ឧកញ៉ា យ៉ន សេងហាន

សមាគមព្រះធម៌ បង្កើតដោយឧកញ៉ា យ៉ន សេងហាន ប្រកាសបើកសម្ពោធដំណើរការ ជាផ្លូវការ

ឧកញ៉ាដែនដី — Wed, 11 Oct 2023 06:19:03 +0000

សមាគមព្រះធម៌ ដើម្បីអប់រំយុវជន (DYEA) ដែលមានគោលដៅដឹកនាំអប់រំយុវជន ឱ្យគាំទ្រវិស័យព្រះពុទ្ធសាសនានៅកម្ពុជា បង្កើតឡើងដោយលោកឧកញ៉ាបណ្ឌិត យ៉ន សេងហាន អគ្គនាយកក្រុមហ៊ុន SENG HAN CO.,LTD បានប្រកាសបើកសម្ពោធដំណើរការជាផ្លូវការយ៉ាងអធឹកអធម កាលពីថ្ងៃទី១០ ខែតុលា ឆ្នាំ២០២៣ ម្សិលមិញនេះ។

លោកឧកញ៉ា យ៉ន សេងហាន ប្រធានសមាគម បានលើកឡើងថា ដោយសារតែលោកជាអ្នកបួសរៀន និងយល់ដឹងច្រើនពីវិស័យព្រះពុទ្ធសាសនា ទើបលោកឧកញ៉ា តែងដឹកនាំក្រុមការងារ និងយុវជនជាហូរហែរកន្លងមក ដើម្បីធ្វើសកម្មភាពស្តាប់ព្រះធម៌អប់រំចិត្ត ហើយដោយសារមានសមាជិកកាន់តែច្រើន និងកត់សម្គាល់ឃើញថា សកម្មភាពស្តាប់ព្រះធម៌ និងធ្វើសម្មាធិអប់រំចិត្តនេះ មានប្រយោជន៍ច្រើនសម្រាប់អ្នកអនុវត្តន៍ និងចង់ឱ្យយុវជនកាន់តែច្រើន បានចូលរួមផង ទើបជំរុញឱ្យឈានដល់ការបង្កើតសមាគមព្រះធម៌នេះឡើង។

លោកឧកញ៉ា បានបន្ថែមថា ការបង្កើតសមាគមនេះ ក៏ដើម្បីកៀរគរអ្នកប្រាជ្ញា និងអ្នកចេះដឹងទាំងអស់ ពិសេសអ្នកធ្លាប់បួស ដែលមានចំណេះដឹងច្រើន រួមចំណែកក្នុងការចូលរួមផ្សព្វផ្សាយព្រះធម៌ជូនដល់សាធារណៈជន។

ពិធីសម្ពោធសមាគមនេះ មានការចូលរួមពីអ្នកមុខអ្នកការ និងយុវជន ដែលមានឆន្ទៈគាំទ្រព្រះពុទ្ធសាសនា។ ក្នុងពិធីនេះក៏មានការតែងតាំង ប្រធានកិត្តិយស អនុប្រធាន ក្រុមប្រឹក្សាភិបាល និងឧត្តមទីប្រឹក្សាជាន់ខ្ពស់ ដល់ឥស្សរជនមួយចំនួន ដើម្បីឱ្យជួយទ្រទ្រង់ដល់សកម្មភាពរបស់សមាគម មានដូចខាងក្រោម៖

លោក ជាតិ ប្រុស ជាអនុប្រធាន
លោក អាត រិទ្ធី ជា អនុប្រធាន
លោក ប្រាក់ សារ៉េន ជា អគ្គលេខាធិការ
លោក រ៉ុន សារ៉ាត់ ជា អគ្គលេខធិការរង
លោកជំទាវ ម៉ៃ សុមាលី ជា ប្រធានហិរញ្ញវត្ថុ
លោកស្រី យ៉ូ សុរីយ៉ា ជា ប្រធារដ្ឋបាល
លោកគ្រូ ធម្មាចារ្យ ជា សុមាលា ជា ប្រធានអប់រំ និងផ្សព្វផ្សាយ។

សូមជម្រាបថា សមាគមព្រះធម៌ ដើម្បីអប់រំយុវជន (DYEA) បង្កើតឡើងក្នុងគោលបំណងដើម្បីចែករំលែកចំណេះដឹងព្រះពុទ្ធសាសនាទៅកាន់ប្រជាជាតិខ្មែរ អប់រំសីលធម៌ដល់យុវជន ចូលរួមចំណែកអភិវឌ្ឍន៍ជាតិ និងផ្តល់ពុទ្ធិដល់យុវជនជំនាន់ក្រោយ។ ជាមួយគ្នានេះ សមាគមមានបេសកកម្មចម្បងៗដូចជា៖ បង្កើតកម្មវិធីសាកច្ឆាជារៀងរាល់ថ្ងៃសីល មានការចូលរួមពីវាគ្មិនដែលមានចំណេះដឹងខ្ពស់ បើកវគ្គសិក្សាព្រះធម៌ កម្មវិធីផ្សព្វផ្សាយនិងដោះស្រាយបញ្ហានានាតាមអនឡាញ និងកម្មវិធីជួបជុំយុវជនប្រចាំត្រីមាសនិងឆមាស៕

The post សមាគមព្រះធម៌ បង្កើតដោយឧកញ៉ា យ៉ន សេងហាន ប្រកាសបើកសម្ពោធដំណើរការ ជាផ្លូវការ appeared first on .

ឧកញ៉ា ២រូប ទទួលការតែងតាំងជា «ទីប្រឹក្សាជាន់ខ្ពស់» នៃសមាគមអតីតអ្នកបួសខ្មែរ

ឧកញ៉ាដែនដី — Sun, 30 Jul 2023 04:39:02 +0000

លោក ហឿន សំនៀង ប្រធានក្រុមប្រឹក្សាភិបាលសមាគមអតីតអ្នកបួសខ្មែរ កាលពីថ្ងៃទី២៦ ខែកក្កដា ឆ្នាំ២០២៣ បានចេញសេចក្តីសម្រេចតែងតាំង ឧកញ៉ា យ៉ន សេងហាន អគ្គនាយកក្រុមហ៊ុន សេង ហាន ឯ.ក និងឧកញ៉ាបណ្ឌិត ផន វណ្ណិត អ្នកនិពន្ធសៀវភៅថ្វីគំនិត ជា ទីប្រឹក្សាជាន់ខ្ពស់ នៃសមាគមអតីតអ្នកបួសខ្មែរ។

ក្រៅពីលោកឧកញ៉ាទាំងពីររូបខាងលើ ក្រុមអតីតអ្នកបួសខ្មែរដែលជាបុគ្គលឆ្នើមៗមួយចំនួនទៀត ក៏ទទួលបានបានការតែងតាំងធ្វើជាទីប្រឹក្សាជាន់ខ្ពស់ផងដែរ ក្នុងនោះរួមមានដូចជា៖ លោកគ្រូ សាន សុជា, ឧត្តមសេនីយ៍ឯក ឌី ពៅ នាយករងខុទ្ទកាល័យសម្តេចតេជោនាយករដ្ឋមន្ត្រី និងជាមេបញ្ជាការរង បញ្ជាការដ្ឋានអង្គរក្ស, បណ្ឌិត ឆាត សុឆេត ទីប្រឹក្សាអាជ្ញាធរជាតិប្រយុទ្ធប្រឆាំងគ្រឿងញៀន, លោក ងួន ស្តេចភក្តី ទីប្រឹក្សាផ្ទាល់សម្តេចតេជោនាយករដ្ឋមន្ត្រី, លោក ស៊ិន គង់ ទីប្រឹក្សាក្រសួងព្រះបរមរាជវាំង, ឧត្តមសេនីយ៍ទោ មួង ឫទ្ធី, សាស្ត្រាចារ្យ ទូច គីមស្រ៊ាង, បណ្ឌិត ប្រាក់ សម្ផស្ស, បណ្ឌិត កែវ រតន:, លោក សេង សុភី, លោក ព្រើន សុវង្ស និង អ្នកអង្គម្ចាស់ បណ្ឌិត ស៊ីសុវត្ថិ ឫទ្ធីរ៉ាវង្ស។

សមាគមអតីតអ្នកបួសខ្មែរ ត្រូវបានចុះឈ្មោះក្នុងបញ្ជីសមាគម នៅក្រសួងមហាផ្ទៃ នៅថ្ងៃទី១៨ ខែកក្កដា ឆ្នាំ២០២៣ ដែលមានអាសយដ្ឋាន ទីស្នាក់ការកណ្តាលនៅបុរីប៉េងហួត ស្ទឹងមានជ័យ ផ្ទះលេខ៤០ ផ្លូវលេខ៨ ក្រុមទី៩ ភូមិដំណាក់ធំ១ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។ សមាគមនេះបង្កើតឡើងក្នុងគោលបំណងពង្រីកទំនាក់ទំនង បង្កើតការចែករំលែកចំណេះដឹង បទពិសោធន៍ បំណិនជីវិត ទ្រទ្រង់ព្រះពុទ្ធសាសនា និងមានចក្ខុវិស័យចង់ឃើញអ្នកបួសខ្មែរ មានសាមគ្គីភាពគ្នា មានលទ្ធភាពរស់នៅថ្លៃថ្នូរ និងជាគំរូល្អក្នុងសង្គម។

តាមការបញ្ជាក់ពីលោក ហឿន សំនៀង ប្រធានសមាគមអតីតអ្នកបួសខ្មែរ បានឱ្យដឹងថា សមាគមនេះមានលក្ខណៈពិសេសត្រង់ថា អ្នកដែលចូលជាសមាជិកបាន ទាល់តែជាអ្នកធ្លាប់បានបួសក្នុងសំណាក់ព្រះពុទ្ធសាសនា។ ដូច្នេះដើម្បីបានក្លាយទៅជាសមាជិក គឺទាល់តែធ្លាប់បានបួសក្នុងសំណាក់ព្រះពុទ្ធសាសនា។ ទោះបីបុគ្គលនោះមានបុណ្យស័ក្តិឋានៈខ្ពង់ខ្ពស់ លុយកាក់ច្រើនប៉ុណ្ណាក៏ដោយ ក៏មិនអាចចូលជាសមាជិកសមាគមអតីតអ្នកបួសខ្មែរបានទេ បើសិនជាមិនធ្លាប់បួស។ មួយវិញទៀត បើទោះបីជារស់នៅក្នុងស្ថានភាព ឬ ជីវភាពបែបណា នៅឆ្ងាយប៉ុណ្ណា (ក្រៅ ឬក្នុងប្រទេស) និងបួសនៅក្នុងសម័យកាលណាក៏ដោយ ក៏អាចក្លាយជាសមាជិកសមាគមនេះបានដែរ ដោយមិនមានការរើសអើង ប្រវត្តិ ជីវភាព និងឋានៈក្នុងសង្គមឡើយ៕

The post ឧកញ៉ា ២រូប ទទួលការតែងតាំងជា «ទីប្រឹក្សាជាន់ខ្ពស់» នៃសមាគមអតីតអ្នកបួសខ្មែរ appeared first on .

