សម្តេច ស ខេង បានលើកឡើងដូច្នេះថា៖« បងប្អូនជនរួមជាតិជាទីគោរព! ខ្ញុំសូមជម្រាបជូនជនរួមជាតិសូមជ្រាបថា បន្ទាប់ពីអការៈសុខភាពខុសប្លែកពីធម្មតាបន្តិចបន្តួច ខ្ញុំបានធ្វើសម្តេច ស ខេង តេស្តរកឃើញថាមានវិជ្ជមានជំងឺកូវីដ-១៩។ ខ្ញុំក៏បានណែនាំក្រុមគ្រួសារ និងអ្នកនៅជុំវិញធ្វើតេស្ត និងតាមដានសុខភាពដូចគ្នាដែរ»។

ជាមួយសម្តេច ស ខេង បានបញ្ជាក់ដែរថា សម្រាប់សម្តេចពេលនេះ គឺបានអនុវត្តតាមវិធានសុខាភិបាល ដោយដាក់ខ្លួននៅដាច់ដោយឡែក និងធ្វើលំហាត់ប្រាណ។ យ៉ាងណាមិញ ក៏ដោយសម្តេចនៅតែអាចបំពេញការងារពីបន្ទប់ដាច់ដោយឡែកក្នុងគេហដ្ឋានរបស់សម្តេចជាធម្មតា។

ជាមួយគ្នានេះ សម្តេច ស ខេង ក៏ស្នើសុំការអធ្យាស្រ័យសម្រាប់ការលុបចោល និងការអវត្តមានពីកម្មវិធីការងារនានាមួយររយៈពេលខ្លី ហើយសម្តេចនឹងធ្វើបច្ចុប្បន្នភាពព័ត៌មានស្ដីអំពីបញ្ហាសុខភាពនេះតាមវិធានសុខាភិបាលជូនជនរួមជាតិរហូតបានជាសះស្បើយផងដែរ៕

អត្ថបទ៖ ពិសី

The post សម្តេច ស ខេង ស្នើសុំអវត្តមាន​ពីកម្មវិធីការងារនានាមួយររយៈពេលខ្លី ក្រោយតេស្តឃើញវិជ្ជមានជំងឺកូវីដ-១៩ appeared first on .

ថ្លែងបើកកិច្ចប្រជុំ សម្ដេចក្រឡាហោម ស ខេង បានថ្លែងអំណរគុណ និងកោតសរសើរ អគ្គលេខា​ធិការដ្ឋាន​ គ.ស.ច.គ. ដែលបានខិតខំសម្របសម្រួលជាមួយក្រសួង-ស្ថាប័ន​ពាក់ព័ន្ធ​ក្នុងការ​រៀបចំ​សេចក្ដីព្រាងផែនការជាតិនេះឡើង។ សម្ដេច បានសម្ដែងការពេញចិត្តចំពោះផែនការនេះ ដ្បិត​មាន​ទស្សនវិស័យវែងឆ្ងាយ និងប្រាកដនិយម ក្នុងការដោះស្រាយបញ្ហាចរាចរណ៍នៅកម្ពុជា។

ជាមួយគ្នានេះ សម្ដេច​ក៏បាន​ឯកភាព​ចំពោះយោបល់​ស្នើឱ្យ​គណៈកម្មាធិការ​ជាតិសុវត្ថិភាព​ចរាចរណ៍​ផ្លូវគោក ពិនិត្យលទ្ធភាពពិចារណាស្នើសុំរាជរដ្ឋាភិបាលកំណត់ឆ្នាំផលិតរថយន្តនាំចូលមកកម្ពុជា ដើម្បី​កាត់បន្ថយរថយន្តជជុះមានហានិភ័យ ខណៈ​សម្ដេច​ក៏បាន​ជំរុញ​ឱ្យខិតខំ​បន្ថែមទៀត​ក្នុងការ​ជំរុញ​ការ​បំពាក់កាមេរ៉ាសុវត្ថិភាពនៅតាមដងផ្លូវផងដែរ។

គួរបញ្ជាក់ថា តាមរយៈកិច្ចប្រជុំខាងលើបានឱ្យដឹងថា ផែនការជាតិទសវត្សរ៍សុវត្ថិភាពចរាចរណ៍ផ្លូវគោក ជាផែនការសកម្មភាពរយៈពេល១០ឆ្នាំ ពីឆ្នាំ២០២១ ដល់ឆ្នាំ២០៣០ និងជាផែនការជាតិលើកទី២ បន្តពីលើកទី១ ពីឆ្នាំ២០១១ ដល់ឆ្នាំ២០២១។ ផែនការនេះ ជា​ឧបករណ៍​រួមចំណែក​សម្រេច​ជោគជ័យ​នូវយុទ្ធសាស្រ្តចតុកោណរាជរដ្ឋាភិបាលកម្ពុជា និង​ស្រប​តាម​គោលនយោបាយ​ជាតិ​សុវត្ថិភាពចរាចរណ៍​ផ្លូវគោក។

