លើកឡើងនៅក្នុងបទសម្ភាសន៍កម្មវិធី សេដ្ឋីនិងជំនួញ នាពេលថ្មីៗនេះ លោក នៅ ស៊ីនិត បានចែករំលែកយ៉ាងច្រើនពាក់ព័ន្ធនឹងជីវិតជាសហគ្រិន បទពិសោធន៍ ចំណេះដឹង និងភាពជាអ្នកដឹកនាំផងដែរ។

បូកផ្សំជាមួយបទពិសោធន៍ផ្ទាល់ខ្លួន លោក នៅ ស៊ីនិត បានលើកឡើងថា ក្នុងការធ្វើអាជីវកម្មមួយអាចទទួលបានជោគជ័យត្រូវមាន ចំណេះដឹងចំពោះកិច្ចការងារដែលខ្លួនកំពុងធ្វើ រៀនសូត្របន្ថែមជានិច្ច និងស្ដាប់បទពិសោធន៍ពីរៀមច្បង។ ការធ្វើអាជីវកម្មក្នុងវិស័យសំណង់គឺមានធាតុផ្សំជាចាំបាច់ ដូចជាជំនាញបច្ចេកទេស និងជំនាញលើការឌីហ្សាញ។ «ជំនាញទាំងពីរនេះអាចបញ្ចូលគ្នាបាន ប៉ុន្ដែប្រសិនបើយើងជាថៅកែ ហើយយើងអត់មានជំនាញនេះគឺពិបាកក្នុងការទៅរកស៊ីណាស់ ហើយណាមួយប្រសិនបើយើងមានលទ្ធភាពច្រើន មានលុយច្រើន គឺអាចបរាជ័យក្នុងការជួលមនុស្សខុស ក៏ប៉ុន្ដែប្រសិនបើយើងមានលទ្ធភាពតិច យើងចង់ជួលគេអ្នកដទៃមកកាន់ជំនាញទាំងអស់នឹង  នៅពេលដែលបរាជ័យគឺអត់អាចងើបមកវិញបាននោះទេ»។ លោក ស៊ីនិត បញ្ជាក់បន្ថែម។

បន្ថែមពីនោះ កត្ដាកេរ្ដិ៍ឈ្មោះផ្ទាល់ខ្លួនក៏ជាធាតុចូលយ៉ាងសំខាន់ផងដែរ ត្រូវកសាងខ្លួនពីតូចទៅធំ ស្វែករកនៅការទុកចិត្តពីអតិថិជនជាមុនសិន។ សម្រាប់លោកផ្ទាល់គឺចាប់ផ្ដើមធ្វើផ្ទះឱ្យអ្នកនៅក្នុងភូមិឱ្យបានល្អ ស្អាត មានគុណភាព ក្លាយជាជាងដែលមានទឹកដៃល្អនៅក្នុងភូមិ ទទួលបានការទុកចិត្ដពីកម្រិត ភូមិ ស្រុក រួចចាប់ផ្ដើមធ្វើទីផ្សារដោយខ្លួនឯង ដោយចាប់ផ្ដើមពីការផ្សព្វផ្សាយនៅលទ្ធផលពិតប្រាកដដែលបានធ្វើកន្លងមកតាមបណ្ដាញសង្គមហ្វេសប៊ុក។

ជាមួយគ្នានេះ លោក នៅ ស៊ីនិត លើកទឹកចិត្ដដល់សហគ្រិនដែលចង់រកស៊ីលើវិស័យសំណង់ក៏ដូចជាវិស័យផ្សេងៗ គួរតែមានជំនាញលើវិស័យទាំងនោះ៕

The post លោក នៅ ស៊ីនិត៖ មុនបោះជំហានធ្វើអាជីវកម្ម ចាំបាច់ត្រូវមានកេរ្ដិ៍ឈ្មោះ និងចំណេះដឹងពិតប្រាកដ appeared first on .

លោកបណ្ឌិត តាន់ មុនីវណ្ណ អគ្គនាយករងក្រុមហ៊ុន ម៉ុងឬទ្ធី គ្រុប និងជាបុគ្គលល្បីមួយរូបនៅក្នុងសង្គម បានមើលឃើញថាសហគ្រិនជោគជ័យឬលេចធ្លោនៅក្នុងអាជីវកម្មរវាងបុរសនិងស្ត្រីនៅពេលបច្ចុប្បន្នមានភាពប្រហាក់ប្រហែលគ្នាតែទៅថ្ងៃខាងមុខផ្អែកលើគោលនយោបាយគំាំទ្រហិរញ្ញវត្ថុរបស់រាជរដ្ឋាភិបាលនឹងជំរុញឱ្យស្ត្រីមានឱកាសជោគជ័យកាន់តែច្រើនថែមទៀត។

លោកបណ្ឌិត តាន់ មុនីវណ្ណ មានប្រសាសន៍ថា «សហគ្រិនជោគជ័យរវាងបុរសនិងស្ត្រីនៅពេលសព្វថ្ងៃនេះ ខ្ញុំគិតថាវាមានប្រហាក់ប្រហែលគ្នា ហើយបើសិនយើងមើលទៅនៅក្នុងគោលការណ៍របស់រាជរដ្ឋាភិបាល ពិសេសនៅក្នុងគោលការណ៍ហិរញ្ញវត្ថុផ្សេងៗ គេមានការគំាំទ្រច្រើនទៅលើស្ត្រី។ អ៊ីចឹងបើយើងមើលទៅលើការជំរុញ ការគំាំទ្រនិងការអប់រំ រួមទំាងគោលនយោបាយគាំទ្រហិរញ្ញវត្ថុរបស់រាជរដ្ឋាភិបាលថែមទៀតនោះខ្ញុំគិតថាសហគ្រិនស្ត្រីមានឱកាសជោគជ័យច្រើនមែនទែន ហើយមកដល់ម៉ោងនេះបច្ចេកវិទ្យាមានការរីកចម្រើន ធ្វើមនុស្សប្រើបញ្ញាមិនប្រើកម្លំាង។ដូចនេះ ដល់ពេលសហគ្រិនស្ត្រីមានការកែលម្អរ ប្រឹងប្រែងធ្វើយ៉ាងម៉េចឱ្យសមត្ថភាពរបស់ខ្លួនអាចស្មើរឬអាចលើសសហគ្រិនបុរស»។