ឧកញ៉ា យ៉ន សេងហាន ប្រកាសឧបត្ថម្ភដីមួយឡូតិ៍ ជូនលោក បឺត សំរេច ក្រោយដឹងពីជីវប្រវត្តិលម្អិត

ឧកញ៉ាដែនដី — Wed, 05 Jul 2023 07:18:31 +0000

ក្រោយដឹងពីជីវប្រវត្តិលម្អិតអតីតកីឡាករ បឺត សំរេច រួចមក លោកឧកញ៉ា យ៉ន សេងហាន អគ្គនាយកក្រុមហ៊ុន SENG HAN CO.,LTD បានប្រកាសឧបត្ថម្ភដល់អតីតកីឡាកររូបនេះ នូវដីចំនួនមួយឡូតិ៍ ព្រមទាំងផលិតផលព្យាបាលជំងឺមួយចំនួនទៀត។

ប្រកាសនៅលើគណនីហ្វេសប៊ុករបស់ខ្លួន នៅព្រឹកថ្ងៃទី៥ ខែកក្កដា ឆ្នាំ២០២៣ នេះ ឧកញ៉ា យ៉ន សេងហាន បានលើកឡើងទាំងក្ដុកក្ដួលថា៖ «ខ្ញុំទើបបានស្តាប់ប្រវត្តិលំអិតរបស់អតីតកីឡាករ បឺត សំរេច ដែលជាដំណក់ឈាម អធិរាជសំលេងមាស លោកតាស៊ិន ស៊ីសាម៉ុត កាលពីយប់មិញនេះ គឺពិតជាកំសត់ខ្លាំងណាស់ ហើយទប់ទឹកភ្នែកមិនចង់បានទេ! »។

លោកឧកញ៉ា បានបន្តថា៖ « ក្រៅពីជីវិតជាកូនកំព្រាអត់ខាន់ស្លា គឺគាត់រស់នៅជាមួយម្តាយចិញ្ចឹម(អ៊ុំស្រី) ក្រលំបាក ត្រូវឪពុកចិញ្ចឹមធ្វើបាប ហើយពិសេសម្តាយគាត់មានប្តីថ្មី បានផ្តាំម្តាយចិញ្ចឹមថាមិនឱ្យ បង បឺត សំរេច ទៅជួប ទៅស្គាល់ឡើយ»។

ជាមួយនឹងអារម្មណ៍រំជើបរំជួលនេះ លោកឧកញ៉ា បន្ថែមថា៖ « ដោយខ្ញុំមានការគោរពដឹងគុណចំពោះ លោកតា ស៊ិន ស៊ីសាម៉ុត ដែលបម្រើអារម្មណ៍ខ្ញុំនិងបងប្អូនខ្មែរទូទាំងពិភពលោក រាប់សិបឆ្នាំកន្លងមក និងរួមផ្សំបង បឺត សំរេច ជាដំណក់ឈាមគាត់ ហើយគាត់ជាមនុស្សស្លូតត្រង់ គួរអោយអាណិត គោរពស្រលាញ់ ជាទឹកចិត្តតិចតួច ខ្ញុំជួយឧបត្ថម្ភដីឡូតិ៍ មួយឡូតិ៍ ដល់គាត់តម្លៃខ្ទង់ ៨០០០ដុល្លារ ហើយនិងជូនផលិតសុខភាពព្យាបាលជំងឺដល់ម្តាយចិញ្ជឹមគាត់១ឈុតផងដែរ ព្រោះឥលូវឮថាគាត់កំពុងឈឺនៅពេទ្យ»។

សូមជម្រាបជូនថា ការឧបត្ថម្ភដល់លោក បឺត សំរេច នាពេលនេះ ក្រោយពីរឿងរ៉ាវគ្រួសាររបស់អតីតកីឡាករប្រដាល់រូបនេះ ដែលប្រកាសជាកូនឥតខាន់ស្លារបស់ អធិរាជសម្លេងមាស ស៊ីន ស៊ីសាម៉ុត បានលាតត្រដាងឡើង ពេលលោកឡើងច្រៀងក្នុងកម្មវិធី ចម្រៀងគ្រួសារខ្មែរ កាលពីថ្ងៃទី១៤ ខែមិថុនា ឆ្នាំ២០២៣៕

អត្ថបទ៖ សុកធា

The post ឧកញ៉ា យ៉ន សេងហាន ប្រកាសឧបត្ថម្ភដីមួយឡូតិ៍ ជូនលោក បឺត សំរេច ក្រោយដឹងពីជីវប្រវត្តិលម្អិត appeared first on .

ឧកញ៉ា យ៉ន សេងហាន៖ ត្រូវសន្សំលុយទិញគ្រឿងអលង្ការឱ្យប្រពន្ធ កុំសន្សំលុយទិញស្រាឬឱ្យស្រី

ឧកញ៉ាដែនដី — Mon, 24 Oct 2022 08:26:32 +0000

ឧកញ៉ា យ៉ន សេងហាន អគ្គនាយកក្រុមហ៊ុន សេងហាន ឯ.ក យល់ឃើញថា ក្នុងនាមជាប្តីល្អ បើសិនជាស្រលាញ់ប្រពន្ធ គឺត្រូវតែសន្សំលុយទិញគ្រឿងអលង្ការឱ្យប្រពន្ធ កុំសន្សំលុយទិញស្រា ឬសន្សំលុយឱ្យស្រី។

លោកឧកញ៉ា បានលើកឡើងលើបណ្តាញសង្គម កាលពីថ្ងៃអាទិត្យម្សិលមិញថា លោកនឹកស្រណោះក្នុងអំឡុងពេលឆ្នាំ២០១០ (១៣ឆ្នាំមុន) លោកខំសន្សំលុយទិញមាស១ដំឡឹង ជូនប្រពន្ធ គឺខ្សែក៥ជី ខ្សែដៃ៥ជី ជាលេីកដំបូង បន្ទាប់ពីរៀបការបាន៣ឆ្នាំ កាលនោះលោករំភេីបណាស់ ពិសេសប្រពន្ធរំភេីបឡេីងយំតែម្តង ព្រោះជាលេីកទីមួយក្នុងឆាកជីវិតរបស់គាត់ ដែលបានស្គាល់ជាតិមាសនៅលេីខ្លួនក្នុងវ័យ២១ឆ្នាំ។

អគ្គនាយកក្រុមហ៊ុន សេងហាន ឯ.ក បានបញ្ជាក់បន្ថែមយ៉ាងដូច្នេះថា៖ “ស្រលាញ់ប្រពន្ធ ត្រូវធ្វេីអ្វីដែលប្រពន្ធត្រូវការ។ ស្រលាញ់ប្រពន្ធ ត្រូវសន្សំលុយទិញគ្រឿងអលង្ការឱ្យប្រពន្ធ កុំសន្សំលុយទិញស្រា ឬសន្សំលុយឱ្យស្រី”។

សូមជម្រាបជូនថា ឧកញ៉ា យ៉ន សេងហាន តែងតែបង្ហាញភាពផ្អែមល្ហែម និងក្តីស្រលាញ់ដ៏ស្មោះត្រង់ចំពោះភរិយារបស់លោកគឺលោកជំទាវ ម៉ៃ សុម៉ាលី។ ជាពិសេសនៅលើបណ្តាញសង្គម លោកឧកញ៉ា តែងតែសរសើរពីភរិយារបស់លោកជាប្រចាំ។

លោកឧកញ៉ា យ៉ន សេងហាន គឺជាអតីតអ្នកបួស និងជាគ្រូបង្រៀនផ្នែកព្រះវិន័យបិដកពុទ្ធសាសនា ហើយក៏ជាគ្រូបណ្តុះបណ្តាលផ្នត់គំនិតជោគជ័យដល់យុវជនរាប់ពាន់នាក់ពេលកន្លងមក។ លោកឧកញ៉ា ត្រូវបានសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ គណៈធម្មយុត្តិកនិកាយ ទ្រង់សព្វព្រះហឬទ័យត្រាស់បញ្ញត្តិតែងតាំងជា ឧត្តមទីប្រឹក្សាផ្ទាល់ ដែលមានគោរម្យ៍ងារ “ពហូហត្ថាចិន្តាសង្គហមហាឧបាសកពុទ្ធសាសនូបត្ថម្ភក៍” កាលពីថ្ងៃទី១៣ ខែសីហា ឆ្នាំ២០២១ បន្ទាប់ពីលោកទទួលបានងារជា «ឧកញ៉ា» កាលពីថ្ងៃទី២១ ខែកុម្ភៈ ឆ្នាំ២០២០៕

The post ឧកញ៉ា យ៉ន សេងហាន៖ ត្រូវសន្សំលុយទិញគ្រឿងអលង្ការឱ្យប្រពន្ធ កុំសន្សំលុយទិញស្រាឬឱ្យស្រី appeared first on .

