សេចក្តីប្រកាសព័ត៌មានរបស់អ្នកនាំពាក្យរាជរដ្ឋាភិបាល ចេញផ្សាយនៅរសៀលថ្ងៃទី១១ ខែមករានេះថា  បន្ទាប់ពីបានចុះទៅពិនិត្យស្ថានភាពនៅទីតាំងជាក់ស្តែង និងប្រជុំជាមួយក្រុមហ៊ុនវិនិយោគដែលបានបណ្តាក់ទុនវិនិយោគជាប្រភេទ BOT ទាំងអាកាសយានដ្ឋាន និងផ្លូវ ក្រុមការងារចំពោះកិច្ចបានធ្វើការពិភាក្សា ចរចាបន្ថែម កាលពីព្រឹកថ្ងៃទី១១ ខែមករា ឆ្នាំ២០២៤ លើអ្វីដែលបានឯកភាពកាលពីពេលមុន ហើយទទួលបានលទ្ធផលដូចខាងក្រោម៖

១, ក្រុមហ៊ុនបានឯកភាពមិនយកថ្លៃចំណតសម្រាប់ការចូលទៅក្នុងអាកាសយានដ្ឋានអន្តរជាតិសៀមរាបអង្គរ ក្រោមរយៈពេល ១៥នាទី សម្រាប់រថយន្តធុនតូចមិនលើស៧កៅអី និងរយៈពេល៣០នាទី  សម្រាប់ប្រភេទរថយន្តផ្សេងៗទៀត។

២, ក្រុមហ៊ុនបានយល់ព្រមបញ្ចុះតម្លៃបន្ថែមទៀត ក្នុងការប្រើប្រាស់ផ្លូវសម្រាប់គ្រប់ប្រភេទយានយន្ត គ្រប់ប្រភេទ។ ក្នុងនោះ តម្លៃសម្រាប់រថយន្តលក្ខណៈគ្រួសារ និងរថយន្តដឹកទំនិញធុនតូច ពីមុនទាំងផ្លូវ និងចំណតតម្លៃ៤ដុល្លារ សម្រេចបញ្ចុះ៥០% នៅសល់២ដុល្លារ(រយៈពេលមិនគិតចំណត១៥នាទី), រថយន្តដឹកអ្នកដំណើរក្រោម១៩កៅអី និងរថយន្តដឹកទំនិញក្រោម៩តោន តម្លៃសរុប៧.២៥ដុល្លារ សម្រេចបញ្ចុះ៤៥% នៅសល់៤ដុល្លារ(រយៈពេលមិនគិតចំណត៣០នាទី), រថយន្តដឹកអ្នកដំណើរចាប់ពី ២០កៅអីឡើង និងរថយន្តដឹកទំនិញចាប់ពី៩ដល់១០តោន តម្លៃសរុប១១ដុល្លារ សម្រេចបញ្ចុះ៤៥% នៅសល់ ៦ដុល្លារ(រយៈពេលមិនគិតចំណត៣០នាទី)និងរថយន្តដឹកទំនិញទម្ងន់ពី១០ទៅ២០តោន តម្លៃសរុប១២ដុល្លារ សម្រេចបញ្ចុះនៅសល់៣៣% ស្មើនឹង៨ដុល្លារ (រយៈពេលមិនគិតចំណត៣០នាទី)

គួរបញ្ជាក់ថា ចំពោះការបញ្ចុះតម្លៃថ្មីនេះសម្រាប់រយៈពេលពីរឆ្នាំ (២០២៤ និងឆ្នាំ២០២៥) ហើយនឹងត្រូវអនុវត្តចាប់ពីថ្ងៃទី១៥ មករា ឆ្នាំ២០២៤នេះតទៅ៕

The post ក្រុមហ៊ុនបានសម្រេចបញ្ចុះថ្លៃសេវាជិះលើផ្លូវចេញចូលព្រលានយន្តហោះសៀមរាបហើយ appeared first on .

យោងតាមស្មារតីនៃកិច្ចប្រជុំកិច្ចប្រជុំក្រុមការងារចំពោះកិច្ច កាលពីថ្ងៃទី៤ ខែមករា ឆ្នាំ២០២៤ កន្លងទៅ បន្ទាប់ពីការចុះពិនិត្យទីតាំងអាកាសយានដ្ឋានអន្តរជាតិសៀមរាប-អង្គររួចរាល់ ក្រុមការងារចំពោះកិច្ចនឹងជួបជជែកជាមួយក្រុមហ៊ុន Angkor International Airport Investment (Cambodia) Co., Ltd. (AIAI) ដើម្បីរួមគ្នាស្វែងរកដំណោះស្រាយសមស្របរួមមួយ។

