ឧកញ៉ា ទ្រី ដាណា

សិប្បកម្មផលិតសៀវភៅ ស្រ៊ុន ងួន ចេញលិខិតបដិសេធ ជុំវិញនិមិត្តសញ្ញាខ្លួនមានរួមបញ្ចូលរូបភាពលោកស្រីឧកញ៉ា ទ្រី ដាណា

ឧកញ៉ាដែនដី — Fri, 01 Mar 2024 09:27:32 +0000

សិប្បកម្មផលិតសៀវភៅ ស្រ៊ុន ងួន របស់ឧកញ៉ា សូ ងួន កាលពីថ្ងៃទី២៩ ខែកុម្ភៈ បានចេញលិខិតជូនដំណឹងផ្លូវការមួយ ដើម្បីបំភ្លឺទៅលើការភាន់ច្រឡំទាំងឡាយនៅលើបណ្តាញសង្គម ដែលមានឈ្មោះ និងនិមិត្តសញ្ញារបស់ខ្លួន មានរួមបញ្ចូលនឹងរូបភាពឯកជនរបស់លោកស្រីឧកញ៉ា ទ្រី ដាណា អគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអិលធីឌី និងស្វាមី។

តាមខ្លឹមសារលិខិត សិប្បកម្មផលិតសៀវភៅ ស្រ៊ុន ងួន បានបញ្ជាក់ថា ការបង្ហោះតាមបណ្តាញសង្គមហ្វេសប៊ុក ដោយមានឈ្មោះ និងនិមិត្តសញ្ញារបស់ខ្លួន រួមបញ្ចូលនឹងរូបភាពឯកជនរបស់គ្រួសារលោកស្រី ទ្រី ដាណា នៅថ្ងៃទី២៩ ខែកុម្ភៈ ឆ្នាំ២០២៤ គឺមិនមែនជាស្នាដៃដើមរបស់សិប្បកម្មផលិតសៀវភៅ “ស៊្រុន ងួន” ទេ។ បន្ថែមពីនេះ សិប្បកម្ម ក៏សូមបដិសេធទាំងស្រុងចំពោះរូបភាពខាងលើ និងសូមសាធារណៈជន ជាពិសេសសិស្សានុសិស្ស មេត្តាជ្រាបថា សិប្បកម្មផលិតសៀវភៅ ស៊្រុន ងួន មិនបានប្រើប្រាស់ “រូបភាពមឯកជនរបស់គ្រួសារលោកស្រី ទ្រី ដាណា” មកធ្វើជាគម្របសៀវភៅនោះទេ។

សិប្បកម្មផលិតសៀវភៅ ស្រ៊ុន ងួន ក៏ស្នើសុំឱ្យអ្នកលេងបណ្តាញសង្គមមេត្តាបញ្ឈប់ការចែករំលែកបន្តនូវរូបភាពកាត់តបែបគម្របសៀវភៅ ដែលមាននិមិត្តសញ្ញា (Logo) សៀវភៅ “ស៊្រុន ងួន” ដែលធ្វើឱ្យសាធារណៈជន មានការភាន់ច្រឡំជាខ្លាំង។

គួរបញ្ជាក់ថា កាលថ្ងៃទី២៩ ខែកុម្ភៈ លោកស្រីឧកញ៉ា ទ្រី ដាណា បានបង្ហោះរូបភាពលើទំព័រហ្វេសប៊ុក ជាមួយនឹងស្វាមី លោក រស់ រាជ្ជសាល ដោយស្លៀកពាក់បែបខ្មែរបុរាណ ឈរលើផ្ទាំងថ្មនៅឆ្នេរសមុទ្រមួយកន្លែង ភ្ជាប់ជាមួយនឹងសារខ្លីថា “ព្រះថោងតោងស្បៃ”។ រូបភាពនេះ បានធ្វើឱ្យជនឆ្លៀតឱកាសយកទៅកាត់តបន្ថែមជាមួយនឹងនិមិត្តសញ្ញា “ស៊្រុនងួន-៣០០ទំព័រ” ធ្វើឱ្យមានការយល់ច្រឡំយ៉ាងខ្លាំងលើបណ្តាញសង្គម៕

The post សិប្បកម្មផលិតសៀវភៅ ស្រ៊ុន ងួន ចេញលិខិតបដិសេធ ជុំវិញនិមិត្តសញ្ញាខ្លួនមានរួមបញ្ចូលរូបភាពលោកស្រីឧកញ៉ា ទ្រី ដាណា appeared first on .