ឧកញ៉ា យ៉ន សេងហាន ទទួលបានសញ្ញាបត្របណ្ឌិត និងពានរង្វាន់ ពីប្រទេសថៃ

ឧកញ៉ាដែនដី — Mon, 17 Oct 2022 01:47:04 +0000

កាលពីថ្ងៃទី១៥ ខែតុលា ឆ្នាំ២០២២ ឧកញ៉ា យ៉ន សេងហាន អគ្គនាយកក្រុមហ៊ុន សេងហាន ឯ.ក បានទទួលសញ្ញាបត្របណ្ឌិតកិត្តិយស ផ្នែកពាណិជ្ជកម្មអន្តរជាតិ (Honorary Doctor Of International Business) និងពានរង្វាន់ភាពជាអ្នកដឹកនាំជោគជ័យនៅអាស៊ាន (Honorary Prestigious Asian Leadership Degree Morality Top Award) នៅបាងកក ប្រទេសថៃ។

ក្រោយត្រឡប់មកដល់ព្រលានយន្តហោះអន្តរជាតិភ្នំពេញ នៃទឹកដីកម្ពុជាវិញ កាលពីថ្ងៃអាទិត្យម្សិលមិញនេះ លោកឧកញ៉ា បានបង្ហាញពីអារម្មណ៍រំភើប ដែលថ្នាក់ដឹកនាំ និងក្រុមការងាររបស់លោក បានទៅទទួលអបអរសាទរយ៉ាងច្រើនកុះករ ដោយមានទាំងកម្រងផ្កា និងស្នាមញញឹម។

ឧកញ៉ា យ៉ន សេងហាន បានលើកឡើងបន្ថែមថា៖ “ពិតជាអរគុណណាស់ នូវទឹកចិត្ត ក្តីគោរពស្រលាញ់ ដឹងគុណ របស់ថ្នាក់ដឹកនាំ និងសមាជិករបស់ក្រុមហ៊ុនទាំងអស់ ដែលមកទទួលខ្ញុំដោយស្នាមញញឹម។ សូមជូនពរគ្រប់គ្នាជួបប្រទ:នូវពុទ្ឋពរទាំង៤ប្រការ គឺអាយុ វណ្ណ: សុខៈ និងពលៈ កុំបីឃ្លៀងឃ្លាតឡេីយ។ ដោយក្តីគោរពស្រលាញ់រាប់អានពីខ្ញុំ ឧកញ៉ាបណ្ឌិតយ៉នសេងហាន”។

សូមបញ្ជាក់ថា លោកឧកញ៉ា យ៉ន សេងហាន គឺជាអតីតអ្នកបួស និងជាគ្រូបង្រៀនផ្នែកព្រះវិន័យបិដកពុទ្ធសាសនា ហើយក៏ជាគ្រូបណ្តុះបណ្តាលផ្នត់គំនិតជោគជ័យដល់យុវជនរាប់ពាន់នាក់ពេលកន្លងមក។ លោកឧកញ៉ា ត្រូវបានសម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ គណៈធម្មយុត្តិកនិកាយ ទ្រង់សព្វព្រះហឬទ័យត្រាស់បញ្ញត្តិតែងតាំងជា ឧត្តមទីប្រឹក្សាផ្ទាល់ ដែលមានគោរម្យ៍ងារ “ពហូហត្ថាចិន្តាសង្គហមហាឧបាសកពុទ្ធសាសនូបត្ថម្ភក៍” កាលពីថ្ងៃទី១៣ ខែសីហា ឆ្នាំ២០២១ ផងដែរ៕

The post ឧកញ៉ា យ៉ន សេងហាន ទទួលបានសញ្ញាបត្របណ្ឌិត និងពានរង្វាន់ ពីប្រទេសថៃ appeared first on .

ឧកញ៉ា យ៉ន សេងហាន យកទ្រឹស្តីព្រះពុទ្ធដឹកនាំក្រុមហ៊ុន និងបណ្តុះបណ្តាលសិក្ខាកាមជាង ៤ម៉ឺននាក់

ឧកញ៉ាតូច — Tue, 19 Apr 2022 07:32:33 +0000

អ្នកជំនួញក្នុងវិស័យអចលនទ្រព្យជាច្រើនទំនងស្គាល់ឧកញ៉ា យ៉ន សេងហាន ជាវិនិយោគិនម្នាក់ដែលបានដឹកនាំក្រុមហ៊ុន តាមទ្រឹស្តីសាសនាព្រះពុទ្ធ ដូចជាប្រកាន់យកនូវគាថាព្រះពុទ្ធ និងសីល ៥ ជាដើម។ បុគ្គលិកក្រុមហ៊ុនរបស់លោកទាំងអស់ជារៀងរាល់ថ្ងៃសីល តែងតែសូធ្យធម៌ និងសមាទានសីលមុនពេលចូលធ្វើការ។

បន្ទាប់ពីបើកក្រុមហ៊ុនជាង ១០ឆ្នាំមក លោកឧកញ៉ាធ្លាប់បានបណ្តុះបណ្តាលបុគ្គលិក និងសិក្ខាកាមជាង ៤ម៉ឺននាក់ ខណៈរាប់រយនាក់ផ្សេងទៀត ពួកគាត់បានចេញបើកក្រុមហ៊ុន និងរកស៊ីតាមជំនាញរៀងៗខ្លួនដោយជោគជ័យ។

លោកថា ក្នុងការរកស៊ីរបស់លោកជាង ១០ឆ្នាំមកនេះ ក្រោមម៉ាកយីហោក្រុមហ៊ុន សេងហាន គឺមិនមែនគ្រាន់តែជាក្រុមហ៊ុនប្រកបអាជីវកម្មរកប្រាក់ចំណូលតែប៉ុណ្ណោះទេ គឺជាកន្លែងបណ្តុះបណ្តាលការធ្វេីអាជីវកម្ម ពាណិជ្ជកម្មបែបសមធម៌ សុច្ចរិតធម៌ និងបណ្តុះកូនខ្មែរឱ្យក្លាយជាសហគ្រិនរឹងមាំ អត្តចរិតថ្លៃថ្នូរ មានគំនិតជាតិនិយម ស្រលាញ់ជាតិ សាសនា វប្បធម៌ ប្រពៃណីដែលជារបស់ខ្មែរ ស្រលាញ់ គាំទ្ររដ្ឋាភិបាលខ្មែរ។

ថ្លែងប្រាប់សារព័ត៌មានឧកញ៉ាញូស៍នៅរសៀលថ្ងៃពុធ ខែមេសានេះ លោកថាអ្វីដែលផ្តោតសំខាន់ក្នុងការរកស៊ីគឺតាមគន្លងរបស់ព្រះពុទ្ធ ម្យ៉ាងលោកចង់លើកតម្កើងព្រះពុទ្ធសាសនា ព្រោះលោកយល់ថា ការរកស៊ីណាដែលប្រាសចាកធម៌ព្រះពុទ្ធ គឺអត់មានអ្វីដែលរីកចម្រើនដល់សង្គមជាតិនោះទេ អាចរីកចម្រើនតែបុគ្គលផ្ទាល់ខ្លួនប៉ុណ្ណោះ ប៉ុន្តែវាបានប៉ះពាល់ដល់សង្គមជាតិទាំងមូល។

ឧកញ៉ា យ៉ន សេងហាន អគ្គនាយកក្រុមហ៊ុនអចលនទ្រព្យ សេងហាន បានថ្លែងថា៖ ជាទស្សនៈរបស់ខ្ញុំ សុទ្ធចិត្តដើរយឺត ប៉ុន្តែយើងដើរទៅយ៉ាងច្បាស់លាស់ ដោយមានតម្លៃ និងគុណធម៌។

មានងារជាទីប្រឹក្សាផ្ទាល់សម្តេចព្រះមហាសង្ឃរាជគណៈធម្មយុត្តិកនិកាយ ឧកញ៉ា យ៉ន សេងហាន ដែលធ្លាប់បួស និងជាឧទ្ទេសាចា្យបង្រៀនព្រះធម៌រូបនេះ បានសម្តែងក្តីកង្វល់ថា មួយរយៈនេះលោកសង្កេតឃើញទីប្រឹក្សាសម្តេចសង្ឃរាជមួយចំនួនតូចបានផឹកស្រា ហើយអ្នកខ្លះមិនដែលស្គាល់វត្តផងក៏មានដែរ។ បើតាមលោកឧកញ៉ា ទីប្រឹក្សាគួរតែមានសីល ៥ ជាប់ខ្លួនខ្លះ។

លោកបន្ថែមថា រាល់ថ្ងៃបុណ្យទានធំៗ លោកបានដឹកនាំបុគ្គលិករាប់រយនាក់ទៅធ្វើបុណ្យតាមវត្តអារាម និងកម្មវិធីសាសនានានា ដើម្បីអប់រំចិត្ត រៀនសូត្រទ្រឹស្តីព្រះពុទ្ធសាសនា។

លោកឧកញ៉ាថ្លែងបញ្ជាក់យ៉ាងដូច្នេះថា៖ ពួកខ្ញុំធ្វើរាល់ថ្ងៃហ្នឹង….មានអ្នកចោទថា….យើងយកសាសនាជាខែល(អាជីវកម្ម)ក៏មានដែរ។ ការប្រតិបត្តិរបស់យើងឲ្យល្អត្រឹមត្រូវភាពជាគំរូរក៏មានមនុស្សអគតិគិតថាយើងសាសនាជាអាជីវកម្ម…។ ក្រុមហ៊ុន សេងហាន មានអ្វីដែលលេីសពីលុយជាអនេក ពិសេសលេីសពីអ្វីដែលអ្នកខាងក្រៅមេីលឃេីញដោយភ្នែកធម្មតា!..៕

The post ឧកញ៉ា យ៉ន សេងហាន យកទ្រឹស្តីព្រះពុទ្ធដឹកនាំក្រុមហ៊ុន និងបណ្តុះបណ្តាលសិក្ខាកាមជាង ៤ម៉ឺននាក់ appeared first on .

