ការបង្ហាញពីបំណងរបស់ក្រុមហ៊ុន ក្នុងឱកាស លោក រស់ សូដែន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ដឹកនាំក្រុមការងារនៃនាយកដ្ឋានកសិឧស្សាហកម្ម ទៅទស្សនកិច្ចនៅប្រទេសចិន ចាប់ពីថ្ងៃទី២២-២៥ ខែកក្កដា ឆ្នាំ២០២៦ ដើម្បីជំរុញ និងស្រូបទាញអ្នកវិនិយោគចិនលើការកែច្នៃនៃវិស័យឧស្សាហកម្មស្វាយចន្ទីកម្ពុជាឱ្យកាន់តែរីកចម្រើន។

ជាលទ្ធផលក្រោយពីទស្សនកិច្ច និងពិភាក្សាគ្នា ភាគីក្រុមហ៊ុន និងប្រតិភូកម្ពុជា បានឯកភាពគ្នា ដោយក្រុមហ៊ុនមានបំណងក្នុងការមកវិនិយោគបង្កើត រោងចក្រកែច្នៃគ្រាប់ស្វាយចន្ទីតែម្ដងនៅខេត្តក្រចេះ។ លើសពីនេះ ក្រុមហ៊ុន នឹងលើកកម្ពស់ស្វាយចន្ទីកម្ពុជា ជាម៉ាកស្វាយចន្ទីសរីរាង្គតាមរយៈការប្រមូលទិញគ្រាប់ស្វាយចន្ទីកម្ពុជាដោយផ្ទាល់យកមកកែច្នៃនៅប្រទេសចិន ដើម្បីនាំចេញ ទៅកាន់ទីផ្សារអឺរ៉ុប ជប៉ុន និងទីផ្សារក្នុងស្រុកតែម្ដង។

បន្ថែមពីលើនេះ ក្រុមហ៊ុននឹងជួលក្រុមហ៊ុនទី៣ ដើម្បីទៅប្រទេសកម្ពុជាធ្វើការចុះសិក្សា ពិនិត្យ និងវាយតម្លៃអំពីអនុលោមភាពស្វាយចន្ទីសរីរាង្គ (ទាំងស្វាយចន្ទីពូជ M23 និងពូជប្រពៃណី) នៅតាមបណ្ដាខេត្តមួយចំនួនដូចជាខេត្តរតនគីរី, ស្ទឹងត្រែង, ក្រចេះ, កំពង់ចាម, កំពង់ធំ, សៀមរាប និងខេត្តព្រះវិហារជាដើម នៅអំឡុងខែសីហា ឆ្នាំ២០២៦ ខាងមុខឆាប់ៗនេះ។

ប្រតិភូកម្ពុជា បានគាំទ្រដំណើរទស្សនកិច្ចរបស់ក្រុមហ៊ុនចិនមកកាន់ប្រទេសកម្ពុជាក្នុងគោលបំណងមកធ្វើការសិក្សា និងវាយតម្លៃលើស្វាយចន្ទីសរីរាង្គនៅកម្ពុជា និងលើកសំណើនេះជូនថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ដើម្បីស្នើសុំគោលការណ៍ជូននាយកដ្ឋានកសិឧស្សាហកម្មចូលរួមសម្របសម្រួលឱ្យបានសម្រេចជោគជ័យតាមផែនការ។

សូមជម្រាបដែរថា ដំណាំស្វាយចន្ទី គឺជាកសិផលដ៏សំខាន់ និងជាដំណាំយុទ្ធសាស្ត្រមួយរបស់កម្ពុជា។កម្ពុជាបានដាក់ចេញ «គោលនយោបាយជាតិស្តីពីស្វាយចន្ទី ឆ្នាំ២០២២-២០២៧» កាលពីថ្ងៃ ១៤ ខែមិថុនា ឆ្នាំ២០២៣ ដែលគោលនយោបាយនេះនឹងក្លាយជាកម្លាំងចលករដ៏មានប្រសិទ្ធភាពសម្រាប់ពង្រឹងផលិតភាពនៃផលិតកម្មដំណាំស្វាយចន្ទី ការនាំចេញ ដើម្បីជំរុញឱ្យកម្ពុជាឈានទៅជាអធិរាជស្វាយចន្ទី នៅលើពិភពលោក៕

The post ក្រុមហ៊ុនចិន មានបំណងបង្កើតរោងចក្រកែច្នៃគ្រាប់ស្វាយចន្ទី នៅខេត្តក្រចេះ appeared first on .

