លោក អាន ឬទ្ធី កសិករចិញ្ចឹមជ្រូកមួយកន្លែងនៅខាងខេត្តសៀមរាប បានចោទជាសំនួរថា អ្នកដែលនាំចូលសាច់បង្កកមកកម្ពុជា វាមានគុណភាពបានប៉ុន្មាន ជាពិសេសខ្ញុំចង់សួរទៅខាងក្រសួងមានសមត្ថកិច្ចថាតើយើងបានពិនិត្យទៅលើគុណភាពសាច់បង្កកបានកម្រិតប៉ុន្មានដែរ?

លោកលើកឡើងថា បើយើងពង្រឹងនិងលើកកម្ពស់ទៅដល់កសិករនៅក្នុងស្រុក ឱ្យគាត់ចិញ្ចឹមហើយយើងលក់នៅក្នុងស្រុក ខ្ញុំគិតថាវាប្រហែលជាវាបានល្អប្រសើរជាង ដែលយើងនាំចូលពីក្រៅ ហើយមកជាន់ពន្លិចតម្លៃនៅក្នុងស្រុក។

លោកសង្កត់ធ្ងន់ថា«ក្នុងន័យនេះខ្ញុំចង់បានន័យថា ឱ្យតែសាច់បង្កកនោះនាំចូលមកតំាងពីព្រទេសប្រេស៊ីល ឥណ្ឌាក៏ដូចជានាំចូលមកពីបណ្តាប្រទេសផ្សេងទៀត បើសិនសាច់បង្កកទំាងនោះវាមានគុណភាពពិតប្រាកដ ខ្ញុំជឿថាមិនអាចលក់នៅក្នុងតម្លៃក្រោមទីផ្សារហើយមកប្រកួតប្រជែងជាមួយផលិតផលនៅក្នុងស្រុកបាននោះទេ»។

ទាក់ទងនិងសាច់បង្កកឬសាច់កកនេះដែរ បើយោងតាមសមាគមអ្នកចិញ្ចឹមសត្វកម្ពុជា បានបង្ហាញថា អ្នកបរិភោគក្នុងស្រុកគួស្វែងយល់ខ្លះៗអំពីសាច់កក និងគុណវិបត្តិរបស់វា សាច់កកជ្រូកមាន់ ទា អាចនាំចូលពីប្រទេសប្រេស៊ីល និងសាច់គោ និងក្របីមកពីប្រទេសឥណ្ឌាត្រូវបានដឹកតាមកប៉ាល់តាមប្រទេសវៀតណាម។ គុណវិបត្តិរបស់សាច់កក ពេលវាទន់ហើយមិនអាចយកទៅបង្កកឡើងវិញទេដោយវាបាត់គុណភាព សម្រាប់សាច់កកអាចរក្សាទុកបានប្រហែល១ ឆ្នាំ និង៦ខែ ដោយគេដាក់សាធាតុមួយចំនួនដើម្បីរក្សាគុណភាព និងពណ៌របស់សាច់ នៅពេលសាច់កកជិតផុតថ្ងៃកំណត់ត្រូវបានគេលក់ធូៗថ្លៃមកប្រទេសក្រីក្រ។

សមាគមអ្នកចិញ្ចឹមសត្វកម្ពុជាគូសបញ្ជាក់ថា«ស្ថានភាពសាច់កកលើទីផ្សារប្រទេសកម្ពុជា បច្ចុប្បន្ននេះមានការនាំចូលខុសច្បាប់ច្រើនតាមប្រទេសវៀតណាមហើយបានចែកចាយលើទីផ្សារគ្រប់រូបភាព អ្នកលក់សាច់ និងអ្នកចែកចាយសាច់បានយកសាច់មកបន្ទន់ រួចដាក់លាយជាមួយសាច់ក្នុងស្រុកដើម្បីបន្លំភែ្នកអ្នកទិញពេលនោះអ្នកទិញមិនដឹងថាសាច់នោះជាសាច់កកទេ ពេលមកដល់ផ្ទះពួកគាត់ចាប់ផ្តើមលាងទឹក នឹងដាក់ចូលទូកកឡើងវិញ ពេលនោះសាច់ខូចគុណភាពភាគច្រើន ប៉ុន្តែអ្នកទទួលទានមិនសូវបានដឹងរឿងនេះទេ។ តាមពិតប្រជាជនយើងមិនចូលចិត្តសាច់កកទេ ប៉ុន្តែមិនមានព័ត៌មានគ្រប់គ្រាន់ សព្វថ្ងៃអ្នករស់នៅទីក្រុងភ្នំពេញទទួលទានសាច់កកច្រើនជាងគេ ប្រសិនបើបងប្អូនប្រើសាច់កក គួរកុំយកវាទៅកកឡើងវិញ»។