ឧកញ៉ា ទ្រី ដាណា នាំយកអំណោយនិងសម្ភារៈសិក្សាប្រគល់ជូនកុមារកំព្រា «វិសាខានៃក្តីសង្ឃឹម»

ឧកញ៉ាដែនដី — Tue, 12 Dec 2023 02:11:57 +0000

លោកស្រីឧកញ៉ា ទ្រី ដាណា អគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអិលធីឌី និងស្វាមីលោក រស់ រាជ្ជសាល កាលពីថ្ងៃទី១០ ខែធ្នូ ឆ្នាំ២០២៣ បាននាំយកអំណោយនិងសម្ភារៈសិក្សាមួយចំនួនទៅប្រគល់ជូនកុមារកំព្រា «វិសាខានៃក្តីសង្ឃឹមវត្តខ្ជាស់» ស្ថិតនៅក្នុងភូមិខ្ចាស់ ឃុំបុស្បូវ ស្រុកព្រះនេត្រព្រះ ខេត្តបន្ទាយមានជ័យ ក្នុងបរិវេណវត្តប្រាសាទស្រះកណ្តាល ហៅវត្តខ្ចាស់។

មជ្ឈមណ្ឌលកុមារកំព្រាវិសាខា នៃក្តីសង្ឃឹមវត្តខ្ចាស់ ត្រូវបានបង្កើតឡើងដោយលោកឧបនាយករដ្ឋមន្ត្រី ស សុខា និងលោកស្រីឧកញ៉ា ម៉ៅ ម៉ាល័យ កែ គឹមយ៉ាន បន្ទាប់ពីមើលឃើញពីទុក្ខលំបាក ពិសេសការមិនបានសិក្សារៀនសូត្រ ឬរៀនសូត្រដែរ តែមិនដិតដល់របស់កុមារកំព្រា ដែលត្រូវបានឪពុកម្តាយ ស្លាប់ចោល ឬបោះបង់ចោល ឬផ្ញើនឹងជីដូនជីតាចាស់ជរាគ្មានទីពឹង សាច់ញាតិ ឬក៏អ្នកដទៃ ដោយសារតែការលែងលះគ្នា ឬភាពក្រីក្រ ចំណាកស្រុកជាដើម។ លោកឧបនាយករដ្ឋមន្ត្រី ស សុខា ធ្លាប់បានបញ្ជាក់ថា ការសាងសង់មជ្ឈមណ្ឌលកុមារកំព្រាវិសាខានៃក្តីសង្ឃឹមវត្តខ្ចាស់ ដើម្បីទទួលយកក្មួយៗទាំងនោះ មកស្នាក់នៅ និងរៀនសូត្រក្នុងមណ្ឌល សំដៅចូលរួមចំណែកជាមួយរាជរដ្ឋាភិបាល ក្នុងការកាត់បន្ថយភាពក្រីក្រ និងការអភិវឌ្ឍធនធានមនុស្សនៅកម្ពុជា។