បើតាមលោកបណ្ឌិត តាន់ មុនីវណ្ណ សម្រាប់កម្ពុជានាពេលបច្ចុប្បន្នកំពុងមានការបើកចំហរហើយក៏ជាឱកាសមួយសម្រាប់ក្មេងស្រីៗ ដូចនេះនៅតាមគ្រួសារគួរមានការលើកទឹកចិត្តដល់កូនស្រីឱ្យមានការចូលរួមនៅក្នុងសង្គមឱ្យបានច្រើនកុំគិតបារម្ភឬដាក់គំនាបដល់កូនៗច្រើនពេក។

លោកបណ្ឌិតលើកឡើងថា កន្លងមកយើងដឹងហើយថាចំណុចខ្សោយរបស់ស្ត្រីមានការជាប់របំាងប្រពៃណីខ្លះ។ខ្ញុំអាចនិយាយបានថាជូនកាលស្ត្រីខ្លួនឯងមិនទាន់មានស្មារតីគ្រប់គ្រាន់នៅក្នុងការប្រកបអាជីវកម្មឬទៅកាន់តួនាទីធំៗ ហើយការជាប់គំនាបពីគ្រួសារនេះ មិនអនុញ្ញាតឱ្យស្ត្រីមានក្លាហាននិងចេញទៅក្រៅចូលរួមនៅក្នុងសង្គមបានច្រើន។ វិស័យអប់រំនៅប្រទេសខ្លះដាក់គំនាបទៅដល់ក្មេងស្រីមិនចង់ឱ្យទៅរៀនសូត្រ ហើយអ្នករកស៊ីនៅប្រទេសខ្លះទៀតស្ត្រីមិនអាចចេញទៅរកស៊ីប្រកបអាជីវកម្មអ្វីបាន។តែមកដល់ម៉ោងនេះសម្រាប់កម្ពុជាបានបើកចំហរទំាងអស់ ហើយខ្ញុំគិតថាវាជាឱកាសមួយសម្រាប់ក្មេងៗស្រី ហើយគ្រួសារនីមួយៗគួរតែហ៊ានឱ្យកូនឬលើកទឹកចិត្តដល់កូនស្រីឱ្យគាត់ចូលរួមច្រើននៅក្នុងសង្គម កុំគិតបារម្ភរឿងអ្វីច្រើនពេក ហើយកុំដាក់គំនាបដល់កូនៗច្រើនពេក ខ្ញុំគិតថាស្ត្រីនៅថ្ងៃអនាគតគាត់មានឱកាសច្រើនធ្វើកិច្ចការពាណិជ្ជកម្មដូចបុរស។

លោកបណ្ឌិតសង្កត់ធ្ងន់ថា «ដើម្បីឱ្យសហគ្រិនស្ត្រីអាចដើរទៅមុខបានលឿនថែមទៀតនោះខ្ញុំគិតថាវិស័យអប់រំជាវិស័យអាទិភាពហើយស្ត្រីខ្លួនឯងត្រូវពង្រឹងសមត្ថភាពនិងហ៊ានប្រឈមជាមួយនិងគំនាបផ្សេងៗដោយខ្លួនឯង ហើយភាគីខាងបុរសគួរតែគិតអំពីគុណតម្លៃនិងលើកទឹកចិត្តដល់ស្ត្រីឱ្យបានច្រើន ដើម្បីឱ្យយើងអាចកសាងសេដ្ឋកិច្ចនិងពាណិជ្ជកម្មមួយបានរវាងប្តីនិងប្រពន្ធកុំឱ្យដូចសម័យកាលពីដើមសេដ្ឋកិច្ចភាគច្រើនពឹងតែទៅលើគ្រួសារខាងប្តី»។

លោកបណ្ឌិតបន្តថា មកដល់បច្ចុប្បន្ននេះនៅកម្ពុជាស្ត្រីដែលជោគជ័យនៅក្នុងសេដ្ឋកិច្ចនិងសង្គមមានច្រើន ហើយបើមើលទៅតាមសមាគមផ្សេងទៀតស្ត្រីបានចូលរួមច្រើន។ជាក់ស្តែងនៅពេលខ្ញុំចូលរួមក្នុងកម្មវិធីចែករំលែកចំណេះដឹងនៅតាមបណ្តាខេត្តខ្ញុំឃើញស្ត្រីចូលរួមច្រើនជាងបុរស៕អត្ថបទ៖សារេត

The post សហគ្រិនស្ត្រីមានឱកាសជោគជ័យកាន់ច្រើននាពេលខាងមុខផ្អែកលើគោនយោបាយនិងបច្ចេកវិទ្យារីកចម្រើន appeared first on .

លោក តាន់ កុសល នាយកវិទ្យាស្ថានជាតិសហគ្រិនភាព និងនវានុវត្តន៍ (NIEI) បានរំពឹងថា កម្មវិធី ពានរង្វាន់សហគ្រិនថ្នាក់ជាតិឆ្នាំ២០២៣ លើកទី៣ និងកម្មវិធីអភិវឌ្ឍន៍សហគ្រាសធុនតូច និងមធ្យមដល់សហគ្រាសធុនតូច និងមធ្យមដំណាក់កាលទី២ នឹងមានការដាក់ពាក្យចូលប្រកួតប្រជែងកើនឡើងជាងឆ្នាំមុន និងមានភាពល្អប្រសើរកាន់តែខ្លាំង។
លោក បានលើកឡើងថា កម្មវិធីនេះចាប់ផ្តើធ្វើតាំងពីឆ្នាំ២០២០មក ដោយមានការផ្លាស់ប្តូរជានិច្ច ដោយឡែកសម្រាប់ឆ្នាំ២០២៣នេះ នឹងមានការខុសប្លែកពីឆ្នាំ២០២២ បន្ថែមទៀត ដោយប្តូរនូវលក្ខណៈយុទ្ធសាស្រ្តនៅក្នុងការប្រកួតប្រជែងមួយចំនួន។

ជាមួយគ្នានេះ លោក ឈៀង វណ្ណមុនិណ្ឌ នាយកប្រតិបត្តិ សហគ្រិនខ្មែរ(KE) បានឱ្យដឹងថា កម្មវិធីនេះជាការបំផុសឱ្យមានអាជីវករដែលធ្វើអាជីវកម្មដឹងពីសមត្ថភាពរបស់ខ្លួន អាចរៀនសូត្របានតាមរយៈការប្រកួតជាមួយដៃគូផង និងគណៈកម្មាផងជាពិសេសមានសេវាផ្សេងៗដល់សហគ្រិនក្នុងកម្មវិធីទាំងអ្នកបានជាប់ និងអ្នកចូលរួម។

