លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានក្រុម ប្រឹក្សាបរធនបាលនៃសហគ្រិនខ្មែរ បានកោតសរសើរដល់ជ័យលាភី និងលើកទឹកចិត្តសហគ្រិនទាំងអស់ឱ្យខិតខំបន្តអភិវឌ្ឍសមត្ថភាព ដើម្បីចាប់យកឧត្តមភាព និងនិរន្តរភាពអាជីវកម្ម។

រដ្ឋមន្ត្រីក្រសួងឧស្សាហកម្ម បានលើកឡើងថា៖ «ភាពជោគជ័យនេះ គឺជាការចាប់ផ្តើមនៃដំណើរសហគ្រិនភាពដ៏ប្រសើរមួយ។ ជាមួយនឹងការផ្លាស់ប្តូរលក្ខខណ្ឌទីផ្សារ បច្ចុប្បន្នឱកាសផលិតមានកាន់តែច្រើន ហើយតម្រូវការផលិតផលក្នុងស្រុកដែលមានគុណភាពក៏មានកាន់តែខ្ពស់។ យើងមានទំនួលខុសត្រូវរួមក្នុងការអភិវឌ្ឍ ពង្រឹង និងលើកកម្ពស់អាជីវកម្មក្នុងស្រុក ធ្វើយ៉ាងណាឱ្យពួក គេមានសមត្ថភាព ដើម្បីបំពេញតម្រូវការទីផ្សារក្នុងស្រុក និងការត្រៀមលក្ខណៈឈានចូលទីផ្សារក្រៅប្រទេស»។

សម្រាប់ម្ចាស់ជ័យលាភីទាំង ១៤ ក្រុម/ក្រុមហ៊ុន មានដូចជា៖

១. ពានរង្វាន់សហគ្រិនខ្មែរ សហគ្រាសធុនតូច និងមធ្យម
*ជ័យលាភីពានរង្វាន់សហគ្រាសធុនតូច និងមធ្យម ឆ្នាំ២០២៥ បានទៅលើក្រុមហ៊ុន មេហ្គា អេហ្វ&ប៊ីឯ.ក * ជ័យលាភីពានរង្វាន់សហគ្រាសធុនតូច និងមធ្យម ផ្នែកនវានុវត្តន៍ បានទៅលើក្រុមហ៊ុន ហូស្ពីកឃែ ខេមបូឌាឯ.ក

* ជ័យលាភីពានរង្វាន់សហគ្រាសធុនតូច និងមធ្យម ផ្នែកនាំចេញ បានទៅលើក្រុមហ៊ុន លូស៍ ខេអេច ឯ.ក
* ជ័យលាភីពានរង្វាន់សហគ្រាសធុនតូច និងមធ្យម ផ្នែកសង្គម បានទៅលើក្រុមហ៊ុន ខេ អេស ស៊ីដ ឯ.ក

២. ពានរង្វាន់សហគ្រិនខ្មែរ ធុរកិច្ចថ្មី
* ជ័យលាភីពានរង្វាន់ធុរកិច្ចថ្មី ឆ្នាំ២០២៥ បានទៅលើ ក្រុម អាថាយអឺ អេមផាយ

 * ជ័យលាភីពានរង្វាន់ធុរកិច្ចថ្មី ផ្នែកនវានុវត្តន៍ បានទៅលើក្រុមហ៊ុន ការពារ សាយប៊ើរ ឯ.ក
* ជ័យលាភីពានរង្វាន់ធុរកិច្ចថ្មី ផ្នែកសក្តានុពលលូតលាស់ បានទៅលើក្រុម អេ អេ ភី ហ្វាម

* ជ័យលាភីពានរង្វាន់ធុរកិច្ចថ្មី ផ្នែកសង្គម បានទៅលើ សហគមន៍កសិកម្មទំនើបទំរីងកំពង់ធំ

៣. ពានរង្វាន់សហគ្រិនខ្មែរ សហគ្រិនមហាវិទ្យាល័យ
* ពានរង្វាន់សហគ្រិនមហាវិទ្យាល័យ ផ្នែកពន្លកនវានុវត្តន៍ បានទៅលើ TOKKATOT
* ពានរង្វាន់សហគ្រិនមហាវិទ្យាល័យ ផ្នែកធុរកិច្ចត្រៀមចូលទីផ្សារ បានទៅលើ STROKIFY
* ពានរង្វាន់សហគ្រិនមហាវិទ្យាល័យ ផ្នែកស្ថាបនិកវ័យក្មេង បានទៅលើ JIV-JEAT

៤. ពានរង្វាន់សហគ្រិនខ្មែរ វិទ្យាល័យ
* ជ័យលាភីពានរង្វាន់សហគ្រិនវិទ្យាល័យ ផ្នែកនវានុវត្តន៍ជំនាន់ថ្មី បានទៅលើ IRIS
* ជ័យលាភីពានរង្វាន់សហគ្រិនវិទ្យាល័យ ផ្នែកនិរន្តរភាពជំនាន់ថ្មី បានទៅលើ KARCHEE
* ជ័យលាភីពានរង្វាន់សហគ្រិនវិទ្យាល័យ ផ្នែកសង្គមជំនាន់ថ្មី បានទៅលើ APSARA

សូមជម្រាបជូនថា ពានរង្វាន់សហគ្រិនខ្មែរ មានបួនប្រភេទគឺ ពានរង្វាន់សហគ្រិនខ្មែរ វិទ្យាល័យ, ពានរង្វាន់សហគ្រិនខ្មែរ សហគ្រិនមហាវិទ្យាល័យ, ពានរង្វាន់សហគ្រិនខ្មែរ ធុរកិច្ចថ្មី, និងពានរង្វាន់សហគ្រិនខ្មែរ សហគ្រាសធុនតូច និងមធ្យម។ ពានរង្វាន់ទាំងនេះត្រូវបានរៀបចំឡើង ដើម្បីជំរុញការអភិវឌ្ឍសហគ្រិនភាពនៅគ្រប់កម្រិត ចាប់តាំងពីសិស្ស-និស្សិតដែលជានវានុវត្តន៍ករ និងជាស្ថាបនិកវ័យក្មេង ដែលត្រៀមលក្ខណៈធ្វើអាជីវកម្ម ដោយប្រែ ក្លាយគំនិតច្នៃប្រឌិតទៅជាផលិតផលសម្រាប់ទីផ្សារ ព្រមទាំងលើកកម្ពស់ធុរកិច្ចបង្កើតថ្មី និងសហគ្រាស ធុនតូច និងមធ្យមដែលកំពុងរីកចម្រើនរបស់កម្ពុជា។ ម្ចាស់ជ័យលាភីត្រូវបានជ្រើសរើសដោយផ្អែកលើភាពច្នៃ ប្រឌិត ភាពធន់ និងការខិតខំប្រឹងប្រែង ក្នុងការជំរុញនវានុវត្តន៍ និងកំណើនសេដ្ឋកិច្ច។