បើតាមលោក អាន ឬទ្ធី កសិករចិញ្ចឹមជ្រូកនៅខេត្តសៀមរាបថា«ទីផ្សាររបស់ប្រទេសប្រេស៊ីលគេលក់ទៅទីផ្សារមួយណា?ខ្ញុំមិនជឿថាស្តង់ដារបស់អឺរ៉ុបវាថោកជាងស្តង់ដានៅស្រុកខ្មែរយើងនោះទេ អីចឹងស្តង់ដានៅអឺរ៉ុប ខ្ញុំក៏ធ្លាប់ធ្វើដំណើរទៅប្រទេសមួយចំនួននៅលើពិភពលោករួមទាំងនៅអឺរ៉ុប អីចឹងខ្ញុំអាចនិយាយបានថាស្តង់ដារស់នៅរបស់ប្រជាពលរដ្ឋគេគឺខ្ពស់ជាងស្តង់ដារបស់ខ្មែរយើង។ដូចនេះបើសិនជាសាច់បង្កកវាមានគុណភាពអាចទទួលទានបានខ្ញុំគិតថាគេមិននាំចូលមកស្រុកខ្មែរទេ បើទោះបីប្រទេសខ្មែរយើងកំពុងមានការអភិវឌ្ឍយ៉ាងណាក៏ដោយ»។

លោកបញ្ជាក់ថា«ខ្ញុំធ្លាប់បានឃើញដោយផ្ទាល់ភ្នែក នៅសាច់បង្កកនាំចូលមកពីប្រទេសប្រេស៊ីលគឺផលិតតាំងពីថ្ងៃទី១១ខែ៩ឆ្នំា២០២១ ហើយបើគិតមកដល់ម៉ោងនេះក្នុងឆ្នាំ២០២៣ វាមានរយៈពេលជិត២ឆ្នាំ។ តើគុណភាពសាច់អ្វីដែលអាចរក្សាទុកបានជិត២ឆ្នំាបែបហ្នឹង វាមិនអាចទេ ទាល់តែវាប្រើសមាសធាតុគីមីណាមួយដើម្បីរក្សាគុណភាពសាច់ឱ្យវានៅរូបរាងជាសាច់ ប៉ុន្តែគុណភាពសាច់ដែលយើងយកមកទទួលទាន យើងមិនដឹងគុណភាពថាវាជាគុណភាពសាច់ឬវាលែងជាសាច់។នេះជាចម្ងល់ដែលយើងត្រូវចោទសួរ»។

លោកបន្តថា ខ្ញុំមិនដឹងថាខាងណាទេដែលអនុញ្ញាតឱ្យមានការនាំចូលសាច់បង្កកប៉ុន្តែយើងត្រូវចោទសួរថាយើងអនុញ្ញាតឱ្យមានការនាំចូលសាច់បង្កកពីខាងក្រៅ តើយើងមានប្រព័ន្ធគ្រប់គ្រងគុណភាពហើយឬនៅ ហើយបើសិនយើងមិនទាន់មានប្រព័ន្ធគ្រប់គ្រងគុណភាពសាច់បង្កកនោះទេ ខ្ញុំគិតថាយើងមិនគួរគម្បីឱ្យមានការនាំចូលមកកម្ពុជាទេ៕ អត្ថបទ៖សារេត

The post ការនាំចូលសាច់បង្កកកំពុងក្លាយជាចម្ងល់ដែលពិបាកក្នុងការស្វែងរកចម្លើយមកអះអាងបញ្ជាក់ពីគុណភាពសាច់ appeared first on .