លោក បានបញ្ជាក់ថា «កម្មវិធីនេះ ជាកម្មវិធីមួយប្រម៉ូតឱ្យមានការចូលរួមក្នុងវិស័យសហគ្រិនភាព បន្ទាប់មកយើងសង្ឍឹមថា អាជីវកម្មរបស់គាត់អាចលូតលាស់ទៅថ្ងៃក្រោយ។កម្មវិធីនេះ ត្រូវការជារៀងរាល់ឆ្នាំដើម្បីបង្កើតឱ្យមានការចូលរួមនិងចំណាប់អារម្មណ៍ថ្មីៗពីសហគ្រាសធុនតូច និងមធ្យមឱ្យបានច្រើន និងអ្នកទើបចាប់ផ្តើមផងដែរ»។

តាមរបាយការណ៍នៃកម្មវិធីពានរង្វានសហគ្រិនថា្នក់ជាតិរយៈពេល ៣ឆ្នាំកន្លងមក មានសហគ្រិនប្រមាណ ជាង ៦៥២ សហគ្រាស បានដាក់ពាក្យចូលរួមយ៉ាងសកម្ម និងគាំទ្រលើគំនិតផ្តួចផ្តើមរបស់រាជរដ្ឋាភិបាលកម្ពុជា តាមរយៈវិទ្យាស្ថានជាតិសហគ្រិនភាពនិងនវានុវត្តន៍ និងគាំទ្រថវិកាដោយសហគ្រិនខ្មែរ។
លើសពីនេះ ដោយមានការគាំទ្រពីសហគ្រិនខ្មែរបានបណ្តុះបណ្តាលសហគ្រិន ចំនួន ១០១នាក់ និងបានផ្តល់គ្រូបង្វឹកដល់ម្ចាស់សហគ្រាសចំនួន ៣០ សហគ្រាស ដើម្បីបន្តគាំទ្រនិងអភិវឌ្ឍម្ចាស់សហគ្រាស រយៈពេល ៥ខែ បន្ថែមទៀត នេះបើយោងតាមរបាយការណ៍នៃកម្មវិធីបណ្តុះបណ្តាលការអភិវឌ្ឍសហគ្រាសធុនតូច និងមធ្យមដំណាក់កាលទី១ វិទ្យាស្ថានជាតិ សហគ្រិនភាពនិងនវានុវត្តន៍។

សូមជម្រាបថា សហគ្រិនខ្មែរត្រូវបានបង្កើតឡើងដោយក្រសួងសេដ្ឋកិច្ច និងហិរញ្ញវត្ថុក្នុងគោលបំណង ធ្វើការដោយផ្ទាល់ជាមួយស្ថាប័នដៃគូ និងអ្នកពាក់ព័ន្ធនានានៅក្នុងប្រព័ន្ធអេកូឡូស៊ីសហគ្រិនភាពនៅកម្ពុជា។សហគ្រិនខ្មែរ មានចក្ខុវិស័យក្លាយជាថ្នាលជាតិសម្រាប់ការលើកកម្ពស់សហគ្រិនភាព តាមរយៈការគាំទ្រទាំង ហិរញ្ញវត្ថុ និងមិនមែនហិរញ្ញវត្ថុដល់ធុរកិច្ចថ្មី និងសហគ្រាសធុនតូច និងមធ្យមដែលមានសក្ដានុពលនៅក្នុងវិស័យ អាទិភាពដូចជាវិស័យព័ត៌មានវិទ្យា សេវាកម្ម កម្មន្តសាល និងផលិតកម្មឱ្យបានច្រើនដើម្បីចូលរួមលើកកម្ពស់ សេដ្ឋកិច្ចជាតិ៕

The post នាយកវិទ្យាស្ថានជាតិសហគ្រិនភាព រំពឹងថាកម្មវិធីពានរង្វាន់សហគ្រិនថ្នាក់ជាតិឆ្នាំនេះ នឹងមានអ្នកចូលច្រើនជាងឆ្នាំមុន appeared first on .

លោក សៅ សែនសំណាង មាន អាយុ ៣៥ឆ្នាំស្ថិតនៅរាជធានីភ្នំពេញ ដែលជាម្ចាស់កសិដ្ឋានចិញ្ចឹមរុយ BSF Farm ផ្ទាល់បានរៀបរាប់ថា លោកបានបើកកសិដ្ឋានចិញ្ចឹមរុយនេះរយៈពេល ៥ឆ្នាំហើយ គឺចាប់តាំងពីឆ្នាំ ២០១៨ មកម៉្លេះ។

ក្នុងការបើកកសិដ្ឋាននេះឡើង លោកមើលឃើញថាការចិញ្ចឹមរុយខ្មៅនេះ គឺមាននៅតាមប្រទេសផ្សេងៗ​ដូច​ជាប្រទេស​ថៃ និង​ប្រទេស​វៀតណាម។ ដោយឡែកនៅកម្ពុជាពុំទាន់មាននោះទេ ហេតុនេះលោកក៏បានស្វែងរក​ពូជរុយខ្មៅធម្មជាតិនៅក្នុងប្រទេសកម្ពុជា និងបានពូជច្រើនទៀតពីវៀតណាម ហើយលោកក៏បានសិក្សាបន្ថែម​តាមប្រព័ន្ធអនឡាញពីប្រទេសម៉ាឡេស៊ី និងទៅរៀនបន្ថែមនៅវៀតណាម។

លោកបានបន្តថា ភាគច្រើនយើង​ចិញ្ចឹមរុយខ្មៅ គឺដើម្បីភ្ញាស់យកពងប្រូតេអ៊ីន យកវាទៅធ្វើមេចំណីដោយ​លាយ​ពងរុយប្រូតេអ៊ីនជាមួយគ្រាប់ធញ្ញជាតិផ្សេងៗធ្វើជាចំណី​សត្វ​ ដើម្បីបង្កើតសារធាតុចិញ្ចឹមដល់សត្វ។ សារ​ប្រយោជន៍​វា គឺមានច្រើនទៀត ដោយគេអាចធ្វើជាម្សៅប្រូតេអ៊ីន គេយកវាធ្វើជាសំបកឱសថ ឬ​ធ្វើជាចំណីរបស់​សត្វ​ត្រជៀកកាំ​ផងដែរ។

