ថ្លែងក្នុងឱកាសផ្សព្វផ្សាយអាហារូបករណ៍ថ្នាក់បរិញ្ញាបត្រវារីវប្បកម្មរបស់សាកលវទ្យាល័យ Shanghai OCeanប្រទេសចិនជូនដល់សិស្សនៅវិទ្យាលហ៊ុនសែនពោធិ៍អំពិលស្ថិតនៅក្នុងស្រុកទ្រំាងខេត្តតាកែវកាលថ្មីៗនេះ លោក ថាយ សុមុនី ប្រធាននាយកដ្ឋានវារីវប្បកម្មនៃរដ្ឋបាលជលផល បានសង្កត់ធ្ងន់ថា បើសិនប្អូនៗចាប់បានឱកាសអាហារូបករណ៍ទៅសិក្សានៅសាកលវិទ្យាល័យដែលល្បីនៅក្នុងប្រទេសចិនមួយនេះ វាសនារបស់ប្អូននឹងល្អប្រសើរ ហើយតាមរយៈអាហារូបករណ៍មួយនេះ ក្រៅពីជួយខ្លួនឯងនិងក្រុមគ្រួសារ វាបានចូលរួមលើកកម្ពស់មុខមាត់ទៅដល់សាលារបស់ប្អូន និងប្រទេសជាតិផងដែរ ខណៈវិស័យវារីវប្បកម្មនៅប្រទេសជិតខាងកម្ពុជា មានការរីកចម្រើនគេនៅតែចង់បានឱ្យពលរដ្ឋរបស់គេប្រឡងយកអាហារូបករណ៍ទៅសិក្សានៅប្រទេសចិនថែមទៀត។

លោក កែវ អ៊ាម នាយករងវិទ្យាល័យហ៊ុនសែនពោធិ៍អំពិលបានលើកឡើងថា មុខជំនាញវារីវប្បកម្ម សព្វថ្ងៃមានសារសំខាន់ណាស់ ហើយបើសិនគាត់(សិស្ស)បានប្រឡងជាប់អាហារូបករណ៍នេះ គាត់អាចចាប់យកអាជីពមួយនេះបង្កើតជាមុខរបរសម្រាប់គ្រួសារហើយ និងអាចលក់ដូរខ្លះបានថែមទៀតផង។

លោកលើកឡើង កន្លងមកសាលាមិនធ្លាប់ទទួលបានសាកលវិទ្យាល័យនៅខាងក្រៅប្រទេសមកផ្សព្វផ្សាយអាហារូបករណ៍ដល់ប្អូនៗបានយល់ដឹងបែបនេះ ទើបតែលើកនេះទេមានសាកលវិទ្យាល័យ Shanghai Ocean  ប្រទេសចិនមកផ្សព្វផ្សាយ ហើយក្នុងនាមជាគ្រូម្នាក់នៅទីនេះជំរុញឱ្យប្អូនៗខិតខំសិក្សាភាសាអង់គ្លេស ពិសេសភាសាចិន ដើម្បីអាចនៅសិក្សានៅក្រៅប្រទេសបាន។

បើតាមលោក ថាយ សុមុនី សាកលវិទ្យាល័យ Shanghai Ocean  នឹងនាយកដ្ឋានវារីប្បកម្ម ត្រៀមរៀបចំជាមជ្ឈមណ្ឌលឬជាកន្លែងបណ្តុះបណ្តាលនិងផ្សព្វផ្សាយអំពីការចិញ្ចឹមត្រី បង្កងក្នុងស្រែនៅក្នុងស្រុកទ្រំាងខេត្តតាកែវដើម្បីឱ្យកសិករក្នុងតំបន់អាចមកស្វែងយល់ ក៏ដូចជានិស្សិតដែលសិក្សានៅសាកលវិទ្យាល័យ Shanghai Ocean  អាចមកស្នាក់នៅ រៀនសូត្រនិងសិក្សាស្រាវជ្រាវជាមួយកសិករបានផងដែរ៕ តាកែវ

The post មន្ត្រីជំនាញចង់ឃើញសិស្សវិទ្យាល័យក្នុងស្រុក៣ នៃខេត្តតាកែវចាប់យកអាហារូបករណ៍ជំនាញវារីវប្បកម្មពីសាកលវិទ្យាល័យល្បីនៅប្រទេសចិន appeared first on .