ក្នុងជំនួបជាមួយ លោកស្រី នួន ផានិត អនុព័ន្ធពាណិជ្ជកម្ម កាលពីថ្ងៃទី២២ ខែកក្កដា លោក KIM OK GYU នាយកប្រតិបត្តិនៃក្រុមហ៊ុន BG Environment Co., Ltd បានលើកឡើងថា ក្រុមហ៊ុនមានយុទ្ធសាស្ត្ររយៈពេលវែង មិនត្រឹមតែផ្តោតលើការនាំចូលសំបកគ្រាប់ស្វាយចន្ទីប៉ុណ្ណោះទេ ប៉ុន្តែថែមទាំងមានគម្រោងវិនិយោគក្នុងឧស្សាហកម្មកែច្នៃដ៏មានសក្តានុពល ដោយត្រៀមសហការបង្កើតរោងចក្រកែច្នៃ និងបង្កើតខ្សែសង្វាក់ផ្គត់ផ្គង់ប្រកបដោយស្ថិរភាពសម្រាប់សំបកគ្រាប់ស្វាយចន្ទីឆៅនៅកម្ពុជា។

ក្រុមហ៊ុនក៏បានពិភាក្សាអំពីកិច្ចសហប្រតិបត្តិការជាមួយដៃគូអាជីវកម្មកម្ពុជាមួយចំនួន ដែលមានរោងចក្រកែច្នៃរួចហើយផងដែរ។ ក្រៅពីនេះ លោកប្រធានក្រុមហ៊ុនក៏បានស្នើសុំឱ្យក្រសួងពាក់ព័ន្ធជួយសម្រួលលើការបំពេញនីតិវិធីគយ និងអធិការកិច្ច ដើម្បីកាត់បន្ថយការបង់ថ្លៃសេវាបន្ថែម និងកាត់បន្ថយការចំណាយខ្ពស់លើការដឹកជញ្ជូនពីរោងចក្រទៅកាន់កំពង់ផែនៅកម្ពុជា។

សូមបញ្ជាក់ផងដែរថា ក្រុមហ៊ុន BG Environment Co., Ltd កំពុងអភិវឌ្ឍបច្ចេកវិទ្យាដើម្បីទាញយកប្រេងជីវៈ និងផលិតផលរងផ្សេងៗពីសំបកគ្រាប់ស្វាយចន្ទី។ ក្រុមហ៊ុនកំពុងដាក់ពាក្យសុំប៉ាតង់ទាក់ទងនឹងបច្ចេកវិទ្យាកែច្នៃនេះ។ បន្ទាប់ពីទទួលបានការអនុម័តពីរដ្ឋាភិបាល ក្រុមហ៊ុនរំពឹងថានឹងទទួលបានការគាំទ្រផ្នែកហិរញ្ញវត្ថុយ៉ាងច្រើនពីរដ្ឋាភិបាលកូរ៉េ សម្រាប់ពាណិជ្ជកម្ម និងការវិនិយោគនៅបរទេស។

The post ក្រុមហ៊ុនមួយរបស់កូរ៉េ មានគម្រោងវិនិយោគក្នុងឧស្សាហកម្មកែច្នៃគ្រាប់ស្វាយចន្ទីឆៅនៅកម្ពុជា appeared first on .

ពាក់ព័ន្ធនិងគ្រាប់ស្វាយចន្ទីនៅឆ្នាំ២០២៥នេះដែរ លោក អួន ស៊ីឡុត ប្រធានសមាគមស្វាយចន្ទីរកម្ពុជា បានឱ្យដឹងថានៅឆ្នាំនេះតម្លៃគ្រាប់ស្វាយចន្ទីនៅលើទីផ្សាររក្សាបានថ្លៃល្អ។ ពោលកាលពីខែតុលាកន្លងទៅនេះស្វាយចន្ទីឡើងថ្លៃខុសពីធម្មតា រហូតដល់មួយតោនថ្លៃ២០៥០ដុល្លារ ដោយសារបញ្ហាប្រទេសតង់ហ្សានីនៅអាហ្វិកខាងកើត ក្រោយពីប្រមូលផលស្វាយចន្ទីហើយ បានកើតមាននូវជម្លោះនយោបាយក្រោយបោះឆ្នោត ដែលធ្វើប្រទេសផលិតគ្រាប់ស្វាយចន្ទីជាមធ្យមបាន៤០ម៉ឺនតោនក្នុងមួយឆ្នាំមួយនេះ មិនអាចលក់ចេញបាន។ ដូចនេះដើម្បីបំពេញតម្រូវការ ការបញ្ជាទិញ រោងចក្របានប្រជែងគ្នាទិញក្នុងតម្លៃថ្លៃ។

