អ្នកឧកញ៉ា ហេង សៀ ផ្ញើសារអបអរសាទរជូនពរ ឧកញ៉ា លី ប៉ោយូ ក្នុងឱកាសដែលត្រូវបានព្រះមហាក្សត្រផ្ដល់គោរមងារ «អ្នកឧកញ៉ា»

ឧកញ៉ាដែនដី — Sat, 26 Aug 2023 11:57:51 +0000

អ្នកឧកញ៉ា ហេង សៀ ផ្ញើសារលិខិតសម្ដែងនូវការអបអរសាទរ និងសូមគោរពជូនពរ ឧកញ៉ា លី ប៉ោយូ ប្រធានប្រតិបត្តិក្រុមហ៊ុន Lee International Group Co., Ltd និងជាសមាជិកក្រុមប្រឹក្សាភិបាលសមាគមឧកញ៉ាកម្ពុជា ក្នុងឱកាសដែល ព្រះករុណា ព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ផ្ដល់គោរមងារជា «អ្នកឧកញ៉ា»។

ព្រះរាជទានត្រាស់បង្គាប់ផ្តល់គោរមងារ «អ្នកឧកញ៉ា» ជាសក្ខីភាពឆ្លុះបង្ហាញ អំពីកិច្ចខិតខំប្រឹងប្រែង ទាំងកម្លាំងកាយចិត្ត ដោយមិនខ្លាចនឿយហត់របស់ អ្នកឧកញ៉ា ក្នុងបុព្វហេតុដើម្បីជួយសង្គមជាតិ និងចូលរួមចំណែកដល់ការអភិវឌ្ឍន៍សេដ្ឋកិច្ចប្រទេសជាតិ ឱ្យកាន់តែរីកចម្រើន។ ការប្រទាននេះពិតជាស័ក្តិសម និងផ្ដល់កិត្តិយសដ៏ឧត្តុង្គឧត្តមសម្រាប់អ្នកឧកញ៉ា និងក្រុមគ្រួសារ។

ក្នុងឱកាសដ៏ប្រសើរថ្លៃថ្លានេះ អ្នកឧកញ៉ា ហេង សៀ ក៏សូមបួងសួងដល់វត្ថុស័ក្តិសិទ្ធិទាំងអស់ក្នុងលោក ទេវតាថែរក្សាព្រះរាជាណាចក្រកម្ពុជា សូមជួយអភិបាលគ្រងរក្សា ប្រោះព្រំប្រសិទ្ធពរ បវរមហាប្រសើរជូន អ្នកឧកញ៉ា លី ប៉ោយូ ព្រមទាំងក្រុមគ្រួសារជាទីស្រឡាញ់ សូមបានប្រកបដោយព្រះពុទ្ធពរ និងពរទាំង ៤ប្រការ គឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

The post អ្នកឧកញ៉ា ហេង សៀ ផ្ញើសារអបអរសាទរជូនពរ ឧកញ៉ា លី ប៉ោយូ ក្នុងឱកាសដែលត្រូវបានព្រះមហាក្សត្រផ្ដល់គោរមងារ «អ្នកឧកញ៉ា» appeared first on .

ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» ជូនម្ចាស់កាស៊ីណូមួយកន្លែង នៅក្រុងបាវិត

ឧកញ៉ាដែនដី — Thu, 24 Aug 2023 01:00:19 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ផ្តល់គោរមងារ ឧកញ៉ា លី ប៉ោយូ អគ្គនាយកកាស៊ីណូពិភពថ្មី នៅក្រុងបាវិត ជា «អ្នកឧកញ៉ា» នៅថ្ងៃទី ១៨ ខែសីហា ឆ្នាំ២០២៣ តាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន។

ឧកញ៉ា លី ប៉ោយូ កើតក្នុងឆ្នាំ១៩៤៧ នៅខេត្តពោធិ៍សាត់ ជាអ្នកជំនួញចាស់វស្សាមួយរូបនៅខេត្តស្វាយរៀង ដែលបានទទួលសិទ្ធិវិនិយោគចំណតរថយន្ត ក្រុងបាវិត រយៈពេល ៣០ឆ្នាំ។ លោកឧកញ៉ា ជាអគ្គនាយកកាស៊ីណូពិភពថ្មី, ប្រធានប្រតិបត្តិក្រុមហ៊ុន Lee International Group Co., Ltd និងជាសមាជិកក្រុមប្រឹក្សាភិបាលសមាគមឧកញ៉ាកម្ពុជា។

ជានិច្ចកាល អ្នកឧកញ៉ា លី ប៉ោយូ តែងតែចូលរួមបរិច្ចាគថវិកាផ្ទាល់ខ្លួន ជួយដល់សង្គមជាតិ ដូចជាលោកបានឧបត្ថម្ភថវិកាចំនួន ៥ពាន់ដុល្លារ ជូនកាកបាទក្រហមកម្ពុជា ដើម្បីអបអរទិវា ៨ ឧសភា ២០២៣ ខណៈដែលកាលឆ្នាំ២០២២ អ្នកឧកញ៉ា ក៏បានបរិច្ចាគថវិកាចំនួន២០,០០០ដុល្លារអាមេរិក ចូលរួមជាមួយកាកបាទក្រហមកម្ពុជា ព្រមទាំងការបរិច្ចាគថវិកាជួយកិច្ចការសប្បុរសធម៌ជាច្រើនទៀត។ អ្នកឧកញ៉ា ត្រូវបានទទួលស្គាល់ និងផ្តល់តម្លៃតាមរយៈគ្រឿងឥស្សរិយយសជាច្រើនពីសំណាក់រាជរដ្ឋាភិបាលកម្ពុជា រួមទាំងគ្រឿងឥស្សរិយយសថ្នាក់កំពូល «ជាតូបការ» ពីព្រះមហាក្សត្រផងដែរ៕

The post ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» ជូនម្ចាស់កាស៊ីណូមួយកន្លែង នៅក្រុងបាវិត appeared first on .