មជ្ឈមណ្ឌលកុមារកំព្រា វិសាខានៃក្តីសង្ឃឹមវត្តខ្ចាស់ ត្រូវបានសាងសង់ឡើងនៅលើផ្ទៃដី ចំនួន ១ហិកតា មានបណ្តោយប្រវែង ៧០ម៉ែត្រ និងទទឹងប្រវែង ៦០ម៉ែត្រ ចាប់ពីថ្ងៃទី០១ ខែមករា ឆ្នាំ២០២១ និងរួចរាល់ជាស្ថាពរនៅថ្ងៃទី២៨ ខែតុលា ឆ្នាំ២០២២ ដោយចំណាយអស់ថវិកាចំនួន ៧០០ ០០០(ចិតសិបម៉ឺន) ដុល្លារសហរដ្ឋអាមេរិក និងត្រូវដាក់សម្ពោធឱ្យប្រើប្រាស់ជាផ្លូវការ នៅចុងខែឧសភា ឆ្នាំ២០២៣។

សូមជម្រាបថា លោកស្រីឧកញ៉ា ទ្រី ដាណា តែងតែចុះជួយដល់ប្រជាពលរដ្ឋ ដែលងាយរងគ្រោះគ្រប់រូបភាពដល់លំនៅឋានផ្ទាល់ ដែលមានជាថវិកា និងសម្ភារៈផ្សេងៗ ជាពិសេសគឺបានចូលរួមជួយសង្គម តាមសកម្មភាពការបរិច្ចាគផ្សេងៗទៀត។ ជាក់ស្តែង កាលពីថ្ងៃទី២១ ខែវិច្ឆិកា ឆ្នាំ២០២៣ លោកស្រីឧកញ៉ា និងស្វាមី ក៏បាននាំយកថវិកាចំនួន ១ម៉ឺនដុល្លារអាមេរិក ប្រគល់ជូនដល់កាកបាទក្រហមកម្ពុជា នៅទីស្នាក់ការកណ្ដាលកាកបាទក្រហមកម្ពុជាផងដែរ។ តាមរយៈសកម្មភាពជួយសង្គមជាហូរហែ ម្ចាស់ហាងពេជ្រ ដាណាទ្រី រូបនេះ ត្រូវបានព្រះមហាក្សត្រ ត្រាស់បង្គាប់ផ្តល់គោរមងារ «ឧកញ៉ា» កាលពីថ្ងៃទី២៧ ខែមេសា ឆ្នាំ២០២២៕

The post ឧកញ៉ា ទ្រី ដាណា នាំយកអំណោយនិងសម្ភារៈសិក្សាប្រគល់ជូនកុមារកំព្រា «វិសាខានៃក្តីសង្ឃឹម» appeared first on .

លោកស្រីឧកញ៉ា ទ្រី ដាណា ជ្រើសរើសទីតាំងសាលអ្នកឧកញ៉ា ថៃ ជាហួត ជាកន្លែងបដិសណ្ឋារកិច្ចភ្ញៀវកិត្តិយសចូលរួមពិសារភោជនាហារ

ឧកញ៉ាកោះក្របី — Mon, 04 Dec 2023 03:19:48 +0000

អ្នកជំនួញល្បីឈ្មោះក្នុងវិស័យគ្រឿងពេជ្រ ផលិតផលសំអាង និងផលិតបំប៉នសុខភាព លោកស្រីឧកញ៉ា ទ្រី ដាណា បានចូលរោងជ័យជាផ្លូវការហើយកាលពីថ្ងៃទី៣ ខែធ្នូ ឆ្នាំ២០២៣ ជាមួយលោក រស់ រាជ្ជសាល ដែលជាកូនអ្នកកោះក្របី ខណ្ឌច្បារអំពៅ រាជធានីភ្នំពេញ។

ពិធីរៀបចំអាពាហ៍ពិពាហ៍លោកស្រីឧកញ៉ា ទ្រី ដាណា និងលោក រស់ រាជ្ជសាល ធ្វើពិធីចូលចែចូវ និងនិមន្តព្រះសង្ឃចម្រើនព្រះបរិត្តនៅភូមិគ្រឹះរបស់លោកស្រីផ្ទាល់នៅខណ្ឌព្រែកព្នៅ ក្រោមវត្តមានលោកមេបាចាស់ទុំរាមច្បងទាំងសងខាង ក្នុងនោះក៏មានវត្តមានសម្តេចកិត្តិសង្គហបណ្ឌិត ម៉ែន សំអាន ឧត្តមប្រឹក្សាផ្ទាល់ព្រះមហាក្សត្រ និងលោកស្រីឧកញ៉ា ហ៊ុន ស៊ីណាត ជាប្អូនស្រីបង្កើតសម្តេចតេជោ ហ៊ុន សែន ប្រធានឧត្តមប្រឹក្សាផ្ទាល់ព្រះមហាក្សត្រ។

