ឥណ្ឌូនេស៊ី គ្រោងបញ្ចេញថវិកាជាតិ ១២ពាន់លានដុល្លារ ដើម្បីឧបត្ថម្ភធនលើថាមពលនៅឆ្នាំនេះ

ឧកញ៉ាសាមញ្ញ — Thu, 18 Jan 2024 00:55:00 +0000

រដ្ឋមន្ត្រីក្រសួងថាមពល និងធនធានរ៉ែរបស់ឥណ្ឌូនេស៊ី លោក Arifin Tasrif បានបង្ហាញឲ្យដឹងថា រដ្ឋាភិបាលរបស់ខ្លួន កំពុងកំណត់គោលដៅប្រើប្រាស់ថវិកាជាតិចំនួន ១៨៦,៩ទ្រីលានរូពី (១២ពាន់លានដុល្លារ) សម្រាប់ការឧបត្ថម្ភធនលើថាមពល នៅឆ្នាំ២០២៤ នេះ។ នេះបើតាមការចុះផ្សាយពីសារព័ត៌មាន VNA។

លោក Tasrif បាននិយាយនៅក្នុងសន្និសីទសារព័ត៌មាន កាលពីថ្ងៃទី១៥ ខែមករាកន្លងទៅថា ទឹកប្រាក់សរុបសម្រាប់ការឧបត្ថម្ភធនលើប្រេងឥន្ធនៈ និងហ្គាស់ (LPG) ត្រូវបានកំណត់គោលដៅចំនួន ១១៣,៣ទ្រីលានរូពី ខណៈទឹកប្រាក់ចំនួន ៧៣,៨ទ្រីលានរូពីផ្សេងទៀត សម្រាប់ការឧបត្ថម្ភធនលើអគ្គិសនី។

បើតាមរដ្ឋមន្ត្រីរូបនេះ បានសង្កត់ធ្ងន់ទៀតថា រដ្ឋាភិបាលឥណ្ឌូនេស៊ី បានពិចារណាបន្តផ្តល់ការឧបត្ថម្ភធនលើថាមពល ក្នុងកិច្ចខិតខំប្រឹងប្រែងដើម្បីរក្សាអំណាចនៃការទិញរបស់ប្រជាជន ដោយរំពឹងថាអាចនឹងមានការកើនឡើងនៃតម្លៃ និងតម្រូវការថាមពល ជាពិសេសប្រេងឆៅ។

ជម្រាបជូនទៀតផងដែរថា ក្រសួងថាមពល និងធនធានរ៉ែរបស់ឥណ្ឌូនេស៊ី ក៏មានគោលដៅបើកភ្នាក់ងារចែកចាយប្រេងឥន្ធនៈក្នុងតម្លៃសមរម្យ យ៉ាងតិច ១០០ កន្លែងក្នុងឆ្នាំនេះ ដើម្បីសម្រេចបានសមភាពតម្លៃប្រេងឥន្ធនៈនៅទូទាំងប្រទេស៕

The post ឥណ្ឌូនេស៊ី គ្រោងបញ្ចេញថវិកាជាតិ ១២ពាន់លានដុល្លារ ដើម្បីឧបត្ថម្ភធនលើថាមពលនៅឆ្នាំនេះ appeared first on .

ទោះរដ្ឋបាត់ចំណូលជិត ៥០០ លានដុល្លារ តែនាយករដ្ឋមន្ត្រីថៃ គ្រោងឧបត្ថម្ភធនលើតម្លៃប្រេងម៉ាស៊ូត បន្តទៀត

ឧកញ៉ាសាមញ្ញ — Wed, 11 May 2022 06:52:55 +0000

នាយករដ្ឋមន្ត្រីថៃ លោក Prayut Chan-o-cha បាននិយាយកាលពីថ្ងៃអង្គារថា រដ្ឋាភិបាល ទំនងជានឹងបន្តកម្មវិធីឧបត្ថម្ភធន លើតម្លៃប្រេងម៉ាស៊ូត ខណ:វិធានការបច្ចុប្បន្ន នឹងត្រូវបញ្ចប់នៅថ្ងៃទី ២០ ខែឧសភា ខាងមុខហើយ ។

