នៅលើបណ្តាញសង្គមហ្វេសប៊ុក នាថ្ងៃទី៧ ខែកញ្ញា ឆ្នាំ២០២៦ ភិក្ខុ ទុំ សារុត បានមានសង្ឃដីកាថា៖ “ថ្ងៃនេះ​ជា​ថ្ងៃទី៨ នៃការចូលសាងផ្នួសជាព្រះភិក្ខុនៅស្រុកកំណើត នៅ​ភូមិ​ព្រៃ​ម្នាស់ ឃុំ​សំឡី ស្រុក​កំពង់​រោទ៍ ខេត្ដស្វាយរៀង។ ចំពោះមូលហេតុដែលព្រះករុណាខ្ញុំសម្រេចចិត្តចូលសាងផ្នួស គឺដើម្បីបំពេញបំណងប្រាថ្នា​របស់អ្នកមានគុណ ដែល​ឪពុករបស់ខ្ញុំធ្លាប់​បាន​បួសសិក្សារៀនសូត្រក្នុងព្រះពុទ្ធចក្រនេះ​ អស់រយៈពេល ៦ព្រះវស្សា។ មុននឹងលោកលាចាក​ទៅ លោកមានបំណងចង់ឱ្យខ្ញុំបានបួសជាសាមណេ ឬភិក្ខុ ដើម្បីបំពេញកុសល្យជូន។ ទីពីរ គឺខ្ញុំបួសដើម្បីបំពេញ​កុសល្យរបស់ខ្លួនក្នុងនាមពុទ្ធសាសនិកជន”។

“ចំពោះទី៣ គឺជារឿងមួយដែលគ្រប់គ្នាចង់បាន ប៉ុន្តែពេលនេះខ្ញុំព្រះករុណាខ្ញុំសម្រេចចិត្តលាឈប់ពីគោរមងារ «ឧកញ៉ា» ចាប់ពីក្រោយលាចាកសិក្ខាបទនេះទៅ និងធ្វើលិខិតស្នើទៅសមាគមឧកញ៉ាកម្ពុជា ដើម្បីឡាយព្រះហស្តលេខាពីព្រះមហាក្សត្រ ព្រះរាជអនុញ្ញាតឱ្យខ្ញុំបាទបានបញ្ចប់គោរមងារ។ នេះមិនមានមូលហេតុអ្វីធំដុំទេ ចំពោះមុខ​របរ អាជីព អាជីវកម្មរបស់ខ្ញុំ ការរស់នៅក្នុងសង្គមមិនមានការប៉ះពាល់ខុសច្បាប់។ នេះជាការសម្រេច​ចិត្តរបស់ខ្ញុំ និងគ្រួសារ ដើម្បីលាឈប់ពីគោរមងារឧកញ៉ា មកទទួលការខុសត្រូវឱ្យតូចជាងមុន ខណៈដែលអាយុរបស់យើងក៏​ច្រើន ដូច្នេះដល់ពេលវេលាដែលយើងដាក់ចុះខ្លះ”។

សូមជម្រាបថា លោក​ឧកញ៉ា ​ទុំ សា​រុត ហៅ​នាយ​ឃ្លោក កើត​នៅ​ថ្ងៃ​ទី​១០ ខែមករា ឆ្នាំ​១៩៥៧ នៅ​ភូមិ​ព្រៃ​ម្នាស់ ឃុំ​សំឡី ស្រុក​កំពង់​រោទ៍ ខេត្ដស្វាយរៀង។ លោក​ជា​កូន​ទី​៦​ក្នុង​ចំណោម​បងប្អូន​១០​នាក់ ក្នុង​នោះ​ប្រុស​៦​នាក់។ លោក ​ទុំ សា​រុត ទទួល​បាន​គោរមងារ​ឧកញ៉ា​ កាលពី​ថ្ងៃ​ទី​២៥ ខែកក្កដា ឆ្នាំ​២០១៤ ហើយមុន​ពេល​បាន​គោរមងារ​ជា​​ឧកញ៉ា​នេះ លោកមាន​ប្រវត្តិ​តស៊ូ​ បូក​រួម​ទាំង​ការងារ​សង្គម​ជា​ច្រើន ដោយ​លោក​បាន​ចូលរួម​កសាង​សមិទ្ធផល​ទាំង​នៅ​ទឹកដី​កំណើត និង​តំបន់​មួយ​ចំនួន​ទៀត៕

The post ភិក្ខុ ទុំ សារុត នាយឃ្លោក សម្រេចចិត្តស្នើសុំបញ្ចប់គោរមងារឧកញ៉ា ដោយស្ម័គ្រចិត្ត ក្រោយលាចាកសិក្ខាបទ appeared first on .