ក្នុងនោះ លោក ប៉ាន សូរស័ក្ត បានឱ្យដឹងថា អត្ថប្រយោជន៍ដែលកម្ពុជានឹងទទួលបានពីកិច្ចព្រមព្រៀងពាណិជ្ជកម្មសេវាកម្មអាស៊ាន នឹងផ្តល់ផលប្រយោជន៍សម្រាប់កម្ពុជាជាច្រើន នៅពេលកិច្ចព្រមព្រៀងនេះចូលជាធរមាន។

ពាក់ព័ន្ធសេចក្តីព្រាងច្បាប់ ស្តីពីការអនុម័តយល់កិច្ចព្រមព្រៀងនេះ បើតាមរដ្ឋមន្រ្តីក្រសួងពាណិជ្ជកម្ម បានបញ្ជាក់ថា «កិច្ចព្រមព្រៀងពាណិជ្ជកម្មសេវាកម្មអាស៊ាន (ATISA) ត្រូវបានចរចាបង្កើតឡើងក្នុងគោលបំណងពង្រឹងការតភ្ជាប់សេដ្ឋកិច្ច និងផ្តល់កាលានុវត្តភាពកាន់តែប្រសើរឡើង សម្រាប់ការអភិវឌ្ឍសេដ្ឋកិច្ចនៅក្នុងសហគមន៍សេដ្ឋកិច្ចអាស៊ាន និងបង្កើនការធ្វើពាណិជ្ជកម្ម និងការវិនិយោគលើវិស័យពាណិជ្ជកម្មសេវាកម្ម ដោយបង្កើតទីផ្សារ និងសេដ្ឋកិច្ចកាន់តែទូលំទូលាយ តាមរយៈការកាត់បន្ថយការរឹតត្បិតចំពោះពាណិជ្ជកម្មសេវាកម្ម»។

លើសពីនេះ កិច្ចព្រមព្រៀងនេះ នឹងពង្រឹងទំនាក់ទំនងសេដ្ឋកិច្ចរវាងប្រទេសជាសមាជិកអាស៊ានទាំងអស់ តាមរយៈការលើកកម្ពស់ និងការសម្របសម្រួលដល់ការប្រើប្រាស់នូវកាលានុវត្តភាពកាន់តែប្រសើរ ការលើកកម្ពស់កិច្ចសហប្រតិបត្តិការក្នុងផ្នែកនិយ័តកម្ម ការបង្កើតកិច្ចសហប្រតិបត្តិការក្នុងវិស័យអភិវឌ្ឍន៍ធនធានមនុស្ស និងការបង្កើនការចូលរួមរបស់សហគ្រាសធុន មីក្រូ តូច និងមធ្យម ក្នុងសកម្មភាពពាណិជ្ជកម្មសេវាកម្ម  ក៏ដូចជាការកាត់បន្ថយគម្លាតនៃការអភិវឌ្ឍរវាងប្រទេសសមាជិកអាស៊ាន ដើម្បីសម្រេចបាននូវសមភាព តុល្យភាព និងនិរន្តរភាពនៃការអភិវឌ្ឍសេដ្ឋកិច្ចសង្គម។

លោកស្រី និន សាផុន ប្រធានគណៈកម្មាការទី៩ និងជាសមាជិកាគណៈកម្មាធិការអចិន្រ្តៃយ៍ បានលើកឡើងផងដែរថា បន្ទាប់ពីបានពិនិត្យនិងសិក្សាលម្អិតលើអត្ថបទសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងពាណិជ្ជកម្មសេវាកម្មអាស៊ាន ដែលជាលទ្ធផលឃើញថា សេចក្តីព្រាងច្បាប់នេះ បានរៀបចំឡើងត្រឹមត្រូវតាមបទប្បញ្ញត្តិនៃរដ្ឋធម្មនុញ្ញ ច្បាប់ និងបទដ្ឋានគតិយុត្តិពាក់ព័ន្ធនានា ស្របតាមយុទ្ធសាស្រ្តចតុកោណដំណាក់កាលទី៤ របស់រាជរដ្ឋាភិបាល នីតិកាលទី៦ នៃរដ្ឋសភា។

គួរបញ្ជាក់ផងដែរថា សេចក្តីព្រាងច្បាប់នេះទាំងស្រុង នឹងបញ្ជូនទៅគណៈកម្មាធិការអចិន្រ្តៃយ៍រដ្ឋសភា ដើម្បីដាក់ចូលក្នុងរបៀបវារៈសម័យប្រជុំពេញអង្គរដ្ឋសភា នាពេលខាងមុខ៕

The post សេចក្តីព្រាងច្បាប់ លើកិច្ចព្រមព្រៀងពាណិជ្ជកម្មសេវាកម្មអាស៊ាន នឹងផ្តល់ផលប្រយោជន៍ជាច្រើនដល់កម្ពុជា ពេលចូលជាធរមាន appeared first on .