លោក ឡែមផូរ វរិទ្ធិ ប្រធានគណៈកម្មការប្រតិបត្តិនៃសមាគមវារីវប្បករកម្ពុជា ឱ្យដឹងថា នៅដើមឆ្នំា២០២៣នេះ សកម្មភាពចិញ្ចឹមត្រីរបស់ប្រជាពលរដ្ឋនៅតាមតំបន់មានការថយចុះមួយចំនួន ដោយសារតម្លៃត្រីលើទីផ្សារកសិករលក់មិនបានថ្លៃ។ប៉ុន្តែចាប់ពីខែកក្កដារហូតដល់ខែ១០តុលា ឆ្នំា២០២៣នេះ សកម្មភាពនៃការចិញ្ចឹមត្រីរបស់ប្រជាកសិករក្នុងតំបន់មានភាពផុលផុសឡើងវិញ ព្រោះត្រីលក់បានថ្លៃ បើប្រៀបធៀបទៅនិងឆ្នំាមុន។

លោក ឡែមផូរ វរិទ្ធិ លើកឡើងថា “នៅពេលកន្លងមកកសិករចិញ្ចឹមត្រីខ្នាតតូច មិនសូវជាយល់និងមានការចាប់អារម្មណ៍ប៉ុន្មានោះទេក្នុងការរៀបចំផែនការអាជីវកម្ម ប៉ុន្តែសម្រាប់ម្ចាស់កសិដ្ឋានចិញ្ចឹមត្រីខ្នាតមធ្យម និងខ្នាតធំ គេមានចំណាប់អារម្មណ៍ទៅលើការរៀបចំផែនការអាជីវកម្ម។ចំណែកទីផ្សារវិញ បងប្អូនដែលជាអ្នកចិញ្ចឹមត្រី មិនសូវចាប់អារម្មណ៍អំពីព័ត៌មានទីផ្សារទេ ដោយសារពួកគាត់គិតថា ចិញ្ចឹមត្រីឱ្យតែបានទៅគឺអាចលក់ចេញបាន តែទីផ្សារវាមានការប្រែប្រួល គាត់ចិញ្ចឹមបានហើយស្ទះលក់មិនចេញ។តែក្រោយពីមានការណែនាំពីសមាគមនិងអង្គការដៃគូរមួយចំនួន គាត់ចាប់ផ្តើមគិត និងស៊ើបមើលអំពីទីផ្សារមុនចិញ្ចឹមត្រីចាប់តំាងពីឆ្នំា២០២១រហូតមកដល់បច្ចុប្បន្ននេះ”។

បើតាមប្រធានគណៈកម្មការប្រតិបត្តិនៃសមាគមវារីវប្បករកម្ពុជា កន្លងមកសមាគមធ្លាប់ធ្វើការជាមួយនិងកសិករចិញ្ចឹមនៅក្នុងខេត្តកំពង់ចាម កំពង់ធំ សៀមរាប បាត់ដំបង ពោធិ៍សាត់និងខេត្តតាកែវ គឺចំនួនមានអ្នកចិញ្ចឹមត្រីមានប្រហែល៧០០កសិដ្ឋាន ក្នុងនោះ៤០%ជាកសិដ្ឋានមធ្យមនិងធំ ក្រៅពីនេះជាកសិករខ្នាតតូច។

លោក ថាយ សុមុនី ប្រធាននាយកដ្ឋានវារីវប្បកម្មនៃរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទមានប្រសាសន៍លើកឡើងថា ក្រសួងកសិកម្ម រុក្ខាប្រមាញ់និងនេសាទ ក្រោមការដឹកនាំរបស់ឯកឧត្តមរដ្ឋមន្ត្រី ឌិត ទីណា បានជំរុញឱ្យថ្នាក់ដឹកនាំនៅតាមអគ្គនាយកដ្ឋាននីមួយៗ គិតពិចារណាទៅនិងទស្សនៈវិស័យលើការងារវារីវប្បកម្មនេះ ព្រោះគាត់ចង់ឃើញផលិតផលដែលផលិតបានពីវារីវប្បកម្មនៅក្នុងស្រុកមានការទទួលស្គាល់ និងប្រើប្រាស់ឱ្យបានច្រើន ដូចនេះយើងត្រូវជំរុញការចិញ្ចឹមត្រីនៅក្នុងស្រុកឱ្យបានច្រើន។