លោក អួន ស៊ីឡុត បានគូសបញ្ជាក់បន្ថែមថា “តម្លៃស្វាយចន្ទីនៅមួយរយៈចុងក្រោយនេះនៅរក្សាបានថ្លៃខ្ពស់ ប៉ុន្តែនៅកម្ពុជា នៅមានគ្រាប់ស្វាយចន្ទីចំនួនតិចតួចចូលដល់ខែតុលានិងវិច្ឆិកា ឆ្នាំ២០២៥ ដែលជាធម្មតាគ្រាប់ស្វាយចន្ទីស្ងួតតែងតែធ្លាក់ថ្លៃចាប់ពីចុងខែកញ្ញារហូតដល់ខែធ្នូ ពីព្រោះប្រទេសឥណ្ឌូនេស៊ី និងប្រទេសតង់ហ្សានី បញ្ចេញស្តុកគ្រាប់ស្វាយចន្ទីមកខាងក្រៅ ធ្វើឱ្យស្វាយចន្ទីនៅកម្ពុជាច្រើនធ្លាក់ថ្លៃ។ តែផ្ទុយមកវិញនៅក្នុងឆ្នាំនេះ ពេលដែលប្រទេសតង់ហ្សានីមានបញ្ហានយោបាយក្នុងប្រទេស មិនមានឈ្មួញណាមួយហ៊ានចូលទិញ ជាហេតុធ្វើឱ្យគ្រាប់ស្វាយចន្ទីឆៅឡើងថ្លៃ”។

លោក តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ក៏ធ្លាប់បានអះអាងថា ដំណាំស្វាយចន្ទីគឺជាដំណាំកសិឧស្សាហកម្មដ៏មានសក្តានុពល មានសារសំខាន់សម្រាប់ប្រជាកសិករនិងជំរុញកំណើនសេដ្ឋកិច្ចជាតិ។ ក្រសួងកសិកម្ម ផ្តោតលើការពង្រឹងផ្នែកផលិតកម្មនិងគុណភាពសម្រាប់គាំទ្រដល់ការកែច្នៃនៅក្នុងស្រុកនិងការនាំចេញ។ ក្នុងឆ្នាំ២០២៥នេះ តាមការប៉ាន់ស្មានរបស់ក្រសួងកសិកម្ម ដំណាំស្វាយចន្ទីមានប្រមាណជាង៦០ម៉ឺនហិកតា ដែលអាចផ្តល់ផលបានប្រមាណ១លានតោន។

លោក អាន តារា ប្រធានសហព័ន្ធស្វាយចន្ទីកម្ពុជាធ្លាប់បានឱ្យដឹងថា បញ្ហាប្រឈមដែលកើតឡើងជាប្រចាំមកទល់ពេលនេះ៖ ទី១) ទុនបង្វិលសម្រាប់ក្រុមហ៊ុនមួយៗយកទៅទិញគ្រាប់ស្វាយចន្ទីពីប្រជាកសិករយកមកធ្វើការកែច្នៃ ព្រោះស្វាយចន្ទីនៅកម្ពុជាបានបរិមាណច្រើនជាងគេនៅក្នុងខែមីនា និងខែមេសា។ ដូចនេះបើសិនក្រុមហ៊ុនអត់មានលុយបម្រុងទុក សម្រាប់ទិញស្វាយចន្ទីកែច្នៃឱ្យបានពេញមួយនោះទេ គ្រាប់ស្វាយចន្ទីនិងត្រូវបាននាំចេញទៅក្រៅអស់។ ចំណែកបញ្ហាទី២)ទាក់ទងនិងអត្រាការប្រាក់របស់ធនាគារ ។ រាល់ថ្ងៃនេះការប្រាក់ថ្លៃជាផ្នែកមួយ ប៉ុន្តែអ្វីដែលជាបញ្ហាគឺទ្រព្យដាក់បញ្ចាំ។ដូចនេះចង់ឱ្យធនាគារមួយចំនួនមានការបន្ធូរបន្ថយ ការដាក់ទ្រព្យបញ្ចាំ ដោយសារគ្រាប់ស្វាយចន្ទីលក់មានតម្លៃថ្លៃ៕