លោកជំទាវ ម៉ៃ សុម៉ាលី ត្រូវស្វាមី និងបុគ្គលិកសហការគ្នា Surprised បានសម្រេចទាំងព្រឹក

អ្នកឧកញ៉ាវត្តភ្នំ — Sun, 19 Dec 2021 04:23:00 +0000

ព្រឹកថ្ងៃអាទិត្យដ៏សែនមនោរម្យ ការជួបជុំដ៏សែនរីករាយ ថ្ងៃនេះ ឧកញ៉ា យ៉ន សេងហាន អគ្គនាយកក្រុមហ៊ុន សេងហាន ឯ.ក និងបុគ្គលិករបស់លោក សហការគ្នា Surprised ឧត្តមភរិយារបស់លោកបានសម្រេច។ នោះគឺ កាដូឆ្នាំថ្មី រថយន្តម៉ាកឡង់គ្រីសស័រស៊េរីទំនើបដ៏ថ្មីសន្លាងមួយគ្រឿង។

កាដូឆ្នាំថ្មី ដ៏ពិសេសនេះ បានធ្វើឱ្យលោក ជំទាវ ម៉ៃ សុម៉ាលី ដែលជាភរិយាញញឹមបិទមាត់សឹងមិនជិត ត្បិតទទួលអារម្មណ៍ភ្ញាក់ផ្អើលមិនធ្លាប់មាន ពីមនុស្សជាទីស្រលាញ់ជុំវិញខ្លួន ជាពិសេស គឺស្វាមី លោកជំទាវផ្ទាល់តែម្ដង។

នៅលើបណ្ដាញសង្គមហ្វេសប៊ុកផ្ទាល់ខ្លួន ជំទាវ ម៉ៃ សុម៉ាលី បានរៀបរាប់ពីអារម្មណ៍ក្ដុកក្ដួល និងរំភើបរបស់ខ្លួនយ៉ាងដូច្នេះថា៖ “ថ្ងៃនេះពិតជារំភេីបខ្លាំងណាស់ឡេីងស្រក់ទឹកភ្នែកហេីយ ប្ដីធ្វេីសុីផ្លូវអារម្មណ៍ទាំងព្រឹក! ចឹងតេីបានចេះតែប្លែកៗទាំងពីល្ងាច តាមពិតចឹងសោះ! បានទទួលកាដូពិសេសពីប្ដីសម្លាញ់ទាំងព្រឹក! អ្នកណាខ្លះយល់អារម្មណ៍មួយនេះថាយ៉ាណា? អូនពិតជារំភេីបខ្លាំងណាស់ប្ដីសម្លាញ់! អរគុណប្ដីសម្លាញ់! ព្រមទាំងថ្នាក់ដឹកនាំជួរមុខទាំងអស់និងសមាជិក របស់ ក្រុមហ៊ុន សេងហានទាំងអស់ដែលបានសហការគ្នាបានយ៉ាងល្អ!”។

ក្រោយទទួលបាន កាដូឆ្នាំថ្មី រថយន្ត Landcruiser ពណ៌ខ្មៅក្រឹបដ៏រលើបរលោងមួយគ្រឿងនេះភ្លាម លោកជំទាវ ម៉ៃ សុម៉ាលី ដាក់ឈ្មោះឱ្យភ្លាមថា៖ “ស្រីម៉ៅមានលាភ”។

ចុះចំណែកប្រិយមិត្តវិញ កៀកចុងឆ្នាំអ៊ីចឹង មានតម្រុយកាដូពីមនុស្សជាទីស្រលាញ់ខ្លះៗហើយ ឬនៅ?

The post លោកជំទាវ ម៉ៃ សុម៉ាលី ត្រូវស្វាមី និងបុគ្គលិកសហការគ្នា Surprised បានសម្រេចទាំងព្រឹក appeared first on .

តើភាពក្រីក្រពិតជាបណ្តាលមកពីការជឿកាន់ព្រះពុទ្ធសាសនាមែនឬទេ និងពុទ្ធសាសនាអាចជួយអ្វីខ្លះដល់អាជីវកម្ម?

ឧកញ៉ាកោះក្របី — Sat, 28 Aug 2021 03:46:06 +0000

មានទស្សនៈមួយចំនួនលើកឡើងផ្សេងៗគ្នា ជុំវិញទស្សនវិជ្ជាព្រះពុទ្ធសាសនានៅក្នុងសកលលោក ដោយបានអះអាងថា ព្រះពុទ្ធសាសនាធ្វើឲ្យអ្នកគោរព ឬប្រតិបត្តិតាមក្រ ប្រើអំពើហិង្សា ការកេងប្រវ័ញ្ច ការសេពគ្រឿងស្រវឹង គ្រឿងញៀន និងអំពើអសីលធម៌កើតមានជារៀងរាល់ថ្ងៃ។ សម្រាប់ព្រះពុទ្ធសាសនានៅប្រទេសកម្ពុជាវិញ ក៏បានធ្វើឲ្យសាវ័ករបស់ព្រះអង្គក្រ ពោលគឺប្រជាជនភាគច្រើនក្រដោយសារពួកគាត់កាន់ព្រះពុទ្ធសាសនា។

នៅកម្ពុជា ព្រះពុទ្ធសាសនាត្រូវបានចាត់ទុកថាជាសាសនារបស់រដ្ឋ ហើយសាសនាក៏ត្រូវគេលើកតម្កើងយ៉ាងខ្ពស់ជាបាវចនារបស់ជាតិទៀតផង។ ទាំងនេះបង្ហាញឲ្យឃើញថា ព្រះពុទ្ធសាសនាពិតជាត្រូវបានផ្តល់តម្លៃដ៏ខ្ពង់ខ្ពស់ពីសំណាក់ប្រជាជាតិខ្មែរ ខណៈដែលមានប្រជាជនខ្មែរ រាប់តាំងពីរាស្ត្រសាមញ្ញ មន្ត្រីរាជការគ្រប់លំដាប់ថ្នាក់ រហូតដល់ព្រះមហាក្សត្រ បានគោរពប្រតិបត្តិជាទីសក្ការៈយ៉ាងខ្ជាប់ខ្ជួន។

សូមចុច Subscribe Telegram oknha_news នឹងទទួលបានព័ត៌មានពីសកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ដោយយល់ឃើញបែបនេះ ឯកឧត្តម ហឿន សំនៀង នាយកវិទ្យាស្ថានតេជោសែនសាធារណការ និងដឹកជញ្ជូន មានប្រសាសន៍ជាការឆ្លើយតបទៅនឹងទស្សនថា ការជឿកាន់ព្រះពុទ្ធសាសនាធ្វើឲ្យយើងក្រ នេះជាគំនិតដែលយល់ខុសយ៉ាងខ្លាំងមកលើព្រះពុទ្ធសាសនា ជាទស្សន:ដែលមិនបានសិក្សាស្វែងយល់ពីព្រះពុទ្ធសាសនា។

ឯកឧត្តមបន្តថា ជាទស្សនដែលអាចកើតចេញពីច្រើនប្រភពដូចជា អាចចេញពីពពួកអ្នកមិនគោរពស្រឡាញ់និងចង់បន្សាបជំនឿព្រះពុទ្ធសាសនា ក្នុងសង្គមខ្មែរ។ ជំនឿជាភាពខ្លាំងនៃមនុស្ស ឬសង្គមជាតិមួយ តែជំនឿក៏អាចជាភាពទន់ខ្សោយនៃបុគ្គល ឬសង្គមមួយផងដែរ។ ជាក់ស្តែង បើប្រព័ន្ធជំនឿត្រូវបានបន្សាបហើយ អ្វីៗនឹងងាយស្រួលតាមនោះដែរ។ យើងគ្រប់គ្នាដឹងហើយថាព្រះពុទ្ធសាសនាជាសាសនារបស់រដ្ឋ ពោល គឺព្រះពុទ្ធសាសនាជា គ្រឹះនៃប្រព័ន្ធជំនឿងយ៉ាងរឹងមាំរបស់ខ្មែរ និងសង្គមខ្មែរទាំងមូលផងដែរ។

លើសពីនេះ ឯកឧត្តបន្ថែមថា គំនិតនេះអាចចេញពីមនុស្សដែលមិនយល់ពីព្រះពុទ្ធសាសនា និងឃើញព្រឹត្តិការណ៍សង្គមនានា ឬអាចឃើញឥរិយាបថយឺតយ៉ាវរបស់អតីតអ្នកបួសខ្លះក្នុងស្រុកភូមិ ឬលឺទ្រឹស្តីបទតាមគេតាមឯងផង ដោយមិនបានសិក្សាសង្កេតជាក់លាក់ ក៏ដាក់បន្ទុកមកលើព្រះពុទ្ធសាសនាតែម្តង។ ការចោទប្រកាន់ទៅលើអតីតអ្នកបួសបានបួសរាប់សិបឆ្នាំ ហើយសឹកមកវិញខ្ចិល រកស៊ីមិនទាន់គេ រស់នៅក្នុងភាពក្រីក្រ នឹងសន្និដ្ឋានថា ព្រះពុទ្ធសាសនាធ្វើឲ្យមនុស្សខ្ចិល ធ្វើឲ្យមនុស្សក្រ ក៏មាន ឬទស្សននេះ អាចចេញពីមនុស្សមិនចំរើន ជាមនុស្សបរាជ័យ យល់មិនដល់មុជមិនឆ្ងាយ គិតមិនជ្រៅ ចឹងជា ជាងបន្ទោសខ្លួនឯង ក៏ទំលាក់ទៅព្រះពុទ្ធសាសនាក៏ថាបាន។