យុទ្ធសាស្រ្តនៃផែនការនេះបានកំណត់គោលដៅជាក់លាក់លើរាជធានី និងខេត្តមានស្លាប់ និងរបួសច្រើន រួមមានរាជធានីភ្នំពេញ ខេត្តកណ្ដាល ព្រះសីហនុ កំពង់ចាម សៀមរាប បន្ទាយមានជ័យ ក្រចេះ កំពង់ធំ បាត់ដំបង ពោធិ៍សាត់ ស្វាយរៀង ព្រៃវែង កំពង់ស្ពឺ តាកែវ និងខេត្តកំពត ដោយផ្ដោត​លើមូលហេតុ​នាំ​ឱ្យ​មានគ្រោះថ្នាក់ ដូចជាការបើកបរលើសល្បឿនកំណត់ ការមិនគោរពសិទ្ធិអាទិភាព ការ​បើកបរ​ក្រោម​ឥទ្ធិពល​គ្រឿងស្រវឹង ការមិនពាក់មួកសុវត្ថិភាព ជាដើម៕

The post សម្តេច ស ខេង នឹងស្នើសុំរដ្ឋាភិបាលកំណត់ឆ្នាំផលិតរថយន្តនាំចូលមកកម្ពុជា ដើម្បីកាត់បន្ថយរថយន្តជជុះមានហានិភ័យ appeared first on .

សម្តេចក្រឡាហោម ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ បានលើកឡើងថា ផ្អែកតាមលទ្ធផលនៃការស្រាវជ្រាវ និងសួរចម្លើយ រកឃើញថាពលរដ្ឋបរទេស មួយចំនួនធំត្រូវបានក្រុមឧក្រិដ្ឋជនដែលមានមេក្លោងនៅក្នុងប្រទេសរបស់ខ្លួន និងមានបក្សពួកនៅកម្ពុជា ប្រើប្រាស់បណ្តាញទំនាក់ទំនងសង្គម ធ្វើការឆបោកឲ្យឆ្លងដែនដោយខុសច្បាប់ចូលមកប្រទេសកម្ពុជា ក្រោមការសន្យាផ្តល់ការងារដែលទទួលបានប្រាក់ឈ្នួលខ្ពស់។

សម្តេចក្រឡាហោម បានលើកឡើងបន្តថា ជាក់ស្ដែងជនទាំងនោះ ត្រូវបានចាត់ឲ្យបម្រើការងារល្បែងស៊ីសង​អន​ឡាញខុសច្បាប់ ហើយបានក្លាយជាជនរងគ្រោះនៃអំពើជួញដូរមនុស្ស និង រត់ពន្ធមនុស្ស ដោយត្រូវបានក្រុមឧក្រិដ្ឋ​ជនធ្វើការជួញដូរ ឬផ្ទេរបន្តពីក្រុមហ៊ុនមួយទៅក្រុមហ៊ុនមួយ ឬពី ក្រុមមួយទៅក្រុមមួយ ដោយពុំមានការព្រមព្រៀងពីសាមីខ្លួន ហើយករណីខ្លះទៀតត្រូវទទួលរងនូវអំពើហិង្សា និងការគំរាមកំហែងផ្សេងៗ ប្រសិនមិនអនុវត្តតាមការបង្គាប់បញ្ហាពីក្រុមឧក្រិដ្ឋជន។

គួរបញ្ជាក់ថា គិតពីថ្ងៃទី ០១ ខែមករា ដល់ថ្ងៃទី ២០ ខែសីហា ឆ្នាំ២០២២នេះ សមត្ថកិច្ចកម្ពុជា បានរកឃើញ និងជួយសង្គ្រោះជនរងគ្រោះចំនួន៨៧ករណី ស្មើនឹងប្រមាណ ៨៦៥នាក់ ព្រមទាំងបានកសាងសំណុំរឿងបញ្ជូនជនសង្ស័យចំនួន ៦០នាក់ទៅតុលាការ ។

ដោយឡែក ក្នុងសប្ដាហ៍ទី៤ ខែសីហា នេះ សមត្ថកិច្ចកម្ពុជាបានបើកកិច្ចប្រតិបត្តិការជួយសង្គ្រោះជនរងគ្រោះនៅក្នុងខេត្តព្រះសីហនុ ខេត្តពោធិ៍សាត់ ខេត្តស្វាយរៀង និងខេត្តឧត្តរមានជ័យ បានសរុបចំនួន០៧ករណី ដោយបានសង្គ្រោះជនរងគ្រោះសរុបចំនួន ២៥នាក់ មាន ៦ សញ្ជាតិ និងឃាត់ខ្លួនជនសង្ស័យសរុបចំនួន ២៣នាក់។ក្រៅពីនេះ មានករណីសេសសល់បន្ថែមទៀត ដែលអាជ្ញាធរមានសមត្ថកិច្ចកម្ពុជាកំពុងបន្តស្រាវជ្រាវ ដើម្បីសង្គ្រោះនិងបង្ក្រាប ៕

The post សម្តេច ស ខេង អំពាវនាវ​ដល់​ភាគី​ពាក់ព័ន្ធចូលរួមផ្តល់ព័ត៌មានពីអំពើជួញដូរមនុស្ស និងឧក្រិដ្ឋកម្មឆ្លងដែន appeared first on .