The post កម្ពុជានាំចេញគ្រាប់ស្វាយចន្ទីក្នុងរយៈ១០ខែ កើនឡើងជិត១០ភាគរយ appeared first on .

ការស្នើរបស់លោកអគ្គលេខាធិការ ក្នុងឱកាសទទួលជួបពិភាក្សាការងារជាមួយគណៈប្រតិភូនៃក្រុមហ៊ុន Sinomach Hainan Development Co., Ltd. ដែលមកទស្សនកិច្ចសិក្សាស្វែងយល់ដោយផ្ទាល់ពីកាលានុវត្តភាព និងបរិយាកាសវិនិយោគនៅកម្ពុជា ពិសេសនៅក្នុងឧស្សាហកម្មស្វាយចន្ទីនៅខេត្តកំពង់ធំ កាលពីថ្ងៃទី៨ ខែមេសា ឆ្នាំ២០២៥។

លោក ជា វុទ្ធី បានលើកឡើងថា រាជរដ្ឋាភិបាលក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បាននិងកំពុងយកចិត្តទុកដាក់យ៉ាងខ្លាំងក្នុងការជំរុញការអភិវឌ្ឍឧស្សាហកម្មស្វាយចន្ទីនេះ ដោយបានគ្រោងបង្កើតតំបន់កសិឧស្សាហកម្មស្វាយចន្ទី។ តំបន់កសិឧស្សាហកម្មស្វាយចន្ទី នឹងទទួលបានការលើកទឹកចិត្តទាំងផ្នែកសារពើពន្ធ និងមិនមែនសារពើពន្ធដូចដែលមានចែងក្នុងច្បាប់វិនិយោគ ក៏ដូចជាការលើកទឹកចិត្ត និងអត្ថប្រយោជន៍ពិសេសផ្សេងទៀត។

បន្ថែមលើនេះ លោកក៏បានធ្វើការអត្ថាធិប្បាយពីខ្សែច្រវាក់តម្លៃនៃឧស្សាហកម្មស្វាយចន្ទីដែលរាប់ចាប់តាំងពីការដាំដុះ ការថែទាំ ការប្រមូលផល ការរៀបចំឃ្លាំងស្តុក ការរៀបចំសម្ងួត រហូតដល់ការកែច្នៃជាផលិតផលសម្រេច ហើយដែលកម្ពុជាបច្ចុប្បន្នកំពុងត្រូវការក្រុមហ៊ុនវិនិយោគកែច្នៃដោយប្រើបច្ចេកវិទ្យាទំនើប។

ឆ្លៀតក្នុងឱកាសនេះ លោកអគ្គលេខាធិការ បានស្នើយ៉ាងទទូចឱ្យក្រុមហ៊ុនរួសរាន់ក្នុងការសម្រេចចិត្តបោះទុនវិនិយោគក្នុងវិស័យឧស្សាហកម្មស្វាយចន្ទីនេះ ដើម្បីចូលរួមជាមួយរាជរដ្ឋាភិបាលក្នុងការទាញយកផលពីស្វាយចន្ទីឱ្យអស់ពីសមត្ថភាពសំដៅបង្កើតតម្លៃបន្ថែមក្នុងស្រុកឱ្យកាន់តែច្រើន ពិសេស ការទទួលបានផលចំណេញទាំងអស់គ្នាពីវិស័យដែលកំពុងមានសក្តានុពលនេះ។

