លោក ប្រាជ្ញ ចន្ទ

រដ្ឋសភា គាំទ្រឲ្យលោក ប្រាជ្ញ ចន្ទ បន្តធ្វើជាប្រធានគណៈកម្មាធិការជាតិរៀបចំការបោះឆ្នោត គ.ជ.ប

ឧកញ៉ាកោះក្របី — Wed, 13 Dec 2023 08:46:10 +0000

រដ្ឋសភា បានបន្តបើកសម័យប្រជុំលើកទី១ នីតិកាលទី៧ ដើម្បីធ្វើការបោះឆ្នោតផ្តល់សេចក្តីទុកចិត្តលើសមាសភាពគណៈកម្មាធិការជាតិរៀបចំការបោះឆ្នោត ហៅកាត់ គ.ជ.ប ចំនួន ៩រូប នៅព្រឹកថ្ងៃពុធទី១៣ខែធ្នូ ឆ្នាំ២០២៣ ក្រោមវត្តមានសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាជាតិ។

អង្គប្រជុំរដ្ឋសភាបានបោះឆ្នោតគាំទ្រឲ្យលោក ប្រាជ្ញ ចន្ទ ជាប់បន្តធ្វើជាប្រធានគណៈកម្មាធិការជាតិរៀបចំការបោះឆ្នោត ចំណែកលោក ជឺ ចំណាន ជាអនុប្រធានគណៈកម្មាធិការជាតិរៀបចំការបោះឆ្នោត និងសមាជិកគណៈកម្មាធិការជាតិរៀបចំការបោះឆ្នោត ចំនួន ៧ រូបទៀតគឺលោក មាន សទិ, លោក ឌឹម សុវណ្ណារុំ, លោក សោម សូរីដា, លោក ហេង ស៊ីឡេង, លោក យិច សមិទ្ធិ, លោក ហ៊ែល សារ៉ាត់ និងលោក ហង្ស ពុទ្ធា។

បើតាមរដ្ឋសភាជាតិ សមាសភាពថ្នាក់ដឹកនាំគណៈកម្មាធិការជាតិរៀបចំការបោះឆ្នោតថ្មីនៃនីតិកាលទី៧រដ្ឋសភានេះ ត្រូវធ្វើសច្ចាប្រណិធាននៅព្រះបរមរាជវាំងជាមុនសិន មុនចូលកាន់តំណែង នាពេលខាងមុខ។

សូមជម្រាបថា គណៈកម្មាធិការជាតិរៀបចំការបោះឆ្នោត ហៅកាត់ថា (គ.ជ.ប) មានសមត្ថកិច្ចក្នុងការធ្វើផែនការរៀបចំ និងចាត់ចែងការបោះឆ្នោតក្នុងទូទាំងប្រទេស ក្រោមបាវចនា ឯករាជ្យ អព្យាក្រឹត សច្ចៈ យុត្តិធម៌ តម្លាភាព។

គួររំលឹកបន្តិចថា លោក ប្រាជ្ញ ចន្ទ ចូលកាន់តំណែងជាប្រធានគណៈកម្មាធិការជាតិរៀបចំការបោះឆ្នោត (គ.ជ.ប) នៅថ្ងៃទី៣០ ខែមិថុនា ឆ្នាំ២០២១ ជំនួសលោក ស៊ិក ប៊ុនហុក ដែលបានសុំលាលែងពីតំណែងក្រោមហេតុផលមានបញ្ហាសុខភាព និងវ័យកាន់តែចាស់។

មុនកាន់តំណែងប្រធាន គ.ជ.ប លោក ប្រាជ្ញ ចន្ទ គឺជាតំណាងរាស្រ្ត និងជាប្រធានគណៈកម្មការទី១ នៃរដ្ឋសភា ទទួលបន្ទុកសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា ចាប់តាំងពីឆ្នាំ២០១៧ មក។ ក្រៅពីនេះ លោកក៏ធ្លាប់ជាមន្ត្រីជាន់ខ្ពស់ក្រសួងមហាផ្ទៃ រយៈពេល១០ឆ្នាំ ពោលគឺពីឆ្នាំ១៩៩១ ដល់២០០១ មុនកាន់តំណែងអភិបាលខេត្តបាត់ដំបង ៣អាណត្តិជាប់គ្នា ពីឆ្នាំ២០០១ ដល់២០១៣ ហើយក្រោយមកលោកបានផ្លាស់ប្ដូរទៅកាន់តំណែងអភិបាលខេត្តត្បូងឃ្មុំ ១អាណត្តិ ពីឆ្នាំ២០១៤ ដល់២០១៧ នៅពេលខេត្តនេះបង្កើតថ្មីដែលបំបែកចេញពីខេត្តកំពង់ចាម៕

The post រដ្ឋសភា គាំទ្រឲ្យលោក ប្រាជ្ញ ចន្ទ បន្តធ្វើជាប្រធានគណៈកម្មាធិការជាតិរៀបចំការបោះឆ្នោត គ.ជ.ប appeared first on .

