ឯកឧត្ដម ទេសរដ្ឋមន្ត្រី គន់ គីម

ព្រឹកនេះ សម្តេចតេជោ ហ៊ុន សែន នាំកូនៗទាំងអស់ ចូលរួមមង្គលការកូនប្រុសទេសរដ្ឋមន្ត្រី គន់ គីម

ឧកញ៉ាដែនដី — Sun, 18 Dec 2022 06:02:14 +0000

នៅព្រឹកថ្ងៃអាទិត្យ ទី១៨ ខែធ្នូ ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងកូនប្រុសស្រីរបស់សម្តេចទាំងអស់ បានអញ្ជើញចូលរួមជាភ្ញៀវកិត្តិយសដ៏ខ្ពង់ខ្ពស់ ក្នុងពិធីអាពាហ៍ពិពាហ៍កូនប្រុសរបស់លោកទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការ សមាគមអតីតយុទ្ធជនកម្ពុជា។

កូនប្រុសរបស់លោកទេសរដ្ឋមន្ត្រី គន់ គីម ដែលជាកូនកំលោះមានឈ្មោះថា «គីម រតនៈ» បានរៀបអាពាហ៍ពិពាហ៍ជាមួយនឹងកូនក្រមុំឈ្មោះ «អ៊ឹង អ៊ីលី» នៅថ្ងៃទី១៨ ខែធ្នូ ឆ្នាំ២០២២នេះ។ ក្នុងពិធីមង្គលការកូនប្រុសរបស់ថ្នាក់ដឹកនាំជាន់ខ្ពស់នៃជួររាជរដ្ឋាភិបាលកម្ពុជានេះ សម្តេចតេជោ និងសម្តេចកិត្តិបណ្ឌិត បានផ្តល់កិត្តិយសអញ្ជើញចូលរួមដោយផ្ទាល់ ហើយក្នុងនោះកូនៗរបស់សម្តេចដូចជា លោក ហ៊ុន ម៉ាណែត លោក ហ៊ុន ម៉ានី លោក ហ៊ុន ម៉ានិត និងលោកជំទាវ ហ៊ុន ម៉ាណា និងស្វាមី លោក ឌី វិជ្ជា ព្រមទាំងកូនប្រសាររបស់សម្តេចមួយចំនួនទៀត ក៏បានអញ្ជើញចូលរួមផងដែរ។

សូមជម្រាបជូនថា នាយឧត្តមសេនីយ៍ ទេសរដ្ឋមន្ត្រី គន់ គីម បច្ចុប្បន្នក៏មានតួនាទីជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ។ លោកទេសរដ្ឋមន្ត្រី គន់ គីម ទើបត្រូវបានព្រះមហាក្សត្រនៃកម្ពុជា ត្រាស់បង្គាប់ផ្តល់គោរម្យងារកិត្តិយសនៃរាជបណ្ឌិត្យសភាកម្ពុជា ជា «កិត្តិសង្គហបណ្ឌិត» កាលពីថ្ងៃទី២៩ ខែតុលា ឆ្នាំ២០២២។ ដោយឡែក កូនប្រុសរបស់លោក គន់ គីម ម្នាក់ទៀតគឺ លោក គីម រិទ្ធី ដែលត្រូវជាបងប្រុសកូនកំលោះ គីម រតនៈ ត្រូវបានទទួលការតែងតាំងជា អភិបាលខេត្តព្រះវិហារ ជំនួសលោកប្រាក់ សុវណ្ណ ដែលបានចូលនិវត្តន៍ កាលពីថ្ងៃទី២៧ ខែកក្កដា ឆ្នាំ២០២២៕

The post ព្រឹកនេះ សម្តេចតេជោ ហ៊ុន សែន នាំកូនៗទាំងអស់ ចូលរួមមង្គលការកូនប្រុសទេសរដ្ឋមន្ត្រី គន់ គីម appeared first on .

ឧកញ៉ា សុខ ស្រស់ គោរពផ្ញើសារអបអរសាទរឯកឧត្តមទេសដ្ឋមន្រ្តី គន់ គីម ក្នុងឱកាសទទួលបានគោរមងារកិត្តិយស «កិត្តិសង្គហបណ្ឌិត»