ជាការឆ្លើយតប តំណាងគណៈប្រតិភូបានថ្លែងអំណរគុណដល់ឯកឧត្តមអគ្គលេខាធិការ ដែលបានទទួលជួបពិភាក្សាការងារ ដោយបានផ្តល់នូវព័ត៌មានលម្អិតនៃវិស័យឧស្សាហកម្មស្វាយចន្ទីនៅកម្ពុជា ដែលក្រុមហ៊ុនកំពុងមានចំណាប់អារម្មណ៍បណ្តាក់ទុនវិនិយោគ។ តបតាមសំណើរបស់លោកអគ្គលេខាធិការ ក្រុមហ៊ុនបានបង្ហាញនូវសុទិដ្ឋិនិយមក្នុងការគិតគូរបណ្តាក់ទុនវិនិយោគនៅកម្ពុជាក្នុងវិស័យឧស្សាហកម្មស្វាយចន្ទីនេះ។

សូមបញ្ជាក់ផងដែរថា ក្រុមហ៊ុន Sinomach Hainan Development Co., Ltd. គឺជាក្រុមហ៊ុនរដ្ឋចិនដ៏ធំមួយ ដែលមានមុខសញ្ញាអាជីវកម្មក្នុងវិស័យជាច្រើនរួមមាន កសិកម្ម ការនាំចេញ/ចូលផលិតផលកសិកម្ម នេសាទ វិស្វកម្ម ថាមពល និងប្រព័ន្ធឌីជីថល៕

The post លោក ជា វុទ្ធី ទទូចក្រុមហ៊ុនរដ្ឋដ៏ធំមួយរបស់ចិន បោះទុនវិនិយោគក្នុងវិស័យឧស្សាហកម្មស្វាយចន្ទីនៅកម្ពុជា appeared first on .

កិច្ចពិភាក្សានេះ បានផ្តោតសំខាន់លើ ការជំរុញសក្តានុពលនាំចេញគ្រាប់ស្វាយចន្ទីកែច្នៃ និងម្រេចកម្ពុជាទៅកាន់ទីផ្សារជប៉ុន។ លើសពីនេះ  ក៏សិក្សាពីឱកាសវិនិយោគក្នុងវិស័យកែច្នៃកសិផលនៅកម្ពុជា ក្នុងការលើកកម្ពស់ការប្រកួតប្រជែងនៃផលិតផលកសិកម្មកម្ពុជា ដោយធានាស្តង់ដារខ្ពស់ក្នុងការកែច្នៃ និងការពង្រីកទីផ្សារ លើកកម្ពស់សក្ដានុពលនៃការច្នៃប្រឌិត និងអនុលោមភាពនៃស្តង់ដារទីផ្សារជប៉ុនផងដែរ។

សូមបញ្ជាក់ថា កន្លងមកប្រទេសជប៉ុនគឺជាប្រទេសមួយដែលមានការចាប់អារម្មណ៍ និងកំពុងវិនិយោគលើវិស័យស្វាយចន្ទី ជាពិសេសការកែច្នៃគ្រាប់ស្វាយចន្ទីគួរឱ្យកត់សម្គាល់នៅកម្ពុជា។

លោក អួន ស៊ីឡុត ប្រធានសមាគមស្វាយចន្ទីកម្ពុជា ធ្លាប់បានឱ្យដឹងថា កន្លងទៅកម្ពុជាមិនអាចផលិតគ្រាប់ស្វាយចន្ទីដើម្បីបំពេញតម្រូវការជប៉ុនបានទេ ដោយសារជប៉ុនត្រូវការច្រើន ខណៈកម្ពុជាផលិតបានតិចតួចនៅឡើយ។

​ចំំណែកឯម្រេចវិញ បច្ចុប្បន្នម្រេច​កំពតកម្ពុជា​​អាច​នាំ​ចេញ​ទៅ​ទីផ្សារ​បរទេសដូចជា កូរ៉េ ចិន ជប៉ុន អឺរ៉ុប អា​មេ​រិ​ក ជាដើម។ គិតក្នុងឆ្នាំ២០២៤ កម្ពុជា​រកចំណូលពីការ​នាំ​ចេញ​ម្រេច​ទៅ​អន្តរជាតិ​ប្រមាណ ​៣៥,២៧​លាន​ដុល្លារ​ កើនឡើង​ជាង​១៣១​ភាគរយ ធៀប​នឹង​ឆ្នាំ​២០២៣ ដែលមានទឹកប្រាក់​១៥,២៣ លាន​ដុល្លារ​៕

The post កម្ពុជា-ជប៉ុន ជំរុញការនាំចេញគ្រាប់ស្វាយចន្ទីកែច្នៃ និងម្រេចកម្ពុជាទៅកាន់ទីផ្សារជប៉ុន appeared first on .

