អ្នកឧកញ៉ា សុទ្ធី ម៉ូនីកា

អ្នកឧកញ៉ា លឹម រស់ និងអ្នកឧកញ៉ា សុទ្ធី ម៉ូនីកា ប្រកាសចូលរួមឧបត្ថម្ភថវិកា ចំនួន៥០ម៉ឺនដុល្លារ ជួយដល់កងទ័ព ជួរមុខកម្ពុជា និងជនភៀសសឹក តាមរយៈសម្តេចតេជោ ហ៊ុន សែន

ឧកញ៉ាដែនដី — Thu, 11 Dec 2025 03:26:07 +0000

អ្នកឧកញ៉ា លឹម រស់ និងអ្នកឧកញ៉ា សុទ្ធី ម៉ូនីកា បានប្រកាសចូលរួមឧបត្ថម្ភថវិកា ចំនួន៥០ម៉ឺនដុល្លារ ជួយដល់ កងទ័ពជួរមុខកម្ពុជា ដែលឈរជើងនៅបណ្តោយព្រំដែនកម្ពុជា-ថៃ និងជនភៀសសឹក តាមរយៈសម្តេចតេជោ ហ៊ុន សែន ប្រធានព្រឹទ្ធសភា។

ការចូលរួមឧបត្ថម្ភថវិការបស់ អ្នកឧកញ៉ា លឹម រស់ និងអ្នកឧកញ៉ា សុទ្ធី ម៉ូនីកា គឺជាការចូលរួមចំណែកលើកទឹកចិត្ត ដល់កងទ័ពកម្ពុជាដ៏អង់អាចក្លាហានរបស់កម្ពុជា ដែលកំពុងឈរជើងជាប់ជាប្រចាំ ដើម្បីការពារបូរណភាពទឹកដី នៅតាមបណ្តោយព្រំដែនកម្ពុជា-ថៃ។

សម្តេចតេជោ ហ៊ុន សែន ថ្លែងអំពាវនាវប្រជាពលរដ្ឋទាំងអស់ ឱ្យចូលរួមឧបត្ថម្ភតាមការស្ម័គ្រចិត្តដល់កងទ័ព ដើម្បីបង្ហាញពីភាពរួបរួមគ្នា ជាធ្លង់មួយនៃខឿនការពារជាតិរបស់កម្ពុជា។ ឆ្លៀតឱកាសនេះ យើងខ្ញុំសូមបួងសួងដល់ ទេវតារក្សាទឹកដីនៃព្រះរាជាណាចក្រកម្ពុជា បុព្វបុរសខ្មែរគ្រប់ព្រះអង្គ និងវត្ថុសក្តិសិទ្ធិក្នុងលោក សូមតាមថែរក្សាការពារកងទ័ពកម្ពុជារបស់យើង ឱ្យជួបប្រទះតែសេចក្តីសុខ ជៀសផុតពីជំងឺដង្កាត់ទាំងឡាយ ហើយឈ្នះអស់ខ្មាំងសត្រូវ៕

The post អ្នកឧកញ៉ា លឹម រស់ និងអ្នកឧកញ៉ា សុទ្ធី ម៉ូនីកា ប្រកាសចូលរួមឧបត្ថម្ភថវិកា ចំនួន៥០ម៉ឺនដុល្លារ ជួយដល់កងទ័ព ជួរមុខកម្ពុជា និងជនភៀសសឹក តាមរយៈសម្តេចតេជោ ហ៊ុន សែន appeared first on .