ក្រោមការងារចង្អុលបង្ហាញដោយផ្ទាល់ពីសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្រុមការងារចំពោះកិច្ចដោះស្រាយលើតម្លៃសេវាប្រើប្រាស់ផ្លូវចេញចូលអាកាសយានដ្ឋានអន្តរជាតិសៀមរាប-អង្គរ ត្រូវបានបង្កើតឡើងដែលមានលោក ស៊ុន ចាន់ថុល ជាប្រធាន។

ការបង្កើតក្រុមការងារចំពោះកិច្ចនេះ ធ្វើឡើងភ្លាមៗបន្ទាប់ពីក្រុមអ្នកដឹកជញ្ជូនភ្ញៀវទេសចរប្រមាណ ៥០នាក់ បានប្រមូលផ្ដុំគ្នានៅមុខរដ្ឋបាលខេត្តសៀមរាប ដោយស្នើឱ្យអាជ្ញាធរជួយដោះស្រាយបញ្ហាដែលក្រុមហ៊ុនចិនគ្រប់គ្រងព្រលានយន្តហោះសៀមរាបអង្គរយកថ្លៃផ្លូវ ដែលក្រុមហ៊ុនបានសាងសង់ភ្ជាប់ពីព្រលានយន្តហោះមកផ្លូវជាតិលេខ៦ កាលពីថ្ងៃទី៣ ខែមករា។

សំណើរបស់ក្រុមអ្នដឹកជញ្ជូនភ្ញៀវទេសចរណ៍ គឺស្នើសុំទៅក្រុមហ៊ុនធ្វើព្រលានយន្តហោះថ្មីនៃខេត្តសៀមរាប លុបចោលលើការយកសេវានេះ ដែលជាបន្ទុកបន្ថែមសម្រាប់អ្នករកស៊ីដឹកភ្ញៀវ ខណៈក្រុមហ៊ុន បានយកថ្លៃចំណតឡាននៅក្នុងព្រលានរួចទៅហើយ។

សេចក្តីជូនដំណឹងរបស់ក្រុមហ៊ុនវិនិយោគព្រលានយន្តហោះរបស់ចិន ការយកសេវារថយន្តបើកកាត់ផ្លូវកៅស៊ូទៅព្រលានយន្តហោះសៀមរាបអង្គរ (SIA) នឹងចាប់ផ្តើមអនុវត្តន៍ពីថ្ងៃទី១ ខែមករា ឆ្នាំ២០២៤តទៅ។ សេវាទាំងនោះ បែង ចែកជា៤ផ្នែកតាមប្រភេទរថយន្ត ដែលតម្លៃសម្រាប់រថយន្តលក្ខណៈគ្រួសារ និងរថយន្តដឹកទំនិញធុនតូច តម្លៃ៣ដុល្លារ, រថយន្តដឹកអ្នកដំណើរក្រោម១៩កៅអី និងរថយន្តដឹកទំនិញក្រោម៩តោន តម្លៃ៦ដុល្លារ, រថយន្តដឹកអ្នកដំណើរចាប់ពី ២០កៅអីឡើង និងរថយន្តដឹកទំនិញចាប់ពី៩ដល់១០តោន តម្លៃ៩ដុល្លារ និងរថយន្តដឹកទំនិញទម្ងន់ពី១០ទៅ២០តោន តម្លៃ១២ដុល្លារ។ តម្លៃនេះមិនរាប់បញ្ចូលពីថេរវេលាដែលចូលចតក្នុងចំណោតរបស់ព្រលានយន្តហោះឡើយ៕

The post រឿងយកលុយថ្លៃជិះលើផ្លូវចូលព្រលានយន្តហោះសៀមរាប លោក ស៊ុន ចាន់ថុល ចុះពិនិត្យទីតាំងដោះស្រាយបញ្ហាហើយ appeared first on .

ក្នុងឱកាសនោះ សម្តេចធិបតី មានប្រសាសន៍ថា គោលបំណងនៃការបង្កើតព្រលានយន្តហោះអន្តរជាតិសៀមរាបអង្គរ មិនមែនធ្វើចេញតែរូបភាព ហើយជាមោទនភាពដែលមានព្រលានយន្តហោះខ្នាតអន្តរជាតិនោះទេ ប៉ុន្តែភារកិច្ចរបស់រាជរដ្ឋាភិបាលគឺត្រូវធ្វើម៉េចឱ្យព្រលាននេះដំណើរការ ហើយសម្រេចបាននូវគោលដៅ និងធ្វើយ៉ាងណាឱ្យព្រលាននេះក្លាយជាចលករមួយសម្រាប់ជួយលើកស្ទួយជីវភាពរស់នៅរបស់ប្រជាពលរដ្ឋ ជំរុញសេដ្ឋកិច្ចកម្ពុជាផងដែរ។

