ការងារមុខរបរ របស់អ្នកកោះឧកញ៉ាតី មួយភាគគឺបានពីការប្រកបរបរត្បាញហូល ផាមួង និងក្រមាជាដើម ដែលមុខរបរមួយនេះគឺអាចជួយទំនុកបម្រុងជីវភាពគ្រួសារ ដូចជា ផ្គត់ផ្គង់ឱ្យកូនរៀនសូត្រ ម្ហូបអាហារប្រចាំថ្ងៃ និងការប្រើប្រាស់ចាំបាច់មួយចំនួនក្នុងគ្រួសារ។

អ្នកស្រី សារ៉ុម ជាអ្នកត្បាញសូត្រម្នាក់នៅសិប្បកម្មនេះ បានឱ្យឧកញ៉ាញូស៍ដឹងថា សិប្បកម្មតម្បាញសូត្រនៅរមណីយដ្ឋានចំការស្នេហ៍ ជាសហគមន៍រាប់ចាប់តាំងពីដាំ ចិញ្ចឹមរហូតដល់សម្រេចជាផលិតផលដាក់លក់នៅនឹងកន្លែងតែមួយ។ មកទល់ពេលនេះ សិប្បកម្មតម្បាញសូត្រ មានសមាជិកប្រមាណជា៣០ទៅ៤០នាក់ហើយ ដែលភាគច្រើនសុទ្ធសឹងជាស្រ្តី។ បើតាមអ្នកស្រី សារ៉ុម មុខរបរតម្បាញនេះបានធ្វើឱ្យប្រជាពលរដ្ឋមានការងារធ្វើ ចៀសវាងការធ្វើចំណាកស្រុក អាចផ្គត់ផ្គង់គ្រួសារបានមួយចំណែក តួយ៉ាង អ្នកស្រីផ្ទាល់តាំងពីចូលមកត្បាញនៅទីនេះ អាចរកចំណូលបាន១០០ដុល្លារ ក្នុងមួយក្បិន​ ឬប្រហែល៣០០ដុល្លារ ក្នុងមួយខែ អាស្រ័យលើការត្បាញលឿនឬយឺត។

អ្នកស្រី បានបន្ថែមថា បច្ចុប្បន្នតម្បាញសូត្រខ្មែរ មានការចាប់អារម្មណ៍ខ្លាំងពីភ្ញៀវជាតិ និងអន្តរជាតិ ជាក់ស្តែងក្នុងខែកក្កដា ឆ្នាំ២០២៦នេះ ចំការស្នេហ៍ទទួលបានចំនួនភ្ញៀវច្រើនប្រហែល ១០០នាក់ ទៅ២០០នាក់ ក្នុងមួយថ្ងៃ។

ក្នុងនាមជាជនជាតិខ្មែរ រស់នៅជាមួយមុខរបរតពីដូនតាខ្មែរ អ្នកស្រី សារ៉ុម មានមោទនភាពណាស់នៅពេលឃើញស្នាមញញឹម និងការសរសើរពីភ្ញៀវបរទេសដល់ផលិតខ្មែរ ស្នាដៃខ្មែរ និងជាពិសេសគាំទ្រផលិតផលខ្មែរ។ មិនត្រឹមតែបរទេសទេ អ្នកស្រីថា បច្ចុប្បន្ននេះយុវជន្មខ្មែរមួយចំនួនដែលពីមុនមកមិនទាន់បានស្គាល់ និងឃើញផ្ទាល់ក៏ចាប់អារម្មណ៍មកសិក្សា ស្វែងយល់ និងចង់រៀនសូត្រពីមុខរបរមួយនេះផងដែរ។

អ្នកស្រីបញ្ជាក់ថា ពិតជាល្អណាស់ បើយុវជនខ្មែរយើងដែលជាក្មេងៗជំនាន់ក្រោយចាប់អារម្មណ៍ ចង់ចេះ ចង់រៀន ចង់រក្សា និងអភិរក្សនូវកេមរតកដូនតាមួយនេះកុំឱ្យបាត់បង់៕

The post សិប្បកម្មតម្បាញសូត្រ លើកោះឧកញ៉ាតី កាន់តែទទួលបានការគាំទ្រ និងការចាប់អារម្មណ៍ច្រើនពីភ្ញៀវជាតិ និងអន្តរជាតិ appeared first on .