លោកលើកឡើងថា កន្លងមកខាងរដ្ឋបាលជលផលបានធ្វើការងារនេះយ៉ាងជិតស្និទ្ធជាមួយគម្រោង អភិវឌ្ឍន៍វារីវប្បកម្ម ពាណិជ្ជកម្មដើម្បីនិរន្តរភាពរបស់ក្រសួងកសិកម្ម សហរដ្ឋអាមេរិក បានចាប់ដៃគ្នា ជំរុញឱ្យមានការបង្កើតជាសមាគមវារីវប្បករកម្ពុជា ព្រោះសមាគមមួយនេះដើរតួនាទីសំខាន់ជួយឱ្យសមាជិករបស់ខ្លួនមានសមត្ថភាពរឹងមំាទំាងផ្នែកបច្ចេកទេសនិងផ្នែកគ្រប់គ្រងជំនួញ៕ សារេត

The post ប្រជាកសិករក្នុងស្រុក ចាប់ផ្តើមសកម្មភាពចិញ្ចឹមត្រីឡើងវិញច្រើន ពីខែកក្កដា ដល់ខែតុលា appeared first on .

លោក សាប់ សារុន កសិករចិញ្ចឹមបង្កងទឹកសាបនៅឃុំសំបួរ ស្រុកទ្រាំងខេត្តតាកែវ បានឱ្យដឹងថា នៅក្នុងរដូវបុណ្យភ្ជុំបិណ្ឌឆ្នំានេះ ចាប់ពីថ្ងៃបិណ្ឌទីមួយការលលក់បង្កងរបស់លោកចាប់ផ្តើមមានការកើន បើប្រៀបធៀបទៅនិងថ្ងៃធម្មតា។ ជាក់ស្តែងចាប់ពីបិណ្ឌទី៣តទៅថ្លៃខ្លះ លោកអាចលក់បង្កងរបស់ខ្លួនបានដល់២០គីឡូ។ ពិសេសជាងនេះទៅទៀតនៅថ្ងៃបិណ្ឌទី១៤និង១៥ អាចលក់បានរហូតដល់៦០គីឡូក្នុងមួយថ្ងៃ។

លោក សាប់ សារុន បញ្ជាក់ថា «នៅក្នុងរដូវបុណ្យភ្ជុំបិណ្ឌឆ្នំា២០២៣នេះ ប្រជាពលរដ្ឋរស់នៅក្នុងតំបន់មកទិញផ្ទាល់នៅនិងកន្លែងចិញ្ចឹមមានច្រើនប្រហាក់ប្រហែលទៅនិងអ្នកកំម្ម៉ង់ទិញតាមទូរស័ព្ទ។ សម្រាប់បង្កងលេខ២លក់ក្នុងតម្លៃ៨ម៉ឺនរៀល និងលេខ៣ថ្លៃ៧ម៉ឺនរៀលក្នុងមួយគីឡូក្រាម»។

បើតាមកសិករចិញ្ចឹមបង្កង ខាងលើនៅក្នុងមួយរដូវបុណ្យភ្ជុំបិណ្ឌឆ្នាំ២០២៣ លោកលក់បានប្រហែល៥០០គីឡូក្រាម ហើយន្ទឹមនិងការលក់បង្កងនៅក្នុងរដូវភ្ជុំបិណ្ឌកើនឡើង បច្ចុប្បន្ននៅមានបង្កងបែបធម្មជាតិនៅក្នុងស្រែបង្កងប្រហែល២ម៉ឺនក្បាលសម្រាប់ផ្គត់ផ្គង់តម្រូវការទីផ្សារ ខណៈដែលថ្មីៗលោកសាប់សារុនក៏បាននិងដាក់កូនចិញ្ចឹមសម្រាប់ផ្គត់ផ្គង់សាច់ និងចែកចាយកូនបង្កងទៅដល់ប្រជាកសិករនៅក្នុងតំបន់រហូតដល់២០ម៉ឺនកូននៅក្នុងទីតំាងរបស់ខ្លួន។