ព្រះមហាក្សត្រ ប្រោសព្រះរាជទានគ្រឿងឥស្សរិយយស «ជាតូបការ» ជូនភរិយាអ្នកឧកញ៉ា លឹម រស់

ឧកញ៉ាដែនដី — Mon, 10 Jun 2024 07:21:24 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យ ប្រោសព្រះរាជទានគ្រឿងឥស្សរិយយស «ជាតូបការ» ជូនអ្នកឧកញ៉ា សុទ្ធី ម៉ូនីកា ត្រូវជាភរិយារបស់អ្នកឧកញ៉ា លឹម រស់ សហស្ថាបនិកក្រុមហ៊ុន អាយអិនជី ហូលឌីង (I.N.G Holding) កាលថ្ងៃទី៨ ខែឧសភា ឆ្នាំ២០២៤។

តាមរយៈព្រះរាជក្រឹត្យលេខ នស/រកត/០៥២៤/៤៣៤ ចុះថ្ងៃទី០៨ ខែឧសភា ឆ្នាំ២០២៤ តាមសំណើរបស់ក្រសួងមហាផ្ទៃ នេះ ព្រះមហាក្សត្របានប្រោសព្រះរាជទានគ្រឿងឥស្សរិយយស តាមលំដាប់ថ្នាក់ ដល់មន្ត្រីរាជការ និងសប្បុរសជន ១២រូប។ ក្នុងនោះ អ្នកឧកញ៉ា សុទ្ធី ម៉ូនីកា, ឧកញ៉ា ម៉ុង ឃុន និងឧកញ៉ា ស៊ន សុទ្ធី ព្រមទាំង ឯកឧត្តម ប៉េង ពោធិ៍សា និងបណ្ឌិត ចិន សាធាន ទទួលបានគ្រឿងឥស្សរិយយសថ្នាក់ខ្ពស់បំផុត ជាតូបការ។

សូមជម្រាបថា អ្នកឧកញ៉ា សុទ្ធី ម៉ូនីកា សមាជិកសកម្មនៃសមាគមឧកញ៉ាកម្ពុជា ជានាយិកាក្រុមហ៊ុនផ្តល់សេវាកម្មអ៊ីនធើណែត Online។ លោកស្រីទទួលបានការប្រោសព្រះរាជទានតែងតាំងជា ឧកញ៉ា ដោយព្រះរាជក្រឹត្យលេខ នស/រកត/០៥១០/៣៦៣ ចុះថ្ងៃទី០៥ ខែឧសភា ឆ្នាំ២០១០ និងទទួលបានការត្រាស់បង្គាប់ផ្ដល់គោរមងារជា អ្នកឧកញ៉ា ដោយព្រះរាជក្រឹត្យលេខ នស/រកត/០៤២៣/៥៩៥ ចុះថ្ងៃទី០៦ ខែមេសា ឆ្នាំ២០២៣៕

The post ព្រះមហាក្សត្រ ប្រោសព្រះរាជទានគ្រឿងឥស្សរិយយស «ជាតូបការ» ជូនភរិយាអ្នកឧកញ៉ា លឹម រស់ appeared first on .

អ្នកឧកញ៉ា លឹម រស់ និងលោកជំទាវអ្នកឧកញ៉ា សុទ្ធី ម៉ូនីកា បរិច្ចាគថវិកា ៥ម៉ឺនដុល្លារ ជូនកាកបាទក្រហមកម្ពុជា

រ៉េត សុកធា — Fri, 03 May 2024 07:22:16 +0000

អ្នកឧកញ៉ា លឹម រស់ និងលោកជំទាវអ្នកឧកញ៉ា សុទ្ធី ម៉ូនីកា បានបរិច្ចាគថវិកាចំនួន ៥ម៉ឺនដុល្លារ ចូលរួមជាមួយកាកបាទក្រហមកម្ពុជា ក្នុងឱកាសខួប១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៤។

ជារៀងរាល់ឆ្នាំ អ្នកឧកញ៉ា លឹម រស់ និងលោកជំទាវអ្នកឧកញ៉ា សុទ្ធី ម៉ូនីកា តែងតែចូលរួមបរិច្ចាគទ្រព្យធនផ្ទាល់ខ្លួនជូនដល់កាកបាទក្រហមកម្ពុជា និងចូលរួមឧបត្ថម្ភថវិកាជួយដល់យុទ្ធនាការផ្សេងៗ របស់ប្រមុខរាជរដ្ឋាភិបាល ព្រមទាំងបានចូលរួមឧបត្ថម្ភដល់កម្មវិធីសប្បុរសជាច្រើនទៀត។