ការជំរុញរបស់សម្តេចក្រឡាហោម ស ខេង ដូចនេះបានធ្វើឡើងក្នុងពិធីផ្សព្វផ្សាយរបាយការណ៍ជាតិ ស្ដីពីការងារ​ប្រយុទ្ធប្រឆាំងអំពើជួញដូរមនុស្សឆ្នាំ២០២១ និងទិសដៅការងារឆ្នាំ២០២២ របស់ គ.ជ.ប.ជ នាព្រឹកថ្ងៃទី៧ ខែមេសា ឆ្នាំ២០២២។

សម្តេចក្រឡាហោម ស ខេង បានបន្ថែមថា ចំពោះស្ថាប័នតុលាការ ត្រូវផ្តល់នូវយុត្តិធម៌ ប្រកបដោយ​ភាពត្រឹមត្រូវ តម្លាភាពដើម្បីធានា និងលើកកម្ពស់ការការពារ ការប្រយុទ្ធប្រឆាំងការជួញដូរមនុស្ស​ឱ្យកាន់​តែល្អប្រសើរថែមទៀត។ ក្នុងនោះ សម្រាប់ការផ្តល់សេវាជួយជនរងគ្រោះ ត្រូវបង្កើន​ការយក​ចិត្តទុកដាក់បន្ថែមទៀតដោយត្រូវចូលរួមសហ​​ប្រតិបត្តិការ​ជាមួយដៃគូជាតិ និងអន្តរជាតិក្នុងការ​ជួយលើកកម្ពស់ គាំទ្រ និងការពារដល់ជនរងគ្រោះ។

ជាមួយគ្នានេះ សម្តេចក្រឡាហោម បានជំរុញដល់ក្រសួង-ស្ថាប័ន្ធពាក់ព័ន្ធដែលស្ថិតនៅក្រោមគណៈ​កម្មាធិការជាតិប្រយុទ្ធ​ប្រឆាំង​អំពើជួយដូរមនុស្ស(គ.ជ.ប.ជ) ត្រូវបន្តកិច្ចសហប្រតិបត្តិការឱ្យបានកាន់​តែសកម្ម និងជិតស្និតបន្ថែមទៀត ដែល​បែង​​ចែកមុខងារទៅតាមជំនាញដើម្បីធ្វើឱ្យកិច្ចការងារទាំងនោះ​​ឱ្យទទួលបានជោគជ័យ ។

សម្តេចក្រឡាហោម ក៏បានអំពាវនាវឱ្យប្រជាពលរដ្ឋ ធ្វើការសម្រេចចិត្តឱ្យបានត្រឹមត្រូវ កុំប្រថុយ​​ប្រថាន​នឹង​គ្រោះថ្នាក់ ដោយព្យាយាមឆ្លងដែនចាកចេញតាមមធ្យោបាយលួចលាក់ខុសច្បាប់ និងប្រកប​ដោយភាព​ប្រឈមនឹងគ្រោះថ្នាក់ ដែលនឹងធ្វើឱ្យមានគ្រោះថ្នាក់ និងការខាតបង់កាន់តែធ្ងន់ធ្ងរ ។

យោងតាម​របាយការណ៍របស់លោកស្រី ជូ ប៊ុន​អេង រដ្ឋលេខាធិការក្រសួងមហាផ្ទៃ និងជា​អនុប្រ​ធានអចិន្ដ្រៃយ៍​គណៈ​កម្មាធិការ​ជាតិប្រយុទ្ធប្រឆាំង​អំពើជួញដូរមនុស្ស បានបង្ហាញថា ក្នុងឆ្នាំ២០២១ សមត្ថកិច្ចបានបង្ក្រាបករណីជួញដូរមនុស្ស ចំនួន២៣៥ករណី ក្នុងនោះបាន​បញ្ជូន​ជនសង្ស័យ​ទៅតុលាការ​ចំនួន៤០០នាក់ និងសង្គ្រោះជនរងគ្រោះបាន​ចំនួន​១,៣៩០​នាក់ ។ សម្រាប់ករណីអំពើធ្វើអាជីវកម្មផ្លូវភេទក្នុងឆ្នាំ២០២១ បង្ក្រាប​​បានចំនួន១២៤ករណី បានបញ្ជូនទៅតុលាការចំនួន​១៣៨នាក់ និងសង្គ្រោះបានជនរងគ្រោះ ចំនួន​១៨៧នាក់ ៕ អត្ថបទ៖ ពុធិកា

The post សម្តេច ស ខេង ប្រាប់សមត្ថកិច្ច​ពាក់ព័ន្ធ​​មិន​ត្រូវ​​យោគ​​យល់ និង​​អនុគ្រោះ​​ ចំពោះ​អ្នក​ប្រព្រឹត្តបទល្មើស​ជួញដូរ​មនុស្ស​ appeared first on .

សម្តេច ស ខេង បានបន្តថា ដើម្បីដោះស្រាយជុំវិញបញ្ហាថ្នាក់ដឹកនាំ និងមន្ត្រីនគរបាលដែលមិនបានចូលរៀនវគ្គបណ្ដុះបណ្ដាល ក្រសួងមហាផ្ទៃ នឹងធ្វើបច្ចុប្បន្នភាពនៃការតម្លើងឋានៈ តួនាទី និងសក្ដិឱ្យបានសមស្រប ក្នុងនោះឆាប់ៗខាងមុខ។