លោកឧកញ៉ា យ៉ន សេងហាន ទីប្រឹក្សាផ្ទាល់សម្តេចព្រះមហាសង្ឃរាជ បូរ គ្រី មានប្រសាសន៍ថា ពេលខ្លះគេមើលតែសំបកខាងក្រៅ ហើយវាយតម្លៃដល់គុណតម្លៃជាសាកលខាងក្នុងនៃព្រះពុទ្ធសាសនា។ ព្រះពុទ្ធសាសនានឹងដឹកនាំមនុស្សឲ្យរីកចំរើន ឬនាំឲ្យអន់ថយ ទាល់តែយើងប្រតិបត្តិប្រព្រឹតិ្តទៅតាមអ្វីដែលព្រះពុទ្ធបានសម្តែងទើបយើងដឹង។ បើយើងមិនស្គាល់មិនដឹងផង ទៅលើវាយតម្លៃលើទ្រឹស្តីព្រះពុទ្ធសាសនាជារឿងដែលត្រឹមត្រូវ ខណៈដែលពួកអ្នកបង្ហាញទស្សនៈលើកឡើងនោះកើតទាន់សាសនាព្រះពុទ្ធជាសាសនាដ៏ល្អក្រៃលែង។

ទោះជាយ៉ាងណាក៏ដោយលោកឧកញ៉ាសង្កេតឃើញថា៖ «ពាក់ព័ន្ធនឹងការមានក្រនេះ យើងដាក់បន្ទុកទៅលើសាសនាគឺមិនសមហេតុផលនោះទេ ពីព្រោះយើងនឹងឯងដែលជាអ្នកគោរពប្រតិបត្តិជាអ្នកយកទៅអនុវត្តជាមួយនឹងសភាពការណ៍ជាក់ស្តែងនៃផែនការអាជីវកម្ម ផែនការជីវិត ឬមកពីយើងចេះតែបណ្តែតបណ្តាយជីវិត ហើយអាងចោទលើព្រះពុទ្ធសាសនា»។

ឯកឧត្តម ហឿន សំនៀង៖ «ខ្ញុំបួស ១៩វស្សា និងបានរៀនសូត្រក៏ច្រើនគ្រាន់ដែរ ខ្ញុំរកមិនឃើញកន្លែងណាមួយដែលព្រះពុទ្ធដាក់ទោសដល់ការមានបាននៃទ្រព្យថាជាអំពើបាប ជាទោស ឬវិបត្តិនោះឡើយ។ ខ្ញុំឃើញតែរឿងព្រះពុទ្ធទ្រង់សសើរពីអានិសង្សនៃការមានទ្រព្យ ឬអត្ថប្រយោជន៍នៃការមានទ្រព្យ។ មិនតែប៉ុណ្ណោះ ខ្ញុំឃើញតែចំណុចដែលព្រះពុទ្ធណែនាំពីវិធីសាស្ត្ររកទ្រព្យ និងមានបានទ្រព្យ តាមរបៀបត្រឹមត្រូវ ថ្លៃថ្នូរ ដែលមិនប៉ះពាល់ប្រយោជន៍អ្នកដទៃ ឬសង្គមជាតិទៀតផង»។

ទាក់ទងនឹងការលើកឡើងថាការជឿកាន់ព្រះពុទ្ធសាសនា ធ្វើឲ្យយើងក្រ លោកឧកញ៉ា ចេង ខេង អគ្គនាយកក្រុមហ៊ុនអចលទ្រព្យ CPL ឲ្យដឹងថា ព្រះពុទ្ធសាសនាអាចធ្វើឲ្យយើងមានបាន ប៉ុន្តែអ្នកមួយចំនួនទៅចោទព្រះពុទ្ធ គោរពពុទ្ធសាសនាធ្វើឲ្យក្រ យើងរៀនពីព្រះអង្គឲ្យបានច្រើនយើងសប្បាយចិត្ត មានសុភមង្គលផ្លូវកាយ ផ្លូវចិត្ត ពីព្រោះព្រះអង្គនាំមនុស្សឲ្យល្អ។

ជាមួយគ្នានេះដែរ លោកឧកញ៉ាកត់សម្គាល់ថា៖ «ចូលមកភ្នំពេញដំបូង ខ្ញុំយកទ្រឹស្តីព្រះពុទ្ធមកមើល និងស្តាប់ក៏ខ្ញុំអាចក្លាយជាអ្នកមានមកដល់សព្វថ្ងៃ។ យើងស្តាប់ព្រះពុទ្ធបានធ្វើឲ្យស្ងប់ចិត្ត សប្បាយចិត្ត និងមានសុភមង្គលពិតប្រាកដទៀតផង»។

ឯកឧត្តម ហឿន សំនៀង៖ «ខ្មែរក្រមិនមែនដោយសារកាន់ជឿព្រះពុទ្ធសាសនាទេ តែខ្មែរក្រដោយសារ តែសង្គ្រាមដ៏រាំរ៉ៃរាប់សិបជំនាន់ របបប្រល័យពូជសាសន៍កាប់សម្លាប់ជនជាតិ ខ្លួនឯង ការបែកបាក់ផ្ទៃក្នុង ភាពល្ងង់ខ្មៅ មិនបានសិក្សារៀនសូត្រ និងការ ប្រើប្រាស់ធនធានជាតិខុសគោលដៅជាដើម ជាហេតុធ្វើឲ្យខ្មែរក្រ»។

លោកឧកញ៉ា ផន វណ្ណិត ទីប្រឹក្សាផ្ទាល់សម្តេចព្រះមហាសង្ឃរាជ បួរ គ្រី បានអះអាងថា ជំនឿ និងការប្រតិបត្តិក្នុងព្រះពុទ្ធសាសនាបានក្លាយជាមាគ៌ាជីវិតប្រកបដោយវិចារណញ្ញាណដើម្បីអភិវឌ្ឍន៍ផ្លូវចិត្ត និងសន្តិភាពសម្រាប់មនុស្សជាតិគ្រប់វណ្ណៈ។ ព្រះពុទ្ធសាសនាជាសាសនាប្រាកដនិយមមានគោលការណ៍ជាក់លាក់ក្នុងការដឹកនាំមនុស្ស នឹងរក្សាមនុស្សគ្រប់សម័យកាល។ កាលណាយើងយកទ្រឹស្តី និងការអប់រំជាពុទ្ធីរបស់ព្រះអង្គមកដឹកនាំជីវិត ប្រទេសជាតិ ស្ថាប័ន ខ្ញុំជឿថាយើងនឹងមាការរីកចម្រើនទៅមុខ។

ជាងនេះទៅទៀត លោកឧកញ៉ាបន្ថែមថា «បញ្ហារបស់មនុស្សមិនមែនថា ព្រះពុទ្ធសាសនាខ្វះមធ្យោបាយជួយដោះស្រាយនោះទេ ពុទ្ធសាសនាមានទិសដៅនាំយើងទៅរកភាពជោគជ័យ។ អ្វីដែលសំខាន់ យើងត្រូវស្គាល់ខ្លួនឯងច្បាស់លាស់ ព្រោះសត្រូវធំបំផុតក្នុងជីវិតពិតប្រាកដរបស់យើង គឺការមិនបានអប់រំលត់ដំខ្លួនឯងឲ្យរឹងមាំ»។

ឯកឧត្តម ហឿន សំនៀង បន្ថែមថា យើងដឹងហើយថា មនុស្សបរាជ័យភាគច្រើន ចេញពីភាពល្ងង់ខ្លៅ អវិជ្ជា មិនបានសិក្សារៀនសូត្រជ្រៅជ្រះ ឬជាមនុស្សមានទស្សនអវិជ្ជមានខ្លាំងពេកចំពោះខ្លួនឯង។ ផ្ទុយទៅវិញ មនុស្សជោកជ័យ គេតែងអរគុណដល់អតីតកាល ពូជពង្សវង្ស ត្រកូល និងមនុស្សជុំវិញខ្លួន ជាពិសេស ភាពល្វីជូចត់ ខ្សត់ខ្សោយ លំបាកតោយ៉ាកដែលធ្វើឲ្យគេរឹងមាំ។ បុគ្គលជោគជ័យ មានទស្សន:វីជ្ជា។

ឯកឧត្តម ហឿន សំនៀង៖ «សម្លឹងមើលប្រទេសដែលកាន់ព្រះពុទ្ធសាសនាដូចយើង ដូចជាប្រទេសថៃ វៀតណាម ចិន ជប៉ុន កូរ៉េ និងតៃវ៉ាន់។ ប្រទេសទាំងនេះ កាលមុនក្រដែរ តែឥឡូវគេក្លាយជាប្រទេសអ្នកមាន។ សួរថា ហេតុអ្វី? ចម្លើយដ៏សាមញ្ញ គឺថា កាលមុនប្រទេសទាំងនេះ ក៏ក្រដែរ គឺក្រដោយសារសង្គ្រាមផង និងក្រដោយសារការវិវត្តនៃបច្ចេកវិទ្យាមិនទាន់ជឿនលឿន។ លុះដល់គេអស់សង្គ្រាម និងការមកដល់នៃបច្ចេកវិទ្យា គេក៏មានឪកាសអភិវឌ្ឍប្រទេសក្លាយជាអ្នកមាន»។