សូមជម្រាបថា ខួប១៦១ ទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា ឆ្នាំ២០២៤ នឹងប្រារព្វឡើងក្រោមប្រធានបទ «រួមគ្នាជាមួយកាកបាទក្រហមកម្ពុជា ដើម្បីសហគមន៍មានសុខភាពល្អ និងមានភាពធន់នឹងអាកាសធាតុ»។ ថវិកាដែលទទួលបានពីសប្បុរសជន សមាគមជាតិមួយនេះនឹងប្រើប្រាស់ដើម្បីបន្តផ្តល់សេវាកម្មមនុស្សធម៌ ដោះស្រាយបញ្ហាប្រឈមនានា បន្តពង្រឹងភាពធន់សហគមន៍ និងជួយសម្រាលទុក្ខលំបាកប្រជាពលរដ្ឋរងគ្រោះ និងងាយរងគ្រោះបំផុត តាមគោលការណ៍គ្រឹះរបស់ចលនាអន្តរជាតិកាកបាទក្រហម និងអឌ្ឍចន្ទក្រហម៕

The post អ្នកឧកញ៉ា លឹម រស់ និងលោកជំទាវអ្នកឧកញ៉ា សុទ្ធី ម៉ូនីកា បរិច្ចាគថវិកា ៥ម៉ឺនដុល្លារ ជូនកាកបាទក្រហមកម្ពុជា appeared first on .

អ្នកឧកញ៉ាប្តីប្រពន្ធមួយគូរនេះកាន់កាប់ភាគហ៊ុន និងគ្រប់គ្រងក្រុមហ៊ុនជាច្រើននៅកម្ពុជា

ឧកញ៉ាកោះក្របី — Thu, 30 Nov 2023 07:05:24 +0000

ពាណិជ្ជករប្តីប្រពន្ធមួយគូរ គឺអ្នកឧកញ៉ា លឹម រស់ និងអ្នកឧកញ៉ា សុទ្ធី ម៉ូនីកា ជាអ្នករកស៊ីដ៏ចាស់វស្សាមួយរូបក្នុងពិភពជំនួញនៅប្រទេសកម្ពុជា ស្របពេលមុខជំនួញរបស់ប្តីប្រពន្ធមួយគូរនេះសុទ្ធតែស្ថិតក្នុងវិស័យសំខាន់ៗ ដូចជាក្រុមហ៊ុន សំណង់ និងអចលនទ្រព្យ, សេវាកម្មចែកចាយអ៊ិនធ័រណេត និងក្រុមហ៊ុន ផលិតស៊ីម៉ងត៍ជាដើម។

អ្នកឧកញ៉ា លឹម រស់ និងអ្នកឧកញ៉ា សុទ្ធី ម៉ូលីកា ប្រធានក្រុមប្រឹក្សាភិបាល និងជាស្ថាបនិកក្រុមហ៊ុន រ៉ូសម៉ាវែល ប្រផឹធី ឌីវេឡុកម៉ិន ឯ.ក ដែលកំពុងវិនិយោគយ៉ាងសកម្មក្នុងវិស័យអចលនទ្រព្យ បុរី មានជ័យ រ៉េស៊ីដិនស៍ ស្ថិតនៅតាមមហាវិថី សម្តេច ហ៊ុន សែន ឬផ្លូវ៦០ម៉ែត្រ បើកការដ្ឋានសាងសង់កាលពីឆ្នាំ២០២២កន្លងទៅ។