លោក អាន ឬទ្ធី កសិករចិញ្ចឹមជ្រូកនៅភូមិស្នាសង្គ្រាម ឃុំបាល្ល័ង ស្រុកប្រាសាទបាគង ខេត្តសៀមរាម នៅពេលបច្ចុប្បន្នកំពុងចិញ្ចឹមជ្រូកប្រហែល១ពាន់ក្បាលបានឱ្យដឹងថា តម្លៃជ្រូករស់នៅលើទីផ្សារបើគិតត្រឹមដើមឆ្នំា២០២៣ចាប់ពីខែមករារហូតដល់ខែកុម្ភៈយើងឃើញថាវាមានការវិវត្តន៍ ប៉ុន្តែវាតិចតួចវាមិនឆ្លើយតបទៅនិងកសិករចង់បាន។ បច្ចុប្បន្ននេះកសិករមិនទាមទារទាល់តែតម្លៃជ្រូករស់ឡើងដល់ជាង១២.០០០រៀលក្នុងមួយគីឡូក្រាមដូចកាលឆ្នំា២០២១នោះទេ ខាងកសិករគ្រាន់តែសុំធ្វើយ៉ាងណាឱ្យរាជរដ្ឋាភិបាលក៏ដូចជាក្រសួងពាក់ព័ន្ធជួយរកដំណោះស្រាយយ៉ាងម៉េច ទប់ស្កាត់នៃការធ្លាក់ចុះបន្ថែមទៀត ហើយឱ្យវារីកចម្រើនជាងនេះបន្តិចទៀតទើបអាចឆ្លើយតបបានទៅនិងថ្លៃដើមផលិតរបស់ប្រជាកសិករដែលជាអ្នកចិញ្ចឹមជ្រូក។

លោកលើកឡើងថា នៅពាក់កណ្តាលឆ្នាំ២០២២ តម្លៃជ្រូករស់នៅលើទីផ្សារចាប់ផ្តើមធ្លាក់ចុះហើយអូសបន្លាយរហូតដល់ដាច់ឆ្នំា២០២២។តែដល់ដើមឆ្នាំ២០២៣តម្លៃវាមានកើនឡើងត្រឹមតែ២០០ទៅ៣០០រៀលក្នុងមួយគីឡូក្រាមនៃជ្រូករស់ វាអត់ឆ្លើយតបទៅនិងការចំណាយថ្លៃដើមផលិតរបស់ប្រជាពលរដ្ឋ។ តម្លៃចំណីវាចេះតែឡើងថ្លៃ ប៉ុន្តែដល់ទីផ្សារតម្លៃជ្រូករស់វាអត់ឡើងថ្លៃ។

លោក អាន ឬទ្ធី មានប្រសាសន៍ថា គិតមកដល់ដើមខែកុម្ភៈឆ្នំា២០២៣នេះខ្ញុំអាចនិយាយបានថាប្រជាកសិករមិនតិចជាង៤០ទៅ៥០%នោះទេដែលគាត់បោះបង់ឈប់ចិញ្ចឹមជ្រូកជាស្ថាពរ។ខ្ញុំអាចធានាថាតួលេខនេះពិតប្រាកដ ព្រោះខ្ញុំក៏ជាអ្នកធ្វើការនៅក្នុងសហគមន៍ដែរ គឺគាត់មិនអាចទប់ទល់ទៀតបានទេ។

លោកគូសបញ្ជាក់ថា«សូម្បីតែខ្ញុំខ្លួនឯងនិយាយប្រាប់ដោយស្មោះថាមកដល់ម៉ោងនេះខ្ញុំទប់ទល់លែងរួចហើយ។ខ្ញុំក៏កំពុងតែពិចារណាឆ្ពោះទៅរកការបិទកសិដ្ឋានចិញ្ចឹមជ្រូករបស់ខ្ញុំដែរខណៈពេលនេះខ្ញុំកំពុងតែពង្រីកមុខរបរថ្មីគឺការដំាបន្លែប្រភេទបន្លែសេរីរាង្គនិងបន្លែសុវត្ថិភាព។នៅពេលយើងបាត់បង់ចំណូល មិនត្រឹមតែរូបខ្ញុំទេ»។ 

