លោក ជី សិលា

គិរីសួគ៍ពង្រីកការចែកចាយទឹកដោះគោស្រស់តាមផ្ទះ

ឧកញ៉ាសម្រែ — Wed, 16 Mar 2022 03:50:50 +0000

ក្រុមហ៊ុន Khmer Fresh Milk ដែលអភិវឌ្ឍកសិដ្ឋានគិរីសួគ៌ (Kirisu Farm) លើការចិញ្ចឹមគោយកទឹកដោះធំគ្រោងពង្រីកការចែកចាយផលិតផលរបស់ខ្លួនដល់អតិថិជននៅតាមផ្ទះ ដោយបង្កើតឲ្យបានចន្លោះពី ២០ ទៅ ៣០ ទីតាំងនៅដំណាច់ឆ្នាំ២០២០។

លោកជី សិលា សហស្ថាបនិកនៃក្រុមហ៊ុន Khmer Fresh Milk បានប្រាប់បណ្តាញព័ត៌មានភ្នំពេញប៉ុស្តិ៍កាលពីពេលថ្មីៗនេះ បន្ទាប់ពីទទួលជោគជ័យពីការដាក់លក់ទឹកដោះគោស្រស់នៅតាមផ្សារទំនើបក្នុងរាជធានីភ្នំពេញ ក្រុមហ៊ុនបានចាប់ផ្តើមពង្រីកការលក់របស់ខ្លួនទៅតាមផ្ទះ «គិរីសួគ៌ហៅស៍» នៅជាយរាជធានីភ្នំពេញ និងបណ្តាខេត្ត ដោយគ្រោងបង្កើតឱ្យបានចន្លោះពី ២០-៣០ ទីតាំងនៅត្រឹមដំណាច់ឆ្នាំ ២០២២ នេះ។

បើតាមលោកជី សិលា ចាប់ពីដើមឆ្នាំរហូតដល់ពេលនេះ ហាងគិរីសួគ៌ហៅស៍ បានបើកដំណើរការចំនួន ៩ ហើយនៅក្នុងរាជធានីភ្នំពេញ។

Khmer Fresh Milk គឺជាក្រុមហ៊ុនក្នុងស្រុកដែលបានបណ្តាក់ទុនប្រមាណ ១០ លានដុល្លារលើកសិដ្ឋានគិរីសួគ៌ (Kirisu Farm) ដើម្បីចិញ្ចឹមគោយកទឹកដោះលើដី ៣០០ ហិកតា ក្នុងស្រុកបាទី ខេត្តតាកែវ ដោយមានគោផ្តល់ទឹកដោះពូជ Holstein heifers ប្រមាណ ៥០០ ក្បាលមកពីប្រទេសអូស្ត្រាលី។ ក្រុមហ៊ុននេះក៏មានរោងចក្រកែច្នៃទឹកដោះគោស្រស់ផ្ទាល់ខ្លួន ដែលបានបើកដំណើរការកាលពីខែកក្កដា ឆ្នាំ ២០២០ ផងដែរ។

បើតាមសហស្ថាបនិកនៃក្រុមហ៊ុន Khmer Fresh Milk លោក ជី សិលា ការចិញ្ចឹមគោ និងការផលិតទឹកដោះគោរបស់ក្រុមហ៊ុន Khmer Fresh Milk កំពុងមានដំណើរការទៅមុខយ៉ាងរលូន ដោយបច្ចុប្បន្នក្នុងកសិដ្ឋានគិរីសួគ៌មានគោផ្តល់ទឹកដោះជិត ៧០០ ក្បាល ក្នុងនោះ ៥០០ ក្បាលជាពូជគោ Holstein heifers ដែលនាំចូលមកពីប្រទេសអូស្ត្រាលី និងប្រមាណ ២០០ ក្បាលទៀតជាកូនគោពូជ Holstein heifers កើតនៅស្រុកខ្មែរកាលពីឆ្នាំ ២០២០។

បច្ចុប្បន្នកសិដ្ឋានគិរីសួគ៌ អាចប្រមូលទឹកដោះគោបានប្រហែល ១២ ០០០ លីត្រក្នុង ១ ថ្ងៃ ដោយក្នុងនោះចំនួនជិត ១០ ០០០ លីត្រ ត្រូវបានចម្រាញ់ជាទឹកដោះគោស្រស់ (មាន ៣ ប្រភេទ) ក្រៅពីនោះក៏មានយ៉ៅអួរ (៤ រសជាតិ) និងប៊័រផងដែរ។

នៅកម្ពុជាមានកសិដ្ឋានធំៗ ចិញ្ចឹមគោយកទឹកដោះប្រមាណ ៣-៤ ប៉ុណ្ណោះ ដោយអាចមានសមត្ថភាពផ្គត់ផ្គង់តម្រូវការក្នុងស្រុកប្រហែលជាង ២០ ភាគរយ ហើយក្រៅពីនោះគឺជាផលិតផលនាំចូលពីក្រៅប្រទេស។ ក្រៅពី Kirisu Farm នៅកម្ពុជាមានកសិដ្ឋានចិញ្ចឹមគោយកទឹកដោះធំៗចំនួន ២ កន្លែងទៀត គឺកសិដ្ឋានផលិតទឹកដោះគោតេជោសែនឫស្សីត្រឹបក្នុងខេត្តព្រះវិហារ និងកសិដ្ឋាន Moo Moo Farms ក្នុងខេត្តកណ្តាល៕

The post គិរីសួគ៍ពង្រីកការចែកចាយទឹកដោះគោស្រស់តាមផ្ទះ appeared first on .