បើតាមសេចក្តីរាយការណ៍ជាច្រើនបានឲ្យដឹងថា អ្នកឧកញ៉ាទាំងពីរនេះ ក្រៅពីជាប្រធានក្រុមប្រឹក្សាភិបាលក្រុមហ៊ុន រ៉ូសម៉ាវែល ហើយលោកក៏នៅកាន់កាប់ភាគហ៊ុន និងគ្រប់គ្រងក្រុមហ៊ុនធំៗជាច្រើន ដូចជា៖ ក្រុមហ៊ុន COGETEL LTD គ្រប់គ្រងលើបុត្តសម្ព័ន្ធ នៃក្រុមហ៊ុន ONLINE ISP និង Internet Home , ក្រុមហ៊ុន MICROMAX CO., LTD ជាដៃគូជិតស្និទ្ធរបស់ក្រុមហ៊ុន AEON Mall, ក្រុមហ៊ុន AZ DISTRIBUTION CO., LTD, ក្រុមហ៊ុន AZ INVESTMENT CO., LTD , ក្រុមហ៊ុន ING HOLDINGS CO., LTD ដែលកំពុងកាន់គម្រោងដ៏ធំ ING City នៅលើមហាវិថីសម្ដេចតេជោហ៊ុនសែន ៦០ម៉ែត្រ, ក្រុមហ៊ុនស៊ីម៉ង់ត៍ចក្រីទីងកម្ពុជា CAMBODIA CEMENT CHAKREY TING FACTORY CO., LTD និងមានក្រុមហ៊ុនមួយចំនួនទៀត។

បន្ថែមទៀតនោះ អ្នកឧកញ៉ាក៏ជាថ្នាក់ដឹកនាំកំពូលក្នុងតួនាទីជាសហស្ថាបនិកក្រុមហ៊ុន អាយអិនជី ហូលឌីង គ្រុប (I.N.G Holding Group) ជាក្រុមហ៊ុនអភិវឌ្ឍន៍អចលនទ្រព្យដ៏ធំមួយនៅកម្ពុជា ដែលត្រូវបានអ្នកឧកញ៉ា រួមនឹងឧកញ៉ា ១រូបទៀត គឺអ្នកឧកញ៉ា អ៊ឹង ប៊ុនហូវ និងឧកញ៉ា លឹម ប៊ុនសួរ រួមគ្នាបង្កើតឡើងរយៈពេលជិត ២០ឆ្នាំមកហើយ។

សូមជម្រាបជូនថា អ្នកឧកញ៉ា លឹម រស់ និងភរិយា គឺអ្នកឧកញ៉ា សុទ្ធី ម៉ូនីកា ត្រូវបានព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» កាលពីថ្ងៃទី០៦ ខែមេសា ឆ្នាំ២០២៣ តាមព្រះរាជក្រឹត្យដាច់ដោយឡែកពីគ្នា ធ្វើឡើងតាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន នាយករដ្ឋមន្រ្តី៕

The post អ្នកឧកញ៉ាប្តីប្រពន្ធមួយគូរនេះកាន់កាប់ភាគហ៊ុន និងគ្រប់គ្រងក្រុមហ៊ុនជាច្រើននៅកម្ពុជា appeared first on .

តើឧកញ៉ារូបណាខ្លះ ជាម្ចាស់ក្រុមហ៊ុនផ្គត់ផ្គង់សេវាអ៊ិនធឺណិត លំដាប់ឈានមុខនៅកម្ពុជា?

ឧកញ៉ាដែនដី — Tue, 23 May 2023 00:30:00 +0000

នាសម័យកាលឌីជីថលនេះ ការរស់នៅរបស់ប្រជាជនលើពិភពលោក ក៏ដូចជាប្រជាជនកម្ពុជា មានតម្រូវការជាចាំបាច់នូវសេវាអ៊ិនធឺណែត ដើម្បីបំពេញកិច្ចការងារប្រចាំថ្ងៃ និងសម្រាប់ទំនាក់ទំនងផ្សេងៗ។ សម្រាប់នៅប្រទេសកម្ពុជាបច្ចុប្បន្ន មានក្រុមហ៊ុនផ្តល់សេវាកម្មអ៊ិនធឺណែតជាច្រើន កំពុងបម្រើសេវាកម្មនៅទូទាំង ២៥រាជធានី ខេត្ត ក្នុងនោះក៏មានក្រុមហ៊ុនមួយចំនួន ដែលមានម្ចាស់ជាអ្នកឧកញ៉ា។

