ពិធីបិទសមយុទ្ធសុខាភិបាលយោធារួមគ្នានេះ ក្រោមវត្តមាននាយ​ឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រី ក្រសួងការពារជាតិ និង​ឧ​ត្ត​ម​សេនីយ៍​ទោ វ៉ាង ស៊ូ​ឈាន (WANG SHUQIAN) ប្រធាន​នាយកដ្ឋាន​សុខា​ភិបាល និង​ជា​គណៈកម្មាធិការ​យោធា​ម​ជ្ឈឹ​ម​ចិន។

ក្រសួងការពារជាតិ បានឲ្យដឹងថា សមយុទ្ធទេវតាសន្តិភាព-ឆ្នាំ២០២៣នេះ បានរៀបចំក្រោម ប្រធានបទចំនួន ៧ រួមមាន៖ ការបញ្ហាកម្លាំងសុខាភិបាលរួមគ្នា,ការដឹកជញ្ជូនកម្លាំងទ័ព,ការពង្រាយកម្លាំងប្រតិបត្តិការ, ការជួយសង្គ្រោះ នៅទីតាំងរងគ្រោះ,ការផ្ទេរបញ្ជួនអ្នករងគ្រោះព្យាបាលបន្ត,ការបញ្ជូនអ្នករងគ្រោះតាមផ្លូវអាកាស និងការការពារបង្ការជំងឺឆ្លង ដែលធ្វើឡើងចាប់កាលពីថ្ងៃទី១៦ ខែកញ្ញា ឆ្នាំ២០២៣។

នាយ​ឧត្ដមសេនីយ៍ ទៀ សីហា រដ្ឋមន្រ្តីក្រសួងការពារជាតិ មានប្រសាសន៍ថា កងយោធពល​ខេមរភូមិន្ទ មាន​មោទនភាព​ដែល​បាន​ធ្វើជា​ម្ចាស់ផ្ទះ​សមយុទ្ធ​រវាង​កងទ័ព​កម្ពុជា និង​ចិន ជា​លើក​ទី១ បានធ្វើឱ្យ​កងទ័ព​ប្រទេស​ទាំង​ពីរ​ទទួល​បានកា​រ​ផ្លាស់ប្តូរ​ចំណេះ​ដឹង ជំនាញ និង​បទពិសោធថ្មីៗ ជាពិសេស​បង្កើន​កិច្ចសហការ​ប្រតិបត្តិកា​រ​កាន់តែ​ជិតស្និទ្ធ ដើម្បី​ផ្ដល់​ការគាំទ្រ​ដល់​សន្តិសុខ​ក្នុង​តំបន់ និង​សកលលោក។

លោកបន្តថា សមយុទ្ធ​សុខាភិបាល ដែល​ទទួលបាន​ជោគជ័យ​នេះ បាន​ផ្ដើមចេញពី​ទំនាក់​ទំនងជា​មិត្តភាព សាមគ្គីភាព និង​កិច្ចសហប្រតិបត្តិការ​លើ​គ្រប់​វិស័យ​រវាង​កម្ពុជា និង​ចិន ក្នុង​ភាពជា​ដៃគូ​យុទ្ធសាស្ត្រ​គ្រប់​ជ្រុងជ្រោយ។

ជាមួយគ្នានេះ ឧ​ត្ត​ម​សេនីយ៍​ទោ វ៉ាង ស៊ូ​ឈាន ប្រធាន​នាយកដ្ឋាន​សុខា​ភិបាល និង​ជា​គណៈកម្មាធិការ​យោធា​ម​ជ្ឈឹ​ម​ចិន បានគូសបញ្ជាក់ថា  ការធ្វើ​សមយុទ្ធ​រវាង​យោធា​ប្រទេស​ទាំង​ពីរ​នេះ នឹង​ក្លាយ​ជា​គំរូ​សម្រាប់​ទំនាក់​ទំនង​អន្តរជាតិ​ជាថ្មី​ក្នុង​ប្រវត្តិ​សាស្ត្រ។ លោកថា សមយុទ្ធ​សុខាភិបាល​នេះ បាន​អនុវត្ត​ការងារ​រួមគ្នា​លើ​វិស័យ​វេជ្ជសាស្ត្រ​សុខាភិបាល និង​ការសង្គ្រោះ ដែល​ចូលរួម​ពី​សំណាក់​កងទ័ព​ជើង​អាកាស​នៃ​កងទ័ព​រំដោះប្រជាជន​ចិន។

សូមជម្រាបជូនថា សមយុទ្ធនេះ ក៏ដើម្បីអបអរសាទរខួបអនុស្សាវរីយ៍លើកទី៦៥ឆ្នាំ នៃការបង្កើតចំណងការទូតរវាងកម្ពុជា-ចិន, ដើម្បីលើកកម្ពស់សមត្ថភាព, ការផ្លាស់ប្តូរបទពិសោធន៍ក្នុងកិច្ចសហប្រតិបត្តិការផ្នែកសុខាភិបាល, ប្រតិបត្តិការសង្រ្គោះគ្រោះមហន្តរាយ និងជំងឺឆ្លងផ្សេងៗឱ្យប្រកបដោយប្រសិទ្ធភាពជាដើម៕

The post លោក ទៀ សីហា៖ សមយុទ្ធរួមគ្នាលើវិស័យសុខាភិបាលលើកទី១ ទទួល​បានកា​រ​ផ្លាស់ប្តូរ​ចំណេះ​ដឹង ជំនាញ និង​បទពិសោធថ្មីៗ appeared first on .