Kem sinath — Fri, 04 Nov 2022 06:51:22 +0000

ឧកញ៉ា សុខ ស្រស់ អនុប្រធានសភាពាណិជ្ជកម្មកម្ពុជា និងជាប្រធានសភាពាណិជ្ជកម្មមណ្ឌលខេត្តកណ្តាល-កំពង់ឆ្នាំង បានផ្ញើសារអបអរសាទរ ឯកឧត្តម ទេសរដ្ឋ គីម រិទ្ធី ក្នុងឱកាសដែលព្រះមហាក្សត្រនៃកម្ពុជា ត្រាស់បង្គាប់ផ្តល់គោរម្យងារកិត្តិយសនៃរាជបណ្ឌិត្យសភាកម្ពុជា ជា «កិត្តិសង្គហបណ្ឌិត» នៅថ្ងៃទី២៩ ខែតុលា ឆ្នាំ២០២២។

នៅក្នុងឱកាសដ៏ប្រពៃថ្លែងថ្លានាពេលនេះដែលឯកឧត្តមទេសរដ្ឋមន្ត្រី ត្រូវបានព្រះមហាក្សត្រ ប្រទានគោរមងារកិត្តិយស «កិត្តិសង្គហបណ្ឌិត» ឧកញ៉ា សុខ ស្រស់ និងលោកជំទាវ ព្រមទាំងក្រុមគ្រសារ សូមគោរពជូនពរឯកឧត្តម គន់ គីម និងលោកជំទាវ សូមមានសុខភាពបរិបូរណ៍ កម្លាំងពលំមាំមួន ឈ្នះអស់មារសត្រូវគ្រប់ទិសទី ដើម្បីបន្តចូលរួមដឹកនាំការងារអភិវឌ្ឍន៍ជាតិជាមួយសម្តេចតេជោ ហ៊ុន សែន នាយករដ្ឋមន្ត្រី ជាស្ថាបនិកសន្តិភាពកម្ពុជា។

ជាចុងក្រោយ ខ្ញុំបាទ និងក្រុមគ្រួសារ សូមបួងសួងដល់វត្ថុស័ក្ដិសិទ្ធិ ទាំងអស់ក្នុងលោក សូមប្រសិទ្ធពរបវរមហាប្រសើរជូន ឯកឧត្តម គន់ គីម និងលោកជំទាវ ព្រមទាំងក្រុមគ្រួសារទាំងអស់ សូមប្រកបដោយពុទ្ធពរទាំងបួនប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ៕

The post ឧកញ៉ា សុខ ស្រស់ គោរពផ្ញើសារអបអរសាទរឯកឧត្តមទេសដ្ឋមន្រ្តី គន់ គីម ក្នុងឱកាសទទួលបានគោរមងារកិត្តិយស «កិត្តិសង្គហបណ្ឌិត» appeared first on .

ឯកឧត្ដមទេសរដ្ឋមន្ត្រីគន់ គីម កោតសរសើរនៅទឹកចិត្តមនុស្សធម៌ដ៏ធំធេង របស់ ឧកញ៉ាឡេង ណាវ៉ាត់ត្រា

កូនចៅឧកញ៉ា — Tue, 20 Oct 2020 04:07:46 +0000

សកម្មភាពដឹកនាំតារាចម្រៀងល្បីៗក្នុងផលិតកម្មហ្កាឡាក់ស៊ី មានដូចជា លោក ព្រាប សុវត្ថិភាព, ខេម, កញ្ញា តន់ ចន្ទសីម៉ា និងកញ្ញា ក សុវណ្ណារី ចុះទៅ ស្រុក មង្គលបុរី នាំស្បៀងអាហារអង្ករ ៥០តោន និងអាហារហូបចុកផ្សេងៗ ជូនប្រជាពលរដ្ឋដែលកំពុងជន់លិច ឯកឧត្ដម ទេសរដ្ឋមន្ត្រី គន់ គីម បានស្វាគមន៍យ៉ាងកក់ក្ដៅបំផុត ក្នុងនោះឯកឧត្ដម ទេសរដ្ឋមន្ត្រី បាន កោតសរសើរនៅទឹកចិត្តមនុស្សធម៌ដ៏ធំធេង របស់លោក ឧកញ៉ាឡេងណាវ៉ាត់ត្រា ជាខ្លាំង។

