ឧកញ៉ា ព្រហ្ម ចន្ធូ និងស្វាមី ទទួលការបំពាក់គ្រឿងឥស្សរិយយស ពីសម្តេចកិត្តិសង្គហបណ្ឌិត ម៉ែន សំអន

ឧកញ៉ាដែនដី — Tue, 27 Jun 2023 02:08:39 +0000

ឧកញ៉ា ព្រហ្ម ចន្ធូ និងស្វាមី ត្រូវបានព្រះមហាក្សត្រ ប្រោសប្រទានគ្រឿងឥស្សរិយយស ថ្នាក់មហាសេនា និងថ្នាក់មហាសិរីវឌ្ឍន៍ និងត្រូវបានបំពាក់ដោយសម្តេចកិត្តិសង្គហបណ្ឌិត ម៉ែន សំអន ក្នុងពិធីសម្ពោធឆ្លងសមិទ្ធផលនានា ក្នុងវត្តជម្ពូព្រឹក្សា (ហៅវត្តថ្មី) ស្ថិតក្រុងស្វាយរៀង ខេត្តស្វាយរៀង កាលពីព្រឹកថ្ងៃអាទិត្យ ទី២៥ ខែមិថុនា ឆ្នាំ២០២៣។

ការទទួលបានការបំពាក់មេដាយកិត្តិយសដ៏ខ្ពង់ខ្ពស់ខាងលើនេះ ឧកញ៉ា ព្រហ្ម ចន្ធូ បានទទួលការបំពាក់មេដាយ ថ្នាក់មហាសេនា ខណៈដែលស្វាមីលោកស្រី គឺលោកឧត្តមសេនីយ៍ត្រី សុខ វិរិទ្ធ បានទទួលមេដាយ ថ្នាក់មហាសិរីវឌ្ឍន៍។

ឧកញ៉ា ព្រហ្ម ចន្ធូ ប្រធានក្រុមហ៊ុនដឹកជញ្ជូន ម៉ីង លាំង ខូ អិលធីឌី (Ming Liang Co., Ltd) ដែលជាក្រុមហ៊ុនដឹកជញ្ជូនទំនិញ និងបំពេញបែបបទគយ (Customs Clearance) និងស្វាមី ជានិច្ចកាល តែងតែចូលរួមយ៉ាងសកម្ម ក្នុងសកម្មភាពសប្បុរសធម៌ និងមនុស្សធម៌ ក្នុងការចូលរួមអភិវឌ្ឍសង្គមជាតិ ដូចជា ការចែកអំណោយដល់ជនក្រីក្រ ការជួយសាងសង់សាលារៀន និងវត្តអារ៉ាម ជាដើម។ លោកស្រី ព្រហ្ម ចន្ធូ ត្រូវបានព្រះមហាក្សត្រ ត្រាស់បង្គាប់ផ្តល់គោរមងារ «ឧកញ៉ា» កាលពីថ្ងៃទី១៥ ខែឧសភា ឆ្នាំ២០២៣៕

The post ឧកញ៉ា ព្រហ្ម ចន្ធូ និងស្វាមី ទទួលការបំពាក់គ្រឿងឥស្សរិយយស ពីសម្តេចកិត្តិសង្គហបណ្ឌិត ម៉ែន សំអន appeared first on .

ព្រះមហាក្សត្រ ចេញព្រះរាជក្រឹត្យផ្តល់គោរមងារ ភរិយានាយទាហានផ្កាយ១ម្នាក់ ជា «ឧកញ៉ា»

ឧកញ៉ាដែនដី — Sat, 20 May 2023 09:08:04 +0000

ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានចេញព្រះរាជក្រឹត្យត្រាស់បង្គាប់ផ្តល់គោរមងារលោកស្រី ព្រហ្ម ចន្ធូ ជា «ឧកញ៉ា» កាលពីថ្ងៃទី១៥ ខែឧសភា ឆ្នាំ២០២៣ តបតាមសេចក្តីក្រាបបង្គំទូលថ្វាយរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

លោកស្រី ព្រហ្ម ចន្ធូ បច្ចុប្បន្នជាប្រធានក្រុមហ៊ុនដឹកជញ្ជូន ម៉ីង លាំង ខូ អិលធីឌី (Ming Liang Co., Ltd) ដែលជាក្រុមហ៊ុនដឹកជញ្ជូនទំនិញ និងបំពេញបែបបទគយ (Customs Clearance) បានបើកដំណើរការតាំងពីខែមិថុនា ឆ្នាំ២០០៣ និងមានអាសយដ្ឋាននៅផ្លូវហាណូយ សង្កាត់ពោងពាយ ខណ្ឌសែនសុខ រាជធានីភ្នំពេញ។ លោកស្រី ត្រូវបានគេស្គាល់ថា ជាភរិយារបស់នាយទាហានជាន់ខ្ពស់មួយរូប គឺលោកឧត្តមសេនីយ៍ត្រី សុខ វិរិទ្ធ បច្ចុប្បន្នមានតួនាទីជា នាយករង នាយកដ្ឋានប្រេងឥន្ធនៈ នៃអគ្គនាយកដ្ឋានភស្តុភារ ហិរញ្ញវត្ថុ នៅក្រសួងការពារជាតិ៕

The post ព្រះមហាក្សត្រ ចេញព្រះរាជក្រឹត្យផ្តល់គោរមងារ ភរិយានាយទាហានផ្កាយ១ម្នាក់ ជា «ឧកញ៉ា» appeared first on .