លោក សៅ សែនសំណាង បានបង្ហើបខ្លះៗនៃដំណើរការចិញ្ចឹមរុយផងដែរថា ដំបូងត្រូវទិញពងរុយ បន្ទាប់​មក​​ចាប់​ផ្ដើមភ្ញាស់ជាមួយចំណីកូនមាន់ នៅពេលវាញាស់បានល្អ និងដល់ពេលវាស៊ីចំណីថ្មី យើងត្រូវត្រៀម​ចំណីថ្មី​ដែលមានដូចជាកាកសំណល់ផ្សេងៗ ដូចជាកាកស្រាបៀរ កាកសណ្ដែកសៀង កាកសំណល់ផ្ទះបាយ កាក​សំណល់​បន្លែផ្លែឈើ លាមកមាន់ ទា ជ្រូក ជាដើម។ នៅពេលដែលចិញ្ចឹមបាន១៥ថ្ងៃ គឺអាចប្រមូលផលបាន ហើយក្នុងរយៈពេល ៣សប្ដាហ៍ វានឹងប្រែជាពណ៌ត្នោតឬពណ៌ខ្មៅហៅថាជាមេពូជត្រៀមញាស់ក្លាយជារុយ ហើយ ៤សប្ដាហ៍​ក្រោយមក វានឹងញាស់ក្លាយជារុយ។ ទោះយ៉ាងណាក៏លោក​សូម​លើក​ទឹកចិត្ត​​ដល់កសិករ​ត្រូវ​រៀនសិន មុននឹងចាប់ផ្ដើមចិញ្ចឹម។

យ៉ាងណាមិញ លោក សៅ សែនសំណាង យល់ឃើញថា ទៅថ្ងៃខាងមុខ​បើមានវិនិយោគគិនណាមួយ ចាប់​អារម្មណ៍​លើវិស័យនេះ ដូចនៅស្រុកគេ ហើយអាចបង្កើតរោងចក្រផលិតចំណីសត្វ​លក់ចែកជូនប្រជាកសិករ​ក្នុង​ស្រុកបាន​តម្លៃធូរថ្លៃគឺរឹតតែល្អ ព្រោះសព្វ​ថ្ងៃប្រជាកសិករមានបញ្ហារឿងចំណីសត្វឡើងថ្លៃ ដូច្នេះ​បើយើងអាច​ផលិត​ចំណី​សត្វពីពងរុយ​ប្រូតេអ៊ីននេះបាន វាមានគុណភាពល្អ​ ហើយ​ថែមទាំងធូរថ្លៃ​ថែមទៀត។

គួរបញ្ជាក់ដែរថា កសិដ្ឋាន របស់លោក សៅ សែនសំណាង ស្ថិតនៅខណ្ឌច្បារអំពៅ រាជធានីភ្នំពេញ។ លោក​បាន​បញ្ជាក់ថា ពីមុនលោករកចំណូលបានចន្លោះពី១០០០ដុល្លារ​ ដល់ ៣០០០ដុល្លារ​ក្នុង​មួយ​ខែ ហើយលក់តែ​នៅក្នុង​ប្រទេស​កម្ពុជា​ប៉ុណ្ណោះ។ ​ជាទូទៅលោកយកចេញទៅលក់ធ្វើជាចំណីសត្វត្រចៀកកម្មនៅខេត្តកោះកុង តែពេល​បច្ចុប្បន្ន លោក​គ្រាន់តែលក់ពូជ ហើយបង្រៀនបន្តដល់សិស្ស និងចិញ្ចឹម សម្រាប់ជាចំណីមាន់ ទា ត្រី របស់លោក​តែប៉ុណ្ណោះ៕

The post កម្រមានអ្នកដឹង! កសិដ្ឋានចិញ្ចឹមរុយមួយកន្លែងនៅភ្នំពេញ រកចំណូលបានដល់ ៣ពាន់ដុល្លារក្នុងមួយខែ appeared first on .

លោកស្រី បែន អង្គាវត្តី ម្ចាស់ចំការតារ៉ុង បង្ហើបត្រួសៗថា ផ្សារឡាក់គីចំនួន ១០សាខា ដែលលោកស្រី​ផ្គត់ផ្គង់​ឱ្យ​នៅរាជធានី​ភ្នំពេញរួមមាន នៅកប់ស្រូវ កួរស្រូវ ព្រែកអាញ ព្រែកព្នៅ និរោធ ឈូកវ៉ា ពោធិ៍ចិនតុង បែកចាន បុរី​ពិភពថ្មី១ ផ្លូវជាតិលេខ៣ និងម៉ាតផ្សារបាយ័ន ហើយបច្ចុប្បន្ននេះ មានការ​នាំទៅខេត្តព្រះសីហនុ និងមាន​ការ​កម៉្មង់តាមអនឡាញ តាមបណ្ដាខេត្តនានា​ទៀត។

លោកស្រីបន្តទៀតថា ស្វាមីលោកស្រីប្រកបរបរដាំដុះ​ដូង​ក្រអូប​នេះ​ ប្រមាណជា ១០ឆ្នាំជាង​មក​ហើយ​ ​ដែល​ពីមុន​​មិនមានការចែកចាយបែបនេះទេ ប៉ុន្តែលោកស្រីទើបបើកលក់បោះដុំលក់រាយជិត១ឆ្នាំនេះ ដោយផ្ដើមចេញ​ពីគំនិតគិតពីសុខភាពប្រជាពលរដ្ឋជាធំ។ ក្នុង​នោះ​លោក​ស្រី​ បាន​លក់​ផលិត​ផល​របស់ខ្លួន ដោយសាកល្បង​លក់ផ្លែត្របែក និងធ្វើជាទឹក​ត្របែកលក់ និង​ធ្វើទៅតាមតម្រូវការរបស់អតិថិជន ហើយបន្តលក់ចេញផលិតផល​ផ្សេងៗ ដែលសុទ្ធតែ​ចេញ​ពីចម្ការលោកស្រីមានដូចជា ដូងក្រអូបជាផ្លែ ជាដប ល្ហុង ខ្នុរ ស្វាយកែវរមៀត បន្លែ និងចាហ៊ួយដូងក្រអូប​ជាដើម។

បន្ថែមទៀតនោះ លោកស្រីបន្តថា នៅក្នុងចំការត្របែកមាន២ប្រភេទ ទី១ គីមជូ (សាច់ស) លក់ចេញក្នុងតម្លៃ ៨០០០រៀល/១គីឡូក្រាម និងទី២ រូប៊ី (សាច់ក្រហម) លក់ចេញតម្លៃ ១២០០០រៀល/១គីឡូក្រាម ចំណែកដូងក្រអូបវិញ តម្លៃ៤០០០រៀល/១ផ្លែ ចាហួយដូងក្រអូបមាន ២ប្រភេទគឺ ចាហួយដាក់ក្នុងដូង ១ផ្លែ តម្លៃ ៨០០០រៀល និងចាហួយកែវ ៣៥០០រៀល។

