ឧកញ៉ា ស្រ៊ាត មុំសុភា

លោកជំទាវឧកញ៉ា ស្រ៊ៀត មុំសុភា ទទួលការតែងតាំងជាកុងស៊ុលកិត្តិយសបង់ក្លាដេស ប្រចាំនៅកម្ពុជា

ឧកញ៉ាដែនដី — Wed, 29 Apr 2026 07:34:44 +0000

នៅថ្ងៃទី២៨ ខែមេសា ឆ្នាំ២០២៦នេះ លោកជំទាវឧកញ៉ា ស្រ៊ៀត មុំសុភា បានទទួលការតែងតាំងជាកុងស៊ុលកិត្តិយសបង់ក្លាដេស ប្រចាំនៅកម្ពុជា ជាផ្លូវការ ដែលពិធីប្រគល់លិខិតតែងតាំងនេះ ត្រូវបានរៀបចំឡើងដោយ ស្ថានកុងស៊ុលកិត្តិយសនៃសាធារណរដ្ឋប្រជាមានិតបង់ក្លាដេស ប្រចាំនៅព្រះរាជាណាចក្រកម្ពុជា ដោយមានការចូលរួមពីមន្ត្រីជាន់ខ្ពស់រដ្ឋាភិបាល អ្នកតំណាងស្ថានទូត មេដឹកនាំអាជីវកម្ម និងភាគីពាក់ព័ន្ធសំខាន់ៗពីប្រទេសទាំងពីរ នៅ Novotel Phnom Penh។

ពិធីដ៏សំខាន់នេះបានធ្វើឡើងក្រោមអធិបតីភាពរបស់ ឯកឧត្តម ហ៊ួត ហាក់ រដ្ឋមន្ត្រីក្រសួងទេសចរណ៍ព្រះរាជាណាចក្រកម្ពុជា និងមានការចូលរួមពី ឯកឧត្តម កាស៊ី ហ្វៃយ៉ាស មួរស៊ីដ ឯកអគ្គរដ្ឋទូតសាធារណរដ្ឋប្រជាមានិតបង់ក្លាដេស ព្រមទាំង ឯកឧត្តម វេជ្ជបណ្ឌិត អ៊ុន ខេង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ និង ឯកឧត្តម ឧកញ៉ា បណ្ឌិត តាន់ មុន្នីវណ្ណ តំណាងសភាពាណិជ្ជកម្មកម្ពុជា។

កម្មវិធីនេះមានព្រឹត្តិការណ៍សំខាន់ៗជាច្រើន រួមមាន៖ ១.ពិធីប្រគល់លិខិតតែងតាំងផ្លូវការ លោកជំទាវ ឧកញ៉ា ស្រ៊ៀត មុំសុភា ជាកុងស៊ុលកិត្តិយសបង់ក្លាដេស ប្រចាំនៅកម្ពុជា, ២.សុន្ទរកថា ថ្នាក់ខ្ពស់ពីមន្ត្រីរដ្ឋាភិបាល និង ឯកអគ្គរដ្ឋទូតបង់ក្លាដេស, ៣.ពិធីចុះហត្ថលេខាលើអនុស្សរណៈយោគយល់ (MOU) ជាមួយស្ថាប័នច្បាប់នៅកម្ពុជា ដើម្បីគាំទ្រកិច្ចសហប្រតិបត្តិការពាណិជ្ជកម្ម និងច្បាប់, ៤.ការបង្ហាញវប្បធម៌កម្ពុជា និងបង់ក្លាដេស បង្ហាញពីមិត្តភាព និងការទូតវប្បធម៌, ៥.វេទិកាភ្ជាប់អាជីវកម្ម (B2B) រវាងសហគមន៍អាជីវកម្មកម្ពុជា និងបង់ក្លាដេស និង ៦.ពិធីទទួលស្គាល់ និងតែងតាំងទីប្រឹក្សាកិត្តិយស និងមន្ត្រីទំនាក់ទំនង។