កម្មវិធីពានរង្វាន់សហគ្រិនខ្មែរ បានឈានដល់ឆ្នាំទី៥ ដោយបន្តបេសកកម្មរបស់ សហគ្រិនខ្មែរ ក្នុងការថែបំប៉ន ដុសខាត់ប្រព័ន្ធអេកូឡូស៊ីសហគ្រិនភាពនៅកម្ពុជា។ កម្មវិធីនេះផ្តល់ ឱកាសសម្រាប់ការបណ្តុះបណ្តាល ការកសាង បណ្តាញធុរកិច្ច និងការចូលរួមក្នុងការប្រកួតប្រជែងថ្នាក់ជាតិ និងអន្តរជាតិ ក្នុងគោលដៅជំរុញកំណើនអាជីវកម្មនៅ គ្រប់កម្រិត។

កម្មវិធីនេះគឺជាផ្នែកមួយនៃយុទ្ធនាការកសាងប្រព័ន្ធអេកូឡូស៊ីសហគ្រិនភាព ឆ្នាំ២០២៥ ដែលមានកម្មវិធីស្នូល សំខាន់ៗ របស់សហគ្រិនខ្មែរ ដែលដំណើរការក្នុងពេលទន្ទឹមគ្នា ដូចជាការប្រកួតប្រជែងគំនិតអាជីវកម្ម ការប្រកួត គំរូអាជីវកម្មរបស់ធុរកិច្ចថ្មី និងសហគ្រាសធុនតូចនិងមធ្យម រហូតដល់ការរៀបចំវេទិកា សិក្ខាសាលា និងកម្មវិធីពានរង្វាន់នានា ដែលសហគ្រិនក្នុងស្រុកអាចទទួលបានចំណេះដឹង កសាងបណ្តាញធុរកិច្ច និងឱកាស ដែលគាំទ្រកំណើន និងនិរន្តរភាពសហគ្រាសរបស់ខ្លួន៕

The post កម្មវិធីពានរង្វាន់សហគ្រិនខ្មែរ ឆ្នាំ២០២៥ រកឃើញម្ចាស់ជ័យលាភី, អបអរសាទរនវានុវត្តន៍ សហគ្រិនភាព និងការរីកចម្រើនរបស់សហគ្រាសធុនតូច និងមធ្យម appeared first on .

លើកឡើងនៅក្នុងកិច្ចប្រជុំនេះ លោក ហែម វណ្ណឌី បានឱ្យដឹងថា សុវត្ថិភាពម្ហូបអាហារគឺជាអាទិភាពជាតិ ដែលទាមទារភាពជាក់លាក់ផ្នែកបច្ចេកទេស និងការសម្របសម្រួលស្ថាប័ន។ គោលដៅរបស់យើងគឺរៀបចំយន្តការជ្រើសរើសមន្ទីរពិសោធន៍ផ្លូវការ និងមន្ទីរពិសោធន៍យោង សម្រាប់វិភាគម្ហូបអាហារ ព្រមទាំងអាចទទួលបានការគាំទ្រ និងពង្រឹងសមត្ថភាព ដើម្បីលើកកម្ពស់ភាពអនុលោមនៃមន្ទីរពិសោធន៍ទាំងនោះ។

លោក បានបន្ថែមថា សុវត្ថិភាពម្ហូបអាហារប៉ះពាល់ផ្ទាល់ដល់សុខភាពអ្នកប្រើប្រាស់ និងទំនុកចិត្តទីផ្សារ ហើយការវាយតម្លៃទទួលស្គាល់មន្ទីរពិសោធន៍វិភាគម្ហូបអាហារ ដោយផ្អែកលើស្តង់ដារបច្ចេកទេស មានសារៈសំខាន់ ដើម្បីធានាថាមន្ទីរពិសោធន៍ទាំងនោះដំណើរការ និងផ្តល់លទ្ធផលវិភាគប្រកបដោយគុណភាព ភាពជឿជាក់ និងប្រសិទ្ធភាព។

ទន្ទឹមនឹងនេះ លោក ហែម វណ្ណឌី ក៏បានរំលឹកថា ការវាយតម្លៃទទួលស្គាល់ជាតិ និងអន្តរជាតិនឹងដើរតួនាទីសំខាន់ក្នុងការពង្រឹងសមត្ថភាពមន្ទីរពិសោធន៍វិភាគម្ហូបអាហារនៅកម្ពុជា ដែលនឹងបម្រើជាសសរស្តម្ភសម្រាប់ការពារសុខភាពសាធារណៈ និងកសាងទំនុកចិត្តរបស់អ្នកប្រើប្រាស់លើផលិតផលម្ហូបអាហារនៅកម្ពុជា។

សូមជម្រាបជូនថា ជាលទ្ធផលនៃកិច្ចប្រជុំនេះ អង្គប្រជុំ បានអនុម័តលើដំណើរការនៃការជ្រើសរើសមន្ទីរពិសោធន៍ផ្លូវការ និងមន្ទីរពិសោធន៍យោង រាប់ចាប់ពីការដាក់ពាក្យស្នើសុំ និងការត្រួតពិនិត្យដល់ទីតាំង រហូតដល់ការសម្រេចជ្រើសរើស និងការចេញវិញ្ញាបនបត្រ សម្រាប់មន្ទីរពិសោធន៍ដែលមានលក្ខណៈសម្បត្តិគ្រប់គ្រាន់៕

The post គណៈកម្មាធិការមន្ទីរពិសោធន៍វិភាគម្ហូបអាហាររៀបចំកិច្ចប្រជុំលើកទី១ ដើម្បីពិភាក្សាកិច្ចដំណើរការជ្រើសរើសមន្ទីរពិសោធន៍វិភាគម្ហូបអាហារ appeared first on .

