យោងតាម លោក វ៉ាន់ អៀន ប្រធានសមាគមត្រសក់ផ្អែមសៀមរាបមានជ័យបានឱ្យដឹងថា សមាគមបង្កើតឡើងនៅថ្ងៃទី២៥ ខែមិថុនា ឆ្នាំ២០១១ ជាមួយនិងសមាជិកដាត្រសក់ផ្អែម និងឪឡឹកលឿង មានតែនៅក្នុងបន្ទាយមានជ័យ និងខេត្តសៀមរាប តែមកឥឡូវនេះ សមាគមមានសមាជិកបន្ថែមនៅឧត្តរមានជ័យ ប៉ៃលិន និងបាត់ដំបង។

លោកលើកឡើងថា «ទាក់ទងនឹងការដាំដុះ ក៏ដូចជាការប្រកួតប្រជែងលើទីផ្សារសមាគមបានដាក់ចេញនៅផែនការរយៈពេល៥ឆ្នាំរួចហើយ គឺយើងចង់បានខេត្តរតនគិរី និងខេត្តមណ្ឌលគិរីជំរុញការដាំដុះត្រសក់ផ្អែមនិងឪឡឹកលឿង ព្រោះតំបន់នៅក្នុងខេត្តទំាងពីរនេះមានដីទំនេរច្រើន ហើយសំបូរទៅដោយដីមានជីជាតិច្រើន តែគ្រាន់វាឆ្ងាយបន្តិចទីតាំងប្រមូលផ្តុំនៅខេត្តសៀមរាប តែទោះជាយ៉ាងនេះក្តីបើយើងដាំបាន វាល្អព្រោះដំណាំទាំងនេះទាមទារប្តូរកន្លែង យើងមិនអាចដាំលើដំណាំដដែលបានទេ»។

បើតាម ប្រធានសមាគមខាងលើ នៅពេលកន្លមកកសិករនៅក្នុងខេត្តរតនគិរី និងមណ្ឌលគិរី ក៏ចង់ដាំត្រសក់ផ្អែមនិងឪឡឹកលឿងនេះ ផ្គត់ផ្គង់មកឱ្យខាងសមាគម តែមានបញ្ហានៅត្រង់ការដឹកជញ្ជូន។ តែទោះជាបែបនេះក្តី នៅក្នុងឆ្នាំ២០២៥ខាងមុខនេះ ខាងសមាគមត្រសក់ផ្អែមសៀមរាបមានជ័យនឹងបង្កើត ឱ្យមានអនុប្រធាន និងប្រធានតំបន់នៅក្នុងខេត្តទំាងពីរនេះបានហើយ សមាគមនឹងពង្រីកទីផ្សារនៅកាន់ខេត្តគោលដៅខាងលើ ដោយឱ្យកសិកធ្វើការដាំដុះហើយផ្គត់ផ្គង់ត្រសក់ផ្អែមនិងឪឡឹកលឿងជូនសមាគម។

លោក វ៉ាន់ អៀន បានអះអាងថា«ទាក់ទងខេត្តគោលដៅខាងលើ យើងត្រូវតែធ្វើឱ្យបាន ដើម្បីឆ្លើយតបទៅនិងផែនការរយៈពេល៥ឆ្នាំដែលសមាគមបានដាក់ចេញ។ ដូចនេះដើម្បីប្រកួតប្រជែងជាមួយទីផ្សារខាងក្រៅ យើងត្រូវការជំរុញការផលិតឱ្យបានតាមផែនការ ហើយការដឹកជញ្ជូនយើងគិតថានៅពេលខាងមុខនេះ សមាគមនឹងមានរថយន្តដឹកទំនិញដោយខ្លួន សង្ឃឹមថាអាចនិងកាត់បន្ថយបានការចំណាយមួយចំនួនផងដែរ»៕ តាកែវ

The post កសិករក្នុងខេត្តរតនគិរីនិងមណ្ឌលគិរី អាចនឹងក្លាយជាគោលដៅផ្គត់ផ្គង់ត្រសក់ផ្អែមនិងឪឡឹកលឿងនៅលើទីផ្សារ appeared first on .

លោក វ៉ាន់ អៀន ប្រធានសមាគមតាសក់ផ្អែម សៀមរាបមានជ័យ ឱ្យដឹងថា ពូជតាសក់បីប្រភេទដែលកម្ពុជានិយមដាំ និងបរិភោគ ជាពិសេសកំពុងមានទីផ្សារល្អ គឺតាសក់ផ្អែមពូជពណ៌ស ពូជពណ៌លឿង និងតាសក់ផ្អែមពូជសំណាញ់។ពូជទាំងបីប្រភេទនេះទិញពីប្រទេសខុសៗគ្នា រួមមានមកពីតៃវ៉ាន់ ថៃ ម៉ាឡេស៊ី។ចំពោះទីផ្សារគឺផ្តោតលើតម្រូវការរបស់អតិថិជន លក់ដាច់ប្រហាក់ប្រហែលគ្នា មានតម្រូវទីផ្សារខ្ពស់ដូចគ្នា។