ព្រះសុមេធវង្សបណ្ឌិត សុខ ប៊ុនធឿន ប្រធាននាយកដ្ឋានពុទ្ធិកឧត្តមសិក្សានិងក្រោយពុទ្ធិកឧត្តមសិក្សានៃអគ្គាធិការដ្ឋានពុទ្ធិកសិក្សាជាតិ មានថេរដីកាថា៖ «ព្រះពុទ្ធសាសនាបង្រៀនមនុស្សនូវរបៀបដឹកនាំជីវិតឲ្យផុតពីគ្រោះថ្នាក់ និងស្វែងរកការរំដោះទុក្ខតាមរយៈផ្លូវកាយ និងផ្លូវចិត្ត។ ព្រះពុទ្ធសាសនាមិនគ្រាន់តែជាកម្មវត្ថុនៃការសិក្សា និងសំណេរបែបតែងសេចក្តីប៉ុណ្ណោះទេ តែថែមទាំងជាគំរូនៃការអនុវត្តចំពោះឥរិយាបថ ក្នុងការសម្អិតសម្អាងមនុស្សទាំងផ្លូវកាយ និងផ្លូវចិត្ត»។

លោកឧកញ៉ា ផន វណ្ណិត៖ «ការរៀនសូធ្យពីព្រះពុទ្ធសាសនានឹងធ្វើឲ្យយើងដឹងកាន់តែច្រើន ព្រោះព្រះពុទ្ធបង្រៀនយើងឲ្យស្គាល់សង្គម បង្រៀនឲ្យស្គាល់មនុស្ស បង្រៀនឲ្យស្គាល់ទិសដៅនៃការងារ បង្រៀនយើងឲ្យចេះទំនាក់ទំនងមនុស្ស អ៊ីចឹងប្រសិនបើយើងចង់ចាប់ផ្តើមមុខរបរពាណិជ្ជកម្ម យើងត្រូវស្គាល់និងដឹងឲ្យបានច្រើនទើបជោគជ័យ»។

លោកឧកញ៉ា ចេង ខេង៖ «អ៊ីចឹងត្រូវដឹងខ្លួនយើង ពេលដែលយើងស្តាប់ព្រះអង្គ ប្រសិនបើយើងជា CEO ស្តាប់ព្រះអង្គដើម្បីអភិវឌ្ឍន៍ក្រុមហ៊ុនឲ្យជាក្រុមហ៊ុនដ៏អស្ចារ្យ បើយើងជាអ្នកដឹកនាំប្រទេសជាតិក៏អាចធ្វើឲ្យប្រទេសជាតិមួយរុងរឿងបានដែរ។ ប្រទេសជប៉ុនគេយកព្រះពុទ្ធសាសនាទៅធ្វើការដឹកនាំប្រទេស ហើយបានប្រែក្លាយជាប្រទេសអ្នកមានទីពីរលើលោក ដោយសារតែការដឹកនាំដោយទ្រឹស្តីព្រះពុទ្ធសាសនានឹងឯង»។

បន្ថែមលើនេះទៀត លោកឧកញ៉ាបញ្ជាក់ថា ព្រះពុទ្ធអាចធ្វើឲ្យសត្រូវដែលចង់សម្លាប់ព្រះអង្គមកធ្វើជាសាវ័ក ហើយមនុស្សដែលធ្វើអាក្រក់គ្រប់រឿងជាមួយព្រះអង្គ ក៏យកមកធ្វើជាសាវ័កដែរ ចឹងបានន័យថា ព្រះអង្គជាបុគ្គលអស្ចារ្យលើលោក យើងមិនអាចចេះតែប្រមាថដោយសារមិនមានភាពយល់ដឹងនោះទេ។

ឯកឧត្តម ហឿន សំនៀង៖ «ព្រះពុទ្ធលើកទឹកចិត្ត និងបង្ហាញផ្លូវឲ្យក្លាយជា អ្នកជោគជ័យ មានបានទ្រព្យសម្បត្តិ រហូតព្រះពុទ្ធសសើរពីគុណសម្បត្តិនៃភាពមានបានទ្រព្យ មិនតែប៉ុណ្ណោះ ព្រះពុទ្ធមិនត្រឹមតែ បង្ហាត់បង្ហាញផ្លូវ មធ្យោបាយ និងរបៀបដែលធ្វើឲ្យជោគជ័យ មានបានប៉ុណ្ណោះទេ ថែមទាំងប្រាប់ពីការចេះប្រើប្រាស់ ទ្រព្យធនរបស់ខ្លួនឲ្យល្អ ត្រឹមត្រូវ និងមានប្រយោជន៍ទៀតផង»។

ឯកឧត្តមបញ្ជាក់បន្ថែមថា ការមានព្រះពុទ្ធសាសនា និងការថែរក្សាទំនៀមទំលាប់ប្រពៃណីដ៏ល្អរបស់ខ្មែរយើង នឹងជួយឲ្យប្រទេសខ្មែរកាន់តែរីកចំរើនលឿន និងស្រសបំព្រងទៀតផង ព្រោះព្រះពុទ្ធសាសនា និងប្រពៃណីទំនៀម ទំលាប់ខ្មែរដ៏ល្អនេះ ជាខឿនប្រព័ន្ធជំនឿដ៏រឹងមាំផង និងជាអលង្ការលម្អប្រជាជន និងប្រទេសជាតិផង។

លោកឧកញ៉ា យ៉ន សេងហាន បន្ថែមថា គ្រាន់កាន់តែសីល ៥ របស់ព្រះសម្មាសម្ពុទ្ធបានធ្វើឲ្យយើងល្អ ប្រទេសជាតិល្អ ឬយើងរកស៊ីក៏ធ្វើឲ្យរីកចំរើនរួចបាត់ទៅហើយ។ លោកពន្យល់ថា ទី១ ការណាយើងរស់នៅមិនសម្លាប់គ្នា គឺយើងបានសុខ ទី២ ប្រទេសមួយដែលមានការលួចប្លន់គឺរកសេចក្តីសុខមិនឃើញនោះទេ សូម្បីតែការងាររកស៊ី ឬរស់នៅក៏មិនបានសុខដែរ ទី៣ ការរស់នៅក្នុងគ្រួសារជាប្តីប្រពន្ធ ដែលមិនក្បត់បោកប្រាស់បញ្ឆោទគ្នា មិនលួចល័ក្ខគ្នាជាមួយអ្នកដទៃសាហាយស្មន់ យើងដឹងហើយគ្រួសារមួយដែលមានបញ្ហានឹងកើតឡើងគឺមានការឈ្លោះទាល់ទែងប្តឹងផ្តល់គ្នា បើទាក់ទងអាជីវកម្មអាចឈានទៅបិទក្រុមហ៊ុនក៏មាន ទី៤ ការរកស៊ីទទួលទានដើម្បីរីកចំរើនត្រូវការភាពស្មោះត្រង់ មិនកុហសបោកប្រាស់អ្នកដទៃធ្វើឲ្យគេចូលចិត្តស្រឡាញ់យើងហើយនឹងរីកចំរើន និងទី៥ នៅពេលយើងគ្រប់គ្នា មិនសេពគ្រឿងស្រវឹង គ្រឿងញៀន ធ្វើឲ្យយើងមានស្មារតីល្អ ប្រទេសមានការអភិវឌ្ឍន៍លឿន សេដ្ឋកិច្ចរឹងមាំ។

ម្យ៉ាងទៀត នៅក្នុងទ្រឹស្តីព្រះពុទ្ធសាសនាមានធម៌ ៤ដែលធ្វើឲ្យយើងសម្រេចគោលដៅ ទី១ មានឆន្ទៈ ពេញចិត្តជាមួយការងារឬយើងមានចំណងចង់បានអ្វីដែលភាសាអាជីវកម្មយើងហៅថា មានក្តីសុបិនយើងចង់បានអ្វីស្រឡាញ់អ្វីគឺធ្វើឲ្យបានច្បាស់លាស់ ទី២ វិរិយៈ ចំពោះអ្វីដែលយើងចង់បាននឹងគឺត្រូវតែមានការព្យាយាមប្រឹងប្រែងធ្វើកិច្ចការងារឲ្យបានសម្រេច ទី៣ គឺអោយយើងមានការយកចិត្តទុកដាក់ ឬតាំងចិត្តធ្វើការងារឲ្យជោគជ័យ ទី៤ ធ្វើអ្វីក៏ដោយត្រូវប្រកបដោយបញ្ញាឆ្លាតវៃ ជួបបញ្ហាបរាជ័យគឺយើងត្រូវមានបញ្ញាក្នុងការដោះស្រាយ ឬបញ្ញាក្នុងការប្រើប្រាស់យុទ្ធសាស្រ្តដើម្បីធ្វើអាជីវកម្ម កិច្ចការងារអាជីពឲ្យជោគជ័យ៕

The post តើភាពក្រីក្រពិតជាបណ្តាលមកពីការជឿកាន់ព្រះពុទ្ធសាសនាមែនឬទេ និងពុទ្ធសាសនាអាចជួយអ្វីខ្លះដល់អាជីវកម្ម? appeared first on .