យោងតាមសេចក្តីប្រកាសព័ត៌មានរួម របស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ស្ថានទូតអូស្ត្រាលីប្រចាំកម្ពុជា និងអង្គការ UNDP កាលថ្ងៃទី១៦ ខែកក្កដា ឆ្នាំ២០២៥ បានបង្ហាញថាក្របខ័ណ្ឌខាងលើនេះ បានជួយបង្កើតប្រព័ន្ធជាតិមួយដ៏រឹងមាំដើម្បីសម្របសម្រួល តាមដាន និងវាយតម្លៃការអនុវត្តយុទ្ធសាស្ត្ររបស់កម្ពុជាសម្រាប់ការអភិវឌ្ឍសេដ្ឋកិច្ចក្រៅប្រព័ន្ធ វាជួយពង្រឹងតម្លាភាព គណនេយ្យភាព និងការសម្រេចចិត្តផ្នែកគោលនយោបាយដោយផ្អែកលើភស្តុតាង ដើម្បីគាំទ្រសេដ្ឋកិច្ចក្រៅប្រព័ន្ធ ដែលចូលរួមពីកម្លាំង ពលកម្មរបស់កម្ពុជាប្រមាណ ៨៨ភាគរយ។

យុទ្ធសាស្ត្រនេះ មានគោលបំណងជំរុញនិរន្តរភាព និងភាពធន់នៃអាជីវកម្ម ក៏ដូចជាកំណើនសេដ្ឋកិច្ច ប្រកបដោយបរិយាបន្ន ដោយអនុញ្ញាតឱ្យអ្នកធ្វើការងារក្រៅប្រព័ន្ធអាចទទួលបានការគាំពារសង្គម ការទទួលស្គាល់ផ្លូវច្បាប់ ការបណ្តុះបណ្តាលហិរញ្ញវត្ថុ និងការធ្វើសមាហរណកម្មទៅក្នុងទីផ្សារក្នុងប្រព័ន្ធ។

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងជាប្រធានគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធមានប្រសាសន៍ថា “ការដាក់ឱ្យប្រើប្រាស់ជាផ្លូវការ ក្របខ័ណ្ឌ ពិនិត្យតាមដាន និងវាយតម្លៃនេះ ជាជំហានដ៏សំខាន់មួយ ក្នុងការពង្រឹង និងពន្លឿនការអនុវត្តយុទ្ធសាស្ត្រជាតិដើម្បីអភិវឌ្ឍន៍សេដ្ឋកិច្ចក្រៅប្រព័ន្ធ។ ក្របខ័ណ្ឌនេះផ្តល់ជាប្រព័ន្ធមួយសម្រាប់រាជរដ្ឋាភិបាល ដើម្បីតាមដានវឌ្ឍនភាពជាក់ស្តែង ធ្វើសេចក្តីសម្រេចទាន់ពេលវេលា និងបង្កើនគណនេយ្យភាពដល់អ្នកគ្រប់គ្នាដែលអនុ វត្តយុទ្ធសាស្ត្រជាតិ”។

ក្របខ័ណ្ឌនេះ ជាលទ្ធផលនៃដំណើរការពិគ្រោះយោបល់ប្រកបដោយបរិយាបន្នអស់រយៈពេលមួយឆ្នាំ ដែលបាន ប្រមូលមតិយោបល់ពីអ្នកចូលរួមជាង ២៥០នាក់ នៅក្នុងសិក្ខាសាលាថ្នាក់ជាតិ ការពិគ្រោះយោបល់បច្ចេកទេស ជាមួយក្រសួងសំខាន់ៗចំនួន៩ និងការពិគ្រោះយោបល់ថ្នាក់តំបន់ចំនួន៥ ដែលក្នុងនោះមានការចូលរួមពីមន្ត្រី ពាក់ព័ន្ធមកពីទូទាំងប្រទេសផងដែរ។

លោក ឧត្តម ដេរិក យឹប ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា មានប្រសាសន៍ថា “អូស្ត្រាលី មានសេចក្តីរីករាយក្នុងការគាំទ្រដល់ការអភិវឌ្ឍកម្មវិធី ពិនិត្យតាមដាន និងវាយតម្លៃដ៏រឹងមាំ ដែលអាចពង្រឹងតម្លា ភាព ការសម្របសម្រួល និងការអនុវត្តគោលនយោបាយដោយផ្អែកលើភស្តុតាង។ ការងាររបស់យើងជាមួយ CCIED ស្របតាមផែនការភាពជាដៃគូសម្រាប់ការអភិវឌ្ឍរវាង អូស្ត្រាលី និងកម្ពុជា សម្រាប់ឆ្នាំ២០២៥-២០២៩ ដែលផែនការនេះ ផ្តល់អាទិភាពដល់ការទទួលបានសេវាសាធារណៈប្រកបដោយបរិយាបន្ន ព្រមទាំងស្ថាប័នសា ធារណៈដែលមានតម្លាភាព និងគណនេយ្យភាព។ នេះជាផ្នែកមួយនៃការប្តេជ្ញាចិត្តដ៏មុតមាំរបស់យើង ដើម្បី កំណើនសេដ្ឋកិច្ចប្រកបដោយភាពធន់ បរិយាបន្ន និងនិរន្តរភាពនៅកម្ពុជា”។

លោក Shakeel Ahmad អនុប្រធានតំណាង UNDP ប្រចាំកម្ពុជា បានមានប្រសាសន៍ថា “ការងារក្រៅប្រព័ន្ធ ជា រឿយៗប្រឈមនឹងកង្វះខាតការគាំពារ និងអាចឱ្យអ្នកប្រកបរបរក្រៅប្រព័ន្ធទាំងនោះងាយប្រឈមនឹងភាពរង គ្រោះ វិស័យមួយនេះ ក៏មានសក្តានុពលក្នុងការក្លាយជាក្បាលម៉ាស៊ីនដ៏មានឥទ្ធិពលសម្រាប់កំណើន ប្រកបដោយបរិយាបន្នផងដែរ ប្រសិនបើវិស័យនេះ ត្រូវបានគាំទ្រដោយគោលនយោបាយ និងវិធីសាស្ត្រត្រឹមត្រូ វ។ NSIED ដែលត្រូវបានដាក់ឱ្យដំណើរការ កាលពីខែតុលា ឆ្នាំ២០២៣ ជាជំហានដ៏មានសារៈសំខាន់មួយក្នុង ទិសដៅនេះ។ ផ្នែកមួយ នៃកម្មវិធីអភិវឌ្ឍន៍ប្រចាំប្រទេស ឆ្នាំ២០២៤-២០២៨ របស់យើង UNDP នៅតែបន្តប្តេជ្ញា ចិត្តគាំទ្រផែនការសកម្មភាព NSIED តាមរយៈប្រព័ន្ធ ពិនិត្យតាមដានដ៏រឹងមាំ ការបង្កើតយុទ្ធសាស្ត្រលើកទឹកចិត្ត ការបណ្តុះបណ្តាលដល់អ្នកអនុវត្តការងារ និងការពង្រឹងស្ថាប័ន”៕

The post កម្ពុជាប្រកាសដាក់ឱ្យប្រើប្រាស់ក្របខ័ណ្ឌពិនិត្យតាមដាន និងវាយតម្លៃដើម្បីលើកកម្ពស់ការអភិវឌ្ឍសេដ្ឋកិច្ចក្រៅប្រព័ន្ធ appeared first on .

