រដ្ឋមន្ត្រីការបរទេសរុស្ស៊ី លោក Sergey Lavrov បានចេញមុខ ស្ដីបន្ទោសសារព័ត៌មានលោកខាងលិច ជុំវិញការចុះផ្សាយព័ត៌មានបំភ្លើសថា លោកមានបញ្ហាសុខភាពធ្ងន់ធ្ងរ រហូតដល់ថ្នាក់បញ្ជូនទៅមន្ទីរពេទ្យនៅកោះបាលីទៀតផង។
“វាគឺជារឿងប្រឌិតទាំងស្រុង ហើយក្បាច់ក្បូរមួយនេះមិនមែនទើបតែកើតមាននៅលើឆាកនយោបាយទេ។ អ្នកកាសែតលោកខាងលិច គួរតែព្យាយាមសរសេរអ្វីដែលជាការពិត ទើបជាការប្រសើរជាង”។ នេះបើតាមសម្ដីរបស់លោក Lavrov បានប្រាប់ទៅកាន់សារព័ត៌មាន។
ដោយឡែក អភិបាលប្រចាំកោះបាលី I Wayan Koster ក៏បានប្រាប់ទៅកាន់ Reuters ដែរថា លោក Lavrov គ្រាន់តែបានឆៀងចូលមន្ទីរពេទ្យ Sanglah Hospital មួយភ្លែតប៉ុណ្ណោះ ដើម្បីពិនិត្យសុខភាព ប៉ុន្តែលទ្ធផលបញ្ជាក់ថា លោកមានសុខភាពមាំទាំធម្មតា។
សូមជម្រាបដែរថា រដ្ឋមន្ត្រីការបរទេសចាស់វស្សាខាងលើថែមទាំងបានថ្កោលទោស អ្នកសារព័ត៌មានលោកខាងលិចទៀតថា ពួកគេធ្លាប់ទាំងសរសេរព័ត៌មានប្រឌិតជាច្រើនដូចជា ប្រធានាធិបតីរុស្ស៊ីមានបញ្ហាសុខភាព ទាំងដែលវាមិនមែនជាការពិត៕