១. អ្នកឧកញ៉ា គិត ម៉េង ៖ ក្រុមហ៊ុន អ៊ីហ្សីខម (Ezecom) និង Cam GSM Co., Ltd (សែលកាត)

Ezecom ជាក្រុមហ៊ុនខ្មែរ ១០០% ដែលម្ចាស់ក្រុមហ៊ុនគឺ អ្នកឧកញ៉ា គិត ម៉េង ប្រធានក្រុមហ៊ុន Royal Group។ Ezecom បានបង្កើតជាផ្លូវការនៅឆ្នាំ២០០៨ ជាមួយគ្រឹះដ៏រឹងមាំក្នុងការសាងសង់នូវប្រព័ន្ធខ្សែកាប្លិ៍បាតសមុទ្រម៉ាឡេស៊ី-កម្ពុជា-ថៃ និងបណ្ដាញខ្សែកាប្លិ៍បាតសមុទ្រ Asian American Gateway ដែលតភ្ជាប់កម្ពុជាទៅកាន់ពិភពលោក និងកាត់បន្ថយថ្លៃអ៊ិនធឺណិតសម្រាប់អ្នកប្រើប្រាស់រាប់លាននាក់នៅកម្ពុជា។ នៅថ្ងៃទី០៥ ខែឧសភា ឆ្នាំ២០២២ អ្នកឧកញ៉ា គិត ម៉េង បានទិញយកក្រុមហ៊ុន Opennet មកបញ្ចូលគ្នាជាមួយ Ezecom ដើម្បីពង្រីកវិសាលភាពកាន់តែធំថែមទៀត បន្ទាប់ពីក្រុមហ៊ុន King Technologies Co.,Ltd ដែលស្គាល់ជាទូទៅថាក្រុមហ៊ុនអ៊ិនធឺណិត Opennet ជំពាក់បំណុលរដ្ឋ។ នេះមានន័យថា អតិថិជនចាស់ទាំងអស់របស់ Opennet នឹងត្រូវគ្រប់គ្រងដោយក្រុមហ៊ុន Ezecom ដោយស្វ័យប្រវត្តិ។

ចំណែកឯក្រុមហ៊ុន សែលកាត (Cellcard) ជាក្រុមហ៊ុនបុត្រសម្ព័ន្ធមួយទៀតនៃក្រុមហ៊ុន រ៉ូយ៉ាល់ គ្រុប របស់អ្នកឧកញ៉ា គិត ម៉េង។ Cellcard បានបើកដំណើរការតាំងពីឆ្នាំ១៩៩៧ និងបានក្លាយជាក្រុមហ៊ុនទូរគមនាគមន៍ដ៏ធំបំផុតនៅកម្ពុជា។ សែលកាត ផ្តល់សេវាកម្មអ៊ិនធឺណែត តាមរយៈស៊ីមកាតលើទូរស័ព្ទដៃចល័ត ហើយថ្មីៗកន្លងទៅនេះ ពួកគេបានបង្ហាញ ផលិតផលថ្មីមួយឈ្មោះថា Cellcard One ដែលផ្តល់នូវដំណោះស្រាយរួមគ្នាចំនួនពីរ ដែលរួមបញ្ចូលទាំងការភ្ជាប់ Wi-Fi និង ការតភ្ជាប់ទូរស័ព្ទចល័ត ក្នុងកញ្ចប់តែមួយ និងការបង់ប្រាក់ ដែលត្រូវគ្នា ដើម្បីសមស្របទៅនឹងតម្រូវការនៃខាងលំនៅដ្ឋាន និងអាជីវកម្មផ្សេងៗ ដោយក្នុងនោះមានគម្រោង Cellcard One Home ជាគម្រោងអ៊ិនធឺណែតល្បឿនលឿន 20Mbps ជាមួយនិង បណ្តាញ Fiber អុបទិច សម្រាប់ការប្រើប្រាស់ក្នុងគេហដ្ឋាន និងគម្រោង “ផែនការអាជីវកម្ម Cellcard One/ Cellcard One Business” ជាគម្រោង ដែលមានការផ្តល់ជូននូវដំណោះស្រាយដ៍ល្អ ក្នុងការតភ្ជាប់សម្រាប់ អាជីវកម្មដែលមានតម្លៃល្អបំផុត ដែលត្រូវបានគិតគូរឡើងជាពិសេស សម្រាប់សហគ្រាសធុនតូច និងមធ្យម ហើយការបញ្ចូននូវល្បឿនលឿន 30Mbps បណ្តាញ Fiber អុបទិច។