សម្តេច ស ខេង មានប្រសាសន៍បញ្ជាក់ថា៖ “គ្រប់មន្ត្រីនគរបាលដែលទើបតែជាប់ដោយការប្រឡងក្តី ដោយការសម្ភាសន៍ក្នុងករណីចាំបាច់ណាមួយក្តី ត្រូវតែទទួលបានការបណ្តុះបណ្តាល មុខវិជ្ជាជំនាញរបស់នគរបាលជាតិ។ កាលពីពេលកន្លងទៅការសិក្សារៀនសូត្រត្រូវមានរយៈពេល២ខែកន្លះ ហើយមកដល់ពេលនេះតាមរយៈកិច្ចខិតខំប្រឹងប្រែងរបស់ក្រសួងមហាផ្ទៃ គឺបន្ថែមឱ្យមានរយៈពេល៤ខែ ក្នុងនោះក្រសួងគ្រោងបន្តពិនិត្យលទ្ធភាពលើផែនការរយៈពេលមធ្យមបង្កើនដល់៦ខែ ហើយផែនការរយៈពេលវែងអាចឈានទៅដល់៨ខែ”។

បើតាមសម្តេចក្រឡាហោម ការទទួលបានវគ្គបណ្តុះបណ្តាលជំនាញនេះ ពិតជាមានសារៈសំខាន់ណាស់ដើម្បីពង្រឹងសមត្ថភាព ចំណេះ ជំនាញ ដល់មន្ត្រីនគរបាលជាតិក្នុងការបម្រើប្រជាពលរដ្ឋឱ្យបានល្អ។ សម្តេចបន្ថែមទៀតថា ក្រសួងមហាផ្ទៃ ក៏បានរៀបចំសាលាបណ្តុះបណ្តាលនគរបាល បើទោះបីជាពេលនេះនៅមិនទាន់មានសាលាគ្រប់គ្រាន់យ៉ាងណាក៏ដោយ។

ជាមួយគ្នានេះ ក្រសួងក៏នឹងខិតខំបន្ថែមទៀតដើម្បីបញ្ជូនមន្ត្រីនគរបាលជាតិឱ្យទៅសិក្សា ព្រមទាំងដកស្រង់បទពិសោធន៍នៅបណ្តាប្រទេសនានាដែលជាមិត្តផងដែរ៕

សូមស្តាប់ប្រសាសន៍សម្តេចក្រឡាហោម ស ខេង៖

The post ក្រសួងមហាផ្ទៃ រកឃើញថ្នាក់ដឹកនាំនិងមន្ត្រីនគរបាលជាង២ពាន់តំណែងមិនបានឆ្លងកាត់វគ្គបណ្ដុះបណ្ដាល appeared first on .

ការអនុញ្ញាតឲ្យក្រសួង ស្ថាប័នក្នុងវិស័យសាធារណៈ ប្រើប្រាស់ទិន្នន័យអត្តសញ្ញាណបុគ្គលដើម្បីបម្រើការដល់សេវាសាធារណៈ ត្រូវបានធ្វើឡើងដោយប្រកាសអន្តរក្រសួង ឬប្រកាសរួមរវាងរដ្ឋមន្រ្តីក្រសួងមហាផ្ទៃ និងរដ្ឋមន្រ្តីក្រសួង ឬប្រធានស្ថាប័នដែលស្នើសុំ។ ដោយឡែកសម្រាប់វិស័យឯកជនឯណេះវិញ ត្រូវធ្វើឡើងដោយកិច្ចព្រមព្រៀង ឬអនុស្សរណៈយោគយល់គ្នារវាងតំណាងក្រសួងមហាផ្ទៃកម្ពុជា និងប្រធាន ឬតំណាងស្ថាប័ន អង្គភាពក្នុងវិស័យឯកដែលបានស្នើសុំ។

ទន្ទឹមនេះ អនុក្រឹត្យនេះ ក៏បានសង្កត់ធ្ងន់ដែរថា ការប្រើប្រាស់ទិន្នន័យអត្តសញ្ញាណបុគ្គល ត្រូវធានារក្សារការពារការសម្ងាត់នៃព័ត៌មានឯកជនរបស់បុគ្គល សុវត្ថិភាព ភាពត្រឹមត្រូវ និងសុចរិតភាព។ ហើយក្រសួងមហាផ្ទៃដែលជាម្ចាស់ទិន្នន័យដើម ក៏ត្រូវធានាថារាល់ទិន្នន័យអត្តសញ្ញាណបុគ្គល មានភាពត្រឹមត្រូវដែលអាចធ្វើជាមូលដ្ឋានក្នុងការផ្ទៀងផ្ទាត់ និងប្រើប្រាស់ជាផ្លូវការបាន។

លើសពីនេះ ក្រសួង ស្ថាប័ន អង្គភាពក្នុងវិស័យសាធារណៈ និងឯកជនដែលត្រូវស្នើសុំប្រើប្រាស់ទិន្នន័យអត្តសញ្ញាណបុគ្គល ត្រូវធានាដែរថា រាល់ទិន្នន័យបានប្រើប្រាស់រួច មិនត្រូវបានរក្សាទុកក្នុងប្រព័ន្ធរបស់ខ្លួន និងមិនត្រូវចែករំលែកទិន្នន័យបន្តទៅភាគីផ្សេងទៀត ឬប្រើប្រាស់ដោយប្រាសចាកពីគោលបំណងនៃការស្នើសុំដែលធ្វើឲ្យប៉ះពាល់ដល់សន្តិសុខ សណ្តាប់ធ្នាប់សាធារណៈនោះឡើយ។

សូមបញ្ជាក់ថា អនុក្រឹត្យនេះ ក៏បានផ្តល់អាជ្ញាសឹកឲ្យក្រសួងមហាផ្ទៃកម្ពុជាអាចសម្រេចដាក់ទណ្ឌកម្មខាងវិន័យទៅលើបុគ្គលដែលប្រព្រឹត្តល្មើសនឹងបទប្បញ្ញត្តិនៃអនុក្រឹត្យនេះផងដែរ ដូចជា ការព្រមាន ការស្តីបន្ទោស និងការដាក់កំហិត ដោយការព្យួរ ឬលុបចោលកិច្ចព្រមព្រៀង ឬអនុស្សរណៈយោគយល់គ្នាតែម្តង៕

The post តទៅនេះ ទិន្នន័យអត្តសញ្ញាណបុគ្គល ត្រូវបានរដ្ឋាភិបាលធានារក្សាការពារការសម្ងាត់នៃព័ត៌មានឯកជន appeared first on .

