នាយឧត្តមសេនីយ៍ ស ថេត បំពាក់ឋានន្តរស័ក្តិថ្នាក់ឧត្តមសេនីយ៍ឯក ជូនលោក ហែម សុវត្ថិ ដែលកំពុងដឹកនាំការងារប្រឆាំងបទល្មើសល្បែងពាណិជ្ជកម្ម

ឧកញ៉ាកោះក្របី — Tue, 13 Feb 2024 09:25:48 +0000

ព្រះករុណា ព្រះបាទសម្ដេចព្រះនរោត្តម សីហមុនី ព្រះមហាក្សត្រ បានចេញព្រះរាជក្រឹត្យ ត្រាស់បង្គាប់ដំឡើងឋានន្ដរស័ក្ដិ ថ្នាក់ឧត្តមសេនីយ៍ឯក ជូនឧត្តមសេនីយ៍ទោ ហែម សុវត្ថិ។ នេះបើតាមព្រះរាជក្រឹត្យ នស/រកត/១២២៣/២៦៦១ ឡាយព្រះហត្ថលេខាដោយព្រះករុណា ព្រះមហាក្សត្រ កាលពីថ្ងៃទី២៨ ខែធ្នូ ឆ្នាំ២០២៣កន្លងទៅ ។

ពេលថ្មីៗនេះ អគ្គស្នងការនគរបាលជាតិ បានរៀបចំបំពាក់ឋានន្ដរស័ក្ដិ «ថ្នាក់ឧត្តមសេនីយ៍ឯក» ជូនឧត្តមសេនីយ៍ទោ ហែម សុវត្ថិ ក្រោមវត្តមាន នាយឧត្តមសេនីយ៍ ស ថេត អគ្គស្នងការនគរបាលជាតិ។ ពិធីនេះធ្វើឡើងក្នុងពិធីបំពាក់ឋានន្ដរស័ក្ដិជូននាយនគរបាលជាតិថ្នាក់ឧត្តមសេនីយ៍ និងប្រកាសចូលកាន់តំណែងអគ្គស្នងការរងនគរបាលជាតិ។

ឧត្តមសេនីយ៍ទោ ហែម សុវត្ថិ បច្ចុប្បន្នកំពុងកាន់តួនាទីជាអគ្គស្នងការរងនគរបាលជាតិ ទទួលដឹកនាំការងារប្រឆាំងបទល្មើសល្បែងពាណិជ្ជកម្ម។

សូមជម្រាបជូនថា ឧត្តមសេនីយ៍ទោ ហែម សុវត្ថិ ធ្លាប់ជាអគ្គនាយករងនៃអគ្គនាយកដ្ឋានសវនកម្មផ្ទៃក្នុងក្រសួងមហាផ្ទៃ ហើយដោយមានការផ្តល់សេចក្តីទុកចិត្តពីថ្នាក់ដឹកនាំឧត្តមសេនីយ៍ឯកត្រូវបានសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញអនុក្រឹត្យផ្ទេរ និងតែងតាំងមុខតំណែងជា អគ្គស្នងការរងនគរបាលជាតិ កាលពីថ្ងៃទី១៥ ខែវិច្ឆិកា ឆ្នាំ២០២៣៕

The post នាយឧត្តមសេនីយ៍ ស ថេត បំពាក់ឋានន្តរស័ក្តិថ្នាក់ឧត្តមសេនីយ៍ឯក ជូនលោក ហែម សុវត្ថិ ដែលកំពុងដឹកនាំការងារប្រឆាំងបទល្មើសល្បែងពាណិជ្ជកម្ម appeared first on .

កូនប្រសារលោក នេត សាវឿន ទទួលការតែងតាំងជាអគ្គស្នងការរងនៃអគ្គស្នងការដ្ឋាននគរបាលជាតិ

ឧកញ៉ាដែនដី — Wed, 22 Nov 2023 07:31:18 +0000

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានចេញអនុក្រឹត្យផ្ទេរ និងតែងតាំងមុខតំណែងមន្ត្រីជាន់ខ្ពស់នគរបាលជាតិកម្ពុជា ចំនួន៤រូប កាលពីថ្ងៃទី១៥ ខែវិច្ឆិកា ឆ្នាំ២០២៣ ក្នុងនោះលោក ហែម សុវត្ថិ ដែលជាកូនប្រសាររបស់លោកឧបនាយករដ្ឋមន្ត្រី នេត សាវឿន បានផ្ទេរទៅជា អគ្គស្នងការរងនៃអគ្គស្នងការដ្ឋាននគរបាលជាតិ។

តាមរយៈអនុក្រឹត្យលេខ ១២៩៩ អនក្រ.តត ចុះថ្ងៃទី១៥ ខែវិច្ឆិកា ឆ្នាំ២០២៣ បានសម្រេចផ្ទេរ និងតែងតាំងមុខតំណែងនាយនគរបាលថ្នាក់ឧត្តមសេនីយ៍ ចំនួន៤រូប នៃក្រសួងមហាផ្ទៃ មានដូចរាយនាមខាងក្រោម៖

១. លោកឧត្តមសេនីយ៍ឯក តាន់ សំណាង អត្តលេខ ៩៦០៦២ ជាអគ្គស្នងការរងនៃអគ្គស្នងការដ្ឋាននគរបាលជាតិ។

២. លោកឧត្តមសេនីយ៍ទោ ហែម សុវត្ថិ អត្តលេខ ៦៦៥០៣ ពីអគ្គនាយករងនៃអគ្គនាយកដ្ឋានសវនកម្មផ្ទៃក្នុង ទៅជាអគ្គស្នងការដ្ឋាននគរបាលជាតិ។

៣. លោកឧត្តមសេនីយ៍ទោ លឹម ដាវុធ អត្តលេខ ០៣៥១៨ ជាអនុប្រធានសេវាធិការដ្ឋាន។

៤. លោកឧត្តមសេនីយ៍ត្រី កុយ រ៉ា អត្តលេខ ៨៥១១២ ជាអនុប្រធានសេនាធិការដ្ឋាន។

សូមជម្រាបថា លោកឧត្តមសេនីយ៍ទោ ហែម សុវត្ថិ បានរៀបអាពាហ៍ពិពាហ៍ជាមួយកញ្ញា នេត ធីតាវិឈុណា កូនស្រីលោក នេត សាវឿន កាលពីថ្ងៃទី០១ ខែមិថុនា ឆ្នាំ២០២៣។ លោក នេត សាវឿន ជាអតីតអគ្គស្នងការនគរបាលជាតិ ដែលឡើងកាន់តំណែងជំនួសលោក ហុក ឡង់ឌី តាំងពីឆ្នាំ២០០៨។ នៅថ្ងៃទី២២ ខែសីហា ឆ្នាំ២០២៣ លោក នេត សាវឿន បានទទួលភារកិច្ចថ្មីជា ឧបនាយករដ្ឋមន្ត្រី សម្រាប់អាណត្តិទី៧ បន្ទាប់ពីរដ្ឋសភាបានផ្តល់សេចក្តីទុកចិត្ត ព្រមទាំងទទួលបន្ទុកជា នាយករដ្ឋមន្រ្តីស្តីទី នៅពេលនាយករដ្ឋមន្រ្តីអវត្តមានផងដែរ៕

The post កូនប្រសារលោក នេត សាវឿន ទទួលការតែងតាំងជាអគ្គស្នងការរងនៃអគ្គស្នងការដ្ឋាននគរបាលជាតិ appeared first on .