នេះបើយោងតាមប្រសាសន៍របស់ លោក ស៊ុន ចាន់ថុល ឧបនាយករដ្ឋមន្ត្រី និងជាអនុប្រធានទី១ ក្រុមប្រឹក្សាអភិវឌ្ឍកម្ពុជា ថ្លែងក្នុងវេទិកាសារព័ត៌មាន ដែលរៀបចំឡើងដោយក្លិបអ្នកកាសែតកម្ពុជា កាលថ្ងៃទី៣ ខែឧសភា ឆ្នាំ២០២៤ ។

នាឱកាសនោះ លោក ស៊ុន ចាន់ថុល បានលើកឡើងថា ការអូសទាញអ្នកវិនិយោគបរទេសឱ្យមកវិនិយោគនៅកម្ពុជា គឺជាបំណងដ៏ធំធេងរបស់​រាជរដ្ឋាភិបាលអាណត្តិទី៧។ ជាក់ស្តែងរាល់បេសកកម្មនៅក្រៅប្រទេសម្តងៗ សម្តេច​ធិប​តី ហ៊ុន ម៉ាណែត នាយករដ្ឋមន្ត្រី តែងជួបអ្នកវិនិយោគ ដើម្បីបង្ហាញនូវ​ទិដ្ឋភាពអំណោយផល សក្តានុពលរបស់កម្ពុជាបញ្ចុះបញ្ចូលឱ្យចាប់អារម្មណ៍ដាក់ទុនវិនិ​យោគនៅកម្ពុជា ឬពង្រីកការវិនិយោគនៅកម្ពុជាបន្ថែមទៀត។

ជាមួយគ្នានេះ លោកថា រាជរដ្ឋាភិបាលកម្ពុជា ក៏បន្តបើកចំហចំពោះការវិនិយោគ​មកពី​គ្រប់​បណ្តា​ប្រទេសទាំងអស់ ដោយឈរលើភាពបត់បែន និងភាពជាក់ស្តែងនិយម និងការដាក់ចេញគោល​នយោបាយ​ក្នុងការឆ្លើយតប និងដោះស្រាយបញ្ហាប្រឈមរបស់វិនិយោគិន ដែលកំពុងធ្វើប្រតិបត្តិ​អាជី​វ​កម្ម​នៅកម្ពុជា ដើម្បីរក្សាបរិយាកាសវិនិយោគ ក៏ដូចជារក្សាភាពប្រកួតប្រជែងក្នុងគោលបំណងថែរក្សា​វិនិ​យោគិន ដែលមានស្រាប់ និងទាក់ទាញវិនិយោគិនថ្មីៗ។

គួរបញ្ជាក់ដែរថា បើតាមការបញ្ជាក់ពីក្រុមប្រឹក្សាអភិវឌ្ឍកម្ពុជា រយៈពេល៤ខែ ឆ្នាំ២០២៤ ពោលគឺចាប់ពីខែមករា ដល់មេសា ក្រុមប្រឹក្សាអភិវឌ្ឍកម្ពុជា បានអនុម័តគ​ម្រោ​ង​​សរុបបានចំនួន១២៨ គម្រោង ដែលចំនួននេះមានការកើនឡើង ៩៧ភាគរយ បើប្រៀបធៀបនឹងរយៈពេលដូ​ចគ្នាកាលពីឆ្នាំ២០២៣។

ក្នុងចំណោមគ​ម្រោ​ង​​ទាំងចំនួន១២៨ គម្រោងនោះ គឺមានទំហំទុនវិនិយោគសរុបមាន១.៩ពាន់លានដុល្លារអាមេរិក។ ដោយឡែក ក្នុងរយៈពេល៨ខែ នៃរាជរដ្ឋាភិបាលអាណត្តិទី៧ ក្រុមប្រឹក្សាអភិវឌ្ឍន៍កម្ពុជាបានអនុម័តគម្រោងសរុបបានចំនួន២៣២ ដែលមានទំហំទុនវិនិយោគសរុបមានជាង៥ពាន់លានដុល្លារអាមេរិក។

ចំពោះកត្តាដែលធ្វើឱ្យកម្ពុជាជោគជ័យ ក្នុងការទាញអ្នកវិនិយោគ គឺដោយសារតែកម្ពុជាសុខសន្តិភាព ស្ថេរភាពនយោបាយ មានលំនឹងម៉ាក្រូសេដ្ឋកិច្ច កត្តាភូមិសាស្រ្ត មិនមានការរើសអើងអ្នកវិនិយោគ និងមានកម្លាំងយុវជនដែលមានអាយុតិចជាង២៥ឆ្នាំ មានប្រមាណ៦៥ភាគរយ៕ អត្ថបទ៖ រង្សី

The post រដ្ឋាភិបាល នៅតែបន្តបើកចំហចំពោះការវិនិយោគ​មកពី​គ្រប់​បណ្តា​ប្រទេស ខណៈសន្ទុះវិនិយោគកើនឡើង ៩៧% appeared first on .