សម្ដេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រ​ធានក្រមការងារថ្នាក់ជាតិចុះជួយជួយខេត្តព្រៃវែង បានអញ្ជើញជួប​សំណេះសំ​ណាលដោយផ្ទាល់ជាមួយក្រុមគ្រូពេទ្យ និងប្រជាពលរដ្ឋដែលមានការសង្ស័យ ពិសេសពលករ ដែលទើបវិលត្រឡប់មកពីក្រៅប្រទេស ហើយត្រូវបាន​ដាក់ឱ្យនៅ​ដោយឡែករយៈពេល១៤ថ្ងៃ ក្រោមការតាម​​ដានពិនិត្យសុខភាពរកជំងឺកូវីដ១៩​ពីក្រុមគ្រូ​ពេទ្យ នៅតាមបណ្ដាស្រុកឃុំមួយចំនួន ដូចជា ឃុំព្រៃស្នៀត ឃុំរកា ឃុំព្រៃ​ព្នៅនៃស្រុកពារាំង ឃុំអង្គរទ្រត ឃុំដំរីពួន នៃស្រុកស្វាយអន្ទរ និងឃុំព្រែកខ្សាយ ស្ថិតនៃស្រុកពាមរក៏ ក្នុងខេត្តព្រៃវែង។

នៅក្នុងឱកាសជួបសំណេះសំណាលនោះ សម្ដេចក្រឡាហោម ស ខេង មានប្រសា​សន៍កោតសរសើរក្រុមគ្រូពេទ្យ ដែលបានខិតខំបំពេញ​ភារកិច្ចប្រកប​ដោយកា​រ​យកចិត្តទុកដាក់ក្នុងការពិនិត្យតាមដានសុខភាពប្រជាពលរដ្ឋ ព្រមទាំងបានសម្ដែង​ការលើកទឹកចិត្តខ្ពស់ដល់អាជ្ញាធរមូលដ្ឋានដែលបានរួមសហការគ្នាចុះអប់រំផ្សព្វផ្សាយ និងណែនាំបងប្អូនប្រជាពលរដ្ឋដែលមានការង្ស័យ ឬទើបវិលមកពីក្រៅប្រទេសនោះ បានអញ្ជើញមកពិនិត្យសុខភាព និងចូលរួមអនុវត្តវិធានការណែ​នាំដោយក្រសួងសុខា​ភិបាល។

ក្នុងឱកាសជួបសំណេះសំណាលនេះដែរ សម្ដេចក្រឡាហោម ស ខេង បានអញ្ជើញ​ចែកជូននូវម៉ាស់ ទឹកសម្លាប់មេរោគ និងសម្ភារៈមួយចំនួនទៀត ព្រមទាំងថវិកា ដល់ក្រុម​គ្រូពេទ្យ ដែលកំពុងបំពេញភារកិច្ចពិនិត្យតាមដានសុខភាពប្រជាពលរដ្ឋ និងជូនពលករ ដែលកំពុងស្ថិតក្រោមការតាមដានសុខភាពពីក្រុមគ្រូពេទ្យ និងបានផ្ដាំ​ផ្ញើ​ឱ្យខិតខំបន្តបំពេញភារកិច្ច និងយកចិត្តទុកដាក់ថែទាំ​សុខភាពតាមគោល​ការណ៍សុខាភិបាល។

ជាមួយគ្នានេះ បងប្អូនពលករ បានសម្តែងក្តីរំភើបចិត្តជាខ្លាំង ខណៈដែលបានជួប​ផ្ទាល់​ជាមួយសម្តេចក្រឡាហោម ស ខេង ដែលមានការយកចិត្តទុកដាក់ ជួយទំនុកប​ម្រុងដល់​ពួកគាត់ពីថ្នាក់ដឹកនាំនៃក្រសួងមហាផ្ទៃយ៉ាងកក់ក្តៅ ពេលដែល​ពួកគាត់​កំពុងតែជួបបញ្ហានាពេលនេះ។

សម្ដេចក្រឡាហោម បានបង្ហាញទឹកចិត្តរំភើបរីករាយបន្ទាប់​ពីបានសង្កេតឃើញបង​ប្អូនប្រជាពលរដ្ឋ ពិសេសពលករ ដែលទើបវិលមកពីក្រៅប្រទេស មានស្មារតីចូលរួម​សហការជាមួយអាជ្ញាធរ និងក្រុមគ្រូពេទ្យ ដោយស្នាក់នៅដាច់ដោយឡែក១៤ថ្ងៃ ដើម្បីពិនិត្យតាមដានសុខភាព ដែលនេះ ជាការចូលរួមយ៉ាងសំខាន់ ក្នុងការបញ្ចៀស​ការឆ្លងជំងឺកូវីដ១៩ជាយថាហេតុដល់ក្រុមគ្រួសារ និងសាច់ញាតិ។