លោក Obaid Saeed Obaid Bintaresh Aldhaheri ឯកអគ្គរដ្ឋទូតនៃសហភាពអារ៉ាប់រួមប្រចាំ កម្ពុជា បានមានប្រសាសន៍ដូច្នេះក្នុងឱកាសជួបពិភាក្សាជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ នៅថ្ងៃទី២១ ខែឧសភា ឆ្នាំ២០២៥ រាជធានី ភ្នំពេញ។

ឯកអគ្គរដ្ឋទូតក៏បានបញ្ជាក់ផងដែរថា នឹងមានការហោះហើររបស់ក្រុមហ៊ុនអាកាសចរណ៍ថ្មីៗរវាងប្រទេសទាំងពីរចាប់ពីខែមិថុនាខាងមុខទៅ។

លោក Aldhaheri បានលើកឡើងថា៖ “យើងមើលមកប្រទេសកម្ពុជា យើងឃើញសក្តានុពល យើងឃើញការរីកចម្រើន។ សហភាពអារ៉ាប់រួមមានក្រុមហ៊ុនជំនាញ AI និងមជ្ឈមណ្ឌលទិន្នន័យទំនើប ហើយយើងនឹងនាំពួកគេមកកម្ពុជា យ៉ាងហោចណាស់ក៏អាចចែករំលែកបទពិសោធន៍ពាក់ព័ន្ធនឹង AI ការបង្កើត App និង Software ផ្សេងៗ។”

ក្នុងជំនួបជាមួយលោករដ្ឋមន្ត្រីក្រសួងឧស្សាហកម្ម ហែម វណ្ណឌី លោកឯកអគ្គរដ្ឋទូតបានពិភាក្សាអំពីកិច្ចសហប្រតិបត្តិការទ្វេភាគីក្នុងវិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដោយបន្តសន្ទុះនៃការអនុវត្តកិច្ចព្រមព្រៀងពាណិជ្ជកម្មសេរីរវាងប្រទេសទាំងពីរ។

លោក ហែម វណ្ណឌី បានស្វាគមចំពោះវឌ្ឍភាពនៃកិច្ចសហការកន្លងមកនិងបានកោតសរសើរសហភាពអារ៉ាប់រួមដែលសន្យាផ្តល់អាហារូបករណ៍សម្រាប់និស្សិតកម្ពុជាទៅសិក្សាជំនាញវិទ្យាសាស្ត្រ។

លោករដ្ឋមន្ត្រី បានលើកឡើងថា៖ “ការអភិវឌ្ឍធនធានមនុស្សក្នុងផ្នែកវិទ្យាសាស្ត្រ និងបច្ចេកវិទ្យាមានសារៈសំខាន់ណាស់ ព្រោះរាជរដ្ឋាភិបាលបានកំណត់យកបច្ចេកវិទ្យាជាមុំទី៥ នៃយុទ្ធសាស្ត្របញ្ចកោណ។”

លោកបានបន្ថែមថា៖ “កម្ពុជាក៏កំពុងធ្វើពិពិធកម្មសេដ្ឋកិច្ច ដោយផ្តោតលើឧស្សាហូបនីយកម្ម និងបរិវត្តកម្មឌីជីថល ហើយយើងបើកចំហចំពោះកិច្ចសហការជាមួយសហភាពអារ៉ាប់រួម លើការវិនិយោគ នវានុវត្តន៍ និងឧស្សាហកម្មដែលបង្កើតតម្លៃបន្ថែមខ្ពស់។”

លោក ហែម វណ្ណឌី ក៏បានស្នើឱ្យសហភាពអារ៉ាប់រួម អញ្ជើញក្រុមហ៊ុនបច្ចេកវិទ្យារបស់ខ្លួន មកចូលរួម និងចែករំលែកបទពិសោធន៍ក្នុងទិវាជាតិវិទ្យាសាស្ត្រ បច្ចេកវិទ្យា និងនវានុវត្តន៍របស់កម្ពុជា ដែលគ្រោងរៀបចំក្នុងខែមីនា ឆ្នាំ២០២៦ ផងដែរ៕

The post គណៈប្រតិភូធុរកិច្ច សហភាពអារ៉ាប់រួមនឹងមកកម្ពុជាចុងឆ្នាំនេះ ដើម្បីស្វែងរកឱកាសវិនិយោគ និងបើកការហោះហើររបស់ក្រុមហ៊ុនអាកាសចរណ៍ថ្មីៗ appeared first on .

លោកលើកឡើងបែបនេះ នៅក្នុងពេលលោកអញ្ជើញជាអធិបតីក្នុងពិធីប្រកាសដាក់ឱ្យប្រើប្រាស់ជាផ្លូវការ “ផែនការប្រតិបត្តិស្តីពីយន្តការជំរុញការចុះបញ្ជីក្នុងប្រព័ន្ធសន្តិសុខសង្គម ឆ្នាំ២០២៤-២០២៦” កាលថ្ងៃទី២៤ ខែមីនា ឆ្នាំ២០២៥។

នាឱកាសនោះ លោក  ហែម វណ្ណឌី បានឱ្យដឹងថា ផែនការប្រតិបត្តិនេះដែលដាក់ឱ្យប្រើប្រាស់នេះ គឺជាជំហានថ្មីមួយទៀតនៃកិច្ចខិតខំរបស់ក្រុមប្រឹក្សាជាតិគាំពារសង្គម ក្នុងការរៀបចំយន្ដការគាំទ្រដល់ការអភិវឌ្ឍសេដ្ឋកិច្ចក្រៅប្រព័ន្ធ ដូចបានកំណត់ក្នុងយុទ្ធសាស្រ្ដជាតិស្ដីពីការអភិវឌ្ឍសេដ្ឋកិច្ចក្រៅប្រព័ន្ធ ២០២៣-២០២៨។