ចំណុចសំខាន់នៃកម្មវិធី គឺពិធីប្រគល់លិខិតតែងតាំងផ្លូវការ ដែលបានទទួលស្គាល់ លោកជំទាវ ឧកញ៉ា ស្រ៊ៀត មុំសុភា ជា កុងស៊ុលកិត្តិយសបង់ក្លាដេស ប្រចាំនៅកម្ពុជា។ ពិធីនេះបានបង្ហាញពីការពង្រឹងទំនាក់ទំនងការទូត និងការប្តេជ្ញាចិត្តរួមក្នុងការអភិវឌ្ឍកិច្ចសហប្រតិបត្តិការរវាងប្រទេសទាំងពីរ។ ការពិភាក្សា និងបទបង្ហាញបានផ្តោតលើវិស័យសំខាន់ៗរួមមាន៖ ពាណិជ្ជកម្ម និងវិនិយោគ, អភិវឌ្ឍន៍វិស័យទេសចរណ៍, កិច្ចសហប្រតិបត្តិការផ្នែកច្បាប់ និងស្ថាប័ន, ការផ្លាស់ប្តូរវប្បធម៌ ទំនាក់ទំនងប្រជាជននិងប្រជាជន។

សូមជម្រាបថា ចាប់តាំងពីដំណើរការតែងតាំងនៅឆ្នាំ២០២៤ និងការទទួលស្គាល់ផ្លូវការនៅឆ្នាំ២០២៥ ស្ថានកុងស៊ុលកិត្តិយសបង់ក្លាដេស ប្រចាំនៅកម្ពុជា បានខិតខំអភិវឌ្ឍវេទិកាសហប្រតិបត្តិការដោយភ្ជាប់ជាមួយក្រសួង ស្ថាប័នច្បាប់ និងវិស័យឯកជន ដើម្បីលើកកម្ពស់កំណើនសេដ្ឋកិច្ចប្រកបដោយចីរភាព៕

The post លោកជំទាវឧកញ៉ា ស្រ៊ៀត មុំសុភា ទទួលការតែងតាំងជាកុងស៊ុលកិត្តិយសបង់ក្លាដេស ប្រចាំនៅកម្ពុជា appeared first on .

ឧកញ៉ា ស្រ៊ាត មុំសុភា ប្រាប់គន្លឹះត្រូវធ្វើបែបណា ដើម្បីឱ្យកាន់តែមាន

ឧកញ៉ាដែនដី — Tue, 20 Jun 2023 01:57:53 +0000

ឧកញ៉ា ស្រ៊ាត មុំសុភា អគ្គនាយិកាក្រុមហ៊ុន SOPHIYA Travel & Tours យល់ឃើញថា ដើម្បីបង្កើនភាពមានបាន ឬអ្នកមានហើយ តែចង់ឱ្យកាន់តែមានទៀត គឺបុគ្គលនោះ ត្រូវតែមានចិត្តចេះចែករំលែក និងចេះបត់បែនតាមទំនោរទីផ្សារនាពេលបច្ចុប្បន្ន។

ឧកញ៉ា ស៊្រាត មុំសុភា បានលើកឡើងក្នុងវេទិកាមួយថា មិនមែនបុគ្គលគ្រប់គ្នា មានហើយ សុទ្ធតែចង់មានថែមទៀតនោះទេ បុគ្គលខ្លះក៏មានភាពគ្រប់គ្រាន់ដែរ មានន័យថាមហិច្ឆតារបស់គាត់មានដែនកំណត់។ ទោះយ៉ាងណា សម្រាប់អ្នកស្រី យល់ឃើញថាបុគ្គលជាអ្នកមាន មិនត្រឹមមានតែទ្រព្យសម្បត្តិទេ តែត្រូវមានចិត្តល្អ មានការចែករំលែក និងមានអត្តចរិកល្អថែមទៀត ទើបជាអ្នកមានពិតប្រាកដ។ ចំណុចនេះ អ្នកស្រីឱ្យតម្លៃលើការចែករំលែកត្រឡប់ទៅវិញ នៅពេលដែលយើងជាបុគ្គលមួយ ដែលមានអត្តចរិកបែបការចែករំលែកទៅវិញ ក្រៅពីក្លាយជាបុគ្គលគម្រូសម្រាប់អ្នកដទៃហើយ យើងខ្លួនឯងក៏នៅតែអាចមានឱកាសជាច្រើនក្នុងការវិនិយោគលើរឿងអ្វីមួយទៀត។ កាលណា យើងជាបុគ្គលដែលគេស្រឡាញ់ គេចូលចិត្ត ពេលមានអ្វី គេតែងតែនឹកឃើញយើងមុនគេមិនខាន។