លោកបន្តថា ជាក់ស្តែងបច្ចុប្បន្នខាងសមាគមតាសក់ផ្អែកសៀមរាបមានជ័យ ផលិតពូជតាសក់ទាំងបីប្រភេទនេះបានច្រើន ដែលអាចលក់បានចន្លោះពី ២៥តោន ទៅ៤០តោន ក្នុងមួយខែៗ ទៅកាន់ទីផ្សារប្រមាណ៣៥ផ្សារ ដែលបានធ្វើកុងត្រាហើយនិងកិច្ចសន្យាទិញលក់ លក់បោះដុំ-រាយ និងលក់តាមតំបន់ទេសចរណ៍ជាដើម។ចំពោះទីផ្សារក្រៅស្រុកវិញ កន្លងមកធ្លាប់បាននាំចេញទៅប្រទេសជប៉ុនប្រមាណ៤០តោន ដើម្បីធ្វើការ៉េម ប៉ុន្តែដោយសារតាសក់ធ្វើការ៉េមពិបាកទើបមានការផ្អាកវិញ។ក្រៅពីនេះ ក៏មានខាងប៉ែកអ៊ឺរ៉ុបធ្លាប់បានយកតាសក់នេះទៅធ្វើតេស្តរួចម្តងហើយ រហូតមកដល់ពេលនេះមិនទាន់មានការឆ្លើយតបនៅឡើយទេ។

លោកបានបន្តទៀតថា តាសក់ទាំងបីប្រភេទនេះ មានទម្ងន់មិនខុសគ្នាប៉ុន្មាននោះទេ ជាមធម្យមជាង១គីឡូ ដល់ជាង២គីឡូក្រាម ក្នុង១ផ្លែ ទៅតាមរដូវកាល បើរដូវត្រជាក់ផ្លែមិនសូវធំទេ តែបើខែក្តៅផ្លែធំៗល្អ។ហើយតម្លៃលក់ពីសមាជិកមកដល់សមាគមបែងចែកជាពីរប្រភេទ តាសក់ផ្អែមសាច់លឿង លេខ១ ទម្ងន់១គីឡូ ៣ខាំឡើងទៅ តម្លៃ ៣០០០រៀលក្នុងមួយគីឡូក្រាម ចំពោះសំណាញ់ និងពណ៌សទម្ងន់ដូចគ្នាមានតម្លៃ៣៥០០រៀល ក្នុងមួយគីឡូក្រាម។ចំណែកតម្លៃលេខ២គិតពី៩ខាំដល់១គីឡូ១ខាំ តម្លៃ២០០០រៀលក្នុងមួយគីឡូក្រាម។លោកបញ្ជាក់ថា តម្លៃប៉ុណ្ណឹងអាចទទួលយកបាន សមាមាត្រនឹងតម្លៃផលិតរបស់កសិករហើយ។

បើតាមលោក វ៉ាន់ អៀន ការដាំតាសក់ផ្អែមដែលមានរសជាតិផ្អែម ឆ្ញាញ់ គឺត្រូវដាំតាមស្តង់ដារ ជាពិសេសគឺការប្រើប្រាស់ជីកំប៉ុស្តិ៍ ទើបទទួលបានរសជាតិឆ្ញាញ់ មានទម្ងន់ធ្ងន់ និងមានតម្រូវការទីផ្សារល្អ។ការធ្វើបែបនេះនឹងការគាំទ្រពីអតិថិជន ពិសេសអ្នកដែលទិញហូបមិនថាទិញផ្ទាល់ មិនថាទិញប្រយោលពួកគាត់គាំទ្រភាគច្រើនគាត់ទិញហូបហើយឆ្ញាញ់ចង់ទិញបន្តទៀត។

ទោះបីយ៉ាងណា ប្រធានសមាគមរូបនេះ បានគូសបញ្ចាក់ថា ការធ្វើកសិកម្មតែងតែជួបនូវបញ្ហាផ្សេងៗ ដែលសមាគមតាសក់ផ្អែមលោកផ្ទាល់នៅមានបញ្ហាទៅលើសត្វល្អិតបំផ្លាញ អាកាសធាតុជាដើម ព្រោះដំណាំនេះទទួលរងនឹងជំងឺខ្លាំងណាស់ ហេតុនេះហើយបណ្តាលឱ្យសមាជិកសមគមប្រមាណជាង៣០០គ្រួសារ ផលិតមិនបានគ្រប់ តែងតែខ្វះខាតជាហូហែរ។

ប៉ុន្តែសមាគម នៅតែបន្តពង្រីកនូវការដាំបន្ថែម និងបានធ្វើផែនការអាជីវកម្មជាមួយដៃគូ និងកសិករ ដាក់គោលដៅក្នុងឆ្នាំ២០២៤នេះ ត្រូវតែផលិតតាសក់ផ្អែមឱ្យបានច្រើន ឱ្យមានគុណភាពជាងឆ្នាំមុនៗ អាចលក់ចេញក្នុងចន្លោះពី៣០តោន ទៅ៤៥តោនក្នុងមួយខែៗ ព្រោះលោកមើលឃើញថាតាសក់ផ្អែមនេះពិតជាមានទីផ្សារល្អ។ជាមួយគ្នានេះ លោកក៏បានសំណូមពរដល់ប្រជាពលរដ្ឋជាពិសេសឱ្យអតិថិជនជួយគាំទ្រផលិតផលតាសក់ផ្អែមបន្ថែមទៀតផងដែរ៕

The post លោក វ៉ាន់ អៀន៖ ពូជតាសក់ផ្អែមបីប្រភេទ កំពុងមានតម្រូវការទីផ្សារល្អ appeared first on .