អស់រយៈពេលជាង៧ខែកន្លងមកនេះ អគ្គនាយកដ្ឋានកសិកម្ម និងក្រុមការងារបច្ចេកទេស បានជួបជាមួយតំណាងក្រុមហ៊ុនសិប្បករអង្គរជាបន្តបន្ទាប់ និងបានផ្ដល់ជូនគ្រាប់ពូជដំណាំមនសម្រាប់ការបណ្ដុះ។

កាលពីថ្ងៃទី៣១ ខែកក្កដា ឆ្នាំ២០២៤ ក្រុមការងារអគ្គនាយកដ្ឋានកសិកម្មបានផ្តល់ពងដង្កូវនាងពូជ CK174 ជាពូជរបស់ខ្មែរ ប្រមាណ ៥០០០ពង ជូនដល់ក្រុមហ៊ុនសិប្បករអង្គរ ហើយបានចុះពិនិត្យនិងផ្លាស់ប្តូរបច្ចេកទេសលើការដាំដុះដំណាំមន ការចិញ្ចឹមដង្កូវនាង ពិនិត្យកូនមនបណ្តុះដោយគ្រាប់ដែលអគ្គនាយកដ្ឋានកសិកម្មបានផ្តល់ជូនកាលពីលើកមុន។

ក្នុងឱកាសពិនិត្យវឌ្ឍនភាពការងារដាំដើមមន និងចិញ្ចឹមដង្កូវនាងនៅសិប្បកម្មតម្បាញនៃក្រុមហ៊ុនសិប្បករអង្គរ ក្នុងស្រុកពួក ខេត្តសៀមរាប លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ បានកត់សម្គាល់ពីភាពរីកចម្រើនយ៉ាងលឿនរហ័សនៃសិប្បកម្មតម្បាញរបស់ក្រុមហ៊ុនអាទីហ្សង់អង្គរ ចាប់តាំងពីពេលដែលសិប្បកម្មនេះមានតែកូនដើមមនទើបដាំ រហូតដល់ពេលនេះដែលដើមមនលូតលាស់ធំធាត់បានល្អ។ មិនត្រឹមតែប៉ុណ្ណោះ សិប្បកម្ម ចាប់ផ្ដើមចិញ្ចឹមដង្កូវនាងសម្រាប់ស្រាវសូត្រ ដើម្បីផលិតជាផលិតផលផ្សេងៗដែលមានគុណតម្លៃផ្នែកវប្បធម៌ និងតម្លៃបន្ថែមផ្នែកសេដ្ឋកិច្ច ព្រមទាំងផ្ដល់ការងារដល់ប្រជាជននៅក្នុងតំបន់ ដែលភាគច្រើនជាស្ដ្រី។

លោក យិន ច័ន្ទសុធី អគ្គនាយករងនៃអគ្គនាយកដ្ឋានកសិកម្ម ព្រមទាំងក្រុមការងារ នឹងបន្តសហការផ្លាស់ប្តូរបច្ចេកទេសលើផ្នែកកោសេយ្យវប្បកម្មដល់អាទីហ្សង់អង្គរ ព្រមទាំងបន្តផ្តល់ពងដង្កូវនាងពូជសូត្រមាសប្រមាណ ៥ ០០០ពង ក្នុងខែសីហា ឆ្នាំ២០២៤ និងផ្តល់ពូជមនប្រមាណ ៥០បាច់ ឬ ១ ០០០ដើមទៀត ក្នុងខែកញ្ញា ឆ្នាំ២០២៤។ ក្រុមហ៊ុនសិប្បករអង្គរ ដាំដើមមនបន្ថែមនៅលើទីតាំងដីទំហំ ១៥ហិកតា ដើម្បីចិញ្ចឹមដង្កូវនាង និងពង្រីកផលិតកម្មសូត្រសម្រាប់ផ្គត់ផ្គង់ដល់រោងតម្បាញ ខណៈតម្រូវការសូត្រខ្មែរពីអតិថិជនមានកំណើនយ៉ាងគំហុក៕

The post ក្រសួងកសិកម្មនិងវិស័យឯកជន រួមគ្នាស្ដារឡើងវិញសិប្បកម្មតម្បាញសូត្រដែលជាវប្បធម៌ដ៏ចំណាស់របស់ខ្មែរឱ្យស្ថិតស្ថេរគង់វង្ស appeared first on .