ទោះជាមានការគាំទ្រពីប្រជាពលរដ្ឋយ៉ាងនេះក្ដី លោកស្រីក៏ជួបការលំបាកខ្លះៗដែរដូចជា បញ្ហាដំណាំខូច បញ្ហាពិបាករកទីផ្សារឱ្យទូលំទូលាយ។ លោកស្រីក៏បានបន្តទៀតថា ក្នុងនាមជាអ្នកធ្វើកសិកម្មត្រូវចេះ​រកទីផ្សារ​ដោយខ្លួនឯង បើមិនដូច្នោះទេ ប្រាកដជាយ៉ាប់ហើយ។ ជាមួយគ្នានេះ លោកស្រីបានថ្លែងអំណរគុណ​យ៉ាងជ្រាល​ជ្រៅ​ដល់អតិថិជន ដែលជួយជាវទិញផលិតផលកន្លងមក និងសំណូមពរដល់ប្រជាពលរដ្ឋ​ជួយគាំទ្រផលិត​ផល​ខ្មែរ​ឱ្យកាន់តែច្រើនបន្ថែមទៀត ដើម្បីឱ្យទីផ្សារខ្មែរឱ្យទូលំទូលាយទៅថ្ងៃអនាគត ហើយបងប្អូនប្រជាពលរដ្ឋ​មាន​សុខភាពល្អផងដែរ។

សូម​បញ្ជាក់​ថា ផ្លែដូងក្រអូបរបស់លោកស្រី បែន អង្គាវត្តី ស្ថិត​នៅ​តំបន់​ពេជ្រនិល ​ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ បាន​ផ្ទុះការទិញច្រើនពីអតិថិជនផង និង​ផ្គត់ផ្គង់តាម​ផ្សារ​ទំនើប​ឡាក់គី​ផង ហើយ​មុននឹងនាំ​ចេញ​ទៅ​លក់​គឺមាន​ការ​ត្រួតពិនិត្យ​យ៉ាងត្រឹមត្រូវ និងជឿទុកចិត្តពីម្ចាស់ហាងឡាក់គី គឺដោយសារ​ផលិតផល​ធម្មជាតិសុទ្ធ១០០% មាន​រសជាតិឆ្ងាញ់ យកចេញតែពីចម្ការខ្លួនឯងផ្ទាល់ ដែលមានស្វាមីលោកស្រី​ជាអ្នកដាំ និងថែទាំផ្ទាល់៕

The post ដូងក្រអូបពេជ្រនិល ផ្ទុះការកម៉្មង់ទិញពីអតិថិជន រហូតផ្គត់ផ្គង់ឱ្យផ្សារឡាក់គី ១០កន្លែងនៅភ្នំពេញ appeared first on .

លោក ភី ទី ម្ចាស់​កសិដ្ឋានចិញ្ចឹមមាន់យកពងលក់ បានលើកឡើងថា កសិដ្ឋានរបស់លោកឈរជើងបានរយៈពេល ២ឆ្នាំហើយ ដោយគិតចាប់ពីឆ្នាំ​២០២០ អំឡុងពេលប្រទេសកម្ពុជាកំពុងជួបស្ថានភាពវិបត្តិកូវីដ-១៩ ដែលបណ្ដាលឱ្យលោក​បែកគំនិតច្នៃប្រឌិត​បើកកសិដ្ឋានចិញ្ចឹមមាន់នេះឡើង ដោយចំណាយទុនត្រឹម ១ពាន់ដុល្លារ ហើយប្រើរយៈពេលតែ ៣ខែប៉ុណ្ណោះ អាចស្រង់ដើមមកវិញបាន។

ម្ចាស់កសិដ្ឋាន វ័យ២៤ឆ្នាំរូបនេះ បានបន្តទៀតថា ក្នុងកសិដ្ឋានរបស់លោកចិញ្ចឹមមេមាន់ចំនួន ១ម៉ឺនក្បាល ដែលក្នុងនោះមេមាន់មួយអាចពងបាន ២គ្រាប់ ហើយក្នុងមួយថ្ងៃប្រមូលស៊ុតបាន ១២០០០គ្រាប់ ខណៈដែល​ទីផ្សារស៊ុតរាល់ថ្ងៃមានលក្ខណៈល្អ មានតម្រូវការច្រើន និងមានភាពទូលំទូលាយពីឈ្មួញ។

ទន្ទឹមនឹងការទទួលបានភាពជោគជ័យ លោកក៏ជួបបញ្ហាខ្លះៗដែរក្នុងការចិញ្ចឹម ដូចជា ផ្គត់ផ្គង់ចំណី ការដាក់ថ្នាំ​មិនបានដិតដល់ជាដើម។ ទោះ​យ៉ាងណា លោកបានបង្ហើបទៀតថា កត្តាដែលធ្វើឱ្យលោកជោគជ័យ​មកដល់​សព្វថ្ងៃ គឺភាពស្មោះត្រង់ក្នុងការរកស៊ី ផ្ដល់ដំណោះស្រាយឱ្យភ្ញៀវ មានទំនួលខុសត្រូវខ្ពស់ទៅលើតម្រូវការទីផ្សារ គុណភាពល្អ និងមានតម្លៃសមរម្យ។

បន្ថែមពីនេះ លោកក៏សំណូមពរដល់បងប្អូនប្រជាពលរដ្ឋឱ្យជួយលើកស្ទួយគាំទ្រផលិតផលខ្មែរ ជួយទិញ​ផលិត​ផលខ្មែរដែលខ្មែរជាអ្នកបង្កើតឡើង ហើយងាកមកចូលរួមចិញ្ចឹមទាំងអស់គ្នាឡើងវិញ ដើម្បីឱ្យជីវភាពប្រសើរ​ឡើង ទីផ្សារខ្មែរកាន់តែមានភាពទូលាយ និងបង្កើនតម្រូវការខ្ពស់ថែមទៀត។

សូមបញ្ជាក់បន្តិចថា កសិដ្ឋានចិញ្ចឹមមាន់របស់កសិករវ័យក្មេង លោក ភី ទី មិនត្រឹមតែផ្គត់ផ្គង់ស៊ុតតែប៉ុណ្ណោះទេ ក៏មានទិសដៅចិញ្ចឹមយកកូន ដើម្បីផ្ដល់ជាពូជកូនមាន់ទៅឱ្យប្រជាពលរដ្ឋ ដែលចង់ជាវយកទៅចិញ្ចឹមបន្ត ដែល​កន្លង​មក លោកបានបណ្ដុះបណ្ដាលកូនសិស្សបានប្រមាណ ១ពាន់នាក់ ហើយកសិដ្ឋាននេះ ក៏ទទួលផ្គត់ផ្គង់​សាច់មាន់ និងទានៅពេលមានតម្រូវការច្រើន និងបុណ្យទានផងដែរ៕

The post កសិករវ័យក្មេងម្នាក់ ចិញ្ចឹមមាន់យកពង រកចំណូលបានមួយខែ ១ពាន់ដុល្លារ appeared first on .