២. អ្នកឧកញ៉ា លឹម រស់ និងភរិយា៖ ក្រុមហ៊ុនអ៊ិនធឺណិត អនឡាញ និងអ៊ិនធឺណិត ហូម

ក្រុមហ៊ុនអ៊ិនធឺណិត អនឡាញ (ONLINE ISP Cambodia) និង អ៊ិនធឺណិត ហូម (Internet Home Cambodia) គឺមានអ្នកឧកញ៉ា លឹម រស់ ជាស្ថាបនិក ហើយបច្ចុប្បន្នក្រុមហ៊ុនទាំងពីរនេះ ដឹកនាំដោយភរិយារបស់អ្នកឧកញ៉ាផ្ទាល់ គឺអ្នកឧកញ៉ា សុទ្ធី ម៉ូនីកា ដែលមានតួនាទីជា នាយកប្រតិបត្តិ។

ក្រុមហ៊ុនអ៊ិនធឺណិត អនឡាញ និងក្រុមហ៊ុន អ៊ិនធឺណិត ហូម គឺជាបុត្រសម្ព័ន្ធរបស់ក្រុមហ៊ុនមេ កូហ្សេតែល (Cogetel Ltd.) ដែលបានបើកដំណើរការ តាំងពីឆ្នាំ២០០២។ ក្រុមហ៊ុនអ៊ិនធឺណិត អនឡាញ ជាកញ្ចប់ សេវា អ៊ិនធឺណិត ផ្តោតសំខាន់បំផុត សម្រាប់ការប្រើប្រាស់តាមអាជីវកម្មខ្នាតតូច និងមធ្យមក្នុងគ្រប់វិស័យ ជាមួយនឹង សេវាកម្មរហ័ស អ៊ីនធឺណិតល្បឿនលឿន និងមិនរអាក់រអួល។ រីឯ ក្រុមហ៊ុន អ៊ិនធឺណិត ហូម ផ្តោតលើគម្រោងសម្រាប់អតិថិជន ដែលមានតម្រូវការប្រើប្រាស់សម្រាប់គ្រួសារ និងមានតម្លៃធូរថ្លៃជាង។

គួរបញ្ជាក់ថា ក្រៅពីក្រុមហ៊ុនរបស់អ្នកឧកញ៉ាខាងលើ ក៏នៅមានក្រុមហ៊ុនផ្តល់សេវាកម្មអ៊ិនធឺណែតជាច្រើនទៀតនៅកម្ពុជា ហើយក្នុងនោះមានក្រុមហ៊ុនជាច្រើនម្ចាស់ជាជនជាតិបរទេសផងដេរ។ ក្រុមហ៊ុនកាន់តែច្រើន នឹងធ្វើឱ្យមានការប្រកួតប្រជែងគ្នាកាន់តែខ្លាំង អាចជាជម្រើសល្អសម្រាប់អតិថិជន ក្នុងការសម្រេចចិត្តប្រើប្រាស់។