អគ្គនាយិការូបនេះ បានបន្ថែមដូច្នេះទៀតថា៖ “ការចែករំលែកទៀត ក៏អាចជះឥទ្ធិពលដល់អ្នកបាត់បង់ឱកាស ឬក៏អត់ឱកាសតែម្តង ហើយត្រូវជឿថា យើងមិនរស់នៅតែម្នាក់ឯងនោះទេ។ បើសិនជាយើងអាចក្លាយជាអ្នកមាន កាន់តែមានថែមទៀត នោះគឺទឹកចិត្តស្មោះស និងភក្តីភាពនៃការចែករំលែក មិនចេះសាបសូន្យនោះទេ ទោះកាលៈទេសៈណាក៏ដោយ។ បន្ថែមពីនេះ ភាពបត់បែនរបស់យើង គឺត្រូវធ្វើការសម្រេចចិត្តថា តើគួរតែបន្ថែមទៅលើការវិនិយោគណាមួយ ដែលវៃឆ្លាត? ហើយយើងត្រូវមើលលើទីផ្សារ តើបច្ចុប្បន្ននេះគេដើរដល់ណាហើយ? ឧទាហរណ៍ ដូចទីផ្សារបច្ចេកវិទ្យា ជាតម្រូវការមួយ។ ដូច្នេះភាពចេះបត់បែន ក៏អាចជួយឱ្យយើងកាន់តែមាន និងរក្សាភាពមានបាន”។

សូមជម្រាបថា អ្នកស្រី ស៊្រាត មុំសុភា ជាអ្នកជំនួញលេចធ្លោម្នាក់ ដែលបានក្តោបក្តាប់ក្រុមហ៊ុនទេសចរណ៍ដ៏ធំមួយ។ អ្នកស្រីចាប់ផ្តើមបង្កើតក្រុមហ៊ុន សុហ្វីយ៉ា នៅឆ្នាំ២០០៥ រហូតកាន់តែរីកចម្រើន និងបានពង្រីកអាជីវកម្មបើកហាងស្បារជាច្រើនកន្លែងទៀត នៅរាជធានីភ្នំពេញ។ អ្នកស្រី ស៊្រាត មុំសុភា ទីប្រឹក្សា ក្រុមប្រឹក្សាភិបាលនៃបណ្តាញសហគ្រិនស្ត្រីកម្ពុជា ទទួលបានគោរមងារ «ឧកញ៉ា» ពីព្រះមហាក្សត្រ កាលឆ្នាំ២០១៤៕

The post ឧកញ៉ា ស្រ៊ាត មុំសុភា ប្រាប់គន្លឹះត្រូវធ្វើបែបណា ដើម្បីឱ្យកាន់តែមាន appeared first on .

ឧកញ៉ា ស្រ៊ាត មុំសុភា៖ ស្ត្រីទាំងអស់មិនគួរបណ្តែតបណ្តោយពេលវេលាចោលនោះទេ

ឧកញ៉ាកោះក្របី — Tue, 26 Jul 2022 03:29:47 +0000

ឧកញ៉ា ស្រ៊ាត មុំសុភាគឺជាសហគ្រិនស្ត្រីកម្ពុជាម្នាក់ក្នុងចំណោមស្រ្តីច្រើនរូប ដែលបានធ្វើកិច្ចការជាច្រើន ដើម្បីកំណត់សក្តានុពលរបស់ស្ត្រីក្នុងការធ្វើជំនួញ តាមរយៈសមាគមសហគ្រិនស្ត្រីកម្ពុជា។

កាលពីក្មេង ឧកញ៉ា ស្រ៊ាត មុំសុភា មិនធ្លាប់គិតថាចង់ក្លាយជាសហគ្រិន ឬអ្នកធ្វើជំនួញទេ បើទោះបីជាអ្នកស្រីរស់នៅក្នុងគ្រួសារដែលជាអ្នកធ្វើជំនួញក៏ដោយ។ ក៏ប៉ុន្តែ បច្ចុប្បន្ននេះ អ្នកស្រីបានក្លាយខ្លួនជាសហគ្រិនស្ត្រីដ៏ឆ្នើមម្នាក់នៅកម្ពុជា។ អ្នកស្រីចាប់ផ្តើមបង្កើតក្រុមហ៊ុន សុហ្វីយ៉ា នៅឆ្នាំ២០០៥។

មុនក្លាយខ្លួនជាថៅកែក្រុមហ៊ុនទេសចរណ៍ អ្នកស្រីបានបញ្ចប់ការសិក្សាផ្នែកធនាគារ និងហិរញ្ញវត្ថុពីសាកលវិទ្យាល័យន័រតុននៅឆ្នាំ ២០០៣ ហើយអ្នកស្រីបានចូលធ្វើការជាបុគ្គលិកក្រុមហ៊ុនអាកាសចរណ៍មួយនៅភ្នំពេញ។