ឧត្តមសេនីយ៍ទោ ប៉ែន សុក្រឹត្យវិទ្យា នាយលេខាធិការដ្ឋាន សេនាធិការចម្រុះ នៃកងយោធពលខេមរភូមិន្ទ និងជាប្រធានក្រុមចាត់ចែងទូទៅនៃសមយុទ្ធទេវតាសន្តិភាព បានឲ្យដឹងថា ការរៀបចំរួមគ្នានៃសមយុទ្ធដោយយោធាចិន និងកម្ពុជា គឺជាការអនុវត្តដ៏រស់រវើកនៃការផ្លាស់ប្តូរសេវាសុខភាពយោធា និងកិច្ចសហប្រតិបត្តិការរវាងចិន និងកម្ពុជា ក្នុងការផ្តល់ជំនួយមនុស្សធម៌ ការព្យាបាលរួមគ្នា ការជម្លៀសអ្នករបួសជាបីផ្នែក និងទិដ្ឋភាពផ្សេងទៀតក្រោមក្របខណ្ឌនៃ អង្គការសហប្រជាជាតិ។

បើតាមនាយឧត្តមសេនីយ៍ ឥត សារ៉ាត់ អគ្គមេបញ្ជាការរង នាយសេនាធិការចម្រុះ នៃកង​យោធពលខេមរភូមិន្ទ ​និងជាប្រធានគណៈកម្មការដឹកនាំធ្វើលំហាត់ ​និងសមយុទ្ធរវាងកង​យោធពលខេមរភូមិន្ទ ​ជាមួយបណ្តាប្រទេសជាមិត្ត ​និងការចាត់តាំងសមយុទ្ធនានា​ក្នុងកង​យោធពលខេមរភូមិន្ទ បានលើកឡើងថា ការធ្វើសមយុទ្ធផ្នែក ​សុខាភិបាលជាមួយកងទ័ពចិននាពេលនេះ គឺដើម្បីបង្កើន​សមត្ថភាពផ្នែកសង្រ្គោះដល់​កងទ័ពកម្ពុជាបន្ថែមទៀត។

ថ្លែងប្រាប់អ្នកសារព័ត៌មាន នាយឧត្តមសេនីយ៍ ឥត សារ៉ាត់ ​បានបញ្ជាក់ថា ​ការធ្វើសមយុទ្ធរួមគ្នារវាង​កងទ័ពកម្ពុជា និងចិន ក្រៅពី​ផ្លាស់ប្តូរ​បទពិសោធន៍គ្នា​ផ្នែកសង្រ្គោះគ្រោះមហន្តរាយ ក៏ដើម្បីអបអរសាទរខួប​លើកទី៦៥ឆ្នាំ ​នៃការបង្កើតចំណងការទូតរវាងកម្ពុជា-ចិនផងដែរ។

លោកបន្ថែមថា ​សមយុទ្ធនេះធ្វើឡើងចាប់ពីថ្ងៃទី ១៦ ដល់ថ្ងៃទី២៦ ខែកញ្ញា ឆ្នាំ២០២៣នេះ ដើម្បីលើកកម្ពស់​សមត្ថភាព ការផ្លាស់ប្តូរបទ​ពិសោធន៍​ក្នុងកិច្ចសហប្រតិបត្តិការផ្នែកសុខាភិបាល ប្រតិបត្តិការសង្រ្គោះគ្រោះមហន្តរាយ និងជំងឺឆ្លងផ្សេងៗ​ឲ្យប្រកបដោយប្រសិទ្ធភាពជាដើម។

បើតាមគម្រោង សមយុទ្ធរួមគ្នានេះមានរយៈពេល ១៣ថ្ងៃ ចាប់ពីថ្ងៃទី១៤ ដល់ថ្ងៃទី២៦ ខែកញ្ញា ឆ្នាំ២០២៣ ដោយអនុវត្តតាមការពិតនៃការសង្គ្រោះផ្នែកវេជ្ជសាស្ត្រគ្រោះមហន្តរាយ ទាក់ទង ការជួយសង្គ្រោះរួមគ្នា ការជម្លៀសវេជ្ជសាស្រ្តរួមគ្នានៃអ្នករបួស និងអ្នកជំងឺ។ រួមគ្នាបង្ការ និងទប់ស្កាត់ជំងឺឆ្លង និងមុខវិជ្ជាផ្សេងៗទៀត។ ភាគីទាំងពីរបានប្រើប្រាស់កងទ័ពជាង ៧០០ នាក់ រួមទាំងយន្តហោះដឹកជញ្ជូន និងយន្តហោះសង្គ្រោះវេជ្ជសាស្រ្ត។ ឧបករណ៍ជាង ១០០០ ឈុត ឧទ្ធម្ភាគចក្រ Mi-17 យន្តហោះគ្មានមនុស្សបើក ឡានពេទ្យ រថយន្តការពារអនាម័យ និងជំងឺរាតត្បាត មន្ទីរពេទ្យតង់ ជាដើម៕

The post កម្ពុជា-ចិន បើកសមយុទ្ធរួមគ្នាជាផ្លូវការដើម្បីបង្កើនសមត្ថភាពផ្នែកសង្រ្គោះដល់កងទ័ពកម្ពុជា appeared first on .