នៅព្រឹកថ្ងៃអាទិត្យ ទី១៨ ខែធ្នូ ឆ្នាំ២០២២នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងកូនប្រុសស្រីរបស់សម្តេចទាំងអស់ បានអញ្ជើញចូលរួមជាភ្ញៀវកិត្តិយសដ៏ខ្ពង់ខ្ពស់ ក្នុងពិធីអាពាហ៍ពិពាហ៍កូនប្រុសរបស់លោកទេសរដ្ឋមន្ត្រី គន់ គីម អនុប្រធាន និងជាអគ្គលេខាធិការ សមាគមអតីតយុទ្ធជនកម្ពុជា។
កូនប្រុសរបស់លោកទេសរដ្ឋមន្ត្រី គន់ គីម ដែលជាកូនកំលោះមានឈ្មោះថា «គីម រតនៈ» បានរៀបអាពាហ៍ពិពាហ៍ជាមួយនឹងកូនក្រមុំឈ្មោះ «អ៊ឹង អ៊ីលី» នៅថ្ងៃទី១៨ ខែធ្នូ ឆ្នាំ២០២២នេះ។ ក្នុងពិធីមង្គលការកូនប្រុសរបស់ថ្នាក់ដឹកនាំជាន់ខ្ពស់នៃជួររាជរដ្ឋាភិបាលកម្ពុជានេះ សម្តេចតេជោ និងសម្តេចកិត្តិបណ្ឌិត បានផ្តល់កិត្តិយសអញ្ជើញចូលរួមដោយផ្ទាល់ ហើយក្នុងនោះកូនៗរបស់សម្តេចដូចជា លោក ហ៊ុន ម៉ាណែត លោក ហ៊ុន ម៉ានី លោក ហ៊ុន ម៉ានិត និងលោកជំទាវ ហ៊ុន ម៉ាណា និងស្វាមី លោក ឌី វិជ្ជា ព្រមទាំងកូនប្រសាររបស់សម្តេចមួយចំនួនទៀត ក៏បានអញ្ជើញចូលរួមផងដែរ។
សូមជម្រាបជូនថា នាយឧត្តមសេនីយ៍ ទេសរដ្ឋមន្ត្រី គន់ គីម បច្ចុប្បន្នក៏មានតួនាទីជាអនុប្រធានទី១ នៃគណៈកម្មាធិការជាតិគ្រប់គ្រងគ្រោះមហន្តរាយ។ លោកទេសរដ្ឋមន្ត្រី គន់ គីម ទើបត្រូវបានព្រះមហាក្សត្រនៃកម្ពុជា ត្រាស់បង្គាប់ផ្តល់គោរម្យងារកិត្តិយសនៃរាជបណ្ឌិត្យសភាកម្ពុជា ជា «កិត្តិសង្គហបណ្ឌិត» កាលពីថ្ងៃទី២៩ ខែតុលា ឆ្នាំ២០២២។ ដោយឡែក កូនប្រុសរបស់លោក គន់ គីម ម្នាក់ទៀតគឺ លោក គីម រិទ្ធី ដែលត្រូវជាបងប្រុសកូនកំលោះ គីម រតនៈ ត្រូវបានទទួលការតែងតាំងជា អភិបាលខេត្តព្រះវិហារ ជំនួសលោកប្រាក់ សុវណ្ណ ដែលបានចូលនិវត្តន៍ កាលពីថ្ងៃទី២៧ ខែកក្កដា ឆ្នាំ២០២២៕
