សាកលវិទ្យាល័យ ឧកញ៉ា ទេព កូលាប ចុះ MoU ជាមួយសាកលវិទ្យាល័យដ៏ល្បីមួយនៅសហរដ្ឋអាមេរិក ជាជំហានឆ្ពោះទៅរកការពង្រឹងកិច្ចសហប្រតិបត្តិក្នុងវិស័យអប់រំ

Kem sinath — Sun, 18 Oct 2026 06:16:23 +0000

សាកលវិទ្យាល័យភ្នំពេញអន្តរជាតិ (PPIU) របស់លោកជំទាវឧកញ៉ា ទេព កូលាប ដែលជាគ្រឹះស្ថានឧត្តមសិក្សាឯកជនដ៏ល្បីល្បាញមួយនៅក្នុងប្រទេសកម្ពុជា បានចុះហត្ថលេខាលើអនុស្សរណៈនៃការយោគយល់គ្នា (MoU) ជាមួយសាកលវិទ្យាល័យ California State University, Fullerton (CSUF) ដ៏ល្បីល្បាញមួយនៃសហរដ្ឋអាមេរិក។

ពិធីចុះMoUនេះ ធ្វើឡើងកាលពីថ្ងៃទី១៦ ខែតុលា ឆ្នាំ២០២៦ ដោយមានការចូលរួមជាសក្ខីភាពពីបងប្អូនខ្មែររស់នៅក្នុងរដ្ឋកាលីហ្វ័រញ៉ាផងដែរ។

បើតាមក្រសួងអប់រំ យុវជន និងកីឡា បានឱ្យដឹងថា កិច្ចសហប្រតិបត្តិការដ៏មានសារៈសំខាន់នេះ គឺជាសមិទ្ធផលថ្មីមួយសម្រាប់ការពង្រឹងទំនាក់ទំនងអន្តរជាតិ និងជាជំហានយុទ្ធសាស្ត្រឆ្ពោះទៅរកការពង្រឹងកិច្ចសហប្រតិបត្តិក្នុងវិស័យអប់រំ និងការផ្លាស់ប្តូរបទពិសោធន៍រវាងគ្រឹះស្ថានឧត្តមសិក្សានៃប្រទេសទាំងពីរ។

ក្រសួងអប់រំ យុវជន និងកីឡាមានជំនឿយ៉ាងមុតមាំថា ភាពជាដៃគូរវាងស្ថាប័នទាំង២នឹងក្លាយជាមូលដ្ឋានគ្រឹះដ៏រឹងមាំសម្រាប់កិច្ចសហប្រតិបត្តិការរយៈពេលវែង ប្រកបដោយផ្លែផ្កា និងរួមចំណែកដល់ការអភិវឌ្ឍធនធានមនុស្ស ក៏ដូចជាការពង្រឹងទំនាក់ទំនងអប់រំរវាងព្រះរាជាណាចក្រកម្ពុជា និងសហរដ្ឋអាមេរិក។

សូមជម្រាបថា សាកលវិទ្យាល័យភ្នំពេញអន្តរជាតិ បានកកើតឡើងនៅឆ្នាំ២០០២ ក្រោមការផ្តួចផ្តើមរបស់សាកលវិទ្យាធិការ ឧកញ៉ា ទេព កូលាប ដែលពេលនោះមានឈ្មោះថា “សាកលវិទ្យាល័យអាស៊ាន”។ សាកលវិទ្យាល័យនេះបានប្តូរឈ្មោះមកជា “សាកលវិទ្យាល័យភ្នំពេញអន្តរជាតិ (Phnom Penh International University – PPIU) នៅឆ្នាំ២០០៦ តាមអនុក្រឹត្យលេខ ១១១ អនក្រ. បក ចុះថ្ងៃទី ២៤ ខែតុលា ឆ្នាំ២០០៦។

បច្ចុប្បន្ន សាកលវិទ្យាល័យ PPIU មានកម្រិតសិក្សាចាប់ពីវគ្គជំនាញវិជ្ជាជីវៈ បរិញ្ញាបត្ររង បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត លើជំនាញជាច្រើន ខណៈដែលថ្មីៗនេះសាកលវិទ្យាល័យ ក៏បានសហការគ្នាជាមួយក្រសួងព័ត៌មាន បើកនូវមហាវិទ្យាល័យសារព័ត៌មាន និងសោតទស្សន៍ ដំបូងគេនៅកម្ពុជាបន្ថែមទៀតផងដែរ៕

The post សាកលវិទ្យាល័យ ឧកញ៉ា ទេព កូលាប ចុះ MoU ជាមួយសាកលវិទ្យាល័យដ៏ល្បីមួយនៅសហរដ្ឋអាមេរិក ជាជំហានឆ្ពោះទៅរកការពង្រឹងកិច្ចសហប្រតិបត្តិក្នុងវិស័យអប់រំ appeared first on .

តើម្ចាស់សាកលវិទ្យាល័យភ្នំពេញ អន្ដរជាតិ លោកស្រី ទេព កូលាប ទទួលបានគោរមងារ «ឧកញ៉ា» តាំងពីឆ្នាំណា?

រ៉េត សុកធា — Sat, 13 Apr 2024 01:00:00 +0000

លោកស្រី ទេព កូលាប ត្រូវបានគេស្គាល់ថា ជាសាកលវិទ្យាធិការ និងជាប្រធានកិត្តិយសក្លឹបយុវជនកាកបាទក្រហមកម្ពុជា ប្រចាំសាកលវិទ្យាល័យភ្នំពេញ អន្ដរជាតិ ។

លោកស្រី ទេព កូលាប ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ផ្តល់គោរមងារជា «ឧកញ៉ា» កាលពីថ្ងៃទី០៣ ខែមករា ឆ្នាំ២០២២ តាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា។

លោកស្រី ឧកញ៉ា ទេព កូលាប ត្រូវបានគេស្គាល់ថា ជាស្រ្ដីមួយរូបដែលបានចូលរួមចំណែកយ៉ាងសំខាន់ក្នុងការជួយដល់ជាតិ រហូតទទួលបានមេដាយស្ថាបនាជាតិថ្នាក់មាសផងដែរ។ បន្ថែមពីនោះ លោកស្រីឧកញ៉ា ក៏ធ្លាប់ទទួលបានការបំពាក់គ្រឿងឥស្សរិយយស ជាអ្នកដែលមានស្នាដៃល្អ នៅក្នុងការបំពេញការងារ និងបានកសាងសមិទ្ធផលនានាជាច្រើនទៀត៕

The post តើម្ចាស់សាកលវិទ្យាល័យភ្នំពេញ អន្ដរជាតិ លោកស្រី ទេព កូលាប ទទួលបានគោរមងារ «ឧកញ៉ា» តាំងពីឆ្នាំណា? appeared first on .