ថ្លែងក្នុងកិច្ចប្រជុំ កាលថ្ងៃទី៤ ខែមីនា ឆ្នាំ២០២៦  ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជាភ្នំពេញ បានបង្ហាញពីតួនាទីយ៉ាងសកម្មរបស់កម្ពុជាក្នុងនាមជារដ្ឋសមាជិកអាស៊ាន ក្នុងការលើកកម្ពស់កត្តាសំខាន់ៗទាំងនេះជាបន្តបន្ទាប់។ សមិទ្ធផលសំខាន់ៗរួមមាន ការអនុម័តផែនការមេគ្រប់ជ្រុងជ្រោយស្តីពីប្រព័ន្ធដឹកជញ្ជូនអន្តរមធ្យោបាយ និងភស្តុភារកម្មកម្ពុជា ឆ្នាំ២០២៣-២០៣៣, ការដាក់ឱ្យដំណើរការផ្លូវល្បឿនលឿនភ្នំពេញ-ក្រុងព្រះសីហនុ និងអាកាសយានដ្ឋានអន្តរជាតិតេជោដែលទើបនឹងបើកដំណើរការថ្មីៗនេះ ក៏ដូចជាគម្រោងកំពុងដំណើរការដូចជា ផ្លូវល្បឿនលឿនភ្នំពេញ-បាវិត ព្រែកជីកហ្វូណនតេជោ និងការពង្រីកកំពង់ផែស្វយ័តក្រុងព្រះសីហនុ។

លើសពីនេះ ឯកឧត្តមបានលើកឡើងពីការពិនិត្យឡើងវិញនូវគោលនយោបាយពាណិជ្ជកម្មឆ្នាំ២០២៥ របស់អង្គការពាណិជ្ជកម្មពិភពលោក (WTO) ដែលបានទទួលស្គាល់ការអនុវត្តពេញលេញរបស់កម្ពុជាលើការប្តេជ្ញាចិត្តនៃកិច្ចព្រមព្រៀងកិច្ចសម្រួលពាណិជ្ជកម្ម ចាប់តាំងពីខែមករា ឆ្នាំ២០២៥។

ជាមួយគ្នានេះ ឯកឧត្តម ក៏បានលើកទឹកចិត្តដល់វិនិយោគិន ឱ្យចាប់យកកាលានុវត្តវិនិយោគនៅក្នុងប្រទសកម្ពុជាឱ្យបានឆាប់រហ័ស ដោយបានគូសបញ្ជាក់អំពីកត្តាសំខាន់ៗមួយចំនួនរួមមាន រាជរដ្ឋាភិបាលដែលគាំទ្រវិស័យឯកជន កម្លាំងពលកម្មវ័យក្មេងនិងស្វាហាប់ ស្ថិរភាពម៉ាក្រូសេដ្ឋកិច្ច និងរបបវិនិយោគដ៏បើកទូលាយរបស់កម្ពុជា ដែលកត្តាទាំងនេះបានផ្តល់នូវឱកាសវិនិយោគដ៏មានសក្តានុពល។ តាមរយៈការគាំទ្រពីកំណែទម្រង់គោលនយោបាយ ការសម្រួលនីតិវិធី និងការតភ្ជាប់ហេដ្ឋារចនាសម្ព័ន្ធប្រកបដោយប្រសិទ្ធភាព កម្ពុជាអាចផ្តល់ជូនវិនិយោគិននូវការចូលទៅកាន់ទីផ្សារពិភពលោក ដែលមានអ្នកប្រើប្រាស់រាប់ពាន់លាននាក់។

សូមជម្រាប់ថា នេះគឺជាឆ្នាំទី៣ ជាប់ៗគ្នា ដែលកិច្ចប្រជុំកំពូលធុរកិច្ចអាស៊ាន-កម្ពុជាត្រូវបានរៀបចំឡើងនៅក្នុងរាជធានីភ្នំពេញ។ សម្រាប់កិច្ចប្រជុំឆ្នាំ២០២៦ នេះ មានការចូលរួមពីក្រុមហ៊ុនជាតិ និងអន្តរជាតិជាង ៣០០ ក្រុមហ៊ុន និងថ្នាក់ដឹកនាំធុរកិច្ចជិត ៧០០ នាក់។ លើសពីតួលេខទាំងនេះ វេទិកានេះដើរតួជាមជ្ឈមណ្ឌលដ៏សំខាន់សម្រាប់ការផ្សារភ្ជាប់ទំនាក់ទំនងកម្រិតខ្ពស់ និងការផ្គូរផ្គងអាជីវកម្ម ដែលជំរុញសមាហរណកម្មតំបន់ និងស្មារតីសហការដើម្បីជំរុញអាស៊ានឆ្ពោះទៅមុខ៕ អត្ថបទ៖ ហ្សាលីន

The post ជាង ៣០០ក្រុមហ៊ុន និងអ្នកវិនិយោគជិត៧០០ នាក់ បានមកប្រជុំកំពូលធុរកិច្ចអាស៊ាន នៅកម្ពុជា appeared first on .

