តាមរយៈការចុះ MoU នេះក្នុងន័យចូលរួមចំណែក ជាមួយកិច្ចប្រឹងប្រែងរបស់រដ្ឋាភិបាល ក្នុងការប្រយុទ្ធប្រឆាំងអំពើពុករលួយ និងការអភិវឌ្ឍសង្គមសេដ្ឋកិច្ចជាតិ ខណៈដែលភាគីទាំងពីរ បានទទួលស្គាល់អំពីការពង្រឹងចំណងសហការ ក្នុងការការពារ និងទប់ស្កាត់អំពើពុករលួយ តាមរយៈកិច្ចសហប្រតិបត្តិការស្អិតល្មួត។

លោក ឱម យិនទៀង ទេសរដ្ឋមន្ត្រី និងជាប្រធានអង្គភាពប្រឆាំងអំពើពុករលួយ បានឲ្យដឹងថា នេះគឺជាឱកាសដ៏ប្រសើរ សម្រាប់អង្គភាព ACU និងក្រុមហ៊ុន JTI ក្នុងការចូលរួមជាមួយសហគមន៍វិស័យឯកជន ដើម្បីប្រយុទ្ធប្រឆាំងអំពើពុករលួយឲ្យមានប្រសិទ្ធភាពខ្ពស់។

លោកគូសបញ្ជាក់ថា ទាំងផ្នែកសាធារណៈ និងផ្នែកឯកជន ចាំបាច់ត្រូវធ្វើការជាប់ជាមួយគ្នានិច្ច ហើយត្រូវធានាថា យន្តការនៃការប្រឆាំងអំពើពុករលួយ ត្រូវបានអនុវត្តជាប្រចាំ។

ចំណែក លោក Roy Manalili អគ្គនាយកនៃក្រុមហ៊ុនJTI ប្រចាំកម្ពុជា បានលើកឡើងផងដែរថា យើងគឺជាក្រុមហ៊ុនជប៉ុន ដែលតែងតែអនុលោមទៅតាមច្បាប់ក្នុងស្រុក និងគោលការណ៍ក្រមប្រតិបត្តិរបស់ក្រុមហ៊ុន។ យើងនឹងបន្តបេ្តជ្ញាចិត្ត ក្នុងការអនុវត្តប្រតិបត្តិការអាជីវកម្មប្រកបដោយភាពទទួលខុសត្រូវ និងសុចរិតភាព។

លោកបន្តថា អនុស្សារណៈនេះ គឺជាសក្ខីភាពមួយ នៃការបេ្តជ្ញាចិត្តរបស់យើង JTI នឹងបន្តធ្វើតែរឿងដែលត្រឹមត្រូវ។

គួររម្លឹកថា ក្រុមហ៊ុន JTI ជាក្រុមហ៊ុនដំបូងគេនៅប្រទេសកម្ពុជា ដែលទទួលបានពានរង្វាន់ក្រុមហ៊ុនឆ្នើម កម្រិតពិភពលោក ពីវិទ្យាស្ថានTop Employer Institute នៅប្រទេសហូឡង់ផងដែរ៕

The post ក្រុមហ៊ុនជប៉ុន ចាប់ដៃអង្គភាព ACU ប្រយុទ្ធប្រឆាំងអំពើពុករលួយ និងលើកកម្ពស់ភាពស្អាតស្អំនៅក្នុងវិស័យឯកជន appeared first on .