ដោយឡែកសម្រាប់ពិធីហែជំនូនចូលរោងជ័យ កាត់សក់បង្កកសិរី សែនចងដៃសំពះផ្ទឹម និងទទួលបដិសណ្ឋារកិច្ចភ្ញៀវកិត្តិយសចូលរួមពិសារភោជនាហាររបស់លោកស្រីធ្វើឡើងនៅសាលសន្និបាត និងប្រារព្ធពិធីមង្គលការ ភីអេច ហ្រេ្គនហល PH Grand Hall របស់អ្នកឧកញ៉ា ថៃ ជាហួត ម្ចាស់ក្រុមហ៊ុនបុរី ប៉េងហួត គ្រុប ស្ថិតនៅខណ្ឌច្បារអំពៅ រាជធានីភ្នំពេញ។

ពិធីមង្គលការលោកស្រីឧកញ៉ា ទ្រី ដាណា ឃើញវត្តមានចូលរួមពីអ្នកឧកញ៉ា ឧកញ៉ា មន្រ្តីរាជការ សិល្បករ សិល្បការិនី អ្នកប្រដាល អ្នកជំនួញចាស់ក្មេងដែលភាគច្រើនសុទ្ធសឹងតែជាអ្នកជំនួញរកស៊ីក្នុងវិស័យគ្រឿងសំអាង ផលិតផលលក់លើបណ្តាញសង្គមនានានៅក្នុងប្រទេសកម្ពុជា៕

The post លោកស្រីឧកញ៉ា ទ្រី ដាណា ជ្រើសរើសទីតាំងសាលអ្នកឧកញ៉ា ថៃ ជាហួត ជាកន្លែងបដិសណ្ឋារកិច្ចភ្ញៀវកិត្តិយសចូលរួមពិសារភោជនាហារ appeared first on .

ឧកញ៉ា ទ្រី ដាណា ប្រគល់ថវិកាចំនួន ១ម៉ឺនដុល្លារ ជូនដល់កាកបាទក្រហមកម្ពុជា

ឧកញ៉ាដែនដី — Wed, 22 Nov 2023 03:30:07 +0000

លោកស្រីឧកញ៉ា ទ្រី ដាណា អគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអិលធីឌី និងគូដណ្តឹងលោក រស់ រាជ្ជសាល កាលពីថ្ងៃទី២១ ខែវិច្ឆិកា ម្សិលមិញនេះ បាននាំយកថវិកាចំនួន ១ម៉ឺនដុល្លារ ប្រគល់ជូនដល់កាកបាទក្រហមកម្ពុជា នៅទីស្នាក់ការកណ្ដាលកាកបាទក្រហមកម្ពុជា។

ពិធីប្រគល់-ទទួលថវិកានេះ បានធ្វើឡើងក្រោមវត្ដមានលោកស្រី ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា។ លោកស្រី ម៉ែន នារីសោភ័គ បាននាំប្រសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលផ្តាំផ្ញើសួរសុខទុក្ខ និងថ្លែងអំណរគុណយ៉ាងជ្រាលជ្រៅ ចំពោះលោកស្រីឧកញ៉ា ទ្រី ដាណា និងលោក រស់ រាជ្ជសាល ដែលតែងតែបានជួយឧបត្ថម្ភគាំទ្រដល់សកម្មភាពមនុស្សធម៌របស់កាកបាទក្រហមកម្ពុជា និងក្នុងឱកាសផ្សេងៗជាហូរហែ។