ម្ចាស់សិប្បកម្ម តារា ហ្វូត លោក ម៉ៅ ចាន់ តារា វ័យ៥២ឆ្នាំ បានឱ្យដឹងថា គោលបំណងនៃការបង្កើត សិប្បកម្ម​នេះឡើង គឺលោកចង់ឱ្យប្រជាកសិករខ្មែរមានទីផ្សារក្នុងការលក់ដំណាំផ្សេងៗដូចជា សណ្ដែកផ្កាយ ល្ងខ្មៅ ដូង សណ្ដែកដី ខ្ញី ស្លឹកគ្រៃ និងម្រុំជាដើម។ មួយវិញទៀតលោកបានមើលឃើញថា ការផលិតប្រេងធម្មជាតិនៅកម្ពុជា គឺនៅមានកម្រឹតនៅឡើយ ហើយអាជីវករជាច្រើនបាននាំចូលប្រេងធម្មជាតិ មកពីក្រៅប្រទេសជាច្រើន។ ហេតុ​ដូច្នេះទើបលោកសម្រេចចិត្តស្វែងរកអ្នកសិក្សាស្រាវជ្រាវ និងអ្នកជំនាញដែលមានបទពិសោធន៍ ដើម្បីបង្កើត​ជា​សិប្បកម្មក្នុងការផលិត ប្រេងធម្មជាតិពិតៗរបស់ខ្មែរ ដែលមានគុណភាពខ្ពស់ និងមានសុវត្ថិភាព។

លោកបានបន្តថា ការលក់ប្រេងធម្មជាតិនៅលើទីផ្សារកម្ពុជា នៅពុំទាន់មានភាពទូលំទូលាយប៉ុន្មានទេ ព្រោះ​ប្រជាជនមួយចំនួនដែលចង់ជាវប្រេងធម្មជាតិរបស់ខ្មែរ ពួកគាត់មិនដឹងថាទៅទិញនៅទីណា ហើយប្រជាជនមួយ​ចំនួន​ទៀត រអ៊ូពីតម្លៃដែលលក់ថ្លៃជាងប្រេងដែលនាំចូលពីក្រៅប្រទេស។ លោកបានបញ្ជាក់ដែរ​ថា​ ទោះបីជា​ប្រេង​ធម្មជាតិរបស់ខ្មែរមានតម្លៃថ្លៃជាងប្រេងនាំចូលក៏ពិតមែន តែលោកធានាគុណភាព និងសុវត្ថិភាពដល់​អ្នក​ប្រើប្រាស់។

សិប្បកម្ម តារា ហ្វូត ក្រៅពីប្រេងសណ្ដែកផ្កាយ ប្រេងដូង ប្រេងល្ងខ្មៅ និងប្រេងសណ្ដែកដី នៅមានផលិតផល​ធម្មជាតិផ្សេងៗទៀតដូចជា តែសណ្ដែកផ្កាយ តែស្លឹកគ្រៃ តែខ្ញី នឹងតែម្រុំ ដែលសុទ្ធតែជាផលិតផល ដែលផលិត​ពីដំណាំ​កសិកម្មរបស់ប្រជាកសិករខ្មែរ។

លោក ម៉ៅ ចាន់ តារា បានយល់ឃើញថា ចំពោះសិប្បកម្មផលិតប្រេងធម្មជាតិនាពេលអនាគត បើប្រជាជន​យើង​កាន់តែគាំទ្រ និងប្រើប្រាស់ផលិតផលក្នុងស្រុកកាន់តែច្រើន ខាងសិប្បកម្មផលិតប្រេងធម្មជាតិ​នៅប្រទេសកម្ពុជា​នឹងមានភាពរីកចម្រើន ហើយនឹងឈានទៅរកការនាំចេញផលិតផលក្នុងស្រុកទៅក្រៅប្រទេស ដើម្បីឱ្យ​បរទេស​កាន់តែស្គាល់ពីគុណភាពផលិតផល នៅក្នុងប្រទេសកម្ពុជា៕

The post សិប្បកម្ម តារា ហ្វូត សំណូមពរដល់ប្រជាជនខ្មែរ ងាកមកប្រើប្រេងធម្មជាតិ ដើម្បីរក្សាសុខភាព appeared first on .

ថ្លែងប្រាប់គណៈប្រតិភូសភាពាណិជ្ជកម្មកម្ពុជា លោក ហ៊ឺ បាវី ប្រធានអគ្គនាយកកំពង់ផែស្វយ័តភ្នំពេញ ឱ្យដឹងថា កំពង់ផែស្វយ័តភ្នំពេញ បាននិងកំពុងធ្វើការអភិវឌ្ឍចំណតផែរណបតាមដងទន្លេបន្ថែមទៀត ដើម្បីបង្ខិតសេវាកម្មកំពង់ផែឱ្យកាន់តែខិតជិតអ្នកប្រើប្រាស់ និងជំរុញការដឹកជញ្ជូនផ្លូវទឹក។

ក្នុងឱកាសទស្សនកិច្ចនេះ អ្នកឧកញ៉ា គិត ម៉េង បានវាយតម្លៃខ្ពស់ចំពោះវឌ្ឍនភាពនិងការរីកចម្រើនរបស់កំពង់ផែស្វយ័តភ្នំពេញ ដែលបានចូលរួមចំណែកយ៉ាងសំខាន់ក្នុងការអភិវឌ្ឍន៍សេដ្ឋកិច្ចកម្ពុជា ជាពិសេសវិស័យដឹកជញ្ជូនផ្លូវទឹក ហើយ អ្នកឧកញ៉ាក៏បានលើកទឹកចិត្តដល់គណៈប្រតិភូទាំងអស់ធ្វើការស្វែងយល់ឱ្យច្បាស់ ដើម្បីប្រើប្រាស់នូវសេវាកម្មដឹកជញ្ជូនឱ្យប្រសិទ្ធភាព ព្រមទាំងកាត់បន្ថយចំណាយផ្សេងៗ។