មកស្តាប់អ្នកជំនួញ ៤រូប ដើម្បីជាទុនមួយសម្រាប់ចាប់ផ្ដើមអាជីវកម្មដោយខ្លួនឯង

ឧកញ៉ាកោះក្របី — Wed, 26 May 2021 08:39:48 +0000

មនុស្សជាច្រើន ស្រមៃចង់ក្លាយជាអ្នកជំនួញ ចង់មានមុខរបរខ្លួនឯង ប៉ុន្តែមិនមានមនុស្សច្រើននោះទេ ដែលបានដឹងច្បាស់ពីវិថីឆ្ពោះទៅកាន់ក្ដីស្រមៃនោះ ថាមានភាពលំបាកប៉ុណ្ណា។ កម្មវិធីថ្មីមួយ ដែលមានឈ្មោះថា “Starting Up” ត្រូវបានបង្កើតឡើង ដើម្បីជាទុនមួយសម្រាប់អ្នកចង់ចាប់ផ្ដើមអាជីវកម្មដោយខ្លួនឯង។

“Starting Up” គឺជាកម្មវិធីសម្ភាសន៍ ជជែកពិភាក្សា ដេញដោល ជាមួយសហគ្រិន ដែលបានចាប់ផ្ដើមជំនួញនៅក្នុងវិស័យផ្សេងៗគ្នា។ កម្មវិធីនេះនឹងពិភាក្សាវែកញែកជីកកកាយយករឿងពិតនៅពីក្រោយការជោគជ័យ និងបរាជ័យលើអាជីវកម្មមួយចំនួន ដែលធ្វើឲ្យស្ថាបនិកទាំងនោះអាចបន្តរស់រីកចម្រើន និងនាំមុខគេ។ កម្មវិធីនេះ នឹងចងក្រង សង្ខេបរឿងពិតទុកជាមេរៀន ជារូបមន្តទុកឲ្យសហគ្រិនគ្រប់គ្នា ត្រងធ្វើជាវិថីតម្រង់ទិសទៅថ្ងៃអនាគត។

កម្មវិធី Starting Up មានលក្ខណៈពិសេស និងប្លែកពីកម្មវិធីផ្សេងៗទៀត ចំនួន ២ចំណុចសំខាន់ៗ៖

ទី១៖ អ្នកសម្ភាសន៍ (Host) សុទ្ធតែជាសហគ្រិន ជាស្ថាបនិកនៃអាជីវកម្ម ដែលមានបទពិសោធន៍ក្នុងការប្រតិបត្តិ, ការផ្ដល់ប្រឹក្សា និងបានវិនិយោគទៅលើមុខជំនួញជាច្រើន។

ទី២៖ សហគ្រិនដែលជាភ្ញៀវចូលរួមក្នុងកម្មវិធី Starting Up នឹងបង្ហាញរឿងរ៉ាវពិតក្នុងជំនួញរបស់ខ្លួន ទាំងភាពជោគជ័យ និងបរាជ័យ ដែលមិនធ្លាប់ត្រូវបានបង្ហាញនាពេលកន្លងមក។

Host ទាំង ៤រូប ក្នុងកម្មវិធី Starting Up មានដូចជា៖

លោក ជី សិលា នាយកប្រតិបត្តិក្រុមហ៊ុន Sabay Digital Group
កញ្ញា ដែក ដារី នាយកគ្រប់គ្រងទូទៅក្រុមហ៊ុន 360 Events
លោក ធុល រិទ្ធី សហស្ថាបនិក និងជានាយកប្រតិបត្តិ Smallworld Venture
លោក លោក ស៊ឹម ចាន់គីរីរត្ន ស្ថាបនិក និងជានាយកប្រតិបត្តិក្រុមហ៊ុន Banhji

ចំណែកភ្ញៀវដែលចូលរួមក្នុងកម្មវិធីនេះ គឺជាសហគ្រិនពីគ្រប់វិស័យផ្សេងៗគ្នា ទាំងវិស័យបច្ចេកវិទ្យា ម្ហូបអាហារ កសិកម្ម លក់ដូរ និងវិស័យជាច្រើនទៀត។

ដើម្បីដឹងកាន់តែច្បាស់ពីកម្មវិធីនេះ Host ទាំង ៤រូប នឹងជួបពិភាក្សាគ្នា បង្ហាញពីគោលបំណងនៃការបង្កើតកម្មវិធី នៅលើទំព័រ Facebook “Starting Up” ក៏ដូចជាលើ YouTube “Sabay TV” នាពេលឆាប់ៗនេះ។ កាន់តែពិសេស កម្មវិធី Starting Up ក៏នឹងមានជា podcast ផងដែរ។

The post មកស្តាប់អ្នកជំនួញ ៤រូប ដើម្បីជាទុនមួយសម្រាប់ចាប់ផ្ដើមអាជីវកម្មដោយខ្លួនឯង appeared first on .

លោក ជី សិលា

គិរីសួគ៍​ពង្រីក​ការ​ចែក​ចាយ​ទឹកដោះ​គោ​ស្រស់​​តាម​ផ្ទះ

មកស្តាប់អ្នកជំនួញ ៤រូប ដើម្បីជា​ទុន​មួយ​សម្រាប់​ចាប់ផ្ដើម​អាជីវកម្មដោយខ្លួនឯង

គិរីសួគ៍ពង្រីកការចែកចាយទឹកដោះគោស្រស់តាមផ្ទះ

មកស្តាប់អ្នកជំនួញ ៤រូប ដើម្បីជាទុនមួយសម្រាប់ចាប់ផ្ដើមអាជីវកម្មដោយខ្លួនឯង