លោក ផាន បូរ៉ា ម្ចាស់អាជីវកម្មក្រមាខ្មែរខេត្តតាកែវ បានលើកឡើងថា ក្រមាខេត្តតាកែវបង្កប់នូវលក្ខណៈ​ពិសេស ដែលធ្វើឱ្យជាប់ចិត្ត គឺពេលប្រើប្រាស់ដូចជាការជូតខ្លួនមិនស្កៀបរមាស់ មិនមានប្រតិកម្មជាមួយស្បែក មិនប្រើ​លាក់ជាតិគីមី ផលិតផលខ្មែរសុទ្ធៗធម្មជាតិ១០០% និងសាច់ក្រមាទន់ល្មើយ។

អាជីវកររូបនេះ បន្តថ្លែងថា លោកចាប់អាជីវកម្មនេះឡើង ក្នុងគោលបំណងជួយចែកចាយ​លើកស្ទួយផលិតផល​ខ្មែរ ជួយស្វែងរកទីផ្សារជូនប្រជាពលរដ្ឋឱ្យកាន់តែទូលំទូលាយ ដើម្បីឱ្យពួកគាត់មានទឹកចិត្តខិតខំត្បាញ​នូវ​ផលិតផលនេះបន្ថែម យកទៅប្រកួតប្រជែងលើទីផ្សារអន្តរជាតិខាងទីផ្សារអារ៉ាប់ ហើយជាពិសេស លោកចង់​ថែរក្សាកេរ្តិ៍ក្រមាមិនចង់ឱ្យមានការបាត់បង់ ជាវត្ថុលោកស្រឡាញ់ និងជាវត្ថុមួយតំណាងឱ្យជាតិសាសន៍ខ្មែរដែរ។

លោកបន្តទៀតថា បច្ចុប្បន្នលោកមើលឃើញទីផ្សារក្រមាខ្មែរទាំងក្នុងស្រុក និងក្រៅប្រទេសរួចហើយ ខណៈ​ពេលនេះ ធ្វើយ៉ាងណាឱ្យដៃគូទីផ្សាររបស់លោកមានការទទួលស្គាល់ជាមុនសិន ដោយចែកក្រមាជាវត្ថុ​អនុស្សាវរីយ៍​នៅពេលមានកិច្ចប្រជុំការងារ ផ្សព្វផ្សាយឱ្យផុសផុលអំពីគុណតម្លៃក្រមា​តាមប្រព័ន្ធឌីជីថល ដែលពុំ​សូវផ្ដោតលើតម្លៃក្រមា និងលោកតែងតែបង់ក្រមានៅនឹងកជានិច្ច។ ជាមួយគ្នានេះ លោកថ្លែងទៀតថា ក្រោយ​មក ក្រមាខេត្តតាកែវ ទទួលបានការគាំទ្រពីសំណាក់បងប្អូនប្រជាពលរដ្ឋខ្មែរយ៉ាងច្រើន តាមអនឡាញ ខណៈ​ដែល​លោកទើបតែបើកអាជីវកម្មចែកចាយក្រមាតាមអនឡាញ នៅដើមឆ្នាំ២០២៣ នេះ។

ទន្ទឹមនឹងនេះ លោកផាន បូរ៉ា បន្តលើកឡើងថា លោកជួយចែកចាយក្រមានេះ ដោយមានទិសដៅរកចំណូល​ក្នុងមួយខែរកឱ្យបានត្រឹម ១០០០ដុល្លារអាមេរិក ប៉ុន្តែពេលខ្លះទទួលចំណូលបានលើស ១០០០ដុល្លារ​អាមេរិក​ក៏មានដែរ។ នៅក្នុងនោះ ក្រមាខ្មែរខេត្តតាកែវ ដែលលោកយកមក មានតម្លៃចាប់ពី ៣ដុល្លាររហូតដល់ ៥០ដុល្លារ ដែលក្រមាតម្លៃ ៣-៤ដុល្លារ ជាក្រមាអនុស្សាវរីយ៍ដាក់តាមរោងការ។

ក្រៅពីជាម្ចាស់អាជីវកម្មចែកចាយក្រមាខ្មែរខេត្តតាកែវ លោកផាន បូរ៉ា ជាអគ្គនាយកក្រុមហ៊ុន Nature Top Cosmetics អគ្គនាយកក្រុមហ៊ុន T.K Business Consulting Co.,LTD អគ្គនាយកក្រុមហ៊ុន CSCP CONSTRUCTION CO.,LTD និងជាសមាជិកសភាពាណិជកម្មជាដើម ហើយ លោកក៏ជាអាជីវករលក់ហូល​ផាមួងខ្មែរ អស់រយៈពេល ២០ឆ្នាំមកហើយផងដែរ។

