ស្ថានទូតសហរដ្ឋអាមេរិក

លោកស្រី ជា សិរី និយាយប្រាប់អ្វីខ្លះដល់គណៈប្រតិភូស្ថានទូតសហរដ្ឋអាមេរិកប្រចាំកម្ពុជា

ឧកញ៉ាកោះក្របី — Thu, 30 Nov 2023 07:28:04 +0000

កូនស្រីលោក ជា ចាន់តូ អតីតទេសាភិបាលធនាគារជាតិ លោកស្រី ជា សិរី បច្ចុប្បន្នជាទេសាភិបាល ធនាគារជាតិនៃកម្ពុជា បានជួបពិភាក្សាការងារជាមួយគណៈប្រតិភូស្ថានទូតសហរដ្ឋអាមេរិកប្រចាំកម្ពុជា ដឹកនាំដោយឯកអគ្គរដ្ឋទូតលោក W. Patrick Murphy កាលថ្ងៃពុធ ទី២៩ ខែវិច្ឋិកា ឆ្នាំ២០២៣។

ក្នុងជំនួបនោះ ឯកអគ្គរដ្ឋទូតសហរដ្ឋអាមេរិក បានពិភាក្សាជាមួយលោកស្រី ជា សិរី ជុំវិញស្ថានភាពម៉ាក្រូសេដ្ឋកិច្ច និងបញ្ហាប្រឈមនានា ព្រមទាំងកិច្ចសហប្រតិបត្តិការរវាងកម្ពុជានិងសហរដ្ឋអាមេរិក ជាពិសេសក្នុងវិស័យធនាគារនិងហិរញ្ញវត្ថុ។

លោកស្រីទេសាភិបាលធនាគារជាតិនៃកម្ពុជា បានជម្រាបជូនគណៈប្រតិភូស្ថានទូតពីវឌ្ឍនភាពសេដ្ឋកិច្ចកម្ពុជា និងសកម្មភាពចូលរួមចំណែករបស់ធនាគារជាតិនៃកម្ពុជា ក្នុងក្របខ័ណ្ឌម៉ាក្រូសេដ្ឋកិច្ច ដូចជាយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល និងផែនការអភិវឌ្ឍន៍សេដ្ឋកិច្ច និងសង្គមឌីជីថល ជាដើម។

ក្នុងឱកាសនោះដែរ លោកស្រីក៏បានជម្រាបពីដំណើរការអភិវឌ្ឍន៍ប្រព័ន្ធទូទាត់របស់ប្រទេសកម្ពុជា ដែលបានតភ្ជាប់ជាមួយបណ្តាប្រទេសក្នុងតំបន់ ព្រមទាំងកិច្ចសហប្រតិបត្តិការជាមួយក្រុមហ៊ុនផ្តល់សេវាទូទាត់ ដូចជា VISA, Mastercard និង Alipay ជាដើម ដែលជួយលើកកម្ពស់បរិយាបន្នហិរញ្ញវត្ថុ ចរាចរណ៍ប្រាក់រៀល សមាហរណកម្មក្នុងតំបន់ និងជំរុញវិស័យទេសចរណ៍តាមរយៈប្រព័ន្ធទូទាត់ងាយស្រួល និងមានសុវត្ថិភាព។ ទន្ទឹមនឹងនេះ លោកស្រីទេសាភិបាល ក៏បានរំលេចពីសារៈសំខាន់នៃចំណេះដឹងផ្នែកហិរញ្ញវត្ថុ ដែលធនាគារជាតិនៃកម្ពុជា នៅតែបន្តលើកកម្ពស់ តាមរយៈគម្រោងដាក់បញ្ចូលមេរៀនចំណេះដឹងផ្នែកហិរញ្ញវត្ថុក្នុងកម្មវិធីសិក្សាចំណេះទូទៅ សិក្ខាសាលាផ្សព្វផ្សាយ និងបណ្តុះបណ្តាលនានា។

បន្ថែមទៀតនោះ លោកស្រី ជា សិរី ក៏បានថ្លែងអំណរគុណរដ្ឋាភិបាលសហរដ្ឋអាមេរិក ដែលបានរួមចំណែកផ្តល់ជំនួយបច្ចេកទេសដល់ធនាគារជាតិនៃកម្ពុជា តាមរយៈរតនាគារសហរដ្ឋអាមេរិក។ លោកស្រីក៏បានស្វាគមន៍គំនិតផ្តួចផ្តើមរបស់ឯកអគ្គរដ្ឋទូត លោក W. Patrick Murphy ទាក់ទងនឹងជំនួយបច្ចេកទេសបន្ថែមពីសហរដ្ឋអាមេរិកសម្រាប់ធនាគារជាតិនៃកម្ពុជាផងដែរ ដើម្បីចូលរួមក្នុងដំណើរការអភិវឌ្ឍវិស័យធនាគារ ក៏ដូចជាពង្រឹងកិច្ចសហប្រតិបត្តិការរវាងប្រទេសទាំងពីរ៕

The post លោកស្រី ជា សិរី និយាយប្រាប់អ្វីខ្លះដល់គណៈប្រតិភូស្ថានទូតសហរដ្ឋអាមេរិកប្រចាំកម្ពុជា appeared first on .