ឯកឧត្ដម ទេសរដ្ឋមន្ត្រី គន់ គីម បានចាត់ទុកកាយវិការរបស់លោកឧកញ៉ា ដែល មានអតីតភាពជាក្មេងទីជនបទក្រីក្រ និងជាពលករប្រទេសកូរ៉េខាងត្បូងរូបនេះថា ជាកាយវិការដ៏ល្អប្រសើរ និងជាគំរូមួយនៅក្នុងសង្គមកម្ពុជា។ ឯកឧត្តម ទេសរដ្ឋមន្ត្រី ថ្លែងទៅកាន់លោកឧកញ៉ា ឡេង ណាវ៉ាត្រា ថា”ការរួមចំណែករបស់លោកឧកញ៉ា ឆ្លើយតបចំសភាពការណ៍ និងតម្រូវការរបស់បងប្អូនប្រជាពលរដ្ឋ ដែលគាត់កំពុងជួបការលំបាក និងខ្វះខាត ព្រោះតែទឹកជំនន់។នេះជាកាយវិការល្អណាស់សម្រាប់សង្គមយើង។ យើងមានបាន យើងថ្កុំថ្កើង ក៏ដោយសារបានការគាំទ្រពីប្រជាជន ដូច្នេះពេលប្រជាជនមានទុក្ខលំបាក យើងត្រូវជួយរំលែកការលំបាករបស់គាត់។ទង្វើល្អដែលយើងបានធ្វើចំពោះគាត់នឹងធ្វើឱ្យជីវិតយើងមិនសាបសូន្យនោះឡើយ”។

លោកឧកញ៉ា ឡេង ណាវ៉ាត្រាបានលើកឡើងនោះចំពោះមុខក្រុមអ្នកសារព័ត៌មានដែលបានចុះទៅព័ត៌មានដោយផ្ទាល់ក្នុងសកម្មភាពមនុស្សធម៌នេះថា «នៅពេលដែលឃើញបងប្អូនខ្មែរមានទុក្ខ ខ្ញុំតែងតែមានទុក្ខជាមួយគាត់។ អ៊ីចឹងយើងមានសេចក្តីសុខ នៅពេលយើងបានចែករំលែកទៅដល់គាត់ ព្រោះយើងគិតថា ជីវិតយើងរស់មិនវែងទេ ១០ឆ្នាំ, ២០ឆ្នាំ, ៣០ឆ្នាំទៀត យើងមិនចឹងថានៅពេលណា? អ៊ីចឹងយើងមានឱកាសហ្នឹង អាចជួយគ្នាបាន យើងគួរតែជួយ ព្រោះគាត់ក៏ចង់រស់នៅបានស្រួល គាត់ក៏ចង់មានសេចក្តីសុខ អ៊ីចឹងយើងអាចចែករំលែកទៅគាត់ខ្លះទៅ។ ខ្ញុំគិតថា វាមិនចម្លែកសម្រាប់ខ្ញុំទេ»។

ទទឹមគ្នានោះដែរលោក ឡេង ណាវ៉ាត្រា ក៏បានបង្ហាញការគាំទ្រពេញទំហឹងចំពោះសកម្មភាពរបស់ថ្នាក់ដឹកនាំរាជរដ្ឋាភិបាល និងអាជ្ញាធរ ដែលបានយកចិត្តទុកដាក់ចំពោះពលរដ្ឋដែលកំពុងជួបទុក្ខជំនន់ទឹកភ្លៀងនៅប្រទេសកម្ពុជា។

សូមបញ្ជាក់ផងដែរថា ក្នុងតួលេខបង្ហាញដោយសម្ដេចតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា កាលពីពេលថ្មីៗនេះ សប្បុរសជនដែលបានចូលរួមជួយប្រជាជនក្នុងគ្រោះជំនន់ទឹកភ្លៀងដែលកំពុងកើតមាននៅក្នុងប្រទេស គិតត្រឹមម៉ោង 11:34 នាទីថ្ងៃត្រង់ ថ្ងៃទី១៩ តុលា ២០២០ ថវិកាទទួលបាន 6,867,524 ដុល្លារ , 396,525,000 រៀល និង ៥.០០០€ (ប្រាំពាន់អឺរ៉ូ)។ ក្នុងចំណោម ឧកញ៉ាល្បីៗដែលជាម្ចាស់ក្រុមហ៊ុនជាច្រើនរូបបានចូលរួមបរិច្ចាគថវិកា គេឃើញថា លោកឧកញ៉ា ឡេង ណាវ៉ាត្រា នាយកក្រុមហ៊ុន ឡេងណាវ៉ាត្រា គ្រុប បានចូលរួមបរិច្ចាគថវិកាជូន ៦០ម៉ឺនដុល្លារ ជាចំនួនដែលច្រើនជាងគេ ខណៈដែលអ្នកដែលឈរលេខរៀងទី២បានចូលចំនួន៥០ម៉ឺនដុល្លារ៕

The post ឯកឧត្ដមទេសរដ្ឋមន្ត្រីគន់ គីម កោតសរសើរនៅទឹកចិត្តមនុស្សធម៌ដ៏ធំធេង របស់ ឧកញ៉ាឡេង ណាវ៉ាត់ត្រា appeared first on .