ទម្រាំសម្រេចបានការសាងសង់ភូមិគ្រឹះតម្លៃរាប់ម៉ឺននៅទីជនបទទុកជាកាដូចំពោះមនុស្សជាទីស្រឡាញ់ ឧកញ៉ា យ៉ន សេងហាន ប្រើល្បិចមួយ

ឧកញ៉ាកោះក្របី — Fri, 30 Jul 2021 08:48:33 +0000

នៅពេលថ្មីៗនេះ លោកឧកញ៉ា យ៉ន សេងហាន បានសម្រេចចិត្តសាងសង់ភូមិគ្រឹះដ៏ស្កឹមស្កៃមួយកន្លែងនៅទីជនបទខ្ពស់ត្រដែតផ្អើលភូមិកំណើត ដើម្បីជាកាដូចំពោះលោកអ្នកមានគុណទាំងទ្វេររបស់លោកដែលមានតម្លៃរាប់ម៉ឺនដុល្លារអាមេរិក នៅភូមិទីមួយ ឃុំកំពង់ទ្រាស់ ស្រុកក្រូចឆ្មារ ខេត្តកំពង់ចាម ប៉ុន្តែស្រុកក្រូចឆ្មារត្រូវបានកាត់បំបែកជាមួយខេត្តត្បូងឃ្មុំ។

សូមចុច Subscribe Telegram oknha_news ដើម្បីទទួលព័ត៌មានពីសកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

លោកឧកញ៉ា យ៉ន សេងហាន អគ្គនាយកក្រុមហ៊ុនអចលនទ្រព្យ សេងហាន ថ្លែងប្រាប់គេហទំព័រឧកញ៉ាញូស៍ថា៖ “តាមពិតទៅខ្ញុំចង់ធ្វើជូនគាត់តាំងពីឆ្នាំ២០១៥មកម្លេះ ប៉ុន្តែពួកគាត់មិនអោយធ្វើខ្លាចអស់លុយ ហើយក្រោយមកខ្ញុំបានលួងលោមគាត់ម្តងជាពីរដង បន្ទាប់មកគាត់ឯកភាពក៏សម្រេចថាសាងសង់ជូនគាត់ភ្លាម”។

ចំពោះតម្លៃនៃការសាងសង់ភូមិគ្រឹះរបស់អតីតកូនអ្នកខេត្តកំពង់ចាមរូបនេះ សម្រាប់លោកឪពុកអ្នកម្តាយដែលមានវ័យជាង ៨០ឆ្នាំប្លាយហើយនោះ គឺទាំងចាក់ដីដំរាប់ទីធ្លាផ្ទះ និងរបង គិតជាទឹកប្រាក់មានប្រមាណជាង ១២ម៉ឺនដុល្លារអាមេរិក។

“បើនិយាយពីរំភើប គឺមិនដឹងថាយកអ្វីមកថ្លែងស្មានឲ្យត្រូវនោះទេ ព្រោះជាអ្វីដែលយើងប៉ងយូរហើយ សូម្បីតែក្នុងឆ្នាំ២០១៥ នៅពេលដែលខ្ញុំមានលទ្ធភាពសាងសង់ផ្ទះជូន ប៉ុន្តែគាត់មិនអនុញ្ញាតិឲ្យធ្វើ ហើយពេលនោះគឺខ្ញុំអត់សូវសប្បាយចិត្តប៉ុន្មានទេ។ រហូតដល់ឆ្នាំ២០១៨ហ្នឹង ខ្ញុំក៏បញ្ឆោតគាត់ថា ធ្វើផ្ទះគឺអស់ត្រឹមតែពីរបីម៉ឺនទេ ដល់ពេលចាក់ដី និងធ្វើរបងអស់ពីរបីម៉ឺនបាត់”។ លោកឧកញ៉ាបន្ថែម។

ឧកញ៉ាញូស៍ បានជូនសំណួរទៅកាន់ឧកញ៉ា យ៉ន សេងហាន ថា ទៅថ្ងៃអនាគតតើលោកមានកាដូធំៗអ្វីខ្លះសម្រាប់ជូនដល់លោកអ្នកមានគុណ? លោកឆ្លើយតបមិនបង្អង់យូរដោយស្នាមញញឹមថា គោលបំណងទៅថ្ងៃខាងមុខ ខ្ញុំមានតែសូមឲ្យគាត់ (ឪពុក-ម្តាយ) មានសុខភាពល្អ និងនាំគាត់ដើរលេងឲ្យបានច្រើនប្រទេសបន្ថែមទៀត។

លោកថា នៅពេលបច្ចុប្បន្ននេះខ្ញុំកំពុងតែធ្វើចេតិយ៍ទុកសម្រាប់គាត់ បានប្រមាណ ៥០%ហើយ គាត់មានការសប្បាយចិត្តជាខ្លាំង។ លោកបញ្ជាក់ថា ការសាងសង់ចេតិយ៍នេះគឺមិនមានការប្រមាថដល់ជីវិតគាត់នោះទេ គ្រាន់យើងរៀបចំជូនពេលគាត់មើលឃើញដឹងលឺតែប៉ុណ្ណោះ។

សូមបញ្ជាក់ថា មុនទទួលបានគោរមងារដ៏ឧដ្តុងឧត្តមជាឧកញ៉ា និងមុខជំនួញជោគជ័យជាច្រើនដូចសព្វថ្ងៃនេះ លោកឧកញ៉ា យ៉ន សេងហាន កើតក្នុងគ្រួសារកសិករ មានបងប្អូនចំនួន ៩នាក់ ខណៈលោកគឺជាកូនទី៥ រស់នៅភូមិទីមួយ ឃុំកំពង់ទ្រាស់ ស្រុកក្រូចឆ្មារ ខេត្តកំពង់ចាម តែក្រោយមករដ្ឋាភិបាលបានកាត់បំបែកចេញមកជាខេត្តត្បូងឃ្មុំថ្មី កាលពីកុមារភាពរបស់លោករស់នៅជាមួយឪពុកម្តាយក្រីក្រលំបាកសឹងតែរកអ្វីហូបគ្មាន ដោយពេលខ្លះលោកហូបក្តួចនិងពោតលាយជាមួយបាយផងក៏មាន ដែលទាំងនេះគឺជាបទពិសោធន៍ដ៏ជូរជត់របស់លោក៕

សូមចុចអានអត្ថបទទាក់ទងខាងក្រោម៖

លោក យ៉ន សេងហាន ធ្លាប់ចូលរួមបកប្រែគម្ពីរអភិធម្មពុទ្ធសាសនាភាសាថៃមកខ្មែរ មុនទទួលងារឧកញ៉ា

The post ទម្រាំសម្រេចបានការសាងសង់ភូមិគ្រឹះតម្លៃរាប់ម៉ឺននៅទីជនបទទុកជាកាដូចំពោះមនុស្សជាទីស្រឡាញ់ ឧកញ៉ា យ៉ន សេងហាន ប្រើល្បិចមួយ appeared first on .

ឧកញ៉ានិងបណ្ឌិតដែលមានចំណេះដឹងជ្រៅជ្រះផ្នែកព្រះពុទ្ធសាសនាយល់ឃើញថា វាមិនមានអ្វីខុសនោះទេ ក្នុងការដែលសម្តេចសង្ឃតែងតាំងជាទីប្រឹក្សា

ឧកញ៉ាកោះក្របី — Sun, 04 Jul 2021 07:35:25 +0000

ថ្មីៗនេះ អ្នកនិយមលេងបណ្តាញសង្គមហ្វេសប៊ុកមួយចំនួន បានសម្តែងការមិនពេញចិត្តចំពោះការតែងតាំងងារជាទីប្រឹក្សា ដល់សប្បុរសជនពីរនាក់ប្តីប្រពន្ធ គឺលោកជំទាវឧកញ៉ា ស្រី ណារួម ដែលគេស្គាល់ថា ម៉ែរួយ និងលោក រួយ មង្គល ត្រូវបានតែងតាំងជាទីប្រឹក្សាផ្ទាល់ សម្តេចព្រះអភិសិរីសុគន្ធាមហាសង្ឃរាជាធិបតី បួរ គ្រី សម្តេចព្រះមហាសង្ឃរាជគណៈធម្មយុត្តិកនិកាយនៃកម្ពុជា។

សូមចុច Subscribe Telegram oknha_news ដើម្បីទទួលបានព័ត៌មានគ្រប់សកម្មភាពឧកញ៉ា អាជីវកម្ម ចែករំលែក ជោគជ័យ

ការមិនពេញចិត្តនេះដោយពួកគាត់លើកហេតុនឹងអះអាងថា មិនសាកសមតែងតាំងអ្នកលក់ឡេ ច្រៀងរាំតាមហ្វេសប៊ុក និងគ្រូមន្តអាគមហៅខ្យល់ ហៅទឹកភ្លៀងមកជាទីប្រឹក្សានោះទេ សមតែងតាំងមនុស្សដែលមានសមត្ថភាពនិងមានចំណេះដឹងផ្នែកព្រះពុទ្ធសាសនាទើបត្រឹមត្រូវ។

បណ្ឌិតនិងបញ្ចវ័នខ្មែរដែលមានចំណេះដឹងជ្រៅជ្រះផ្នែកព្រះពុទ្ធសាសនា បានបង្ហាញការយល់ថា នេះវាមិនមានអីខុសទេ ក្នុងការដែលសម្តេចសង្ឃសម្រេចត្រាស់ជាទីប្រឹក្សាក្នុងសាសនានោះ។

លោកឧកញ៉ា យ៉ន សេងហាន អគ្គនាយកក្រុមហ៊ុន សេងហាន និងអតីតជាឧទ្ទេសាចារ្យបង្រៀនផ្នែកព្រះវិន័យ ព្រមទាំងជាអ្នកយល់ច្បាស់ផ្នែកវិន័យបិដកជ្រៅជ្រះ បានបង្ហាញការយល់ឃើញថា៖ “ការតែងតាំងងារជាពុទ្ធសាសនូបត្ថម្ភន៍ចំពោះពុទ្ធបរិស័ទគឺជារឿងល្អ ខណៈដែលពួកគាត់មានសទ្ធាចូលរួមទំនុកបំរុងជាលុយដើម្បីជួយព្រះពុទ្ធសាសនា ប៉ុន្តែការតែងតាំងជាទីប្រឹក្សាគឺវាឆ្គាំឆ្គងណាស់ហើយ”។

បើតាមលោកឧកញ៉ា យ៉ន សេងហាន ការតែងតាំងជាទីប្រឹក្សា ទាល់តែគាត់មានចំណេះដឹង មានស្នាដៃក្នុងព្រះពុទ្ធសាសនា ម្យ៉ាងការតែងតាំងខ្លះ នាំឲ្យខូចសាសនាទៅវិញទេ។