សូមជម្រាបថា លោកស្រីឧកញ៉ា ទ្រី ដាណា ក្រៅពីជួយគាំទ្រដល់សកម្មភាពមនុស្សធម៌របស់កាកបាទក្រហមកម្ពុជា ឧកញ៉ាដ៏សប្បុរសរូបនេះ ក៏តែងតែចុះទៅដោយផ្ទាល់ជួយដល់ប្រជាពលរដ្ឋ ដែលងាយរងគ្រោះគ្រប់រូបភាពដល់លំនៅឋានផ្ទាល់ ដែលមានជាថវិកា និងសម្ភារៈផ្សេងៗផងដែរ។ ជាពិសេសគឺបានចូលរួមជួយសង្គម តាមសកម្មភាពផ្សេងៗទៀត។ តាមរយៈការងារជួយសង្គមជាច្រើន ម្ចាស់ហាងពេជ្រ ដាណាទ្រី រូបនេះ ត្រូវបានព្រះមហាក្សត្រ ត្រាស់បង្គាប់ផ្តល់គោរមងារ «ឧកញ៉ា» កាលពីថ្ងៃទី២៧ ខែមេសា ឆ្នាំ២០២២៕

The post ឧកញ៉ា ទ្រី ដាណា ប្រគល់ថវិកាចំនួន ១ម៉ឺនដុល្លារ ជូនដល់កាកបាទក្រហមកម្ពុជា appeared first on .

ថៅកែពេជ្រ ឧកញ៉ា ទ្រី ដាណា ចូលរោងជ័យភ្ជាប់ពាក្យជាផ្លូវការ នៅព្រឹកនេះហើយ

ឧកញ៉ាដែនដី — Thu, 09 Nov 2023 03:44:39 +0000

លោកស្រីឧកញ៉ា ទ្រី ដាណា អគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអិលធីឌី បានសម្រេចបញ្ចេញមុខគូអនាគតពិតប្រាកដជាផ្លូវការនៅព្រឹកថ្ងៃព្រហស្បតិ៍នេះ ក្នុងពិធីសិរីមង្គលចូលចែចូវ ខណៈដែលកូនកំលោះ ជាបុរសខ្ពស់សង្ហាមួយរូប មានឈ្មោះថា រស់ រាជ្ជសាល។

ពិធីភ្ជាប់ពាក្យរបស់លោកស្រីឧកញ៉ាម្ចាស់ក្រុមហ៊ុន N.N.P នៅព្រឹកនេះ បានធ្វើឱ្យអ្នកលេងបណ្តាញសង្គមជាច្រើន មានការភ្ញាក់ផ្អើលយ៉ាងខ្លាំង ព្រោះកន្លងមកមានការយល់ច្រឡំថា លោកស្រីមានទំនាក់ទំនងជាមួយតារាសម្តែងលោក សេង មង្គល ហើយអ្នកខ្លះធ្លាប់បានផ្គូរផ្គងឱ្យអ្នកទាំងពីរថែមទៀតផង។ កម្មពិធីភ្ជាប់ពាក្យរបស់លោកស្រីឧកញ៉ារូបស្រស់ ក៏មានការអញ្ជើញចូលរួមពីភ្ញៀវកិត្តិយស តារាល្បីៗ ជាពិសេសក៏មានវត្តមានលោកស្រីឧកញ៉ា ហ៊ុន ស៊ីណាត ផងដែរ។

បុរសដែលជាគូដណ្ដឹងរបស់លោកស្រីឧកញ៉ា ទ្រី ដាណា មានឈ្មោះ រស់ រាជ្ជសាល ត្រូវបានគេដឹងថាជាមនុស្សម្នាក់ដែលមានសមត្ថភាពខ្ពស់ខាងវិស័យសិល្បៈ ដោយលោកជាតារាសម្ដែង, តារាម៉ូដែល ហើយក៏ធ្លាប់ជាតារាចម្រៀងដែលមានបទចម្រៀង Original ផ្ទាល់ខ្លួនទៀតផង។

