បច្ចុប្បន្ន កម្ពុជាមានរោងចក្រផលិតស៊ីម៉ងត៍ចំនួន៥ និងរោងចក្រ២ទៀត គ្រោងបញ្ចប់សាងសង់ក្នុងឆ្នាំ២០២៥

Kem sinath — Mon, 27 Nov 2023 09:18:00 +0000

គិតមកដល់បច្ចុប្បន្ននេះ កម្ពុជាមានរោងចក្រផលិតស៊ីម៉ងត៍ចំនួន៥ ដែលកំពុងដំណើរការ និងមានសមត្ថភាពផលិតស៊ីម៉ងត៍បានប្រមាណ៩លានតោន ក្នុងមួយឆ្នាំ។នេះបើតាមក្រសួងរ៉ែ និងថាមពល កាលពីថ្ងៃទី២៦ ខែវិច្ឆិកា ឆ្នាំ២០២៣។

ក្រសួងរ៉ែ និងថាមពល បានឱ្យដឹងថា បច្ចុប្បន្ន កម្ពុជាមានរោងចក្រផលិតស៊ីម៉ងត៍ចំនួន ៥ កំពុងដំណើរការ អាចផលិតបានប្រមាណ ៩លានតោនក្នុងមួយឆ្នាំ និងមានរោងចក្រ ២ទៀតដែលនឹងបញ្ចប់ការសាងសង់ក្នុងឆ្នាំ២០២៥ខាងមុខ។

គួរបញ្ជាក់ផងដែរថា រោងចក្រផលិតស៊ីម៉ងត៍ដែលកំពុងដំណើរការទាំង៥នោះរួមមាន៖

១) រោងចក្រស៊ីម៉ង់តិ៍កំពត ស៊ីមេន ខូអិលធីឌី (Kampot Cement Co., Ltd) មានទីតាំងនៅស្រុកបន្ទាយមាស និងស្រុកដងទង់ ខេត្តកំពត មានសមត្ថភាពផលិតប្រមាណ ២ លានតោនក្នុងមួយឆ្នាំ។

២) រោងចក្រស៊ីម៉ងតិ៍កម្ពុជា ចក្រីទីង (Cambodia Cement Chakreyting Co., Ltd) មានទីតាំងនៅស្រុកកំពត ខេត្តកំពត មានសមត្ថភាពផលិតប្រមាណ ១,៣ លានតោនក្នុងមួយឆ្នាំ។

៣) រោងចក្រស៊ីម៉ង់តិ៍ ជីប ម៉ុង អ៊ិនស៊ី ស៊ីមេន ខបភើរេស៊ិន (Chip Mong Insee Cement Corporation) មានទីតាំងនៅស្រុកបន្ទាយមាស ខេត្តកំពត មានសមត្ថភាពផលិតប្រមាណ ២លានតោនក្នុងមួយឆ្នាំ។

៤) រោងចក្រស៊ីម៉ងត៍ បាត់ដំបង ខនស៍ ស៊ីមេន លីមីធីត មានទីតាំងស្ថិតនៅស្រុករតនៈមណ្ឌល ខេត្តបាត់ដំបង មានសមត្ថភាពផលិតស៊ីម៉ង់តិ៍ បានជិត ២.១ លានតោនក្នុងមួយឆ្នាំ។

៥) រោងចក្រស៊ីម៉ង់តិ៍ថៃប៊ុនរ៉ុងស្ថិតនៅស្រុកដងទុង ខេត្តកំពត មានសមត្ថភាពផលិតស៊ីម៉ង់តិ៍ បានប្រមាណ១ លានតោនក្នុងមួយឆ្នាំ៕

The post បច្ចុប្បន្ន កម្ពុជាមានរោងចក្រផលិតស៊ីម៉ងត៍ចំនួន៥ និងរោងចក្រ២ទៀត គ្រោងបញ្ចប់សាងសង់ក្នុងឆ្នាំ២០២៥ appeared first on .

រោងចក្រផលិតស៊ីម៉ងត៍ល្បីៗចំនួន ៥ កំពុងប្រកួតប្រជែងក្នុងទីផ្សារកម្ពុជា

ឧកញ៉ាកោះក្របី — Sat, 05 Jun 2021 09:44:08 +0000

វិស័យសាងសង់ហេដ្ឋារចនាសម្ព័ន្ធ និងលំនៅដា្ឋនកំពុងមានការរីកលូតលាស់ជាខ្លាំង បើទោះស្ថិតក្នុងស្ថានភាពនៃវិបត្តិកូវីដ១៩ ដែលជាហេតុបណ្តាលឲ្យសេដ្ឋកិច្ចពិភពលោកធ្លាក់ចុះ ក្នុងនោះប្រទេសកម្ពុជាក៏មានការធ្លាក់ចុះផងដែរ។

សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ

សម្រាប់ក្រុមហ៊ុនដែលវិនិយោគលើវិស័យឧស្សាហកម្មស៊ីម៉ងត៍ កំពុងតែជំរុញការបង្កើនផលិតភាព និងគុណភាពស៊ីម៉ងត៍ ខណៈដែលតម្រូវការនៅតែស្ថិតនៅក្នុងអត្រាខ្ពស់ ទោះបីជាស្ថិតនៅក្នុងស្ថានភាព កូវីដ១៩យ៉ាងណាក្តី។

បច្ចុប្បន្ននេះ កម្ពុជាមានរោងចក្រផលិតស៊ីម៉ងត៍ធំៗចំនួន៥ ដែលមានសមត្ថភាពផលិតស៊ីម៉ងត៍បានចំនួនប្រមាណ៧លានតោនក្នុងមួយឆ្នាំ។ រោងចក្រទាំងនោះរួមមាន៖ រោងចក្រស៊ីម៉ងត៍កំពត រោងចក្រស៊ីម៉ងត៍ចក្រីទីង, រោងចក្រស៊ីម៉ងត៍ ជីបម៉ុង អ៊ិនស៊ី, រោងចក្រស៊ីម៉ងត៍ បាត់ដំបង ខនស៍ ស៊ីមេន និងរោងចក្រស៊ីម៉ងត៍ ថៃ ប៊ុនរ៉ុង ខមភេនី។

១.ក្រុមហ៊ុន Kampot cement co.,Ltd

កំពត ស៊ីមេន គឺជាក្រុមហ៊ុនផលិតស៊ីម៉ងត៍ធំជាងគេនៅកម្ពុជា។ ក្រុមហ៊ុននេះត្រូវបានបង្កើតឡើងក្នុងឆ្នាំ ២០០៥ ជាក្រុមហ៊ុនបណ្តាក់ទុនរួមគ្នា ៩២.៥: ៧.៥ រវាងក្រុមហ៊ុន សៀមស៊ីម៉ងត៍ (Siam Cement) និងក្រុមហ៊ុន ខូវ ជូលី គ្រុប (Khaou Chuly Group Cambodia) ដែលជាក្រុមហ៊ុនសំណង់និងវិស្វកម្មកំពូលនៅកម្ពុជា។

Kampot cement មានរោងចក្រផលិតស៊ីម៉ងត៍របស់ខ្លួននៅខេត្តកំពត ហើយចាប់ផ្តើមដំណើរការនៅខែកុម្ភៈឆ្នាំ ២០០៨ និងមានសមត្ថភាពផលិត ៩៥០,០០០ តោនក្នុងមួយឆ្នាំ។

២. ក្រុមហ៊ុន Chip Mong Insee Cement Corporation

ក្រុមហ៊ុន ជីបម៉ុង អ៊ិនសេអ៊ីសស៊ីប៊ែរស៊ីខេ (CCIC) ត្រូវបានបង្កើតឡើងនៅថ្ងៃទី១៦ ខែកញ្ញា ឆ្នាំ២០១៥ ដោយការបណ្តាក់ទុនរួមគ្នាដែលមានតម្លៃ ២៦២ លានដុល្លារអាមេរិក។ ៦០% ត្រូវបានចាក់បញ្ចូលដោយក្រុមហ៊ុន CHIP MONG GROUP ជាសាជីវកម្មដ៏ធំបំផុតមួយនៅប្រទេសកម្ពុជាដែលមានបទពិសោធជាង ៣០ ឆ្នាំនៅក្នុងវិស័យសំណង់។ ចំនួន ៤០% ទៀតបានមកពីក្រុមហ៊ុន THAI SIAM CITY CEMENT CORPORATION មានទីស្នាក់ការកណ្តាលនៅប្រទេសថៃ ក្រុមហ៊ុនមានបទពិសោធជាង ៥០ ឆ្នាំដោយមានរោងចក្រស៊ីម៉ងត៍ នៅប្រទេសថៃ បង់ក្លាដែស ស្រីលង្កា និងវៀតណាម។

ជីបម៉ុង Insee មានរោងចក្រ នៅខេត្តកំពត ចម្ងាយ ១២៥ គីឡូម៉ែត្រខាងត្បូងរាជធានីភ្នំពេញ។