ទន្ទឹមគ្នានេះ លោក ហែម វណ្ណឌី បានលើកឡើងថា៖“ការអភិវឌ្ឍសេដ្ឋកិច្ចក្រៅប្រព័ន្ធ និងប្រព័ន្ធគាំពារសង្គម គឺជាមូលដ្ឋានគ្រឹះដ៏រឹងមាំដែលមានភាពប្រទាក់ក្រឡា និងបំពេញគ្នាទៅវិញទៅមកក្នុងការចូលរួមលើកកម្ពស់សេដ្ឋកិច្ចជាតិ និងសុខុមាលភាពពលរដ្ឋគ្រប់រូប។”

បើតាមក្រសួងឧស្សាហកម្ម  បានបញ្ជាក់ថា រាជរដ្ឋាភិបាលកម្ពុជា បានបង្កើនការយកចិត្តទុកដាក់ លើការអភិវឌ្ឍសេដ្ឋកិច្ចក្រៅប្រព័ន្ធ ដើម្បីពង្រឹងសមត្ថភាព ភាពធន់ និងការប្រកួតប្រជែងលើទីផ្សារ ជាពិសេសចំពោះសុខុមាលភាព ភាពធន់នឹងវិបត្តិ និងយន្តការគាំទ្រដល់បងប្អូនអ្នកសេដ្ឋកិច្ចក្រៅប្រព័ន្ធ។ ការខិតខំប្រឹងប្រែងរបស់រាជរដ្ឋាភិបាលនេះ គឺដើម្បីជំរុញសមាហរណកម្មពួកគេទៅក្នុងខ្សែច្រវាក់ផ្គត់ផ្គង់ និងការបង្កើតតម្លៃបន្ថែមក្នុងសេដ្ឋកិច្ចជាតិ សំដៅកាត់បន្ថយភាពក្រីក្រនិងលើកកម្ពស់សមភាពសង្គម៕ អត្ថបទ៖ ហ្សាលី

The post លោក ហែម វណ្ណឌី៖ ការអភិវឌ្ឍសេដ្ឋកិច្ចក្រៅប្រព័ន្ធ គឺជាមូលដ្ឋានគ្រឹះដ៏រឹងមាំដែលមានភាពប្រទាក់ក្រឡា appeared first on .

លោក បានកោតសរសើរដល់ជ័យលាភីទាំង ៣៨ រូប ដែលបានទទួលអាហារូបករណ៍នេះ និងសង្កត់ធ្ងន់ថា ការអភិវឌ្ឍធនធានមនុស្សនៅតែជាអាទិភាពចម្បងរបស់រាជរដ្ឋាភិបាល។ លោកបានទឹកចិត្តឱ្យជ័យលាភីទាំងអស់ ​ត្រឡប់​មក​កម្ពុជាវិញ ​ក្រោយ​បញ្ចប់​ការ​សិក្សា ​ដើម្បី​​រួម​ចំណែក​ដល់​ការ​អភិវឌ្ឍប្រទេស។

លោកបានណែនាំថា៖ “គោលដៅរបស់ប្អូនៗគួរតែ «បម្រើ និងតបស្នងជាតិមាតុភូមិ» ទោះក្នុងទម្រង់ណាក៏ដោយ (មិនថាក្នុងជួររាជរដ្ឋាភិបាល វិស័យឯកជន ឬអង្គការមិនមែនរដ្ឋាភិបាលទេ) ដើម្បីបង្កើតផលសាយភាយ (Multiplier effect) នៃការរួមចំណែករបស់ប្អូនៗ។ ហើយសូមចងចាំថា ប្អូនៗមានរាជ​រដ្ឋាភិបាល មានប្រជាជន និង​ប្រទេស​ជាតិនេះ ដែល​កំពុង​រង់ចាំ​ការ​ចូល​រួម​ចំណែក​របស់​ប្អូនៗ។”

រដ្ឋាភិបាលអូស្ត្រាលីបានផ្តល់អាហារូបករណ៍ដល់និស្សិតកម្ពុជា ទៅបន្តការសិក្សាលើមុខជំនាញផ្សេងៗជាច្រើន ហើយឆ្នាំនេះគឺជាខួបទី៣០ នៃកម្មវិធីអាហារូបករណ៍អូស្ត្រាលីនៅកម្ពុជា។ រហូតមកដល់ពេលនេះ កម្មវិធីអាហារូបករណ៍អូស្ត្រាលីបានផ្តល់ឱកាសដល់និស្សិតកម្ពុជាជាង ១.០០០នាក់ ទៅបន្តការសិក្សានៅប្រទេសអូស្ត្រាលី៕

The post រដ្ឋមន្រ្តីឧស្សាហកម្ម៖ ជ័យលាភីអាហារូបករណ៍អូស្ត្រាលីត្រូវមានផ្នត់គំនិត «បម្រើ និងតបស្នងជាតិមាតុភូមិ» appeared first on .

ពិធីសម្ពោធនេះត្រូវបានធ្វើឡើងក្រោមអធិបតីភាព លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ រួមជាមួយ លោក AMAKAWA Hirofumi អនុរដ្ឋមន្ត្រីក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍នៃប្រទេសជប៉ុន ក្រោមគម្រោងជំនួយឥតសំណងពីរដ្ឋាភិបាលជប៉ុន និងថវិកាបដិភាគរបស់រដ្ឋាករទឹកស្វយ័តក្រុងភ្នំពេញ។

លោក ហែម វណ្ណឌី បានលើកឡើងពីសារៈសំខាន់នៃរោងចក្រផលិតទឹកស្អាតនេះ ក្នុងការរួមចំណែកដល់ការអនុវត្តយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាល ដែលកំណត់យកទឹកជាអាទិភាពគន្លឹះទីបី។