សម្តេចតេជោ ថ្លែងដូច្នេះ ក្នុងជំនួបសម្ដែងការគួរសម និងពិភាក្សាការងាររវាងសម្តេច ជាមួយគណៈប្រតិភូក្រុមហ៊ុន Toyota Tsusho Corporation ដឹកនាំដោយ លោក ICHIRO KASHITANI ប្រធាននាយកប្រតិបត្តិ ក្រុមហ៊ុន តូយ៉ូតា ស៊ុយស៊ូ និង ឧកញ៉ា គង់ នួន ប្រធានក្រុមហ៊ុន តូយ៉ូតា ស៊ុយស៊ូ មេនូហ្វេកឆឺរីង (ខេមបូឌា) នៅវិមានព្រឹទ្ធសភា រាជធានីភ្នំពេញ នាព្រឹកថ្ងៃទី៣ ខែឧសភា ឆ្នាំ២០២៤។

ជាកិច្ចចាប់ផ្ដើម សម្ដេចតេជោ បានស្វាគមន៍យ៉ាងកក់ក្តៅចំពោះគណៈប្រតិភូក្រុមហ៊ុន តូយ៉ូតា ស៊ុយស៊ូ ដែលបានធ្វើទស្សនកិច្ចនៅកម្ពុជាដើម្បីចូលរួមក្នុងពិធីសម្ពោធបើកដំណើរការរោងចក្រ តម្លើងរថយន្ត Toyota នៅតំបន់សេដ្ឋកិច្ចពិសេសរ៉ូយ៉ាល់ភ្នំពេញ កាលពីម្សិលមិញ  ខណៈបានចាត់ទុកថា វាគឺជាសមិទ្ធផលមួយ និងបង្ហាញពីដំណើរការអភិវឌ្ឍស្ថិរភាពនយោបាយ កំណើនសេដ្ឋកិច្ចនៅដំណើរការល្អប្រសើរ ហើយការបើកសម្ពោធរោងចក្រតូយ៉ូតានេះ ជាភស្តុតាងស្រាប់។

សម្ដេចតេជោ បានបន្តថា អ្វីអ្វីតែងតែនិយាយពីមរតកតេជោ មរតកនោះគឺមានសន្តិភាព និងស្ថិរភាពនយោបាយ ដោយសារសម្ដេចបានពន្លត់សង្រ្គាម ដែលមិនធ្លាប់មាននៅក្នុងប្រវត្តិសាស្ត្រកម្ពុជាជាង៥០០ឆ្នាំ។ ហើយសុខសន្តិភាពបានបន្តមកតាំងពីឆ្នាំ១៩៩៨មក គឺមានរយៈពេល២៦ឆ្នាំហើយ។

បន្ថែមពីនេះ សម្ដេចតេជោ ក៏បានស្នើថា៖«សូមឱ្យអ្នកវិនិយោគក្រុមហ៊ុនបរទេស មើលឃើញថា កម្ពុជា គឺមានស្ថិរភាពយូរអង្វែងតទៅទៀត ដោយសារថា គណបក្សប្រជាជននៅតែបន្តដឹកនាំកម្ពុជា កម្ពុជានៅតែបន្តមានសន្តិភាពទៅមុខទៀត ដើម្បីអោយអ្នកវិនិយោគជឿជាក់លើកម្ពុជា ដែលប្រទេសមួយចំនួនក្នុងតំបន់មិនមាន ហើយអ្នកវិនិយោគគួរមកវិនិយោគនៅកម្ពុជា»។

គួរបញ្ជាក់ដែរថា តាមរយៈជំនួបពិភាក្សាការងារជាមួយសម្តេចតេជោ លោក ICHIRO KASHITANI ប្រធាននាយកប្រតិបត្តិ ក្រុមហ៊ុន តូយ៉ូតា ស៊ុយស៊ូ ក៏បានថ្លែងអំណរគុណចំពោះពាក្យពេជន៍ដ៏មានអត្ថន័យរបស់ សម្ដេចតេជោ និងបានមានប្រសាសន៍ថា បើពិភពលោកនេះ មានអ្នកដែលមានគំនិតដូច សម្ដេចតេជោ ប្រទេសនានានឹងមានសុខសន្តិភាព ដូចកម្ពុជា។ ជាថ្មីម្តងទៀត លោកក៏បានប្ដេជ្ញាថា នឹងចូលរួមយ៉ាងសកម្ម អនុវត្តតាមអនុសាសន៍របស់ប្រមុខដឹកនាំកម្ពុជា ចូលរួមជាមួយរាជរដ្ឋាភិបាល បង្កើនការផលិត និង ផ្ដល់ការហ្វឹកហ្វឺនជំនាញរថយន្តដល់ប្រជាជនកម្ពុជាផងដែរ៕ អត្ថបទ៖ រង្សី

The post សម្ដេចតេជោ ស្នើឱ្យអ្នកវិនិយោគបរទេសជឿជាក់លើកម្ពុជា ថាកម្ពុជាគឺមានស្ថិរភាពយូរអង្វែងតទៅទៀត appeared first on .