លោក ថាយ សុមុនី ប្រធាននាយកដ្ឋានវារីវប្បកម្មនៃរដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទមានប្រសាសន៍ថា ក្រសួងកសិកម្មរុក្ខាប្រមាញ់និងនេសាទ ក៏ដូចជាមន្ទីរកសិកម្ម រដ្ឋបាលជលផលខេត្តតាកែវ ចង់ឃើញដីសណ្តទន្លេមេគង្គកម្ពុជា ពិសេសក្នុងខេត្តតាកែវ កណ្តាល ព្រៃវែង មានការពង្រីការចិញ្ចឹមបានកាន់តែច្រើន ដើម្បីចូលរួមកាត់បន្ថយការនាំចូលពីប្រទេសជិតខាង ឬអាចឈានដល់ការនាំចេញទៅថ្ងៃអនាគត។

លោកបញ្ជាក់ថា «ថ្មីៗនេះយើងបានអញ្ចើញអ្នកជំនាញការក៏ដូចជាសាស្ត្រាចិនចុះមកមើលទីតំាងចិញ្ចឹមបង្កងរបស់យើង និងបានភ្លក្សម្ហូបធ្វើពីបង្កងទឹកសាបហើយ គាត់ទទួលស្គាល់រសជាតិ និងមានការចាប់អារម្មណ៍ ហើយទីតំាងសមស្របអាចជំរុញការចិញ្ចឹមបង្កងទឹកសាប ។ជាទិសដៅរដ្ឋាបាលជលផលក៏បានស្នើសុំទៅក្រសួងកសិកម្មរុក្ខាប្រមាញ់និងនេសាទនៅការពង្រីកការចិញ្ចឹមបង្កងនៅតាមខេត្តគោលដៅ មានខេត្តតាកែវ កណ្តាលនិងខេត្តព្រៃវែង»៕ អត្ថបទ៖ សារេត

The post បង្កងចិញ្ចឹមបែបធម្មជាតិកំពុងក្លាយជាមុខម្ហូបពេញនិយមមួយសម្រាប់គ្រួសារនិងមិត្តភក្រ្ត័ក្នុងរដូវបុណ្យទាន appeared first on .

ក្រុមមន្ត្រីជំនាញខាងបច្ចេកទេសរបស់ចិនចាប់ផ្តើមចុះសិក្សាស្វែងយល់អំពីការគ្រប់គ្រងជលផលនិងវារីវប្បកម្មហើយកាលពីថ្ងៃទី១ខែឧសភានៅតាមបណ្តាខេត្តគោលដៅ ដើម្បីសរសេរផែនការឆ្លើយតបទៅនិងទិដ្ឋភាពជាក់ស្តែងរបស់កម្ពុជា ដើម្បីធ្វើការអភិវឌ្ឍនៅពេលបន្ទាប់ ខណៈបេសកម្មសិក្សាមានរយៈពេលមួយខែ។

បើយោងតាមមន្ត្រីជំនាញខាងជលផលនិងវារីវប្បកម្មរបស់កម្ពុជា ដែលដឹកនាំដោយ លោក ហាវ វិសិដ្ឋ អនុប្រធានរដ្ឋបាលជលផល និងលោក ថាយ សុមុនី ប្រធាននាយកដ្ឋានវារីវប្បកម្មនៃរដ្ឋបាលជលផល នៃក្រសួងកសិកម្មរុក្ខាប្រមាញ់ និងនេសាទ សម្រាប់ទឹកដីខេត្តតាកែវ បានឱ្យឧកញ៉ាញ៉ូស៍ដឹងថា ក្រុមមន្ត្រីបច្ចេកទេសចិននេះមកនៅពេលនេះ ដើម្បីសិក្សាស្វែងយល់អំពីការគ្រប់គ្រង ការអនុវត្តជលផលនិងវារីវប្បកម្មនៅកម្ពុជា ដើម្បីរៀបចំសរសេរផែនឱ្យឆ្លើយតបទៅនិងទិដ្ឋភាពរបស់កម្ពុជា។

លោក ថាយ សុមុនី ប្រធាននាយកដ្ឋានវារីវប្បកម្មនៃរដ្ឋបាលជលផល មានប្រសាសន៍ថា ក្រុមការងារជលផលនៃក្រសួងកសិកម្ម រុក្ខាប្រមាញ់និងនេសាទ សហការជាមួយមន្ទីរកសិកម្ម ខណ្ឌរដ្ឋបាលជលផលខេត្តតាកែវ កំពត កំពង់សោម សៀមរាប កំពង់ធំ កំពង់ឆ្នំា បាត់ដំបង បន្ទាយមានជ័យ ធ្វើកិច្ចសហការជាមួយគាត់(មន្ត្រីបច្ចេកទេសចិន)ចុះទៅមើលទាក់ទងគ្រប់គ្រងជលផល ការងារសហគមន៍នេសាទ សហគមន៍រក្សាជម្រកត្រី ការងារអនុវត្តវារីវប្បកម្ម ការងារស្រាវជ្រាវវារីវប្បកម្មនៅកម្ពុជា។