លោករដ្ឋមន្រ្ដីក្រសួងឧស្សាហកម្ម បន្ដថា “ការផ្គត់ផ្គង់នេះមិនត្រឹមតែឆ្លើយតបទៅនឹងតម្រូវការប្រើប្រាស់ទឹកស្អាតប្រចាំថ្ងៃប៉ុណ្ណោះទេ ថែមទាំងបានរួមចំណែកដល់ការកសាងហេដ្ឋារចនាសម្ព័ន្ធរូបវន្តគាំទ្រដល់ការពង្រីកមូលដ្ឋានឧស្សាហកម្ម អាជីវកម្ម និងសេវាកម្មគ្រប់វិស័យ ដែលកំពុងមានការរីកចម្រើនយ៉ាងឆាប់រហ័ស។”

លោកក៏បានរំលេចពីភាពជាដៃគូដ៏រឹងមាំរវាងកម្ពុជា និងជប៉ុន ក្នុងវិស័យទឹកស្អាត ដោយក្នុងនោះ មានគម្រោងចំនួន៣១ ដែលបានអនុវត្តរួច និងកំពុងអនុវត្ត រួមមានទាំងគម្រោងកសាងសមត្ថភាពគម្រោងហេដ្ឋារចនាសម្ព័ន្ធ និងការវិនិយោគផ្សេងទៀត ក្នុងគោលដៅលើកកម្ពស់លទ្ធភាពទទួលបានសេវាទឹកស្អាតនៅទូទាំងប្រទេស។

រោងចក្រផលិតទឹកស្អាតបឹងធំគឺជាសមិទ្ធផលទី២ របស់រដ្ឋាករទឹកស្វយ័តក្រុងភ្នំពេញ ដែលបានធ្វើការសិក្សា និងសាងសង់ដោយខ្លួនឯងបន្ទាប់ពីរោងចក្រប្រព្រឹត្តិកម្មទឹកស្អាត “មេ្លច” នៅខេត្តកំពត។ រោងចក្រថ្មីនេះផ្គត់ផ្គង់ទឹកស្អាតដែលមានគុណភាពស្របតាមស្តង់ដារគុណភាពទឹកស្អាតថ្នាក់ជាតិ និង ស្តង់ដារគុណភាពទឹកស្អាតរបស់អង្គការសុខភាពពិភពលោក។ នេះបង្ហាញពីការខិតខំប្រឹងប្រែងរបស់រាជរដ្ឋាភិបាលក្នុងការសម្រេចគោលដៅអភិវឌ្ឍន៍ប្រកបដោយចីរភាព ឆ្នាំ២០៣០។

លោក ហែម វណ្ណឌី បានស្នើឱ្យភាគីពាក់ព័ន្ធ រួមទាំងក្រសួង-ស្ថាប័ន អាជ្ញាធរមូលដ្ឋាន និងប្រជាពលរដ្ឋ ចូលរួមការពារ និងថែទាំហេដ្ឋារចនាសម្ព័ន្ធទឹកស្អាត ពង្រីកបណ្តាញចែកចាយ និងរក្សាស្ទឹងព្រែកត្នោត ជាប្រភពទឹកសម្រាប់រយៈពេលវែង។ លោកបានបន្ថែមថា កិច្ចសហការទាំងនេះមានសារៈសំខាន់ក្នុងការធានាការផ្គត់ផ្គង់ និងគុណភាពទឹកនាពេលអនាគត, លើកកម្ពស់សុខភាពសាធារណៈ, និងគាំទ្រដល់ការអភិវឌ្ឍប្រកបដោយចីរភាព និងបរិយាបន្ន។

បច្ចុប្បន្នភាពផែនការមេវិស័យទឹកស្អាត ដំណាក់កាលទី៣ ឆ្នាំ២០២១-២០៣០ បានព្យាករថា តម្រូវការទឹកស្អាតនឹងកើនឡើងដល់ប្រមាណជាង ១,៨ លានម៉ែត្រគូបក្នុងមួយថ្ងៃ នៅត្រឹមដំណាច់ឆ្នាំ២០៣០។ ក្រោយដាក់ឱ្យដំណើរការរោងចក្រផលិតទឹកស្អាតបឹងធំ សមត្ថភាពផលិតរបស់រដ្ឋាករទឹកស្វយ័តក្រុងភ្នំពេញនឹងកើនឡើងពី ៩៨២.០០០ ទៅដល់ ៩៨៨.០០០ ម៉ែត្រគូបក្នុងមួយថ្ងៃ ដែលគាំទ្រដោយបណ្តាញចែកចាយទឹកស្អាតប្រវែង ៤.៨៧០ គីឡូម៉ែត្រ៕ ដោយ សុភក្រ្តា

The post រោងចក្រផលិតទឹកស្អាតបឹងធំ តម្លៃ១,៤លានដុល្លារ មានសមត្ថភាពផលិតទឹកស្អាតជាច្រើនពាន់ម៉ែត្រគូបក្នុងមួយថ្ងៃ ជូនដល់ប្រជាពលរដ្ឋនៅតំបន់ជាយរាជធានីភ្នំពេញ appeared first on .

ក្នុងជំនួបសំណេះសំណាលជាមួយគណៈគ្រប់គ្រងរបស់ក្រុមហ៊ុន លោក ហែម វណ្ណឌី បានកោតសរសើរចំពោះវឌ្ឍនភាពយ៉ាងឆាប់រហ័ស បន្ទាប់ពីក្រុមហ៊ុនចាប់ផ្តើមប្រតិបត្តិការក្នុងប្រទេសកម្ពុជាកាលពីខែវិច្ឆិកា ឆ្នាំ២០២២។ រោងចក្រនេះត្រូវបានសាងសង់លើផ្ទៃដីទំហំ ៨ ហិកតា បច្ចុប្បន្នមានបុគ្គលិកចំនួន១៦៨នាក់ ភាគច្រើនជាបុគ្គលិកខ្មែរ និងកំពុងដំណើរការបរិក្ខាផលិតកម្មទំនើបចំនួន៥០គ្រឿង ដើម្បីផលិតទុយោ និងគ្រឿងបង្គុំផ្សេងៗ ក្នុងសមត្ថភាពផលិតជាង ៤៨.០០០ តោនក្នុងមួយឆ្នាំ។

លោក ហែម វណ្ណឌី ​បាន​លើកឡើង​ថា​ ​ហេដ្ឋារចនាសម្ព័ន្ធ​ផ្គត់ផ្គង់​ទឹកស្អាត​មាន​សារៈ​សំខាន់​ជាសារវន្តសម្រាប់​ការ​អភិវឌ្ឍ​របស់​​កម្ពុជា ហើយការប្រើប្រាស់​ទុយោចែកចាយទឹកស្អាត​ដែល​មាន​គុណភាព​ខ្ពស់​ជាកត្តាចម្បងក្នុង​ការ​កាត់​បន្ថយ​ការ​បាត់​បង់​ទឹក និងការពង្រឹងគុណភាពសេវាទឹកស្អាត។