ជាមួយគ្នានេះ លោក ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ ក៏បានដាក់ចេញនូវប្រកាសស្តីពី «គុណភាពសេវាទូរគមនាគមន៍» សម្រាប់ឱ្យប្រតិបត្តិករទូរគមនាគមន៍ទាំងអស់ ដែលជាក្រុមហ៊ុនទូរស័ព្ទ និងក្រុមហ៊ុនអ៊ិនធឺណិត កែលំអនិងពង្រឹងគុណភាពសេវា ឬបណ្តាញរបស់ខ្លួន ដើម្បីបំពេញតម្រូវការរបស់អតិថិជនក្នុងការប្រើប្រាស់ ខណៈដែលប្រកាសនេះ ត្រូវបានដាក់ឱ្យអនុវត្ត ចាប់តាំងពីថ្ងៃទី១៧ ខែកក្កដា ឆ្នាំ២០២២៕

The post តើឧកញ៉ារូបណាខ្លះ ជាម្ចាស់ក្រុមហ៊ុនផ្គត់ផ្គង់សេវាអ៊ិនធឺណិត លំដាប់ឈានមុខនៅកម្ពុជា? appeared first on .

ពាណិជ្ជករឆ្នើមចាស់វស្សាមួយគូរ ត្រូវបានព្រះមហាក្សត្រ ផ្តល់គោរមងារ «អ្នកឧកញ៉ា»

ឧកញ៉ាកោះក្របី — Tue, 11 Apr 2023 11:56:44 +0000

ពាណិជ្ជករខ្មែរដ៏មានឥទ្ធិពល ដែលកំពុងដឹកនាំមុខជំនួញក្នុងវិស័យអចលនទ្រព្យ លោកឧកញ៉ា លឹម រស់ និងឧត្តមភរិយា គឺលោកជំទាវឧកញ៉ា សុទ្ធី ម៉ូនីកា ត្រូវបានព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រ ត្រាស់បង្គាប់ផ្តល់គោរមងារ «អ្នកឧកញ៉ា» កាលពីថ្ងៃទី០៦ ខែមេសា ឆ្នាំ២០២៣ តាមព្រះរាជក្រឹត្យដាច់ដោយឡែកពីគ្នា។

ការដែលព្រះករុណា ព្រះមហាក្សត្រ សព្វព្រះរាជហឬទ័យត្រាស់បង្គាប់ផ្តល់គោរមងារអ្នកឧកញ៉ា ជូនដល់ឧកញ៉ា លឹម រស់ តាមរយៈព្រះរាជក្រឹត្យលេខ នស/រកត/០៤២៣/៥៩៦ និងលោកជំទាវឧកញ៉ា សុទ្ធី ម៉ូនីកា ដោយព្រះរាជក្រឹត្យលេខ នស/រកត/០៤២៣/៥៩៥ ចុះថ្ងៃដូចគ្នា ធ្វើឡើងតាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន នាយករដ្ឋមន្រ្តីកម្ពុជា។

អ្នកឧកញ៉ា លឹម រស់ និងលោកជំទាវអ្នកឧកញ៉ា សុទ្ធី ម៉ូនីកា ក៏ជាសប្បុរសជនខ្មែរមួយរូបដែលតែងតាំងបង្ហាញមុខក្នុងការចុះជួយវិភាគទានថវិកា និងធនធានជាច្រើនចូលរួមជាមួយប្រមុខរាជរដ្ឋាភិបាលកម្ពុជា ដើម្បីអភិវឌ្ឍន៍ប្រទេសជាតិ លើកិច្ចការងារសង្គម សេដ្ឋកិច្ច និងវិស័យសុខាភិបាលជាដើម។