គួររម្លឹកបន្តិចថា ក្រមាខ្មែរ បាន​ធ្វើ​ឱ្យ​អន្តរជាតិ​ស្គាល់​កាន់​តែ​ច្រើន បន្ទាប់ពី​បានជាប់ឯកទគ្គកម្មពិភពលោក​ជា​ក្រមា​វែងជាងគេ ដែលមានប្រវែង១០០០ម៉ែត្រ ត្រូវបានគណៈកម្មការឯកទគ្គកម្មពិភពលោក (Guinness World Records) វាស់វែង និងពិនិត្យយ៉ាងល្អិតល្អន់កាលពីថ្ងៃទី១ ខែកក្កដា ឆ្នាំ២០១៨ នៅបរិវេណមជ្ឈ​មណ្ឌលកោះពេជ្រ នូវសមិទ្ធផលថ្មីមួយប្រកបដោយមោទនភាពខ្ពស់ និងជាកិត្តិយសជាតិថ្មីមួយទៀត ដែល​ពលរដ្ឋ​ខ្មែរបានរួមគ្នាកសាងឡើង៕

The post ក្រមាខ្មែរ ជាមរតកខ្វះមិនបាន មានតម្រូវការប្រើប្រាស់គ្រប់សម័យកាល appeared first on .

លោក ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានឱ្យដឹងថា វិនិយោគិនជប៉ុនបានសិក្សាអំពីសរសៃសូត្រខ្មែរ ហើយរកឃើញថា សរសៃសូត្រខ្មែរមានសារជាតិប្រូតេអ៊ីនប្រកបដោយគុណភាព ដែលអាចយកទៅផលិតជាគ្រឿងសម្អាងរក្សាផ្ទៃមុខឱ្យក្មេងជាងវ័យ។

ឆ្លើយតបនឹងសំណើរបស់វិនិយោគិនជប៉ុន លោក និងក្រសួងកសិកម្ម រុក្ខាប្រមាញ់ និងនេសាទ នឹងជួយសម្រួលដំណើរការរៀបចំវិញ្ញាបនបត្រជូនភាគីជប៉ុន ដើម្បីបញ្ជាក់ពីប្រភពនៃដង្កូវនាងនិងសរសៃសូត្រឱ្យបានលឿនតាមដែលអាចធ្វើទៅបានផងដែរ។

នាឱកាសនោះដែរ រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទរូបនេះ ក៏បានបញ្ជាក់ឱ្យដឹងដែរថា នៅក្នុងវិស័យវារីវប្បកម្ម វិនិយោគិនជប៉ុន បានបោះទុនចិញ្ចឹមត្រីទីឡាព្យា ស្របតាមស្តង់ដារបស់ជប៉ុន ដែលធ្វើឱ្យសាច់ត្រីមានគុណភាពខ្ពស់ និងអាចបរិភោគឆៅបាន។ សព្វថ្ងៃ ត្រីទីឡាព្យាដែលក្រុមហ៊ុននេះចិញ្ចឹម កំពុងតែចរាចរយ៉ាងមមាញឹកលើទីផ្សារកម្ពុជា និងកំពុងតែឈានទៅពង្រីកការចិញ្ចឹមបន្ថែមដើម្បីនាំចេញទៅកាន់ទីផ្សារបរទេសថែមទៀត។

គួរបញ្ជាក់ដែរថា ក្រសួងកសិកម្ម បានចាត់ទុកដែរថា ការវិនិយោគផ្ទាល់របស់អ្នកវិនិយោគជប៉ុននៅកម្ពុជា គឺជាគំរូមួយដ៏ប្រសើរសម្រាប់អ្នកវិនិយោគបរទេសដទៃទៀត ខណៈក្រសួងនឹងនៅតែបន្តលើកទឹកចិត្តចំពោះការវិនិយោគដោយផ្ទាល់ដូច្នេះ ដើម្បីការរីកចម្រើនក្នុងវិស័យកសិកម្ម និងសេដ្ឋកិច្ចកម្ពុជាឱ្យកាន់ស្ទុះខ្លាំង៕ អត្ថបទ៖ ពិសី

The post ជប៉ុន រកឃើញថា សរសៃសូត្រខ្មែរមានជាតិប្រូតេអ៊ីនប្រកបដោយគុណភាព អាចផលិតជាគ្រឿងសម្អាងរក្សាផ្ទៃមុខឱ្យក្មេងជាងវ័យ appeared first on .

នៅកម្ពុជាបច្ចុប្បន្ន ការងារក្នុងវិស័យសូត្រនេះ បាននិងកំពុងចូលរួមកាត់បន្ថយការចំណាកស្រុកទៅធ្វើជាពលករស្រុកគេ ជាពិសេសប្រទេសថៃ។

លោកស្រី ម៉ន សារឿត ម្ចាស់សិប្បកម្ម Khmer Golden Silk នៅខេត្តបន្ទាយមានជ័យ បានថ្លែងថា ការងារធ្វើសិប្បកម្មនេះ លោកស្រីធ្វើតពីឪពុកម្ដាយ ហើយការងារនេះលោកស្រីធ្វើបានរយៈពេល ៧ឆ្នាំ។ទាក់ទងទៅនឹងការងារនេះ លោកស្រីបានចូលរួមវគ្គបណ្ដុះបណ្ដាលខ្លីៗនៅប្រទេសថៃ ចិន និងឥណ្ឌា។