លោកបានបញ្ជាក់ថា “ខ្ញុំសូមលើកទឹកចិត្តឱ្យក្រុមហ៊ុនសហការជាមួយគ្រឹះស្ថានហិរញ្ញវត្ថុ ដើម្បីផ្តល់ជម្រើសហិរញ្ញប្បទានសមស្របសម្រាប់ប្រតិបត្តិករទឹកស្អាត និងប្រជាពលរដ្ឋជាអ្នកប្រើប្រាស់ទូទៅ។ ទន្ទឹមនឹងនោះ សូមក្រុមហ៊ុនពិចារណាពង្រីកមុខផលិតផលរបស់ខ្លួន ដូចជាផលិតសំបកវេចខ្ចប់ ឬកំប៉ុងអាលុយមីញ៉ូម ដើម្បីគាំទ្រដល់ឧស្សាហកម្មក្នុងស្រុកបន្ថែមទៀត។”

ទន្ទឹមនឹងនោះ លោកក៏បានស្វាគមន៍ចំពោះសំណើរបស់ក្រុមហ៊ុនក្នុងការបង្កើតស្តង់ដារទុយោសម្រាប់កម្ពុជា ដើម្បីជំរុញការអភិវឌ្ឍវិស័យទឹកស្អាត និងវិស័យពាក់ព័ន្ធផងដែរ។

ជាការឆ្លើយតប ថ្នាក់ដឹកនាំក្រុមហ៊ុន Lesso បានលើកឡើងពីចក្ខុវិស័យក្នុងការពង្រីកការនាំចេញរបស់ក្រុមហ៊ុនទៅកាន់បណ្តាប្រទេសអាស៊ាន និងពង្រឹងប្រតិបត្តិការផលិតនៅកម្ពុជា ដោយលើកឡើងពីទំនាក់ទំនងទ្វេភាគីដ៏រឹងមាំរវាងកម្ពុជា និងចិន។

សូមបញ្ជាក់ថា ក្រុមហ៊ុន Lesso (Cambodia) Trading គឺជាបុត្រសម្ព័ន្ធក្រោមការវិនិយោគផ្ទាល់ទាំងស្រុងរបស់ Lesso Group Holdings Limited ដែលជាក្រុមហ៊ុនផលិតទុយោឈានមុខមួយរបស់ប្រទេសចិន បច្ចុប្បន្ន មានមូលដ្ឋានផលិតកម្មចំនួន ៣០ នៅទូទាំងពិភពលោក។

ផលិតផលរបស់ក្រុមហ៊ុន Lesso ត្រូវបានប្រើប្រាស់ក្នុងវិស័យជាច្រើន ដូចជាវិស័យទឹកស្អាត ប្រព័ន្ធ ដំណក់ទឹកស្រោចស្រព (drip irrigation) ប្រព័ន្ធលូនិងទឹកកខ្វក់ និងទុយោអាលុយមីញ៉ូមសម្រាប់ការប្រើប្រាស់ក្នុងគោលដៅផ្សេងៗ៕

The post លោក ហែម វណ្ណឌី លើកទឹកចិត្តក្រុមហ៊ុនផលិតទុយោឈានមុខមួយរបស់ចិន អភិវឌ្ឍ​ប្រតិបត្តិការថែមទៀតនៅកម្ពុជា នាំចេញទៅទីផ្សារបណ្តាប្រទេសអាស៊ាន appeared first on .

ថ្លែងក្នុងពិធីបិទទិវាសហគ្រិនស្ត្រីកម្ពុជាឆ្នាំ២០២៤ នៅថ្ងៃទី១១ ខែវិច្ឆិកា ឆ្នាំ២០២៤ លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យានិងនវានុវត្តន៍ បាន លើកឡើងថា៖ “ការលើកកម្ពស់សហគ្រិនភាពស្រី្តតម្រូវឱ្យមានការប្រឹងប្រែងរួមគ្នាពីគ្រប់ភាគីពាក់ព័ន្ធទាំងអស់ តាមរយៈសមាហរណកម្មអាជីវកម្មរបស់ពួកគេទៅក្នុងខ្សែច្រវាក់តម្លៃក្នុងតំបន់ និងសកលលោក ដោយប្រើប្រាស់ឱ្យអស់លទ្ធភាពនូវសក្តានុពលធនធានក្នុងស្រុក និងការទទួលយកការផ្ទេរបច្ចេកវិទ្យាថ្មីៗ។”

តាមលទ្ធផលជំរឿនឆ្នាំ២០២២ របស់ក្រសួងផែនការ អង្គភាពសេដ្ឋកិច្ចចំនួន ៦៩.២% នៅកម្ពុជា កំពុងដឹកនាំដោយសហគ្រិនស្ត្រី។ ជាមួយនឹងការព្យាករណ៍កំណើនសេដ្ឋកិច្ចកម្ពុជាក្នុងរង្វង់ ៦% សម្រាប់ឆ្នាំ២០២៤ ដោយមានការគាំទ្រពីវិស័យសំខាន់ៗ ដូចជាឧស្សាហកម្មនាំចេញសម្លៀកបំពាក់ កម្មន្តសាលមិនមែនកាត់ដេរ កសិកម្ម ទេសចរណ៍ និងពាណិជ្ជកម្មដែលកំពុងងើបឡើងវិញ ឯកឧត្តម ហែម វណ្ណឌី បានលើកឡើងថា សហគ្រិនស្ត្រីជាតួអង្គសំខាន់ក្នុងការរក្សានិន្នាការកំណើននេះ។

រាជរដ្ឋាភិបាលកម្ពុជាបាន និងកំពុងអនុវត្តកម្មវិធីគោលនយោបាយ និងយុទ្ធសាស្ត្រជាច្រើន សំដៅគាំទ្រសហគ្រិនស្ត្រី ដោយផ្តោតលើការលើកកម្ពស់ផលិតភាព ការពង្រីកទីផ្សារ និងលទ្ធភាពទទួលបានហិរញ្ញប្បទានចាំបាច់ ដើម្បីកំណើធុរកិច្ច។ ថ្នាលបច្ចេកវិទ្យាដូចជា ASEANAccess និង KhmerSME ត្រូវបានបង្កើតឡើងដើម្បីផ្តល់ព័ត៌មានអាជីវកម្មសំខាន់ៗក្នុងតំបន់ដល់សហគ្រាសធុនតូច និងមធ្យម ដោយផ្តល់ជូនពួកគេនូវឧបករណ៍ និងធនធានចាំបាច់សម្រាប់ភាពជោគជ័យ និងកំណើនប្រកបដោយនិរន្តរភាព។