៣. ក្រុមហ៊ុន Cambodia Cement Chakrey Ting Factory Co., Ltd

រោងចក្រស៊ីម៉ង់ត៍ កម្ពុជាចក្រីទីង ត្រូវបានផ្តួចផ្តើមបង្កើតឡើងកាលពីឆ្នាំ២០១៤ ក្រោមទុនវិនិយោគប្រមាណជា ១០០ លានដុល្លារអាមេរិក ស្ថិតក្នុងភូមិភ្នំតូច ឃុំកណ្តាល ស្រុកទឹកឈូ ខេត្តកំពត លើផ្ទៃដីប្រមាណជា ៣២ ហិកតា។ រោងចក្រនេះអាចមានសមត្ថភាពផលិតស៊ីម៉ងត៍បានដល់ ១,២២ លានតោនក្នុងមួយឆ្នាំដើម្បីផ្គត់ផ្គង់តម្រូវការដែលកំពុងកើនឡើងនៅក្នុងវិស័យសំណង់នៅកម្ពុជា។

៤. ក្រុមហ៊ុនបាត់ដំបង ខនស៍ ស៊ីមេន

ក្រុមហ៊ុន Battambang Conch Cement Company Limited បានចាប់ផ្តើមប្រតិបត្តិការក្នុងឆ្នាំ២០១៨ នៅខេត្តបាត់ដំបង។ រោងចក្រនេះ បានទាញយកប្រយោជន៍ពីវិស័យសំណង់ដែលកំពុងរីកចម្រើនកម្ពុជា ប្រមាណ ២៣០ លានដុល្លារអាមេរិក។

រោងចក្រ ស៊ីម៉ងត៍បាត់ដំបងខនចច (Battambang Conch Cement Factory) ដែលលាតសន្ធឹងលើផ្ទៃដីជាង ៣១៦ ហិកតានៅក្នុងស្រុករតនៈមណ្ឌល នឹងអាចផលិតស៊ីម៉ងត៍បាន ២ លានតោនក្នុងមួយឆ្នាំ

រោងចក្រនេះគឺជាការបណ្តាក់ទុនរួមគ្នារបស់ក្រុមហ៊ុន ខុនស៊ី អ៊ិនធឺណេសិនណល ស៊ីខនធីង មានមូលដ្ឋាននៅប្រទេសចិន China-based Conch International Holding (HK) និងក្រុមហ៊ុន ខេធីស៊ីធីស៊ីម៉ងត៍ ខូអិលធីឌី (Battambang KT Cement Co., Ltd) ដែលគ្រប់គ្រងដោយពាណិជ្ជករក្នុងស្រុក លោកឧកញ៉ា វីញ ហួរ និងលោកឧកញ៉ា គង់ ទ្រី។

៥. ក្រុមហ៊ុន ស៊ីម៉ងត៍ ថៃ ប៊ុនរ៉ុង ខមភេនី លីមីធីត

ក្រុមហ៊ុន Thai Boom Roong Cement Co.,Ltd ជារោងចក្រផលិតស៊ីម៉ងត៍ក្រោមការវិនិយោគ ១១០លានដុល្លារ នៅខេត្តកំពត បានដំណើរការជាផ្លូវការកាលពីឆ្នាំ២០១៩ ដោយអាចផលិតបាន ១ លានតោនក្នុង ១ឆ្នាំ។

រោងចក្រនេះក្លាយជារោងចក្រស៊ីម៉ងត៍ទី ៥ នៅក្នុងប្រទេសកម្ពុជា ដើម្បីជាការឆ្លើយតបទៅនឹងការអភិវឌ្ឍយ៉ាងរហ័សនៃវិស័យសំណង់។

រោងចក្រនេះត្រូវបានអភិវឌ្ឍលើផ្ទៃដី ៦៧៨,៤ ហិកតា ក្នុងស្រុកដងទុង ខេត្តកំពត ដោយរោងចក្រនេះស្ថិតលើផ្ទៃដីទំហំ ៩១ ហិកតា ជាមួយនឹងទុនវិនិយោគប្រហែល ១១០ លានដុល្លារ ជាការវិនិយោគរួមរវាងក្រុមហ៊ុនក្នុងស្រុក ថៃ ប៊ុនរ៉ុង ស៊ីម៉ងត៍ និងវិនិយោគិនចិន។

បើតាមការបញ្ជាក់ពីរដ្ឋមន្ដ្រីក្រសួងរ៉ែ និងថាមពល លោក ស៊ុយ សែម ធ្លាប់ប្រាប់អ្នកសាព័ត៌មានឲ្យដឹងថា ត្រឹមចុងឆ្នាំ ២០១៩ កម្ពុជាមានរោងចក្រស៊ីម៉ងត៍៥ ដែលស្រូបយកបុគ្គលិកប្រហែល ២ ៧០០ នាក់ និងអាចមានសមត្ថភាពការផលិត ៨ លានតោន ជាមួយនឹងទុនវិនិយោគចំនួន ៨០០ លានដុល្លារ៕

The post រោងចក្រផលិតស៊ីម៉ងត៍ល្បីៗចំនួន ៥ កំពុងប្រកួតប្រជែងក្នុងទីផ្សារកម្ពុជា appeared first on .