អ្នកស្រីជាអគ្គនាយិកាក្រុមហ៊ុន Sophiya Corporation ដែលក្នុងនោះរួមមាន SOPHIYA Travel & Tours SOPHIYA Home & Services Management, TLC Professional Nail Spa និង U &ME Spa ហើយក៏ជាសមាជិកនៃសមាគមសហគ្រិនវ័យក្មេងកម្ពុជាផងដែរ។

ក្នុងឆ្នាំ២០១៦ អ្នកស្រី ទទួលបានពានរង្វាន់សហគ្រិនឆ្នើមផ្នែកស្ត្រី ប្រចាំឆ្នាំ២០១៦ ពីសភាយុវពាណិជ្ជករអន្តរជាតិកម្ពុជា ផងដែរ។

ឧកញ៉ា ស្រ៊ាត មុំសុភា បានថ្លែងថា៖ «ចាប់ផ្តើមធ្វើអាជីវកម្មតាំងពីដើមទុនតិចតួច រហូតមកដល់ពេលនេះ ខ្ញុំឃើញខ្លួនឯងថាខុសគ្នាឆ្ងាយ ហើយដែលអ្វីដែលយើងបានលះបង់ បានចេញជាផ្លែផ្កា។ ហើយវាមិនមែនសម្រាប់តែខ្លួនខ្ញុំទេ ដែលខ្ញុំរកស៊ីបានចំណូល មានស្ថិរភាព។ វាក៏អាចជួយដល់សេដ្ឋកិច្ចក្នុងស្រុក ជួយប្រជាជនមានការងារធ្វើ ទាំងក្នុងក្រុមហ៊ុន និងពលរដ្ឋទូទៅ ដែលធ្វើការក្នុងវិស័យទេសចរណ៍ រួមទាំងអ្នករត់ម៉ូតូឌុប ភោគជនីយដ្ឋាន ជាដើម»។

ដើម្បីជំរុញទឹកចិត្តដល់ស្ត្រីផ្សេងទៀត ឈានជាសហគ្រិនស្ត្រីឆ្នើម ឧកញ៉ា ស្រ៊ាត មុំសុភា ផ្ដល់អនុសាសន៍ថា ស្ត្រីទាំងអស់មិនគួរបណ្តែតបណ្តោយពេលវេលាចោលនោះទេ ។ ស្រ្តីគួរតែអភិវឌ្ឍន៍ខ្លួនពីក្នុងប្រទេសមកក្នុងតំបន់និងទៅថ្នាក់អន្តរជាតិ តាមរយៈការចូលរួមប្រកួតផ្សេងៗ។ អ្នកស្រីបញ្ជាក់ថា សូមកុំទុកខ្លួនឯងឲ្យម្នាក់ឯង តែត្រូវនៅក្នុងបណ្ដាញ ដើម្បីអភិវឌ្ឍន៍ប្រមូលបានសំលេងតែមួយ ព្រមទាំងធ្វើដំណើរទៅរួមគ្នា៕

The post ឧកញ៉ា ស្រ៊ាត មុំសុភា៖ ស្ត្រីទាំងអស់មិនគួរបណ្តែតបណ្តោយពេលវេលាចោលនោះទេ appeared first on .

ឧកញ៉ា ស្រ៊ាត មុំសុភា

លោកជំទាវឧកញ៉ា ស្រ៊ៀត មុំសុភា ទទួលការតែងតាំងជាកុងស៊ុលកិត្តិយសបង់ក្លាដេស ប្រចាំនៅកម្ពុជា

ឧកញ៉ា ស្រ៊ាត មុំសុភា ប្រាប់គន្លឹះត្រូវធ្វើបែបណា ដើម្បីឱ្យកាន់តែមាន

ឧកញ៉ា ស្រ៊ាត មុំសុភា៖ ស្ត្រី​ទាំង​​អស់​មិន​គួរ​បណ្តែត​បណ្តោយ​ពេល​វេលា​ចោល​​នោះ​ទេ

ឧកញ៉ា ស្រ៊ាត មុំសុភា៖ ស្ត្រីទាំងអស់មិនគួរបណ្តែតបណ្តោយពេលវេលាចោលនោះទេ