នៅក្នុងសេចក្តីប្រកាសព័ត៌មានរបស់ក្រសួងរៀបចំដែនដី នគរូបនីយកម្ម និងសំណង់ បានបញ្ជាក់ថា ប្រជាពលរដ្ឋ និងធុរជនដែលមាន តម្រូវការប្រើប្រាស់សេវារហ័សខាងលើ អាចមកដាក់ពាក្យស្នើសុំ នៅច្រកចេញចូលតែមួយ នៅទីស្តីការក្រសួងរៀបចំដែនដី នគរូបនីយកម្ម និងសំណង់ រៀងរាល់ម៉ោងធ្វើការ ចាប់ពីថ្ងៃជូនដំណឹងនេះតទៅ។

តាមប្រភពផ្លូវការដែល Oknha News ទទួលបាន យន្តការផ្តល់សេវាសាធារណៈរហ័ស (Express Service) នេះ រួមមានសេវា៖ ១.ចុះបញ្ជីដីបំពេញបន្ថែម ២.ចុះបញ្ជីចំណែកឯកជននៃអគារសហកម្មសិទ្ធិ ៣.ចុះបញ្ជីអំពីការបង្កើតសិទ្ធិជួលអចិន្ត្រៃយ៍ និងសិទ្ធិសម្បទានដីសេដ្ឋកិច្ច ៤.ការបំបែកក្បាលដី ៥.ការបង្រួម​ក្បាលដី ៦.ចុះបញ្ជីប្តូរពីបណ្ណភោគៈ មកជាវិញ្ញាបនបត្រសម្គាល់អចលនវត្ថុ ៧.ចុះបញ្ជីអំពីការផ្ទេរកម្មសិទ្ធិ ឬភោគៈ ឬចំណែកកម្មសិទ្ធិអវិភាគ ឬចំណែកភោគៈ ៨.ចុះបញ្ជីអំពីការផ្ទេរសិទ្ធិសម្បទានដីសេដ្ឋកិច្ច ឬសិទ្ធិជួលអចិន្ត្រៃយ៍ និង ៩.ចេញបណ្ណ/វិញ្ញាបនបត្រ ទុតិយតា ឬតតិយតា គ្រប់ប្រភេទ។

សូមជម្រាបថា រាល់សេវាទាំង៩ប្រភេទខាងលើនេះ ធ្វើបាននៅទីតាំងអចលនវត្ថុទាំង ២៥ រាជធានី ខេត្ត ហើយអាច​ធ្វើបាននៅទីស្តីការរៀបចំដែនដី នគរូបនីយកម្ម និងសំណង់ តែម្តង ដែលអាចបន្ថែមជម្រើសសេវា​គាប់ចិត្ត​ដល់​ប្រជាពលរដ្ឋ អាចទទួលសេវានៅខេត្តក៏បាន ឬអាចធ្វើនៅទីស្តីក្រសួងក៏បានដូចគ្នាផងដែរ៕

The post កាន់តែងាយស្រួលធ្វើប្លង់ដី! ក្រសួងរៀបចំដែនដី ប្រកាសដាក់ចេញយន្តការផ្តល់​សេវាសាធារណៈរហ័ស (Express Service) លើសេវាសុរិយោដី, ពលរដ្ឋអាចសុំសេវានៅទីស្តីការក្រសួងបាន ទោះបីទីតាំងដីនៅតាម​បណ្តាខេត្តផ្សេងៗ appeared first on .