សម្ដេចក្រឡាហោម ស ខេង ឧបនាយករដ្ឋមន្ត្រីក៏បានមានប្រសាសន៍​គូសបញ្ជាក់ទៀត​ថាបច្ចុប្បន្ននេះ រាជរដ្ឋាភិបាលកម្ពុជា កំពុងផ្ដោតការយកចិត្តទុកដាក់ខ្ពស់​បំផុតចំពោះ​ការ​​ការពារ​សេចក្ដីសុខ និសុវត្ថិភាពជូនដល់បងប្អូនប្រជាពលរដ្ឋនៅ​ក្នុងបរិបទដែល​មនុស្សជាតិលើពិភពលោក កំពុងទទួលរងការគំរាមកំហែងខ្ពស់ដោយជំងឺកូវីដ១៩។

សម្ដេចក៏បានបន្ថែមទៀតថាការអនុវត្តវិធានការដាក់នៅដោយឡែកនេះ គឺមិនមែន​សម្រាប់​តែដើម្បីត្រៀមជួយសង្គ្រោះបងប្អូនដែល​ទើបវិលត្រឡប់ចូលប្រទេស​វិញឲ្យ​បានទាន់ពេលវេលាប្រសិនបើមានជំងឺកូវីដ១៩នោះទេ ប៉ុន្តែការណ៍នេះ​ក៏ជាវិធានការ​ដ៏ចាំបាច់បំផុតដើម្បីជួយទប់ស្កាត់ការរាលដាលជំងឺនេះទៅដល់ប្រជាពលរដ្ឋក្នុងសហគមន៍ទូទៅដែរ ដែលពួកគាត់មិនបានចេញទៅក្រៅប្រទេសនោះ៕

The post ពលករខ្មែរ ដែល​ត្រឡប់ពី​ប្រទេស​ថៃ សម្តែង​​ក្តីរំ​ភើប​ចិត្ត ខណៈ​​ស​ម្តេ​​ច​​ក្រឡា​ហោម​ ស ខេង អញ្ជើ​ញ​ជួប​​សំណេះ​សំណា​ល​សួរ​សុខ​ទុក្ខ appeared first on .

សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធាន​គណៈកម្មាធិការជាតិសុវត្ថិភាពចរាចរណ៍ផ្លូវគោក បានដាក់ចេញនូវបទបញ្ជាចំនួន​៤ចំណុច សំខាន់ៗ ដើម្បីកាត់បន្ថយគ្រោះថ្នាក់ចរាចរណ៍នៅកម្ពុជា។ បទបញ្ជាទាំងបួនរួមមាន៖ ទី១.ប្រជាពលរដ្ឋអ្នកប្រើប្រាស់ផ្លូវទាំងអស់មេត្តាយោគយល់ចំពោះការប្រកាន់យកវិធានការច្បាប់ដ៏តឹងរ៉ឹង ចំពោះបទល្មើសចរាចរណ៍ ផ្លូវគោក ដើម្បីចៀសវាងពីការ​ប្រឈម​ចំពោះផ្លូវច្បាប់ គឺត្រូវគោរពអនុវត្តច្បាប់ស្តីពីចរាចរណ៍ផ្លូវគោកឱ្យបានល្អខ្ជាប់ខ្ជួន ដើម្បីការពារអាយុជីវិតខ្លួនឯងផ្ទាល់ ភាពសុខដុមរមនា ក្នុងក្រុមគ្រួសារ ការពារទ្រ​ព្យសម្បត្តិរបស់បងប្អូន និងដើម្បីរួមគ្នាលើកកម្ពស់កិត្តិយស សេចក្តីថ្លៃថ្នូរបស់​ប្រទេសជាតិ។

ទី២.ក្រសួង-ស្ថាប័នពាក់ព័ន្ធ អាជ្ញាធរ កងកម្លាំងមានសមត្ថកិច្ចគ្រប់លំដាប់ថ្នាក់ អង្គការ​ជាតិ អន្តរជាតិ និងប្រព័ន្ធផ្សព្វផ្សាយនានា បន្តអប់រំផ្សព្វផ្សាយច្បាប់​ស្តីពីចរាចរណ៍​ផ្លូវគោក និងកម្រិតនៃការពិន័យអន្តរការណ៍ចំពោះអំពើ​ល្មើសទៅនឹងច្បាប់​ស្តីពីចរាចរ​ណ៍​ផ្លូវគោកឱ្យបានទូលំទូលាយនិងជាប់ជាប្រចាំ។

ទី៣.ដាក់ចេញនូវបទបញ្ជាដល់ថ្នាក់ដឹកនាំ និងមន្ត្រីនគរបាលចរាចរណ៍ទូទាំង​ប្រទេស​ត្រូវរឹតបន្តឹង​ការអនុវត្តច្បាប់ស្តីពីចរាចរណ៍ផ្លូវគោកប្រកបដោយភាពម៉ឺងម៉ាត់ដាច់ខាត មិនយោគយល់ និងត្រូវអនុវត្តឱ្យបានត្រឹមត្រូវទៅ​តាមនិតិវិធីច្បាប់នូវរាល់បទល្មើសច​រាចរណ៍ផ្លូវគោក​ប្រកបដោយតម្លាភាព ស្មើរភាព និងមិនរើសអើង ហើយត្រូវសហការ​ស្រាវជ្រាវ​តាមចាប់ខ្លួនជនបង្កគ្រោះថ្នាក់ចរាចរណ៍ផ្លូវគោក ដែលគេចខ្លួន យកមក​ផ្តន្ទាទោសតាមច្បាប់ឱ្យបានជាដាច់ខាត។