សូមជម្រាបថា បច្ចុប្បន្នកំពង់ផែស្វយ័តភ្នំពេញ អភិវឌ្ឍចំណតដែរណបតាមដងទន្លេបន្ថែមទៀត ក្នុងនោះ៖ ចំណតផែរណបពហុបំណង TS១១ មានទីតាំងស្ថិតនៅភូមិស្ពានខ្ពស់ សង្កាត់គីឡូម៉ែត្រលេខ៦ ខណ្ឌឫស្សីកែវ រាជធានីភ្នំពេញ, ចំណតផែរណបពហុបំណង UM១ ស្ថិតនៅភូមិកណ្តាល ឃុំព្រែកអញ្ចាញ ស្រុកមុខកំពូល ខេត្តកណ្តាល, ចំណតផែរណបពហុបំណង UM២ ស្ថិតនៅភូមិទន្លេបិទ ឃុំទន្លេបិទ ស្រុកត្បូងឃ្មុំ ខេត្តត្បូងឃ្មុំ និងចំណតផែរណបពហុបំណង LM២៦ ស្ថិតនៅភូមិកោះរកា ឃុំកោះរកា ស្រុកពាមជរ ខេត្តព្រៃវែង។

ទន្ទឹមនឹងនោះ ដំណើរទស្សនកិច្ចលើកនេះ ក៏បានស្តាប់បទបង្ហាញអំពីការអភិវឌ្ឍ និងសកម្មភាពអាជីវកម្ម ឬប្រតិបត្តិការរបស់កំពង់ផែ, ទស្សនកិច្ចសកម្មភាពប្រតិបត្តិការនៃចំណតផែកុងតឺន័រ LM១៧, ទស្សនាផ្លូវទឹកពីចំណតផែកុងតឺន័រ LM១៧-ទន្លេចតុមុខ-ចំណតផែរណបពហុបំណង TS៣៕

The post អ្នកឧកញ៉ា គិត ម៉េង ដឹកនាំ ឧកញ៉ា សហគ្រិនច្រើនរូបទស្សនកិច្ចកំពង់ផែស្វយ័តភ្នំពេញ appeared first on .

តើសហគ្រិនវ័យក្មេង ដឹកនាំអាជីវកម្មខាងផ្ដល់សេវាកម្មជួសជុលបញ្ហាតាមគេហដ្ឋាន និងបញ្ហាជម្រាបទឹកដ៏លេចធ្លោរូបនេះ មានប្រវត្តិយ៉ាងណា?

លោក តុង សៀកអាន គឺជាក្មេងកំព្រា យកការតស៊ូ និងភាពស្មោះត្រង់ ធ្វើជាដើមទន់រហូតក្ដាប់បានឱកាសក្លាយជា ស្ថាបនិក ក្រុមហ៊ុន បច្ចេកវិទ្យាទំនើបមួយ ឈ្មោះថា CH Home Services ដែលជាក្រុមហ៊ុនឯកទេសជួសជុលបញ្ហាជម្រាបទឹក តាមបង្គន់ និងតំបូលលិចជ្រាប ដោយប្រើបច្ចេកវីទ្យាទំនើបចុងក្រោយដូចបណ្ដាប្រទេសជឿនលឿនលើពិភពលោក។

ប្រវត្តិការងារ លោក មានបទពិសោធន៍ ធ្លាប់ជាអ្នកគ្រប់គ្រងពិនិត្យគុណភាពឱ្យក្រុមហ៊ុនសហរដ្ឋអាមេរិក អស់រយៈពេលជាង 15ឆ្នាំ ក្នុងតួនាទីជាអ្នកគ្រប់គ្រងប្រចាំតំបន់អាសុីអាគ្នេយ៍។ ប្រវត្តិការងារលើជំនាញមួយនេះ ជាងមួយទស្សវត្សកន្លះនេះហើយ ដែលជាចំណុចខ្លាំង ដឹកនាំរូបលោក សៀកអាន ក្លាយជាអ្នកជំនាញដ៏បុិនប្រសព្វក្នុងការងារមួយនេះ។

បន្ថែមពីនេះ លោកក៏ទទួលបានសញ្ញាបត្រសិក្សា លើជំនាញជួសជុលជម្រាបទឹក ពីក្រុមហ៊ុនដែលមានប្រវត្តិក្នុងជំនាញនេះពីប្រទេសស្វីសផងដែរ។

បទពិសោធន៍ពេញខ្លួន ហើយទំនួលខុសត្រូវខ្ពស់ គួបផ្សំនឹងទឹកចិត្តដ៏សប្បុរសផងនោះ មានពេលខ្លះ យុវជនដែលមានប្រវត្តិជាកូនកំព្រាតាំងពីតូចរូបនេះ ថ្លែងថា ពេលខ្លះរូបលោក ជួយជួសជុលបញ្ហាជូនអតិថិជនដោយមិនយកប្រាក់ឈ្នួលក៏មានដែរ។

លោក សៀក តុងអាន ក៏បានចែករំលែកនូវទុនគំនិត ២សំខាន់ៗ

1- ត្រូវជឿលើខ្លួនឯងមួយទំហឹង
2- ត្រូវធ្វើការតិច បានផលច្រើន (យុត្តិសាស្រ្ត 20%/80%) កុំរវល់ច្រើន បានផលតិចវិញ។

សម្រាប់បងប្អូនមានបញ្ហាជម្រាបទឹក អាចទាក់ទងគាត់បាន៖ 010238566 / 012238556

The post លោក តុង សៀកអាន៖ បើខ្ញុំមិនអាចជួសជុលបញ្ហាជម្រាបទឹកជូនបងប្អូនអតិថិជនបានទេ ខ្ញុំនឹងមិនលើកដៃយកលុយដាច់ខាត appeared first on .

