើងពីមួយឆ្នាំទៅមួយឆ្នាំប្រមាណ ៨,៧% ខណៈឡានជាង ១ លានគ្រឿងលក់អស់គ្មានសល់សម្រាប់ទីផ្សារក្នុងស្រុក។

2/ប្រទេសឥណ្ឌូណេស៊ី

ស្របពេលថៃកំពុងវាយលុកទីផ្សារនាំចេញរថយន្តក្រៅប្រទេស ងាកមកមើលឥណ្ឌូណេស៊ីវិញ គឺកំពុងដុតដៃដុតជើងទាញយកផលចំណេញពីទីផ្សារក្នុងស្រុកគ្មានពេលសម្រាក។

ក្រុមហ៊ុនផលិតឡាននៅឥណ្ឌូណេស៊ីបានកំណត់អតិថិជនគោលដៅជាស្រេចដោយលក់សម្រាប់បុគ្គលមានជីវភាពមធ្យម ខណៈទីក្រុងចំបងដែលវៃចេញជាប្រចាំនោះគឺ រដ្ឋធានី Jakarta តែម្ដង។ គិតត្រឹមចុងឆ្នាំ ២០១៨ តួលេខនៃការលក់ហក់ឡើងដល់ ១,៣ លានគ្រឿងសម្រាប់ទីផ្សារក្នុងស្រុក ស្របពេលការនាំចេញមានត្រឹម ៣៤៦ ០០០ គ្រឿងប៉ុណ្ណោះដែលមានដូចជាទៅកាន់ប្រទេសហ្វីលីពីន អារ៉ាប៊ីសាអូឌីត និងវៀតណាមជាដើម។

3/ប្រទេសវៀតណាម

ថ្វីបើធៀបនឹងប្រទេស ២ ខាងលើ វៀតណាមរាងដើរយឺតជាងបន្តិចមែន តែបើមកមើលស្ថិតិប្រៀបនឹងឆ្នាំកន្លង ឃើញថារយៈកាលចុងក្រោយសន្ទុះនៃការកើនឡើងក្នុងវិស័យនេះមានការហក់ឡើងខ្លាំងមែនទែន។

វិស័យនេះចាប់ផ្ដើមឲ្យផ្លែផ្កានៅដើមឆ្នាំ ២០០០ ដែលនេះគឺត្រូវបានចាត់ទុកថាជាការកើនឡើងរហ័សបំផុតសម្រាប់វិស័យយានយន្តនៅអាស៊ានសម្រាប់រយៈពេល ២០ ឆ្នាំខាងមុខ។ បើតាមការអះអាងពី សមាគមផលិតយានយន្តវៀតណាមបានឲ្យដឹងថា នៅឆ្នាំ ២០១៨ អត្រាលក់រថយន្តមានច្រើនជាង ២៨៨ ០០០ គ្រឿង ច្រើនជាងឆ្នាំ ២០១៧ ប្រមាណ ៦%។

វៀតណាមអាចនិយាយបានថា ជាឋានសួគ៌សម្រាប់វិនិយោគិន ដ្បិតរដ្ឋាភិបាលបានចែងច្បាប់ថា សម្រាប់រោងចក្រផលិតយានយន្ត អាចគ្រប់គ្រងបាន ១០០% ដោយជនជាតិបរទេស ពោលមិនចាំបាច់មានថ្នាក់លើជាជនជាតិវៀតណាមឡើយ ដែលនេះបានជួយឲ្យសេដ្ឋកិច្ចវៀតណាមកើនឡើងមួយកម្រិតផងដែរ។

4/ប្រទេសម៉ាឡេស៊ី

មិនសូវខុសពីប្រទេសទាំង ៣ ខាងលើប៉ុន្មានទេ ដោយម៉ាឡេស៊ីក៏ជាសសរទ្រូងសំខាន់ក្នុងវិស័យផលិតយានយន្តនៅតំបន់អាស៊ានដែរ ខុសត្រង់ថាម៉ាឡេស៊ីផ្ដោតសំខាន់លើប្រភេទរថយន្តដឹកអ្នកដំណើរ ព្រោះនៅឆ្នាំ ២០១៨ តួលេខនៃការផលិតមានរហូតដល់ ៥៧២ ០០០ គ្រឿង ខណៈ ៥២២ ០០០ គ្រឿងជាប្រភេទរថយន្តដឹកអ្នកដំណើរ។

ជាចុងក្រោយ ក្នុងចំណោមប្រទេសទាំង ៤ ខាងលើ យើងអាចសន្មតបានថា ថៃ និងឥណ្ឌូណេស៊ីអាចនឹងជាដៃគូប្រជែង ព្រោះប្រទេស ២ នេះសុទ្ធតែចង់បានវិនិយោគិនក្រៅស្រុក ដ្បិតទីផ្សារស្រុកក្រៅរបស់ថៃកំពុងដំណើរការល្អ ស្របពេលឥណ្ឌូណេស៊ីកំពុងព្យាយាមវាយលុកទីផ្សារអន្តរជាតិដូចគ្នា៕

ប្រភព: Aseanbriefing

The post ប្រទេស ៤ នៅអាស៊ាន ដណ្តើមគ្នាធ្វើស្តេចត្រាញ់ ជាទីតាំងបោះមូលដ្ឋានផលិតរថយន្ត appeared first on .