តើប្រធាន គ.ជ.ប ថ្មី លោក ប្រាជ្ញ ចន្ទ ជានរណា?

ឧកញ៉ាកោះក្របី — Fri, 25 Jun 2021 03:28:07 +0000

កាលពីថ្ងៃទី២៤ ខែមិថុនាម្សិលមិញ រដ្ឋសភាកម្ពុជាបានបោះឆ្នោតគាំទ្រ និងផ្តល់ទំនុកចិត្តឱ្យលោក ប្រាជ្ញ ចន្ទ ជាសមាជិកគណបក្សប្រជាជនកម្ពុជាធ្វើជាប្រធានគណៈកម្មធិការជាតិរៀបចំការបោះឆ្នោត (គ.ជ.ប)ថ្មីជាផ្លូវការ។ បន្តទៅទៀត លោកប្រាជ្ញ ចន្ទ នឹងត្រូវចូលស្បថក្នុងព្រះបរមរាជវាំង ដើម្បីឡើងកាន់ការងារជាប្រធានគ.ជ.បថ្មីនៅថ្ងៃនេះ។

លោក ប្រាជ្ញ ចន្ទ ត្រូវបានជ្រើសរើសជាប្រធានថ្មីគ.ជ.ប នេះ គឺជំនួសលោក ស៊ិក ប៊ុនហុក ដែលបានលាលែងកាលពីដើមខែមិថុនានេះក្រោមហេតុផលសុខភាព។

សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ

តើលោក ប្រាជ្ញ ចន្ទ ជានរណា?

មានវ័យ៦៤ឆ្នាំ លោកប្រាជ្ញ ចន្ទ ត្រូវបានក្លាយជាប្រធានថ្មីនៃគណៈកម្មធិការជាតិរៀបចំការបោះឆ្នោត ហៅកាត់ (គ.ជ.ប)។ លោកកើតនៅភូមិត្រពាំងព្រីង ឃុំទូកមាស ស្រុកបន្ទាយមាស ខេត្តកំពត។ លោកបញ្ចប់មធ្យមសិក្សាកម្រិត១នៅក្នុងខេត្តកំពត ហើយបានមកបន្តបញ្ចប់មធ្យមសិក្សាកម្រិត២នៅក្នុងរាជធានីភ្នំពេញក្នុងសម័យសាធារណរដ្ឋខ្មែរមុនការមកដល់នៃរបបខ្មែរក្រហម។ បន្ទាប់ពីបញ្ចប់មធ្យមសិក្សាទាំង២កម្រិតនេះ លោកប្រាជ្ញ ចន្ទ ក៏បានបញ្ចប់ការសិក្សាផ្នែកវិទ្យាសាស្ត្រនយោបាយថ្នាក់បរិញ្ញាបត្រ។

លោក ប្រាជ្ញ ចន្ទ មានបទពិសោធន៍ជោគជាំនៅក្នុងក្រសួងមហាផ្ទៃ។ ពីឆ្នាំ១៩៩១ដល់ឆ្នាំ២០០១ លោកបានកាន់ដំណែងជាប្រធាននាយកដ្ឋានគ្រប់គ្រងខេត្តនៃក្រសួងមហាផ្ទៃ ហើយក្រោយមកជាប្រធាននាយកដ្ឋានរដ្ឋបាលទូទៅ បន្ទាប់មកទៀតជាអគ្គនាយករងនៃអគ្គនាយកដ្ឋានរដ្ឋបាល និងចុងក្រោយជាអគ្គនាយកនៃអគ្គនាយកដ្ឋានរដ្ឋបាលនៃក្រសួងមហាផ្ទៃ។

ចេញពីក្រសួងមហាផ្ទៃ លោកប្រាជ្ញ ចន្ទ បានទៅធ្វើជាអភិបាលខេត្តបាត់ដំបងចន្លោះឆ្នាំ២០០១ដល់ឆ្នាំ២០១៣ ហើយផ្លាស់ទៅធ្វើជាអភិបាលខេត្តត្បូងឃ្មុំពីឆ្នាំ២០១៤ដល់ឆ្នាំ២០១៧ ខណៈដែលនៅពេលនោះរាជរដ្ឋាភិបាលសម្រេចបង្កើតខេត្តត្បូងឃ្មុំៗថ្មី។

ក្រោយមក លោកបានធ្វើជាតំណាងរាស្រ្តខេត្តត្បូងឃ្មុំ និង ត្រូវបានតែងតាំងជាប្រធានគណៈកម្មការទី១ នៃរដ្ឋសភា គឺគណៈកម្មការសិទ្ធិមនុស្ស ទទួលពាក្យបណ្តឹង អង្កេត និងទំនាក់ទំនងរដ្ឋសភា ព្រឹទ្ធសភា មុនត្រូវបានជ្រើសរើសជាប្រធានគ.ជ.បថ្មីនាពេលនេះ៕

The post តើប្រធាន គ.ជ.ប ថ្មី លោក ប្រាជ្ញ ចន្ទ ជានរណា? appeared first on .