សូមជម្រាបថា លោកស្រីម្ចាស់ហាងពេជ្រ ដាណា ទ្រី ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ផ្តល់គោរមងារជា «ឧកញ៉ា» កាលពីថ្ងៃទី ២៧ ខែមេសា ឆ្នាំ២០២២៕

The post ថៅកែពេជ្រ ឧកញ៉ា ទ្រី ដាណា ចូលរោងជ័យភ្ជាប់ពាក្យជាផ្លូវការ នៅព្រឹកនេះហើយ appeared first on .

ដឹងអត់ថា លោកស្រី ទ្រី ដាណា ទទួលបានគោរមងារ «ឧកញ៉ា» តាំងពីពេលណា?

ឧកញ៉ាដែនដី — Thu, 28 Sep 2023 01:15:05 +0000

លោកស្រី ទ្រី ដាណា អគ្គនាយិកាក្រុមហ៊ុន ដាណា ទ្រី ខេមបូឌា ត្រេនឌីង ខូអិលធីឌី ជាអ្នកជំនួញលេចធ្លោរមួយរូប ដែលត្រូវបានគេស្គាល់ថា ជាម្ចាស់ហាងលក់ផលិតផលគ្រឿងសម្អាង អាហារបំប៉ន រួមទាំងហាងមាសពេជ្រដ៏ធំចំនួនពីរទីតាំង នៅក្នុងរាជធានីភ្នំពេញ។

លោកស្រីម្ចាស់ហាងពេជ្រ ដាណា ទ្រី ត្រូវបានព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ចេញព្រះរាជក្រឹត្យត្រាស់បង្គាប់ផ្តល់គោរមងារជា «ឧកញ៉ា» កាលពីថ្ងៃទី ២៧ ខែមេសា ឆ្នាំ២០២២ តាមសេចក្តីក្រាបបង្គំទូលថ្វាយរបស់សម្តេចតេជោ ហ៊ុន សែន អតីតនាយករដ្ឋមន្ត្រីនៃកម្ពុជា។

លោកស្រីម្ចាស់ហាងគ្រឿងសម្អាង NNP កាលពីថ្ងៃទី១៧ ខែកក្កដា ឆ្នាំ២០២២ បានទម្លាយអាថ៌កំបាំងពីប្រវត្តិរបស់ខ្លួនឱ្យដឹងថា លោកស្រីធ្លាប់ប្រកបរបរផ្សេងៗចំនួន៧មុខ ក្នុងរយៈពេល៦ឆ្នាំ ដូចជា លក់ស្បែកជើង, លក់ខោអាវថ្មី, លក់ខោអាវជជុះ, លក់កាហ្វេ, លក់បាយ, លក់បបរ និងកាត់ដេរម៉ូត តែរងការបរាជ័យទាំងអស់ មុននឹងលោកស្រីមានអាជីវកម្មរីកចម្រើន រហូតឈានដល់ក្លាយជាម្ចាស់ហាងលក់ពេជ្រ ដូចពេលបច្ចុប្បន្ន។

លោកស្រី ទ្រី ដាណា បានបើកសម្ពោធ ហាងពេជ្រ ដាណាទ្រី សាខាច្បារអំពៅ ថ្មីមួយទៀតជាផ្លូវការ កាលពីថ្ងៃទី២៥ ខែកក្កដា ឆ្នាំ២០២២ បន្ទាប់ពីហាងពេជ្រដំបូងរបស់លោកស្រី ទទួលបានជោគជ័យដ៏ធំធេង នៅសាខាធំ លើមហាវិធីឈ្នះ-ឈ្នះ ខណ្ឌព្រែកព្រៅ រាជធានីភ្នំពេញ៕

The post ដឹងអត់ថា លោកស្រី ទ្រី ដាណា ទទួលបានគោរមងារ «ឧកញ៉ា» តាំងពីពេលណា? appeared first on .