សម្តេចធិបតី បន្តថា ជាគោលការណ៍ដើម្បីធ្វើឱ្យព្រលានយន្តហោះនេះ ដើរឱ្យបានល្អ កិច្ចការដែលត្រូវធ្វើនោះការយកចិត្តទុកដាក់បន្ថែម ដោយរួមមាន ការរៀបចំការគ្រប់គ្រងឱ្យបានល្អ ធានាធ្វើយ៉ាងណាផ្តល់សេវាគ្រប់ប្រភេទ គ្រប់ជ្រុងជ្រោយ នៅក្នុងព្រលាននេះមានដំណើរការទៅដោយរលូន ត្រូវធ្វើយ៉ាងណាឱ្យការងារទាំងអស់រួមទាំងការងារបដិសណ្ឋារកិច្ច ការងារផ្តល់សេវាផ្សេងៗទាំងសេវានៅខាងក្រៅ និងខាងក្នុងព្រលាន។លើសពីនេះ ធ្វើយ៉ាងណាឱ្យទីនេះជាកន្លែងមួយដែលអ្នកដំណើរឆ្លងកាត់មានអនុស្សាវរីយ៍ល្អ ហើយជាព្រលានយន្តហោះមួយដែលផ្តល់សេវា និងភាពកក់ក្តៅ និងធានាការរៀបចំចាត់ចែងឱ្យបានល្អ។

បន្ថែមទៀតនោះ គឺការពង្រឹងហេដ្ឋារចនាសម្ព័ន្ធតភ្ជាប់ពីក្រុងសៀមរាបមកដល់ព្រលានយន្តហោះ។ក្នុងន័យនេះ គឺពង្រីកផ្លូវជាតិលេខ៦ ពីចំណុចផ្លូវប្រសព្វ រហូតដល់ទីរួមខេត្ត, ការធ្វើរថភ្លើងធុនស្រាល ដើម្បីសម្រួលដល់ការធ្វើដំណើរតាមរថយន្ត,ពង្រីកការតភ្ជាប់ពីខេត្តសៀមរាបទៅកាន់ពិភពលោករួមមានការភ្ជាប់ជើងហោះត្រង់ពីប្រទេសសំខាន់ៗមកខេត្តសៀមរាប, ការពង្រីកវិសាលភាពប័ណ្ណព្រំដែន ,និងការរៀបចំពង្រឹងនូវព្រឹត្តិការណ៍ផ្សេងៗ នៅខេត្តសៀមរាបជាដើម។

សម្តេចធិបតី បានបន្ថែមទៀតថា យើងមិនអាចធ្វើទាំងអស់ក្នុងពេលតែមួយបានទេ តែផែនការជាក់លាក់ក្នុងការពង្រីកការតភ្ជាប់នេះពិតជាសំខាន់ណាស់ គឺធ្វើយ៉ាងណាកាត់បន្ថយការចំណាយ ពេលវេលាក្នុងការធ្វើដំណើរពីក្រុងមកដល់ព្រលានយន្តហោះ និងត្រូវរៀបចំផែនការ និងទាញអត្ថប្រយោជន៍ពីព្រលានថ្មីនេះ សម្រាប់ដល់ប្រជាពលរដ្ឋ។ព្រលាននេះ អាទិភាពសំខាន់សម្រាប់អ្នកនៅមូលដ្ឋាននៅក្នុងខេត្តផ្ទាល់តាមរយៈការបង្កើតការងារផ្សេងៗ ជាពិសេសបង្កលក្ខណៈឱ្យកន្លែងនេះទៅជាចលករមួយជំរុញការអភិវឌ្ឍន៍ផ្សេងៗទៀតនៅតំបន់នេះឱ្យអាចក្លាយជាតំបន់ឧស្សាហកម្ម។

ឆ្លៀតក្នុងឱកាសនោះ សម្តេចធិបតីនាយករដ្ឋមន្រ្តី ក៏បានណែនាំដល់អភិបាល ថ្នាក់ដឹកនាំខេត្ត ស្រុក ឱ្យយកចិត្តទុកដាក់លើការចាប់យកចំណុចខ្លាំងនៅទីនេះ ជំរុញការវិនិយោគ ទេសចរឱ្យច្រើនពីខេត្តយូណាន ប្រទេសចិន មកកាន់ខេត្តសៀមរាប ក៏ដូចជាកម្ពុជា ដើម្បីជំរុញឱ្យការប្រើប្រាស់នូវទេសចរព្រលានថ្មីនេះ ឱ្យអស់សុពលភាព ឱ្យអស់សក្តានុពល ជាពិសេសគឺភ្ជាប់ទំនាក់ទំនងរវាងកម្ពុជា-ចិន។

