ជប៉ុន ប្រកាសអាសន្នក្រោយរលកយក្សស៊ូណាមិ ហក់ឡើងដល់កម្ពស់ ១,៣ ម៉ែត្រ

ឧកញ៉ាសាមញ្ញ — Wed, 30 Jul 2025 10:02:16 +0000

រដ្ឋាភិបាលប្រទេសជប៉ុន បានប្រកាសថា ពលរដ្ឋនៅទីប្រជុំជន ភូមិ និងកម្មករនៅរោងចក្រនុយក្លេអ៊ែរ ត្រូវបានជម្លៀសចេញ ស្របពេលអាកាសយានដ្ឋានមួយចំនួនត្រូវបានបិទ បន្ទាប់ពីប្រទេសនេះ កំពុងស្ថិតនៅក្រោមការគំរាមកំហែងដោយរលកយក្សស៊ូណាមិ បន្ទាប់ពីមានការរញ្ជួយដីដ៏ធំមួយ នៅភាគខាងកើតនៃប្រទេសរុស្ស៊ី។ នេះបើតាមការចុះផ្សាយពីសារព័ត៌មាន The Japan Times។

ប្រភពដដែល បានរាយការណ៍ទៀតថា ប្រទេសមួយចំនួន បាននិងកំពុងត្រៀមខ្លួនរួចជាស្រេចហើយសម្រាប់ការមកដល់នៃរលកយក្សស៊ូណាមិ បន្ទាប់ពីមានការរញ្ជួយដីកម្រិត ៨,៧ រិចទ័រ ដែលបានវាយប្រហារនៅឆ្នេរសមុទ្រនៃឧបទ្វីប Kamchatka ប្រទេសរុស្ស៊ី ដែលមានចម្ងាយប្រហែល ១ ៥០០ គីឡូម៉ែត្រ ពីកោះហុកកៃដូ ប្រទេសជប៉ុន។

យ៉ាងណាមិញ នៅរសៀលថ្ងៃពុធនេះ នៅប្រទេសជប៉ុន រលកដ៏ធំបំផុតមួយ ត្រូវបានគេរាយការណ៍ថាបានកើនឡើងដល់កម្ពស់ ១,៣ ម៉ែត្រហើយ នៅកំពង់ផែ Kuji ភាគឦសានប្រទេសជប៉ុន ដែលជាកម្រិតប្រកាសអាសន្នមួយ។

មិនតែប៉ុណ្ណោះ អាជ្ញាធរជប៉ុន បាននិយាយទៀតថា រលកអាចឡើងដល់កម្ពស់ ៣ ម៉ែត្រ ហើយបានព្រមានអ្នកស្រុកថា ការព្រមានអំពីរលកយក្សស៊ូណាមិ អាចនឹងស្ថិតនៅក្នុងរយ:ពេល ២៤ម៉ោង បន្ទាប់។

ជម្រាបជូនផងដែរថា បើយោងតាមសារព័ត៌មានធំៗជាច្រើន បានរាយការណ៍ថា រលកយក្សស៊ូណាមិ ក៏ត្រូវបានគេសង្កេតឃើញនៅឆ្នេរសមុទ្រប៉ាស៊ីហ្វិក នៃរដ្ឋអាឡាស្តា សហរដ្ឋអាមេរិក ផងដែរ៕

The post ជប៉ុន ប្រកាសអាសន្នក្រោយរលកយក្សស៊ូណាមិ ហក់ឡើងដល់កម្ពស់ ១,៣ ម៉ែត្រ appeared first on .