លោក អួន ស៊ីឡុត ប្រធានសមាគមស្វាយចន្ទីកម្ពុជា បានឱ្យដឹងថា ក្រុមហ៊ុនជប៉ុនចង់បណ្តាក់ទុននៅក្នុងប្រទេសណាមួយ តែងមានភាពយឺតយាវបន្តិច ប៉ុន្តែការវិនិយោគរបស់គេមានភាពច្បាស់លាស់ និងបង្ហាញឱ្យឃើញថាប្រទេសទាំងនោះមានបរិយាកាសវិនិយោគល្អ ។ តួយ៉ាង ការវិនិយោគរបស់ក្រុមហ៊ុន Mirarth Holdings នៅក្នុងវិស័យស្វាយចន្ទីកម្ពុជា វាបង្ហាញឱ្យឃើញថាក្រុមហ៊ុនស្វែងរកប្រាក់ចំណេញបាន ហើយមានតម្លាភាពសង្គម។ លើសពីនេះធ្វើឱ្យវិនិយោគិននៅតាមបណ្តាប្រទេសផ្សេងទៀត និងចូលមកវិនិយោគតាមដែរ ព្រោះវិនិយោគិនបរទេសទំាងនោះគេជឿជាក់លើការសិក្សារបស់ក្រុមហ៊ុនជប៉ុន។

បើតាមប្រធានសមាគមស្វាយចន្ទីកម្ពុជាខាងលើ ក្រុមហ៊ុនជប៉ុនចូលមកបណ្តាក់ទុនវិនិយោគនៅក្នុងវិស័យស្វាយចន្ទីកម្ពុជាមិនត្រឹមតែចង់កែច្នៃគ្រាប់ស្វាយចន្ទីប៉ុណ្ណោះទេ ជប៉ុនថែមទាំងចង់ធ្វើការកែច្នៃសំបគ្រាប់ស្វាយចន្ទីគាបយកប្រេងថែមទៀត ដោយសារវាទទួលបានកម្រៃខ្ពស់។

ផ្អែកលើការវិនិយោគរបស់ក្រុមហ៊ុនជប៉ុនក្នុងវិស័យស្វាយចន្ទីនាពេលសព្វថ្ងៃ, លោក អួន ស៊ីឡុត ទទួលស្គាល់ថា “ច្បាស់ណាស់យើងត្រូវការ ការវិនិយោគបន្ថែមពីក្រុមហ៊ុនជប៉ុនសម្រាប់វិស័យស្វាយចន្ទី ព្រោះកាលណាមានការវិនិយោគរបស់ជប៉ុនមានច្រើន វាបង្ហាញអំពីបរិយាកាសវិនិយោគល្អនៅក្នុងប្រទេសកម្ពុជា ហើយមានតម្លាភាពដែលអាចទទួលយកបាន ដើម្បីបង្ហាញទៅដល់វិនិយោគិននៅតាមបណ្តាប្រទេសនានាឱ្យចាប់អារម្មណ៍មកលើកម្ពុជាថែមទៀត”។

លោក Taniguchi Kentaro ប្រធានក្រុមហ៊ុន Mirarth Holdingsថ្មីៗនេះបានបង្ហាញព័ត៌មានដល់លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីថា បច្ចុប្បន្នក្រុមហ៊ុន Mirarth Holdings មានសមត្ថភាពកែច្នៃគ្រប់ស្វាយចន្ទី ១៥០០ តោន ក្នុងមួយឆ្នាំ និងអាចឡើងដល់ប្រមាណ ៣០០០ តោននៅដើមឆ្នាំ២០២៥ ហើយក្រុមហ៊ុននឹងបន្តពង្រីកផលិតកម្មរបស់ខ្លួនរហូតដល់ប្រមាណ ២៥ ០០០ តោន ក្នុងរយៈពេល ៣ ទៅ ៤ ឆ្នាំទៀត។