ស្ថានទូត ណែនាំក្រុមហ៊ុន និងវិនិយោគិនជនជាតិអាមេរិកាំងឱ្យប្រុងប្រយ័ត្នក្នុងការបណ្តាក់ទុនលើវិស័យប្រកបដោយហានិភ័យខ្ពស់ចំនួន ៣ នៅកម្ពុជា

ឧកញ៉ាកោះក្របី — Sun, 14 Nov 2021 02:59:50 +0000

តាមរយៈការប្រកាសព័ត៌មានកាលពីថ្ងៃទី១១ ខែវិច្ឆិកា ឆ្នាំ២០២១នេះ ស្ថានទូតសហរដ្ឋអាមេរិកប្រចាំកម្ពុជា បានណែនាំក្រុមហ៊ុន និងវិនិយោគិនជនជាតិអាមេរិកាំងឱ្យប្រុងប្រយ័ត្នមុននឹងបណ្តាក់ទុនវិនិយោគលើវិស័យប្រកបដោយហានិភ័យខ្ពស់មួយចំនួននៅកម្ពុជា។

វិស័យប្រកបដោយហានិភ័យខ្ពស់នៅកម្ពុជាដែលស្ថានទូតសហរដ្ឋអាមេរិក ចាត់ថាមានហានិភ័យនោះរួមមាន វិស័យហិរញ្ញវត្ថុ អចលនទ្រព្យ កាស៊ីណូ និងហេដ្ឋារចនាសម្ព័ន្ធ។

ជាមួយគ្នានេះដែល ស្ថានទូតក៏បានណែនាំដល់ក្រុមហ៊ុន និងវិនិយោគិនជនជាតិអាមេរិកាំងឱ្យយល់ដឹងអំពីហានិភ័យផ្នែកកេរ្តិ៍ឈ្មោះ សេដ្ឋកិច្ច និងច្បាប់ ដែលពួកគេអាចប្រឈមនៅពេលរកស៊ីជាមួយនឹងក្រុមហ៊ុននៅកម្ពុជា ដែលជាប់ពាក់ព័ន្ធនឹងអំពើរំលោភសិទ្ធិមនុស្ស សកម្មភាពឧក្រិដ្ឋ ឬអំពើពុករលួយជាដើម។

បន្ថែមលើនេះ ស្ថានទូតផ្តល់អនុសាសន៍ថា ដើម្បីកាត់បន្ថយនូវហានិភ័យទាំងនេះ ក្រុមហ៊ុនអាមេរិកាំងទាំងអស់ គួរតែអនុវត្តនូវគោលនយោបាយ និងនីតិវិធីនៃការពិនិត្យពិច័យផ្ទៀងផ្ទាត់ និងស្រាវជ្រាវឱ្យបានហ្មត់ចត់មុននឹងសម្រេចវិនិយោគនៅកម្ពុជា។

តំណាងរដ្ឋាភិបាលកម្ពុជាចាត់ទុកការលើកឡើងរបស់ស្ថានទូតអាមេរិកជុំវិញហានិភ័យខ្ពស់ក្នុងការរកស៊ីនៅកម្ពុជានោះថា ជារឿងមិនឆ្លុះបញ្ចាំងការពិត។

អ្នកនាំពាក្យរដ្ឋាភិបាលលោក ផៃ ស៊ីផាន អះអាងថា រដ្ឋាភិបាលតែងតែធ្វើច្បាប់ប្រឆាំងអំពើពុករលួយ ដើម្បីការពារអ្នកវិនិយោគជាតិ និងអន្តរជាតិ។ លោកលើកឡើងទៀតថា ជនជាតិអាមេរិកមិនចង់រកស៊ីនៅស្រុកខ្មែរទើបចោទប្រកាន់ថា ការវិនិយោគនៅកម្ពុជា មានអំពើពុករលួយឬរំលោភសិទ្ធិមនុស្សបែបនេះ។

លោក ផៃ ស៊ីផាន៖ «ខ្ញុំទទួលស្គាល់ថា មិនអស់ទេអំពើពុករលួយដូច្នេះជាយន្តការប្រឆាំងអំពើពុករលួយយើងដឹងថា អ្នករកវិនិយោគនៅកម្ពុជាប្រព្រឹត្តិអំពើពុករលួយយើងចាប់ដាក់ហើយ»៕

The post ស្ថានទូត ណែនាំក្រុមហ៊ុន និងវិនិយោគិនជនជាតិអាមេរិកាំងឱ្យប្រុងប្រយ័ត្នក្នុងការបណ្តាក់ទុនលើវិស័យប្រកបដោយហានិភ័យខ្ពស់ចំនួន ៣ នៅកម្ពុជា appeared first on .