នាយកវិទ្យាស្ថានតេជោសែនសាធារណាការ និងដឹកជញ្ជូន លោកបណ្ឌិត ហឿន សំនៀង អតីតអ្នកបួសបានច្រើនវស្សានិងសិក្សាខ្ពង់ខ្ពស់ផ្នែកព្រះពុទ្ធសាសនានៅប្រទេសអភិវឌ្ឍន៍ បានលើកឡើងថា៖ “ខ្ញុំមិនមានចម្លើយពិតប្រាកដទេ ព្រោះថា រឿងតែងតាំងទីប្រឹក្សាជាឆន្ទានុសិទ្ធិរបស់សម្តេចៗព្រះសង្ឃតែប៉ុណ្ណោះ ម្យ៉ាងក៏ខ្ញុំមិនដឹងពីអ្វីៗនៅពីក្រោយសាច់រឿងនោះដែរ”។

លោក សំនៀង បានអះអាងថា៖ “សម័យសង្គ្រាម គេយកអ្នកខ្លាំងផ្នែកយុទ្ធសាស្ត្រសង្គ្រាមមកធ្វើជាទីប្រឹក្សា សម័យកាលហឺហារ គេយកអ្នកពូកែរកលុយ មកធ្វើជាទីប្រឹក្សាមានអីខុស រឿងដែលខុស គឺ អត់លុយនោះឯង”។

ជាគំនិតផ្ទាល់ខ្លួន លោក សំនៀង គូសបញ្ជាក់ថា៖ ការតែងតាំងជាទីប្រឹក្សានេះ មិនមានអីខុសទេ (ច្បាប់រដ្ឋមិនបានកំណត់ថា សម្តេចសង្ឃមិនអាចមានទីប្រឹក្សានោះទេ ឯច្បាប់សាសនាក៏មិនហាមឃាត់ដែរ) តែរឿងសំខាន់នោះ គឺថា តើយកទីប្រឹក្សា ដើម្បីប្រឹក្សាយោបល់ដោះស្រាយបញ្ហាអ្វី? បើចង់ដោះស្រាយបញ្ហាលុយកាក់ យកអ្នកមានពូកែរកលុយជាទីប្រឹក្សា បើចង់ដោះស្រាយបញ្ហាគ្មានចំណេះដឹង យកអ្នកប្រាជ្ញបណ្ឌិតជាទីប្រឹក្សា ជាដើម។ ចម្លើយពិតគឺថា តើចង់ដោះស្រាយបញ្ហាអ្វី? រកអ្នកជំនាញផ្នែកនោះៗ មកជាទីប្រឹក្សា និងធ្វើតាមគេទៅជាការស្រេច។

បើតាមអនុប្រធានសមាគមអ្នកអភិវឌ្ឍន៍ដីឡូតិ៍កម្ពុជា និងអតីតព្រះសង្ឃសិក្សានៅប្រទេសឥណ្ឌាផ្នែកព្រះពុទ្ធសាសនា លោកឧកញ៉ា ផន វណ្ណិត បានលើកឡើងថា៖ “កិច្ចការនេះគឺខាងសាសនាជាអ្នករៀបចំចាត់ចែង ចំពោះការតែងតាំងវាចេះតែមានអ្នកទាស់ទាល់ហើយ ប៉ុន្តែព្រះពុទ្ធសាសនារុងរឿងទៅបានក៏ដោយសារបរិស័ទបួនពួកដែរ”។

លោកឧកញ៉ាគូសបញ្ជក់ថា៖ “បច្ចុប្បន្នសម្តេចសង្ឃនៅស្រុកខ្មែរកំពុងមានការគាំទ្រ និងឧបត្ថម្ភពីពុទ្ធបរិស័ទច្រើន ចឹងលោកប្រោសព្រះរាជទានទៅដល់អ្នកដែលជួយឧបត្ថម្ភសាសនា ហើយលោកសព្វព្រះទ័យត្រាស់បញ្ញតិ្តងារជាទីប្រឹក្សាគឺអត់ទាស់ខុសអ្វីនោះទេ ព្រោះគេមានគុណសម្បត្តិ និងអាចប្រឹក្សាជួយលើកតម្លៃព្រះពុទ្ធសាសនាឲ្យមានការរីកចម្រើន”។

លោកបន្តថា សម្រាប់សម្តេចសង្ឃលោកមានសិទ្ធិក្នុងការតែងតាំងអ្នកណាម្នាក់ដើម្បីឡើងងារជាទីប្រឹក្សាដោយស្របច្បាប់។

លោកបន្តថា សម្រាប់ឧកញ៉ា ស្រីណារួម គាត់ក៏មានអ្នកគាំទ្រច្រើន ដូច្នេះគាត់មានងារជាទីប្រឹក្សាច្បាស់ណាស់ថាគាត់នឹងនាំអ្នកគាំទ្រឲ្យមកចូលរួមក្នុងព្រះពុទ្ធសាសនា នឹងស្រឡាញ់សាសនាឲ្យកាន់តែច្រើនឡើង គាត់ក៏ជាមនុស្សម្នាក់ដែលជួយក្នុងកិច្ចការសាសនា។

លោកឧកញ៉ា ផន វណ្ណិត បានលើកឧទាហរណ៍សម័យព្រះមកបញ្ជាក់ថា អង្គុលិមាល កាត់ដៃហើយនិងសម្លាប់មនុស្សចំនួន ៩៩៩នាក់ ចុងក្រោយអង្គុលិមាល ក៏នៅតែជាសាវ័កល្អរបស់ព្រះសម្មាសម្ពទ្ធដោយការសន្តោសនិងប្រស់ប្រណី។ ក្រឡេកមកវិញ ការតែងតាំងនេះ ជាការលើកទឹកចិត្តឱ្យបុគ្គលម្នាក់មានឈ្មោះ តែមិនមានជាការផ្ដល់អំណាចឱ្យអ្វីអោយបុគ្គលនោះទេ អាចអោយបុគ្គលនោះចូលទៅកៀក ជិតនិងសាសនា ហើយថែមទាំងញាំងបុគ្គលនោះជ្រះថ្លាហើយ ឱ្យជ្រះថ្លាថែមទៀតផង។

លោកឧកញ៉បញ្ជាក់បន្ថែមថា ការងារនៅក្នុងសាសនានិងសម្តេចសង្ឃ គឺគ្មានការងារណាដែលមានប្រាក់ចំណូលនោះទេ ចឹងត្រូវការផ្គត់ផ្គង់ឧបត្ថម្ភពីពុទ្ធបរិស័ទទាំងអស់ ព្រោះព្រះពុទ្ធសាសនារីកចំរើនទៅបានដោយសារបរិស័ទ ៤ពួកចូលរួមជ្រុមជ្រែងទល់ទប់ខ្ជែងពីខាងទាំងបួនជ្រុងឲ្យរឹងមាំ និងឲ្យនឹង។

សូមបញ្ជាក់ថា រដ្ឋធម្មនុញ្ញនៃប្រទេសកម្ពុជាបានកំណត់ថា ព្រះពុទ្ធសាសនាជាសាសនារបស់រដ្ឋ និងមានប្រជាពលរដ្ឋខ្មែរស្ទើរ ៩០% គឺជាអ្នកគោរពប្រតិបត្តិព្រះពុទ្ធសាសនាច្រើនជំនាន់កន្លងទៅនិងនាបច្ចុប្បន្ននេះ។

ជាទូទៅ ប្រជាពលរដ្ឋខ្មែរភាគច្រើន គោរពប្រតិបត្តិព្រះសង្ឃតំណាងឲ្យព្រះពុទ្ធសាសនា តាមជំនឿ និងទំនៀមទម្លាប់តៗគ្នាពីដូនតាមក។ ប្រជាពលរដ្ឋអ្នកមានជំនឿលើព្រះពុទ្ធសាសនាចាត់ទុកព្រះសង្ឃជាទីពឹង នៅក្នុងជីវភាពរស់នៅប្រចាំថ្ងៃ ដូចជា ត្រូវការព្រះសង្ឃចូលរួមបុណ្យប្រពៃណីមាន បុណ្យភ្ជុំបិណ្ឌ មាឃបូជា ពិសាខបូជា បុណ្យសពក្រុមគ្រួសារសាច់ញាតិ ប្រជាពលរដ្ឋដែលបានស្លាប់ ពេលរៀបអាពាហ៍ពិពាហ៍ បុណ្យជាតិដូចជា បុណ្យចូលឆ្នាំ បុណ្យខួបឯករាជ្យជាតិ និងពិធីបុណ្យច្រើនទៀត ដែលប្រជាពលរដ្ឋ មន្ត្រីរាជការ សង្គមស៊ីវិល អាជីវករ សិប្បករ សុទ្ធសឹងតែត្រូវការព្រះសង្ឃនៃព្រះពុទ្ធសាសនា។

ដោយសារពលរដ្ឋខ្មែរមានតម្រូវការព្រះសង្ឃនៅគ្រប់ការងារសង្គមបែបនេះ មានសាធារណមតិមួយចំនួនធំបានលើកតម្កើងថា ព្រះពុទ្ធសាសនា បានរួមចំណែកធ្វើឲ្យសង្គមមានការអភិវឌ្ឍន៍ តាំងពីអតីតកាល បច្ចុប្បន្នកាល និងតទៅអនាគតកាលថែមទៀត៕

The post ឧកញ៉ានិងបណ្ឌិតដែលមានចំណេះដឹងជ្រៅជ្រះផ្នែកព្រះពុទ្ធសាសនាយល់ឃើញថា វាមិនមានអ្វីខុសនោះទេ ក្នុងការដែលសម្តេចសង្ឃតែងតាំងជាទីប្រឹក្សា appeared first on .