លោកបញ្ជាក់ថា “ក្រុមហ៊ុនបានចាប់ដៃគូជាមួយក្រុមហ៊ុនមួយនៅប្រទេសហូឡង់ដ៍ ហើយគ្រោងនឹងនាំចេញគ្រាប់ស្វាយចន្ទីប្រមាណ ២៥០តោន ទៅកាន់ទីផ្សារអ៊ឺរ៉ុបក្នុងពេលខាងមុខនេះ។ លើសពីនេះក្រុមហ៊ុនក៏មានគម្រោងពង្រីកសកម្មភាពកែច្នៃគ្រាប់និងកសិផលស្វាយចន្ទីផងដែរ ដូចជាការកែច្នៃធ្វើជាប្រេង គ្រឿងសម្អាង និងផលិតថាមពលជីវម៉ាស ដែលសុទ្ធសឹងជាផលិតផលដែលមានតម្លៃបន្ថែមខ្ពស់”។

យោងតាមលោក អួន ស៊ីឡុត គិតត្រឹមរយៈពេល១០ខែក្នុងឆ្នាំ២០២៤ កម្ពុជាបានផលិតគ្រាប់ស្វាយចន្ទីឆៅបានប្រមាណ៨៤ម៉ឺនតោន ក្នុងនោះបាននាំចេញទៅប្រទេសវៀតណាមប្រមាណ៧៩ម៉ឺនតោន ដែលអាចឱ្យកម្ពុជារកបានប្រាក់ពីនាំចេញបានប្រមាណ ១១០០លានដុល្លារអាម៉េរិក៕ SL

The post អ្នកជំនាញ ចង់បានការបណ្តាក់ទុនពីវិនិយោគិនជប៉ុនបន្ថែម នៅក្នុងឧស្សាហកម្មស្វាយចន្ទីកម្ពុជា appeared first on .

លោក វ៉ា រុតសាន រដ្ឋលេខាធិការក្រសួងពាណិជ្ជកម្មមានប្រសាសន៍ «យើងសង្ឃឹម​ថានៅពេល​​គោល​នយោបាយ​ជាតិស្តីពី​ស្វាយ​ចន្ទីឆ្នំា២០២២-២០២៧អនុវត្តន៍ទៅប្រជាពលរដ្ឋនឹងទទួលបាននូវតម្លៃបន្ថែម សេដ្ឋកិច្ចរីកចម្រើន ហើយរដ្ឋយក​ចិត្ត​​ទុក​ដាក់​បន្ថែមទៅលើបញ្ហាបច្ចេកទេស ដើម្បីឱ្យការដំាដុះកាត់បន្ថយបានហានិភ័យ ហើយទទួលបានទិន្នផល​កើន​ឡើង​»។

លោកបន្តថា ស្វាយចន្ទីនៅកម្ពុជាវាមានបរិមាណច្រើនដែលផលិតបាននៅក្នុងមួយឆ្នាំៗ។ដូចនេះបរិមាន​ផលិតកម្មស្វាយ​ចន្ទី​​ជាប់​​លេខ១នៅទូទាំងពិភពលោក ហើយអ្នកវិនិយោគបរទេសទើបតែបានដឹង៣ឬ៤ឆ្នំាកន្លងមកនេះ អីចឹងបរិទេស​គេចាប់​ផ្តើមភ្ញាក់ផ្អើល​ហើយគេចាប់ផ្តើមសម្លឹងមករកការវិនិយោគនៅស្រុកយើង។

លោក វ៉ា រុតសាន មានប្រសាសន៍ថាបើតាមខ្ញុំដឹងវិនិយោគិនជនជាតិជប៉ុនបានចូលមកហើយ និងអ្នកវិនិយោគនៅ​តាម​បណ្តា​​​​​ប្រទេសផ្សេងដូចជាកូរ៉េ តៃវ៉ាន់ក៏គេកំពុងតែសម្លឹងមកស្រុកខ្មែរដែរ ពិសេស​ការគា​ប​សំបកស្វាយចន្ធីយកប្រេង​​ដើម្បី​ធ្វើការនាំចេញហើយប្រទេសឧស្សាហកម្មគេត្រូវការប្រេងនេះខ្លំាងណាស់។ដូចនេះអ្វីតាមខ្ញុំដឹងគឺជប៉ុនមកហើយ ហើយកូរ៉េមកដែរគេចង់បង្កើតជារោងចក្រគាបសំបកស្វាយចន្ទីយកប្រេងនេះ ក្រៅពីសាច់ស្វាយចន្ធី។ក្រៅពីនេះ​ក៏នៅ​​មានប្រទេសខ្លះគេចូលមកធ្វើការសិក្សាអំពីផ្លែពណ៌លឿងឬក្រហមរបស់ស្វាយចន្ទីគេចង់កែច្នៃធ្វើជាស្រាផងដែរ។