សមាជិកក្រុមប្រឹក្សាភិបាល និងជាអនុប្រធានសមាគមគ្រឹះស្ថានឧត្តមសិក្សាបច្ចេកទេស និងបណ្តុះ​បណ្តាល​វិជ្ជាជីវៈឯកជន​រូប​នេះ​ ​​​​បាន​ប្រាប់​ដល់​ឧកញ៉ា ញ៉ូស៍​​ យ៉ាងដូច្នេះ​​ថា​ ជារួម​ស្នាដៃ និងលក្ខណៈ​សម្បត្តិ​របស់​លោក​មាន​ច្រើន​​ ប៉ុន្តែ​លោក​សូមលើកតែ​ចំណុចសំខាន់​ខ្លីៗ ត្រឹមតែ ៧ចំណុចទេ​ ក្នុងចំណោមចំណុច​ផ្សេងៗជា​ច្រើន​ទៀត ដែល​លើកយកមកលំអិតមិនបានអស់។ ក្នុង​នោះ​​​​ស្នាដៃ​ធំៗ​ទាំង​៧​ចំណុច​របស់​លោក មាន​ដូចជា៖

១. ធ្លាប់ជាអ្នកបួសរៀនធម៌វិន័យព្រះពុទ្ឋសាសនា (ជាគុណតម្លៃផ្ទាល់ខ្លួនមួយក្នុងនាមអតីតអ្នកបួស) និង​មានប្រវត្តិឆ្លងកាត់ការសិក្សាអប់កំរិតឧត្តមសិក្សា។

២. ជាអ្នកអប់រំ ជាគ្រូបង្រៀនជាង១៦ឆ្នាំ និងជាអង្គនាយកសាលារៀនឯកជន ៥សាខា ដែលជួយ​បណ្តុះ​បណ្តាលធនធានមនុស្សកម្ពុជាជាង១០ឆ្នាំ ជាចំណែកជួយដល់ការ​អភិវឌ្ឍសង្គមជាតិ​មាតុភូមិជាមួយ​រាជរដ្ឋាភិបាល។

៣. ជាមនុស្សមានប្រវត្តិការតស៊ូជំនះភាពលំបាកខ្លាំងក្លា ពីជីវិតកូនកំព្រាក្នុងគ្រួសារក្រីក្រ ក្លាយជាស្ថាបនិក​សាលារៀនឯកជន។

៤. តាមរយៈសាលាផ្ទាល់ លោក​បានលះបង់ធនធានថវិកា គិតគូរជ្រោមជ្រែងផ្គត់ផ្គង់ ជួយផ្តល់​អាហារូប​ករណ៍សិក្សាឥតគិតថ្លៃ ១០០% ដល់កុមារក្រីក្រ​ជារៀងរាល់ឆ្នាំ តាមសាខានីមួយៗទាំង៥ របស់សាលា ជិត១០០នាក់ក្នុងប្រទេសកម្ពុជា ហើយក៏ជាចំណែក នឹកគុណ និងតបស្នងដល់គុណបាយបាត្រ ដែលធ្លាប់​បានពឹងអាស្រ័យ។

៥. ចូលរួមជាវាគ្មិនចែករំលែក ជូនដល់យុវជន សិស្សនិសិត្ស និងសហគ្រិននានា ជិត៥ឆ្នាំ ពីបទពិសោធន៍​កសាង​ជីវិត កសាងគ្រួសារ និងអាជីវកម្ម។

៦. ចូលរួមឧបត្ថម្ភ ជាអំណោយ ថវិកា និងសំភារៈសិក្សា ជួយដល់អាជ្ញាធរ ពលរដ្ឋគ្រួសារមានជីវភាព​ខ្វះ​ខាត និងសិស្សក្រីក្រតាមទីជនបទ។

៧. ផ្គត់ផ្គង់ប្រាក់បៀវត្សប្រចាំខែ ប្រចាំឆ្នាំ និងបណ្តុះបណ្តាលធនធានមនុស្សកម្ពុជា និងបំពាក់បំប៉ន​ជំនាញ​វិជ្ជាជីវៈការងារផ្ទាល់ៗតាមជំនាញ តាមផ្នែក ដល់មន្ត្រីជំនាញ និងបុគ្គលិក គ្រូបង្រៀនទាំង៥សាខា របស់​សាលា ១ឆ្នាំជាង៤០នាក់ រយៈពេល ជិត១០ឆ្នាំ។

លោកបណ្ឌិត ជា ចំរើន ​​បាន​បញ្ជាក់​បន្ថែម​ថា លក្ខណៈសម្បត្តិទាំងនេះហើយ ដែលស្ថាប័ន​គណៈកម្មការអន្តរជាតិ​ទាំង៥ រួមមាន ១)សហព័ន្ធសារព័ត៌មាន (Innovation Mass Media Confederation), ២)មូលនិធិ​ធម្មជាតិមង្គល (Thamma Chot Mongkhol Foundation_ពី៣ប្រទេស នេប៉ាល់ ថៃ និងឥណ្ឌា), ៣)សាកលវិទ្យាល័យអន្តរជាតិនៃគុណធម៌ សហរដ្ឋអាមេរិក (Internatoinal University of Morality At U.S.A.), ៤)សភាអន្តរជាតិ ដើម្បីសន្តិសុខ សន្តិភាព និងភាពយុត្តិធម៌ នៃអង្គការសហប្រជាជាតិ (Internatoinal Parliament for Safety and Peace Justic – United Nations) (IPSPJ-UN) និង​ ៥)អង្គភាពអភិរក្ស និងការពារធនធានធម្មជាតិពិភពលោក (Prevent & protect inspector world natural resources ) បានធ្វើការវាយតម្លៃ ហើយសម្រេចប្រគល់ពានរង្វាន់សហគ្រិនឆ្នើម “ផ្នែក​វិទ្យាសាស្រ្តសេដ្ឋកិច្ចអន្តរជាតិ និងភាពជាអ្នកដឹកនាំអាជីវកម្ម លើកទី២ ឆ្នាំ២០២២ ដើម្បីលើកកម្ពស់​គុណធម៌ គុណតម្លៃ ក្នុងសង្គមមនុស្សជាតិទូទាំងពិភពលោក សម្រាប់បុគ្គលឆ្នើម” មកដល់រូបលោក ឥស្សរជនកម្ពុជា និង​ឥស្សរជនពីបណ្តា​ប្រទេសផ្សេងៗទៀតទូទាំងពិភពលោក៕

The post បណ្ឌិត ជា ចំរើន ទទួលបានពានសហគ្រិនឆ្នើម ពីប្រទេសម៉ាឡេស៊ី ដោយសារមានស្នាដៃធំៗ៧ចំណុច appeared first on .