ថ្លែងទៅកាន់អង្គពិធីនេះ ឯកឧត្តម ហែម វណ្ណឌី បានអំពាវនាវដល់សហគ្រាសធុនមីក្រូ តូច និងមធ្យម ឱ្យប្រើប្រាស់ការចុះបញ្ជី និងខិតខំបំពេញអនុលោមភាព ដើម្បីពង្រីកលទ្ធភាពទទួលបានការគាំទ្រ, រួមចំណែកដល់ការបង្កើតគោលនយោបាយ និងវិធានការចំគោលដៅ, ព្រមទាំងបង្កើនភាពធន់ និងកំណើនអាជីវកម្មរយៈពេលវែងរបស់ខ្លួន៕

The post រដ្ឋមន្ត្រីក្រសួងឧស្សាហកម្ម លើកទឹកចិត្តសហគ្រាសធុនតូច និងមធ្យមដែលដឹកនាំដោយស្ត្រី ឱ្យចាប់យកទីផ្សារតំបន់ និងពិភពលោក appeared first on .

មានប្រសាសន៍នៅក្នុងជំនួបជាមួយគណៈប្រតិភូមកពីទីភ្នាក់ងារអភិវឌ្ឍន៍បារាំង (AFD) និងសហភាពអឺរ៉ុប កាលពីថ្ងៃទី១៤ ខែតុលា ឆ្នាំ២០២៤ លោក ហែម វណ្ឌឌី បានលើកឡើងថាកំណើននៃនគរូបនីយកម្ម ឧស្សាហកម្ម និងកិច្ចខិតខំប្រឹងប្រែងដើម្បីសម្រេចចក្ខុវិស័យកម្ពុជាឆ្នាំ២០៣០ និង២០៥០។

លោកបន្តថា ស្ថានភាពនៃវិស័យទឹកស្អាតនៅកម្ពុជាបច្ចុប្បន្ន មានភាពបែកខ្ញែកច្រើន ដោយក្នុងនោះមានរដ្ឋាករទឹកសាធារណៈចំនួន១១ និងប្រតិបត្តិករទឹកស្អាតឯកជនជាង៤០០ស្ថាប័ន។

លោកស្រី Sandrine Boucher នាយក AFD ប្រចាំប្រទេសកម្ពុជា ក៏បានបញ្ជាក់ថា AFD បានរួមចំណែកក្នុងវិស័យទឹកស្អាតនៅកម្ពុជាជាង៣០ឆ្នាំមកហើយ។ តាមរយៈជំនួយបច្ចេកទេសនេះ AFD បានបញ្ជូនក្រុមអ្នកជំនាញ ដើម្បីធ្វើការសិក្សាកំណត់វិសាលភាព សម្រាប់ជាមូលដ្ឋានគ្រឹះនៃការសិក្សាសមិទ្ធិលទ្ធភាពនៃការកែទម្រង់វិស័យទឹកស្អាត ដែលគ្រោងនឹងចាប់ផ្តើមនៅដើមឆ្នាំ២០២៥។

លើសពីនេះ សហភាពអឺរ៉ុប ក៏បានបញ្ជាក់ការផ្តល់មូលនិធិសម្រាប់ការសិក្សាសមិទ្ធិលទ្ធភាពនេះ ស្របតាមយុទ្ធសាស្ត្រអឺរ៉ុបរួមទីពីរសម្រាប់កិច្ចសហប្រតិបត្តិការអភិវឌ្ឍន៍ ដែលក្នុងនោះការកែទម្រង់វិស័យទឹកស្អាតគឺជាអាទិភាពចម្បងមួយរបស់ខ្លួនផងដែរ។

សូមជម្រាបជូនថា ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានផ្តល់អាទិភាពលើសេវាទឹកស្អាត សម្រាប់ទាំងការប្រើប្រាស់ប្រចាំថ្ងៃក្នុងគ្រួសារ និងជាកាតាលីករជំរុញការអភិវឌ្ឍសេដ្ឋកិច្ច  ពិសេសនៅក្នុងទីក្រុង តំបន់ប្រជុំជន ច្រករបៀងសេដ្ឋកិច្ច តំបន់ឧស្សាហកម្ម និងកសិ-ឧស្សាហកម្មជាដើម។ក្នុងនោះ ការគាំទ្រ និងកិច្ចសហប្រតិបត្តិការរបស់ដៃគូ ដូចជាទីភ្នាក់ងារបារាំងសម្រាប់ការអភិវឌ្ឍ និងសហភាពអឺរ៉ុប មានសារៈសំខាន់ណាស់ ខណៈដែលកម្ពុជាកំពុងខិតខំប្រឹងប្រែង សម្រេចឱ្យបាននូវគោលដៅអភិវឌ្ឍន៍ប្រកបដោយចីរភាពទី៦ ស្តីពីទឹកស្អាត និងអនាម័យ។

សូមបញ្ជាក់បន្ថែមថា AFD ក៏ទើបបានអនុម័តជំនួយឥតសំណងចំនួន ២០០.០០០ អឺរ៉ូ សម្រាប់ការសិក្សាសមិទ្ធិលទ្ធភាពដល់រដ្ឋាករទឹកស្វយ័តសៀមរាប។  ក្រោយការសិក្សាសមិទ្ធិលទ្ធភាពនេះ កិច្ចព្រមព្រៀងហិរញ្ញប្បទានសម្រាប់គម្រោងដែលមានតម្លៃប្រមាណ២៥លានអឺរ៉ូ គ្រោងនឹងចុះហត្ថលេខានៅត្រឹមដំណាច់ឆ្នាំ២០២៥៕

The post បច្ចុប្បន្ន កម្ពុជាមានរដ្ឋាករទឹកសាធារណៈចំនួន១១ និងប្រតិបត្តិករទឹកស្អាតឯកជនជាង៤០០ស្ថាប័ន appeared first on .