ថ្លែងក្នុងបទសម្ភាសន៍ជាមួយអ្នកសារព័ត៌មាន ក្រោយពេលបញ្ចប់កិច្ចជំនួបជាមួយគណៈប្រតិភូក្រុមហ៊ុនមកពីកូរ៉េ កាលពីពេលថ្មីៗនេះ លោក ស៊ុន ចាន់ថុល បានលើកឡើងថា ការទាក់ទាញអ្នកវិនិយោគឱ្យមកវិនិយោគនៅកម្ពុជាជារឿងសំខាន់ណាស់ ដោយលោកបានព្យាយាមពន្យល់អំពីការរីកចម្រើនរបស់ប្រទេសជាតិកម្ពុជាមានសុខសុវត្ថិភាព ស្ថេរភាពនយោបាយ ម៉ាក្រូសេដ្ឋកិច្ច ក៏ដូចជាការលើកទឹកចិត្តនានា។ដែលធ្វើយ៉ាងណាឱ្យគាត់យល់អំពីស្ថានភាពកម្ពុជា ហើយអញ្ជើញគាត់មកដាក់ទុននៅកម្ពុជា ដើម្បីបង្កើតការងារជូនប្រជាពលរដ្ឋខ្មែរធ្វើកាន់តែច្រើន។

លោកបញ្ជាក់ថា «អ្នកវិនិយោគដែលគ្រោងមកវិនិយោគគឺពួកគេច្រើនមើលទីតាំងណាដែលដាក់ទុនទៅអាចចំណេញដល់គាត់ ហើយខ្ញុំជឿជាក់ថាការដាក់នៅកម្ពុជា ជាការផ្តល់ផលចំណេញ ដូចជាលើការដឹកពីកម្ពុជាទៅសហរដ្ឋអាមេរិកតម្លៃពន្ធទាប ម្យ៉ាងទៀតបើអ្នកវិនិយោគនោះមានរោងចក្រនៅវៀតណាមឬថៃ គាត់មកធ្វើនៅកម្ពុជាទៀត គឺអាចផ្គុំគ្នាទៅវិញទៅមកវិនិយោគរួមគឺចំណេញកាន់តែច្រើន។ដូច្នេះហើយ យើងខំប្រឹងប្រែងទាក់ទាញឱ្យមកដាក់ទុនមកវិនិយោគនៅកម្ពុជា»។

បើតាមលោក ស៊ុន ចាន់ថុល លោកចង់ឱ្យអ្នកវិនិយោគដែលចូលមកវិនិយោគនៅកម្ពុជាទៅលើវិស័យអេឡិចត្រូនិច, វិស័យយានយន្តជាដើម។ដោយលោកគូសបញ្ជាក់ថា បើយើងចង់បានប្រទេសយើងក្លាយទៅជាប្រទេសមានចំណូលខ្ពស់ឆ្នាំ២០៥០ យើងមិនអាចនៅតែទទួលអ្នកវិយោគដាក់ទុនវិនិយោគលើរោងចក្រកាត់ដេរនោះទេ។ក្នុងន័យនេះ មិនមែនរោងចក្រកាត់ដេរមិនសំខាន់នោះទេ អាចផ្តល់ការងារដល់ប្រជាពលរដ្ឋ តែតម្លៃបន្ថែមតិចពេក។ ប៉ុន្តែបើយើងទៅផ្គុំឡាន ធ្វើអេឡិចត្រូនិចគឺកាន់តែល្អ។អីចឹងបានខ្ញុំស្នើអ្នកវិនិយោគទាំងនោះឱ្យពិនិត្យពិចារណាដាក់នៅកម្ពុជា នេះហើយទើបយើងអាចក្លាយទៅជាប្រទេសមានចំណូលខ្ពស់នៅឆ្នាំ២០៥០បាន ដោយសារបុគ្គលិក អ្នកធ្វើការបានប្រាក់ខែច្រើន តម្លៃបន្ថែមច្រើននៅកម្ពុជា។

សូមបញ្ជាក់ផងដែរថា នៅក្នុងខែមករា ឆ្នាំ២០២៤នេះ កម្ពុជាទទួលបានគម្រោងវិនិយោគថ្មី និងគម្រោងពង្រីកផលិតកម្មប្រមាណ៣២គម្រោង ក្នុងទុនប្រមាណ១៨៧លានដុល្លារ និងអាចបង្កើរការងារបានជិត២៩ពាន់កន្លែងផងដែរ។គម្រោងទាំងនោះភាគច្រើនជាគម្រោងរោងចក្រផលិតគ្រឿងអេឡិចត្រូនិក, រោងចក្រផ្គុំដំឡើងម៉ូតូ, រោងចក្រកែច្នៃដេរសម្លៀកបំពាក់ជាដើម។ចំណែកក្នុងខែក្នុងកុម្ភៈវិញ មានគម្រោងប្រមាណ៣៧ទៀតមកដាក់ទុនប្រមាណជិត១,២ពាន់លានដុល្លារវិនិយោគនៅកម្ពុជា រួមមានគម្រោងថ្មី និងគម្រោងពង្រីកផលិតកម្មចំនួន៣២គម្រោងផងដែរ៕

The post លោក ស៊ុន ចាន់ថុល៖ បើចង់ឱ្យកម្ពុជាក្លាយជាប្រទេសមានចំណូលខ្ពស់ឆ្នាំ២០៥០ យើងមិនអាចទទួលតែអ្នកវិនិយោគលើរោងចក្រកាត់ដេរនោះទេ appeared first on .