លោកលើកឡើងថា កសិករនៅទូទំាងប្រទេសជារួមតែនិយាយដោយឡែកសម្រាប់កសិករចិញ្ចឹមជ្រូកតែម្តង សុទ្ធតែមានបំណុលនៅធនាគារនិងនៅមីក្រូហិរញ្ញវត្ថុ។យើងដឹងហើយថាបំណុលនៅធនាគារនិងនៅមីក្រូហិរញ្ញវត្ថុនេះគ្មានករណីលើកលែងណាមួយថាស្ថានភាពសេដ្ឋកិច្ចធ្លាក់ចុះ ជ្រូកជួបបញ្ហាត្រូវបានគេបន្ធូរបន្ថយ បញ្ចុះភាគរយនៃការយកការប្រាក់ឬពន្យាពេលយកការប្រាក់គឺអត់មានទេគឺមានន័យថាដល់ថ្ងៃដល់ខែត្រូវបង់ការប្រាក់ទៅឱ្យគេ។ ខាតទៅលើជ្រូកនេះមិនមែនខាតលើប្រាក់ចំណេញទេគឺខាតទៅលើថ្លៃដើមផលិតជ្រូកតែម្តង អីចឹងខាតទៅលើថ្លៃដើមផលិតជ្រូកផង ហើយខាតទៅលើបង់ការប្រាក់ទៅឱ្យគ្រឹះស្ថានមីក្រូហិរញ្ញវត្ថុនិងធនាគារផងនោះគឺកសិករទប់លែងជាប់ដែលធ្វើឱ្យកសិករពី៤០ទៅ៥០%បង្ខំចិត្តបិទកន្លែងចិញ្ចឹមជ្រូក ហើយទៅធ្វើជាពលករសំណាកស្រុកមានទាំងស្របច្បាប់និងខុសច្បាប់នៅប្រទេសជិតខាងវិញ។

លោកសង្កត់ធ្ងន់ថា«ខ្ញុំមានបទពិសោធន៍លើការចិញ្ចឹមជ្រូកជាង១០ឆ្នំាកន្លងមកនេះ ខ្ញុំគិតថានៅពាក់កណ្តាលឆ្នាំ២០២២ដល់ដើមឆ្នំា២០២៣នេះគឺជាវិបត្តិទីផ្សារជ្រូករស់ដែលអាក្រក់បំផុតដែលខ្ញុំអត់ធ្លាប់ជួប។ ទីផ្សារជ្រូករស់ធ្លាក់ចុះនៅឆ្នំា២០១៤និងឆ្នំា២០១៥ដោយសារបញ្ហាជំងឺត្រចៀកជ្រូកខៀវ,ឆ្នាំ២០១៧មានការធ្លាក់ចុះនិងឆ្នាំ២០១៩ធ្លាក់ចុះម្តងទៀតប៉ុន្តែស្ថានភាពនៃការធ្លាក់ចុះនៅពេលនោះគឺយើងទប់ទល់បានដោយសារវាមានរយៈពេលខ្លី»។

លោកបន្តថា ប៉ុន្តែស្ថានភាពនៃការធ្លាក់ចុះនាពេលបច្ចុប្បន្ននេះមានរយៈពេល៧ខែមកហើយ។អីចឹងសម្រាប់កសិករដូចជាខ្ញុំនិងកសិករខ្នាតតូចនិងលក្ខណៈគ្រួសារគឺយើងបានខ្ចីបុលខាងធនាគារនិងមីក្រូហិរញ្ញវត្ថុត្រឹមតែ៣ខែឬ៤ខែបើយើងមិនព្រមស្តារដើមឬរកដំណោះស្រាយឱ្យតម្លៃជ្រូកអាចលក់បានថ្លៃពី១ម៉ឺនរៀលដល់១២០០០រៀលឡើងវិញទេនោះកសិករដួលរំលំដោយខ្លួនឯងដោយពុំចំាបាច់ទៅបង្ខំគាត់ឱ្យបិទរោងចិញ្ចឹមជ្រូកទេគឺគាត់បិទដោយខ្លួនឯង។

តាមម្ចាស់កសិដ្ឋានចិញ្ចឹមជ្រូកនៅក្នុងខេត្តរៀម «មកដល់ពេលនេះខ្ញុំសូមសំណូមពរជំនួសឱ្យប្រជាពលរដ្ឋដែលជាអ្នកចិញ្ចឹមជ្រូកទំាងអស់សូមឱ្យរាជរដ្ឋាភិបាលនិងក្រសួងពាក់ព័ន្ធទំាងអស់ចាត់វិធានការទប់ស្កាត់ការនាំចូលសាច់បង្កកប្រកបដោយប្រសិទ្ធិភាពកុំធ្វើឱ្យប្រជាកសិករបាត់បង់ជំនឿទុកចិត្តទៅលើការដឹកនាំរបស់រាជរដ្ឋាភិបាលក៏ដូចជាក្រសួងពាក់ព័ន្ធ»៕ អត្ថបទ៖សារេត

The post កសិដ្ឋានចិញ្ចឹមជ្រូកប្រមាណ១ពាន់ក្បាលក្នុងខេត្តសៀមរាបមួយកន្លែងត្រៀមផ្អាកអាជីវកម្មងាកមកដាំបន្លែវិញ appeared first on .