បើតាមការប្រកាសរបស់រដ្ឋសភាបានឱ្យដឹងថា សេចក្តីព្រាងច្បាប់ស្តីពីសារពើពន្ធថ្មីនេះ ត្រូវបានរៀបចំឡើងដើម្បីផ្តល់ភាពងាយស្រួលកែលម្អ បំពេញចន្លោះខ្វះខាត និងធានាសង្គតភាពជាមួយច្បាប់ និងបទដ្ឋានគតិយុត្តនានា ស្របតាមការវិវឌ្ឍនៃសង្គម សេដ្ឋកិច្ច និងបរិបទថ្មីៗនៃវិស័យធុរកិច្ច ខណៈសេចក្តីព្រាងច្បាប់នេះ ក៏នឹងចូលរួមជំរុញ និងលើកកម្ពស់វិស័យធុរកិច្ចនៅកម្ពុជា បង្កើនភាពអនុគ្រោះនៃបរិយាកាសវិនិយោគ ពង្រឹងកម្រិតអនុលោមភាពសារពើពន្ធ ធានានូវការប្រកួតប្រជែងដោយស្មើភាពគ្នាជាដើម។

សូមរម្លឹកដែរថា ច្បាប់ស្ដីពីសារពើពន្ធជាធរមានមាន ​ដែលត្រូវបានដាក់ឱ្យប្រើប្រាស់ក្នុងឆ្នាំ១៩៩៧ ​មាន​ចំនួន ៧ជំពូក ចែកចេញជា ១៥៥មាត្រា បូករួមទាំង​បទប្បញ្ញតិ្តស្ដីពីសារពើពន្ធដទៃទៀត​ដែលនៅ​រប៉ាត់ប៉ាយ​ក្រៅពី​ច្បាប់​ស្ដីពីសារពើពន្ធ។

ចំណែកសេចក្តីព្រាងច្បាប់ស្ដីពីសារពើពន្ធ ដែល​ត្រូវ​បាន​រៀបចំ​រួចរាល់​ចប់សព្វគ្រប់នេះ​មាន​ចំនួន​ដល់​ទៅ ២០ជំពូក និង២៥៥មាត្រា​ ដោយ​សារជាការរួម​បញ្ចូល​គ្នានូវច្បាប់ស្ដីពី​សារពើ​ពន្ធ​ជាធរមាន និងច្បាប់ ​និង​លិខិត​បទដ្ឋាន​គតិយុត្តិ​ស្ដីពីពន្ធដារ​ដែលនៅរប៉ាត់​ប៉ាយ​ទាំងអស់ ​ហើយ​បន្ថែម​ដោយ​មាត្រាថ្មីមួយចំនួន ​ដើម្បី​បំពេញ​បន្ថែម​នូវ​ចំណុច​ខ្វះខាត។

ដោយឡែក​ចំពោះផ្នែកទោសទណ្ឌ ក៏ត្រូវ​បានពិនិត្យពិភាក្សាយ៉ាង​ល្អិតល្អន់ ​និងបានកែ​សម្រួលរួចរាល់​ហើយ​បន្ទាប់​ពី​មានធាតុចូល​ពី​ក្រសួង​យុត្តិធម៌ ​និងកិច្ចពិភាក្សាសម្របសម្រួលបន្ថែមចុងក្រោយជាមួយអង្គភាព​ប្រឆាំង​អំពើពុករលួយ។

សូមបញ្ជាក់ថា គណៈរដ្ឋមន្ត្រី ​បាន​អនុម័ត​សេចក្តីព្រាងច្បាប់​ស្ដីពី​សារពើពន្ធ ក្នុង​កិច្ច​ប្រជុំពេញអង្គ​គណៈរដ្ឋមន្ត្រី នា​ថ្ងៃទី ​៣១ ខែមីនា ដែល​ដឹកនាំ​ដោយ​សម្ដេច​តេជោ ​ហ៊ុន ​សែន ​នាយក​រដ្ឋមន្ត្រីកម្ពុជា ៕​

The post សេចក្តីព្រាងច្បាប់ស្តីពី​សារពើពន្ធ ត្រូវបានរដ្ឋសភាជាតិ សម្រេចអនុម័តជាផ្លូវការហើយ appeared first on .