រដ្ឋមន្ត្រីក្រសួងថាមពល និងធនធានរ៉ែរបស់ឥណ្ឌូនេស៊ី លោក Arifin Tasrif បានបង្ហាញឲ្យដឹងថា រដ្ឋាភិបាលរបស់ខ្លួន កំពុងកំណត់គោលដៅប្រើប្រាស់ថវិកាជាតិចំនួន ១៨៦,៩ទ្រីលានរូពី (១២ពាន់លានដុល្លារ) សម្រាប់ការឧបត្ថម្ភធនលើថាមពល នៅឆ្នាំ២០២៤ នេះ។ នេះបើតាមការចុះផ្សាយពីសារព័ត៌មាន VNA។
លោក Tasrif បាននិយាយនៅក្នុងសន្និសីទសារព័ត៌មាន កាលពីថ្ងៃទី១៥ ខែមករាកន្លងទៅថា ទឹកប្រាក់សរុបសម្រាប់ការឧបត្ថម្ភធនលើប្រេងឥន្ធនៈ និងហ្គាស់ (LPG) ត្រូវបានកំណត់គោលដៅចំនួន ១១៣,៣ទ្រីលានរូពី ខណៈទឹកប្រាក់ចំនួន ៧៣,៨ទ្រីលានរូពីផ្សេងទៀត សម្រាប់ការឧបត្ថម្ភធនលើអគ្គិសនី។
បើតាមរដ្ឋមន្ត្រីរូបនេះ បានសង្កត់ធ្ងន់ទៀតថា រដ្ឋាភិបាលឥណ្ឌូនេស៊ី បានពិចារណាបន្តផ្តល់ការឧបត្ថម្ភធនលើថាមពល ក្នុងកិច្ចខិតខំប្រឹងប្រែងដើម្បីរក្សាអំណាចនៃការទិញរបស់ប្រជាជន ដោយរំពឹងថាអាចនឹងមានការកើនឡើងនៃតម្លៃ និងតម្រូវការថាមពល ជាពិសេសប្រេងឆៅ។
ជម្រាបជូនទៀតផងដែរថា ក្រសួងថាមពល និងធនធានរ៉ែរបស់ឥណ្ឌូនេស៊ី ក៏មានគោលដៅបើកភ្នាក់ងារចែកចាយប្រេងឥន្ធនៈក្នុងតម្លៃសមរម្យ យ៉ាងតិច ១០០ កន្លែងក្នុងឆ្នាំនេះ ដើម្បីសម្រេចបានសមភាពតម្លៃប្រេងឥន្ធនៈនៅទូទាំងប្រទេស៕