ទី៤.ថ្នាក់ដឹកនាំនគរបាលចរាចរណ៍ត្រូវរៀបចំផែនការសកម្មភាព និងរៀបចំកម្លាំង ដើម្បីតាមដាន ពិនិត្យ និងគាំទ្រប្រតិបត្តិការអនុវត្តច្បាប់របស់មន្ត្រីនគរបាល​ចរាចរណ៍ក្រោម​ឱវាទរបស់ខ្លួន ដើម្បីធានាអំពីភាពត្រឹមត្រូវនៃការអនុវត្តច្បាប់របស់​មន្ត្រីនគរបាលចរាចរណ៍ទាំងអស់ ព្រមទាំងត្រូវពង្រឹងអាកប្បកិរិយា សីលធម៌ វិន័យ ឱ្យស័ក្តិសមជាមន្ត្រី អនុវត្តច្បាប់ប្រកបដោយគុណធម៌ និងមនសិកាវិជ្ជាជីវៈ។ ត្រូវផ្តល់រង្វាន់តាមការកំណត់របស់រដ្ឋជាមួយការលើកសរសើរចំពោះអង្គភាព និងមន្ត្រីមានស្នាដៃនិងត្រូវដាក់វិន័យឱ្យបានម៉ឺងម៉ាត់ចំពោះមន្ត្រីអសកម្មឬ មន្ត្រីដែលប្រព្រឹត្តផ្ទុយពីក្រមសីលធម៌វិជ្ជាជីវៈ។

សម្តេចក្រឡាហោមបញ្ចេញបទបញ្ជាទាំង៤ចំណុចនេះ នៅក្នុងពិធីផ្សព្វផ្សាយអនុ​ក្រឹត្យលេខ ៣៩ អនក្រ.បក ចុះថ្ងៃទី១៧ ខែមីនា ឆ្នាំ២០២០ ស្ដី «ពីការកែ​សម្រួល​អនុក្រឹត្យលេខ ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧» ស្ដី «ពីការពិ​ន័យ អន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក» នៅព្រឹកថ្ងៃទី ២៧ ខែមីនា ឆ្នាំ ២០២០។​ ជាមួយគ្នានេះ សម្តេចក្រឡាហោម បានសម្តែងការកោត​សរសើរមន្រ្តីគ្រប់ស្ថាប័នពាក់ព័ន្ធទាំងអស់ ដែលបានខិតខំប្រឹង​ប្រែងធ្វើការយ៉ាង​មមាញឹក ដើម្បីពង្រឹងច្បាប់ និងកាត់បន្ថយ​បញ្ហាគ្រោះថ្នាក់ចរាចរណ៍នេះ៕

The post សម្តេច​ ស​ ខេ​ង ដាក់​ចេញ​គោ​ល​​កា​រ​ណ៍ចំនួន​៤ ដើម្បី​កាត់​​បន្ថយ​គ្រោះ​ថ្នាក់ចរា​ចរណ៍​ផ្លូវគោក appeared first on .

ថ្លែងទៅកាន់អ្នកសារព័ត៌មានក្រោយកិច្ចប្រជុំស្តាប់របាយការណ៍របស់មន្រ្តីនៃក្រសួងមហាផ្ទៃ នៅព្រឹកថ្ងៃទី ២០ ខែមីនា ឆ្នាំ ២០២០ សម្តេចក្រឡាហោម ស ខេង ឧបនាយក​រដ្ឋមន្រ្តី រដ្ឋមន្រ្តីក្រសួងមហាផ្ទៃ មានប្រសាស៍ថា ក្រសួងមហាផ្ទៃ កំពុងពិចារ​ណាផ្អា​កការ​សួរសុខទុក្ខបណ្តោះអាសន្ននៅក្នុងពន្ធនាគារ ដើម្បីចូលរួមទប់ស្កាត់​ការរីករាលដា​ល​នៃជំងឺកូវីដ១៩។

ជាមួយគ្នានេះ សម្តេចក្រឡាហោម មានប្រសាសន៍ថា ក្រសួងមហាផ្ទៃនឹង​បង្កើតគណៈ​កម្មាការដាច់ដោយឡែកមួយ មានក្រុមការងារនៅតាមអគ្គនាយកដ្ឋាននានា ដើម្បី​ធ្វើការផ្សព្វផ្សាយអំពីវិធានការទាំងឡាយឲ្យមន្រ្តីបុគ្គលិកទាំងអស់ ដែលកំពុង​បម្រើកា​រងារនៅក្នុងក្រសួងមហាផ្ទៃ។

ទន្ទឹមនឹងនេះ សម្តេចមានប្រសាសន៍ថា ក្រសួងនឹងមានវិធានការគ្រប់គ្រងតឹង​រឹងនៅ​តាមច្រ​​កព្រំ​ដែនទាំងផ្លូកគោក ផ្លូវទឹក និងផ្លូវអាកាស។