គិតមកដល់ទល់បច្ចុប្បន្ន សិប្បកម្ម Khmer Golden Silk បានពង្រីកខ្លួនចំនួន ២ទីតាំង ដែលទីតាំងទី១សម្រាប់ផលិត ស្ថិតនៅស្រុកភ្នំស្រុក ខេត្តបន្ទាយមានជ័យ និងទីតាំងទី២ កន្លែងស្តុកផលិតផល និងចែកចាយបោះដុំបន្តទៅឱ្យអតិថិជន ស្ថិតក្នុងក្រុងសៀមរាប ខេត្តសៀមរាប។

សម្រាប់ការលក់ចេញវិញ ក្រៅពីផ្គត់ផ្គង់ទីផ្សារក្នុងស្រុកហើយនោះ សិប្បកម្មលោកស្រីក៏បានលក់ទៅឱ្យឈ្មួញនៅប្រទេសអាល្លឺម៉ង់ និងកាណាដា ផងដែរ។ លោកស្រីបានបន្តថា លក្ខណៈពិសេសនៃផលិតផលរបស់លោកស្រី គឺមានលក្ខណៈខុសប្លែកពីផលិតផលដទៃដែលរកកន្លែងផ្សេងមិនមានដូចជា ១/ផលិតផលប្រើវត្ថុធាតុដើមក្នុងស្រុក, ២/សរសៃសូត្រក្នុងស្រុក, ៣/ប្រើពណ៌ធម្មជាតិ, ៤/រចនាក្បាច់តាមធម្មជាតិ, ៥/ទាក់ទងនឹងប្រវត្តិផលិតផល(History)ថាមានប្រវត្តិបែបណា។

លោកស្រីបានបន្ថែមថា ផលិតផលដែលទទួលបានការគាំទ្រ និងចាប់អារម្មណ៍ពីអតិថិជនច្រើនជាងគេក្នុងបរិបទកូវីដ-១៩ គឺផលិតផលសរសៃអំបោះដែលយកស្លឹកឈើធម្មជាតិមករចនាម៉ូដរំលេចក្បាច់ រួមមាន ផលិតផលកន្សែង ភួយ និងក្រណាត់ ខណៈផលិតផលសូត្រហាក់ធ្លាក់ចុះដោយសារវាមានតម្លៃថ្លៃ និងទីផ្សាររាងចង្អៀតផង។

ការប្រកបរបរការងារសូត្រខ្មែរនេះ លោកស្រីបានលើកឡើងនូវភាពជោគជ័យមួយចំនួន ទន្ទឹមនឹងភាពជោគជ័យនេះ លោកស្រីក៏មានផលវិបាកខ្លះៗដែរ ដូចជា បញ្ហាវត្ថុធាតុដើម ខ្វះធនធានមនុស្ស ផលិតមិនទាន់តម្រូវការ រកអ្នកទិញក្រៅប្រទេសមិនទាន់ទូលំទូលាយ តម្លៃផលិតផលថ្លៃមិនសូវមានអតិថិជនជាវ និងធ្វើឱ្យធ្លាក់ចំណូលខ្លាំងក្នុងឆ្នាំ២០២១ ប្រមាណ ៦ម៉ឺនដុល្លារក្នុងបរិបទកូវីដ ប៉ុន្តែក្នុងឆ្នាំ២០២២ លោកស្រីអាចរកចំណូលបានមកវិញ ចន្លោះពី៧ម៉ឺនដុល្លារទៅ ៨ម៉ឺនដុល្លារផងដែរ។ បន្ថែមទៀតនោះលោកស្រីរំពឹងទុកថា ផលិតផលនេះនឹងមានការកើនឡើងពី១៥% ទៅ២០% ទៅថ្ងៃអនាគត។

ជាមួយគ្នានេះ ម្ចាស់សិប្បកម្ម Khmer Golden Silk លោកស្រី ម៉ន សារឿត ក៏បានណែនាំដល់ប្រជាពលរដ្ឋខ្មែរដែលធ្វើចំណាកស្រុកនៅក្រៅប្រទេស សូមវិលមកស្រុកវិញ ខណៈដែលលោកស្រីក៏បានជួយជ្រោមជ្រែងជីវភាពឱ្យមានកម្រិតប្រសើរឡើង ដោយផ្ដល់ឱកាសការងារត្បាញសូត្រនៅតាមផ្ទះរៀងៗខ្លួន និងបង្ហាត់បង្ហាញជំនាញវិជ្ជាជីវៈដល់អ្នកមិនសូវចេះជំនាញ ដើម្បីឱ្យត្រូវតាមស្ទង់ដារ និងមានគុណភាព៕

The post ក្រៅពីផ្គត់ផ្គង់ទីផ្សារក្នុងស្រុក សិប្បកម្មសូត្រ Khmer Golden Silk លក់ចេញទៅអាល្លឺម៉ង់ និងកាណាដា appeared first on .