សូមជម្រាបជូនថា អ្នកឧកញ៉ា លឹម រស់ ត្រូវបានគេចាត់ទុកថា ជាអ្នកជំនួញវស្សាមួយរូបក្នុងពិភពជំនួញនៅប្រទេសកម្ពុជាដ៏លេចធ្លោរ ដែលកំពុងជោគជ័យលើវិស័យអចលនទ្រព្យ ហើយអ្នកឧកញ៉ាក៏ជាថ្នាក់ដឹកនាំដ៏ឆ្នើមកំពូលក្នុងតួនាទីជាសហស្ថាបនិកក្រុមហ៊ុន អាយអិនជី ហូលឌីង គ្រុប (I.N.G Holding Group) ជាក្រុមហ៊ុនអភិវឌ្ឍន៍អចលនទ្រព្យដ៏ធំមួយនៅកម្ពុជា ដែលត្រូវបានអ្នកឧកញ៉ា រួមនឹងឧកញ៉ា ២រូបទៀត គឺឧកញ៉ា អ៊ឹង ប៊ុនហូវ និងឧកញ៉ា លឹម ប៊ុនសួរ រួមគ្នាបង្កើតឡើងរយៈពេលជិត ២០ឆ្នាំមកហើយ។

សូមបញ្ជាក់ថា អ្នកឧកញ៉ា លឹម រស់ ក៏ម្ចាស់នៃគម្រោងលំនៅឋានប្រណិតមានជ័យ រ៉េស៊ីដិនស៍ ដែលស្ថិតនៅក្នុងតំបន់សក្តានុពលក្នុងរាជធានីភ្នំពេញ ដែលបានបើកសម្ពោធការលក់ជាផ្លូវការហើយថ្មីៗនេះ ក្រោមអធិបតីភាពដ៏ខ្ពង់ខ្ពស់របស់ឯកឧត្តម បណ្ឌិត ហ៊ុន ម៉ាណែត កូនប្រុសច្បងសម្តេចតេជោ ហ៊ុន សែន និងជាបេក្ខភាពអនាគតនាយករដ្ឋមន្រ្តីបន្តវេន៕

The post ពាណិជ្ជករឆ្នើមចាស់វស្សាមួយគូរ ត្រូវបានព្រះមហាក្សត្រ ផ្តល់គោរមងារ «អ្នកឧកញ៉ា» appeared first on .

ព្រះមហាក្សត្រ ចេញព្រះរាជក្រឹត្យផ្តល់គោរមងារឧកញ៉ា លឹម រស់ និងភរិយា ជា «អ្នកឧកញ៉ា»

ឧកញ៉ាដែនដី — Fri, 07 Apr 2023 04:14:33 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ផ្តល់គោរមងារលោកឧកញ៉ា លឹម រស់ និងភរិយា លោកជំទាវឧកញ៉ា សុទ្ធី ម៉ូនីកា ជា «អ្នកឧកញ៉ា» កាលពីថ្ងៃទី០៦ ខែមេសា ឆ្នាំ២០២៣។

តាមរយៈព្រះរាជក្រឹត្យលេខ នស/រកត/០៤២៣/៥៩៦ ចុះថ្ងៃទី០៦ ខែមេសា ឆ្នាំ២០២៣ បានសម្រេចផ្តល់គោរមងារ ឧកញ៉ា លឹម រស់ សហស្ថាបនិកក្រុមហ៊ុន អាយអិនជី ហូលឌីង (I.N.G Holding) ជា «អ្នកឧកញ៉ា» ខណៈដែលព្រះរាជក្រឹត្យលេខ នស/រកត/០៤២៣/៥៩៥ ចុះថ្ងៃដូចគ្នា បានសម្រេចផ្តល់គោរមងារ លោកជំទាវឧកញ៉ា សុទ្ធី ម៉ូនីកា ជា «អ្នកឧកញ៉ា» ផងដែរ៕

The post ព្រះមហាក្សត្រ ចេញព្រះរាជក្រឹត្យផ្តល់គោរមងារឧកញ៉ា លឹម រស់ និងភរិយា ជា «អ្នកឧកញ៉ា» appeared first on .