លោកសង្កត់ធ្ងន់ដូច្នេះថា «ខ្ញុំមានសុទិដ្ឋិនិយមថានៅពេលគោលនយោបាយយើងចេញទៅ បរិទេសគេដឹងពីបរិមាណ​ស្វាយចន្ទីរបស់យើងច្រើនអីចឹងគេនឹងចូលមកបណ្តាក់ទុនវិនិយោគនៅកម្ពុជាហើយ។ម្យ៉ាងទៀតក្រសួងពាណិជ្ជកម្ម​​ក៏បាន​បង្កើតសហព័ន្ធស្វាយចន្ទីកម្ពុជាកាលថ្មីៗនេះផងដែរ អីចឹងអ្វីៗវានិងដើរទៅមុខ»។

សេចក្តីព្រាងគោលនយោបាយជាតិស្តីពីស្វាយចន្ទី ឆ្នាំ២០២២-២០២៧ បាន​បង្ហាញថាដំណាំស្វាយចន្ទី គឺជាដំណាំកសិ​ឧស្សា​ហ​កម្មដ៏​មាន​សក្តានុពល និងជាដំណាំអាទិភាពមួយក្នុងចំណោមដំណាំអាទិភាពទាំង១២មុខ ដែលរាជរដ្ឋាភិបាលបាន​និង​​កំពុង​ផ្តោតការ​យកចិត្តទុកដាក់លើការបង្កើនផលិតភាពនិងការប្រកួតប្រជែង​តាមរយៈការធ្វើពិពិធកម្មសេដ្ឋកិច្ចក្នុង​សកម្ម​ភាព​ដែលមានតម្លៃខ្ពស់។

បច្ចុប្បន្ន ព្រះរាជាណាចក្រកម្ពុជាមានខេត្តចំនួន១០ ដែលមានផ្ទៃដីដាំដុះស្វាយចន្ទី ដែលរួមមាន កំពង់ធំ រតនគិរី ក្រចេះ កំពង់ចាម ព្រះវិហារ ស្ទឹងត្រែង ឧត្តរមានជ័យត្បូងឃ្មុំ មណ្ឌលគិរី និងសៀមរាប។ ពីឆ្នាំ២០១៥ ដល់ឆ្នាំ២០២១ ផ្ទៃដីដាំដុះ​ស្វាយចន្ទីកម្ពុជាមានការកើនឡើងពី ៩៤ ៣០៨ហិកតា ដល់ ៤០៥ ៩៩១ហិកតា និងផ្ទៃដីប្រមូលផលបានកើនពី៧៨ ៥៨៤​​ហិកតា ដល់ ២៧៥ ៦៧៩ហិកតា ដោយទទួលបានទិន្នផលសរុបកើនពី ៩៣ ៩៤៤តោន ដល់ ៤៧២ ៦៣៦​តោន។

ជាមួយគ្នានេះ ស្វាយចន្ទីកម្ពុជាក៏កំពុងមានកេរ្តិ៍ឈ្មោះល្បី និងត្រូវបានទទួលស្គាល់ពីទីផ្សារ លើទំហំគ្រាប់ រសជាតិ កម្រិត​កាកសំណល់កសិកម្មទាប និងសរីរាង្គតាមបែបប្រពៃណី ដោយក្នុងនោះផលិតផលស្វាយចន្ទីរបស់កម្ពុជាអាច​ទាញ​យក​ចំណែកទីផ្សារពីសហរដ្ឋអាមេរិក អាល្លឺម៉ង់ ហូឡង់ ចិន ចក្រភពអង់គ្លេស បារាំង អូស្ត្រាលី សហភាពអារ៉ាប់​រួម​​និង​ជប៉ុន៕

អត្ថបទ៖សារេត

The post មន្ត្រីជំនាញ មានសុទិដ្ឋិនិយម​ថាវិនិ​យោគិន​បរទេស ​​នឹង​មក​​ប​ណ្តា​ក់ទុន​ផលិត​និង​កែច្នៃស្វាយ​ចន្ទី​កម្ពុជា appeared first on .