សម្តេចធិបតី បានគូសបញ្ជាក់ថា ពិធីសម្ពោធនេះជាមួយនឹងផែនការសកម្មភាពជំរុញខេត្តសៀមរាប ក្នុងកម្មវិធី«ទស្សនាសៀមរាបឆ្នាំ២០២៤»និងផែនការគោលរបស់រាជរដ្ឋាភិបាល សម្តេចធិបតីសង្ឈឹមថាឆ្នាំ២០២៤ ជាឆ្នាំនៃការចាប់ផ្តើមរស់ឡើងវិញនៃវិស័យទេសចរនៅក្នុងខេត្តសៀមរាបផងដែរ៕

The post សម្តេចធិបតី ហ៊ុន ម៉ាណែត៖ ការបង្កើតព្រលានយន្តហោះអន្តរជាតិសៀមរាបអង្គរមិនធ្វើចេញតែរូបភាពទេ តែធ្វើយ៉ាងណាឱ្យព្រលាននេះក្លាយជាចលករជំរុញសេដ្ឋកិច្ចកម្ពុជា appeared first on .

តាមរយៈសំណេរនៅលើទំព័រហ្វេសប៊ុកផ្លូវការរបស់ម្តេចធិបតី ហ៊ុន ម៉ាណែត កាលពីថ្ងៃទី១៤ វិច្ឆិកាថា កាលានុវត្តភាពថ្មីនេះ នឹងក្លាយជាសក្តានុពលស្រូបទាញដ៏ខ្លាំងក្លា និងសំខាន់សម្រាប់វិស័យទេសចរណ៍ក្នុងខេត្តសៀមរាប និយាយដោយឡែក ព្រមទាំងវិស័យទេសចរណ៍ទូទាំងប្រទេស និយាយជារួម។ ការណ៍នេះ នឹងអាចទាក់ទាញដល់វិនិយោគិន ក៏ដូចជាផ្តល់ប្រយោជន៍សេដ្ឋកិច្ចមូលដ្ឋានដល់ប្រជាពលរដ្ឋ។

សម្តេចធិបតីបន្តថា ផ្លូវអាកាស គឺជាអាទិភាពគន្លឹះទី២ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណ-ដំណាក់កាលទី១ ហើយក៏ជាកិច្ចការអាទិភាពទី២ នៃបញ្ចកោណទី២ ដោយផ្តោតលើការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងឡូជីស្ទិក ដែលមានគោលដៅយុទ្ធសាស្ត្រផ្តោតលើការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រ ការកសាង និងការអភិវឌ្ឍហេដ្ឋារចនាសម្ព័ន្ធថ្មីៗ។

សូមបញ្ជាក់ដែរថា អាកាសយានដ្ឋានអន្តរជាតិសៀមរាបអង្គរ មានទីតាំងស្ថិតនៅភូមិក្រៀលពង ឃុំពពេល និងភូមិប្រវ៉ាល ឃុំតាយ៉ែក ស្រុកសូទ្រនិគម ខេត្តសៀមរាប។អាកាសយានដ្ឋាននេះ បានចាប់ផ្តើមសាងសង់កាលពីខែមីនា ឆ្នាំ២០២០ ដោយក្រុមហ៊ុន Angkor International Airport Investment (Cambodia)Co.,Ltd (AIAI) ក្រោមទុនវិនិយោគប្រមាណ ១,១០០លានដុល្លារអាមេរិក។

អាកាសយានដ្ឋានថ្មីនេះ មានចំណតសម្រាប់ចតអាកាសយានចំនួន៣៨ ចំណតមានសមត្ថភាពទទួលអ្នកដំណើរតាមផ្លូវអាកាសបាន៧លាននាក់ក្នុងឆ្នាំ២០២៤ និង១២លាននាក់ក្នុងឆ្នាំ២០៤០ ហើយមានសមត្ថភាពផ្ទុកទំនិញតាមផ្លូវអាកាសបានចំនួន១០,០០០តោនក្នុងឆ្នាំ២០២៤ និង២៦,០០០ តោនក្នុងឆ្នាំ២០៤០ខាងមុខ អាចទទួលជើងហោះហើរបានចំនួន ៦៥,៨០០ជើងក្នុងឆ្នាំ២០២៤ និង១១២,៧០០ ជើង ក្នុងឆ្នាំ ២០៤០៕

The post អាកាសយានដ្ឋានអន្តរជាតិសៀមរាបអង្គរ តម្លៃជាង១ពាន់លានដុល្លារ នឹងសម្ពោធឱ្យប្រើប្រាស់ជាផ្លូវការនៅថ្ងៃស្អែកនេះហើយ appeared first on .