ជាក់ស្តែង លោក Prayut បានលើកឡើងថា ការសម្រេចចិត្តរបស់គណ:រដ្ឋមន្ត្រី ក្នុងការកាត់បន្ថយពន្ធ លើការគិតថ្លៃប្រេងម៉ាស៊ូតក្នុងមួយលីត្រ ចំនួន ៣ បាត គឺបានធ្វើឱ្យរដ្ឋខាតបង់ប្រាក់ចំណូលប្រមាណ ៥,៧ ពាន់លានបាតក្នុងមួយខែៗ ចាប់តាំងពីវិធានការនេះ ត្រូវបានអនុវត្ត កាលពីខែ ៣ មុន ខណ:ដែលធ្វើឱ្យបាត់បង់ប្រាក់ចំណូលសរុបប្រហែល ១៧ ពាន់លានបាត ឬជិត ៥០០ លានដុល្លារអាមេរិក ។

លោកឧត្តមសេនីយ Prayut បានបន្ថែមទៀតថា ដោយសារតែតម្លៃប្រេងម៉ាស៊ូត មានការកើនឡើងតម្លៃខ្ពស់ ដែលវាបានធ្វើឱ្យជះឥទ្ធិពល លើផលិតផលជាច្រើនទៀត រួមទាំងប្រេងចម្អិនអាហារ ចំណីសត្វ និងជីផងដែរ ខណ:គណ:រដ្ឋមន្ត្រី គ្រោងនឹងរក្សាការកាត់បន្ថយពន្ធនេះបន្តទៀត ដើម្បីជួយកាត់បន្ថយផលប៉ះពាល់ នៃអតិផរណា ដែលបានកើនឡើង ក្នុងស្រុក ។

លើសពីនេះ នាយករដ្ឋមន្ត្រីរូបនេះ បាននិយាយថា ព័ត៌មានលម្អិតបន្ថែម នឹងត្រូវសម្រេចដោយក្រសួងថាមពល និងហិរញ្ញវត្ថុ មុនពេលគណ:រដ្ឋមន្ត្រីអនុម័តវិធានការបន្ថែម និងកែសម្រួល មុនកាលបរិច្ឆេទបច្ចុប្បន្ននៃវិធានការនេះ ត្រូវអស់សុពលភាព នៅសប្តាហ៍ក្រោយ ។

បន្ថែមពីនេះ ឧបនាយករដ្ឋមន្រ្តី និងជារដ្ឋមន្រ្តីក្រសួងថាមពល លោក Supattanapong Punmeechaow បាននិយាយថា ដើម្បីរក្សាបាននូវការទប់ស្កាត់តម្លៃលក់រាយប្រេងម៉ាស៊ូត ក្រសួងថាមពល បានផ្តល់ទិន្នន័យចាំបាច់ ដល់ក្រសួងហិរញ្ញវត្ថុរួចរាល់ហើយ ដើម្បីគណនាថា តើនឹងត្រូវបន្តកាត់បន្ថយពន្ធ សម្រាប់រយ:ពេលប៉ុន្មានទៀត ។

មិនតែប៉ុណ្ណោះ លោក Supattanapong បានបន្តទៀតថា ក្រសួងហិរញ្ញវត្ថុ នឹងបញ្ជូនសំណើទាក់ទងនឹងវិធានការឧបត្ថម្ភធនសម្រាប់តម្លៃប្រេងម៉ាស៊ូតនេះ ទៅកាន់គណ:រដ្ឋមន្រ្តី ដើម្បីធ្វើការពិចារណា នៅថ្ងៃទី ១៧ ខែឧសភា ខាងមុខ ៕

ប្រភព: Bangkok Post

The post ទោះរដ្ឋបាត់ចំណូលជិត ៥០០ លានដុល្លារ តែនាយករដ្ឋមន្ត្រីថៃ គ្រោងឧបត្ថម្ភធនលើតម្លៃប្រេងម៉ាស៊ូត បន្តទៀត appeared first on .