សម្តេចគូសបញ្ជាក់ថា ការដឹកទំនិញតាមច្រកព្រំដែនផ្លូវគោកទាំងអស់​ជាមួយប្រទេស​វៀតណាម នៅជាប្រក្រតីនៅឡើយ បើទោះជាវៀតណាម ប្រកាសបិទ​ព្រំដែនបណ្តោះ​អាសន្នជាមួយកម្ពុជាក្តី។ ចំណែកឯប្រទេសថៃ សម្តេចបញ្ជាក់ថា មិនទាន់មានគោល​ការបិទព្រំដែននៅឡើយ៕

The post សម្តេចក្រ​ឡា​ហោម ពិ​ចារ​ណា​ផ្អា​ក​​ការ​​សួរសុខ​ទុក្ខនៅពន្ធនា​គាប​ណ្តោះ​អាសន្ន ដើ​ម្បី​ទ​ប់​ស្កាត់​​ការា​លដា​​ល​ជំ​ងឺ​កូវី​ដ១៩ appeared first on .

ភ្នំពេញ ៖ គ្រោះថ្នាក់រាចរណ៍ បានកើនឡើងយ៉ាងគំហុក គួរឲ្យព្រួយបារម្ភ កាលពីឆ្នាំ ២០១៩ កន្លងទៅ។ នេះជាការលើកឡើងរបស់សម្តេច ស ខេង នៅក្នុងពិធីបើក​សន្និបាតត្រួតពិនិត្យការងារឆ្នាំ ២០១៩ លើកទិសដៅការងារឆ្នាំ ២០២០ របស់ក្រសួង​មហាផ្ទៃ ព្រឹកថ្ងៃទី ១៩ ខែកុម្ភៈ។

សម្តេច ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ បានថ្លែងនៅក្នុងពិធីបើក​សន្និបាតត្រួតពិនិត្យការងារឆ្នាំ ២០១៩ លើកទិសដៅការងារឆ្នាំ ២០២០ របស់ក្រសួង​មហាផ្ទៃថា នៅឆ្នាំ ២០១៩ កន្លងទៅនេះ គ្រោះថ្នាក់ចរាចរណ៍មានការកើន​ឡើងយ៉ាង​គំហុក បើធៀបជាមួយនឹងឆ្នាំ ២០១៨  ។ សម្តេចសម្តែងការព្រួយបារម្ភ ប្រសិនបើកំ​ណើននេះ ពុំមានការថមថយ នៅឆ្នាំបន្តបន្ទាប់ទៀត។

ទោះយ៉ាងណា សម្តេចជំរុញឲ្យអ្នកជំនាញ ចាំបាច់ត្រូវតែសិក្សារកមូលហេតុពាក់ព័ន្ធនឹង​បញ្ហាគ្រោះថ្នាក់ចរាចរណ៍នេះ។ សម្តេចបញ្ជាក់ថា ក្រសួងមិនទាន់បានធ្វើវិសោធ​នកម្មច្បាប់ ឬអនុក្រឹត្យទាក់ទងនឹងបញ្ហាគ្រោះថ្នាក់ចរាចរណ៍នេះទេ ប៉ុន្តែក្រសួង​បានប្រកាសនឹងធ្វើការសិក្សាឈានទៅធ្វើវិសោធនកម្ម។

ទន្ទឹមនឹងនេះ សម្តេច មានប្រសាសន៍ថា អគ្គស្នងការនគរបាល ក៏បានធ្វើការប្រជុំ​ផ្សព្វផ្សាយ និងពង្រឹងការអនុវត្តជាបន្តបន្ទាប់។

សម្តេចលើកឡើងថា នៅឆ្នាំ ២០២០នេះ ប្តេជ្ញាថា នឹងកាត់បន្ថយគ្រោះថ្នាក់ចរាចរណ៍​ឲ្យខានតែបាន។ ពោលគឺធ្វើយ៉ាងណាឲ្យនៅប្រហាក់ហែលឆ្នាំ ២០១៨ និងទាបជាងឆ្នាំ ២០១៩។

សូមបញ្ជាក់ថា ក្នុងរយៈពេលពេញ ១ឆ្នាំ២០១៩ មានអ្នកស្លាប់ ដោយសារគ្រោះថ្នាក់ ចរាចរណ៍ចំនួន ១៩៨១នាក់ និងរងរបួសចំនួនជាង ៦ពាន់នាក់ ។ នេះបើយោង​តាមរបាយការណ៍ ស្ដីពី គ្រោះថ្នាក់ចរាចរណ៍ ឆ្នាំ២០១៩ របស់គណៈកម្មាធិការជាតិ សុវត្ថិភាពចរាចរណ៍ផ្លូវគោក (គ.ស.ច.គ) ។ របាយការណ៍បានឲ្យដឹងទៀតថា ចំនួនមនុស្សស្លាប់ឆ្នាំ ២០១៩ កើនលើសពីឆ្នាំ២០១៨ ចំនួន២២០នាក់៕

The post សម្តេច​ ​ស ​ខេង៖ គ្រោះ​ថ្នាក់​​​ចរា​ច​រណ៍​កើន​​ឡើង​​​គំហុក​នៅឆ្នាំ ២០​​១៩ ត្រូវតែ​មានដំ​ណោះ​ស្រាយ​ឆ្នាំនេះ appeared first on .