អាមេរិក លុបចោលការព្រមានអំពីរលកយក្សស៊ូណាមិ ក្រោយគ្រោះរញ្ជួយដីនៅសមុទ្រការីបៀនធូរស្បើយ

ឧកញ៉ាសាមញ្ញ — Sun, 09 Feb 2025 07:58:54 +0000

យោងតាមទីភ្នាក់ងារស្ទាបស្ទង់ភូមិសាស្រ្តអាមេរិក (USGS) បានឲ្យដឹងថា ការព្រមានអំពីការកើតមាននៃរលកយក្សស៊ូណាមិញ បន្ទាប់ពីមានគ្រោះរញ្ជួយដីដ៏៏ខ្លាំងក្លាកម្រិត ៧,៦ រ៉ិចទ័រ នៅសមុទ្រការីបៀន ត្រូវបានលុបចោលវិញហើយ ក្រោយស្ថានការណ៍មានភាពធូរស្បើយឡើងវិញ។ នេះបើតាមការចុះផ្សាយពីសារព័ត៌មាន BBC។

ក្រុមមន្ត្រីរបស់ទីភ្នាក់ងារ USGS បាននិយាយទៀតថា ចំណុចកណ្តាលនៃគ្រោះរញ្ជួយដីនេះបានកើតឡើងស្ថិត នៅចម្ងាយប្រហែល ២០ ម៉ាយល៍ (៣២,១គីឡូម៉ែត្រ) ពីភាគខាងជើងនៃប្រទេសហុងឌូរ៉ាស និង ១៣០ ម៉ាយល៍ (២០៩,២ គីឡូម៉ែត្រ) ពីភាគនិរតីនៃកោះកៃម៉ាន នៅពេលដែលវាបានវាយប្រហារកាលពីល្ងាចថ្ងៃសៅរ៍ (ម៉ោងក្នុងស្រុក)។

ជុំវិញស្ថានភាពនេះ ប្រព័ន្ធព្រមានរលកយក្សស៊ូណាមិរបស់សហរដ្ឋអាមេរិក ដំបូងបានចេញការព្រមានដល់ប្រទេសជាច្រើនដែលរំពឹងថាអាចនឹងកើតមានរលកយក្សកម្ពស់រហូតដល់ទៅបីម៉ែត្រ។ ប៉ុន្តែក្រោយមក ស្ថាប័ននេះ បានចេញសេចក្តីប្រកាសឡើងវិញថា ការគំរាមកំហែងនេះ ហាក់មានភាពធូរស្បើយឡើងវិញហើយ។

ទន្ទឹមនឹងនេះ យោងតាមរដ្ឋបាលមហាសមុទ្រ និងបរិយាកាសជាតិអាមេរិក បានឲ្យដឹងថា គ្រោះរញ្ជួយដីកាលពីថ្ងៃសៅរ៍នោះ ត្រូវបានចាត់ទុកថាជាគ្រោះរញ្ជួយដីដ៏ធំបំផុតមួយមិនធ្លាប់មាន គិតចាប់តាំងពីឆ្នាំ២០២១ មក ដោយនៅពេលនោះការរញ្ជួយដីដែលមានកម្រិត ៧,២ រិចទ័រ បណ្តាលឲ្យកើតមានរលកយក្សស៊ូណាមិ និងបានវាយប្រហារទាំងស្រុងទៅលើប្រទេសហៃទី។

ប៉ុន្តែទោះជាយ៉ាងណា ប្រហែលបីម៉ោងបន្ទាប់ពីការរញ្ជួយដី អាជ្ញាធរអាមេរិកបានព្រមានថា ការប្រែប្រួលកម្រិតទឹកសមុទ្រនៅតែអាចមានតិចតួច ខណ:រលកខ្លះអាចមានកម្ពស់រហូតដល់ ៣០ សង់ទីម៉ែត្រ ប៉ុន្តែការគំរាមកំហែងណាមួយដែលធ្ងន់ធ្ងរជាងនេះ ហាក់បានកន្លងផុតទៅហើយ៕

The post អាមេរិក លុបចោលការព្រមានអំពីរលកយក្សស៊ូណាមិ ក្រោយគ្រោះរញ្ជួយដីនៅសមុទ្រការីបៀនធូរស្បើយ appeared first on .