លោកបញ្ជាក់ថា «ក្រុមការងារជំនាញបច្ចេកទេសរបស់ចិន មានគ្រប់ផ្នែកដូចជាកសិកម្ម សត្វនិងផលិតកម្មសត្វ ពេទ្យសត្វ កៅស៊ូ ជលផលនិងវារីវប្បកម្ម អ៊ីចឹងក្រុមការងារនេះមានបេសកម្មរយៈពេលមួយខែ ដោយធ្វើការបែងចែកជាក្រុមជំនាញមួយៗ ចុះធ្វើការនៅតាមខេត្តគោលដៅដែលគាត់ត្រូវការស្វែងយល់»។

បើយោងតាមប្រធាននាយកដ្ឋានវារីវប្បកម្មនៃរដ្ឋបាលជលផល បេសកម្មរបស់មន្ត្រីបច្ចេកទេសចិន ចុះធ្វើកម្មសិក្សានេះមានរយៈពេលតែពេល១០ថ្ងៃ ហើយក្រុមបច្ចេកទេសរបស់ចិនចំណាយពេលសរសេរផែនការនៅក្រុងភ្នំពេញជាមួយក្រុមជំនាញរបស់អគ្គនាយកដ្ឋាននីមួយៗនៃក្រសួងកសិកម្ម រុក្ខាប្រមាញ់និងនេសាទ ។

លោកលើកឡើងថា សម្រាប់ខេត្តតាកែវឃើញថាមានសក្តានុពល ពិសេសស្រុកនៅជាប់ដីសណ្តរទន្លេមេគង្គ ដូចជាស្រុកទ្រំាង ស្រុកជលសារ ស្រុកកោះអណ្តែតនិងស្រុកអង្គរបូរីនេះវាមានសក្តានុពលធ្វើកសិកម្មចម្រុះមានស្រូវ បង្កងនិងត្រី ដែលជាផ្នែកមួយបង្ហាញទៅខាងភាគីជំនាញបច្ចេកទេសរបស់ចិន ឱ្យបានយល់អំពីសក្តានុពលនៃខេត្តតាកែវ ពិសេសស្រុកទំាង៤ ដែលមានរបបទឹកល្អទំាងនៅរដូវប្រំាងនិង រដូវវស្សា។

លោក ថាយ សុមុនី មានប្រសាសន៍ថា «ឥលូវនេះយើងកំពុងពិភាក្សាជាមួយក្រុមជំនាញរបស់ភាគីចិន ហើយអ្វីដែលគាត់បានស្តាប់យើង ហើយគាត់យកទៅសរសេរជាផែនការឡើងនេះឃើញថាវាល្អ ព្រោះការគ្រប់គ្រងវារីវប្បកម្មនៅប្រទេសចិននេះមានការរីកចម្រើនខ្លំាងណាស់ហើយជាប់លេខមួយនៅលើពិភពលោក។ អ៊ីចឹងគាត់មកជួយយើង ដោយគាត់ចុះមកសរសេរពីបទពិសោធន៍ជាក់ស្តែង និងធ្វើបានជោគជ័យនៅប្រទេសចិន។ដូចនេះយើងសង្ឃឹមថាផែនការដែលគាត់សរសេរនេះនឹងឆ្លើយតបទៅនិងទិដ្ឋភាពជាក់ស្តែងរបស់ប្រទេសកម្ពុជា ហើយទាមទារឱ្យយើងស្វែងរកប្រភពថវិកាដើម្បីយកមកអនុវត្តនៅលើផែនការដែលយើងត្រូវធ្វើថ្ងៃខាងមុខ»៕ អត្ថបទ៖សារេត

The post ចិនចុះសិក្សាស្វែងយល់អំពីការគ្រប់គ្រងជលផលនិងវារីវប្បកម្មសម្រាប់កម្ពុជាធ្វើការអភិវឌ្ឍន៍នាពេលខាងមុខ appeared first on .