អ្នកនាំពាក្យរាជរដ្ឋាភិបាលបន្តថា ក្នុងយុគសម័យបច្ចុប្បន្នដែលបច្ចេកវិទ្យាទំនើបនិងបញ្ញាសិប្បនិម្មិត (AI) រីកចម្រើនយ៉ាងលឿនរហ័ស ព័ត៌មានមិនគ្រប់ជ្រុងជ្រោយ ព័ត៌មានបំភ្លៃ និងព័ត៌មានក្លែងក្លាយ ត្រូវបានគេប្រើប្រាស់ជាអាវុធយុទ្ធសាស្ត្រដើម្បីបំភាន់សាធារណមតិបានយ៉ាងងាយ។ ដូច្នេះ «ក្រុមការងារយើងទាំងអស់ត្រូវតែក្តាប់រឿងនេះឱ្យបាន ហើយត្រូវគ្រប់គ្រងនិងបន្សាបព័ត៌មានទាំងនោះឱ្យបានទាន់ពេលវេលា និងប្រកបដោយប្រសិទ្ធភាព ដោយមិនខ្លាចនឿយហត់ និងមិនគិតពេលវេលា ប្រៀបដូចវ៉ាក់សាំងដែលបញ្ចេញឥទ្ធិពលភ្លាមពេលមានមេរោគមកយាយីរាងកាយរបស់យើង»។ នេះជាប្រសាសន៍សង្កត់ធ្ងន់របស់ឯកឧត្តម ប៉ែន បូណា។

វគ្គបណ្តុះបណ្តាលនេះប្រព្រឹត្តទៅនៅថ្ងៃអាទិត្យទី៤ ខែតុលា ឆ្នាំ២០២៦ នៅក្នុងមន្ទីរបក្សខេត្តកណ្តាល ដែលមានក្រុមការងារព័ត៌មាននិងសាធារណមតិ និងយុវជនគណបក្សឃុំ ទូទាំងខេត្តសរុបប្រមាណ ៨០០ នាក់ ក្រោមអធិបតីភាពឯកឧត្តម ស្វាយ ស៊ីថា ទេសរដ្ឋមន្ត្រី និងជាប្រធានគណៈកម្មាធិការជាតិសម្របសម្រួលព័ត៌មាននិងសាធារណមតិ (គ.ស.ព.ស) ដោយមានការអញ្ជើញចូលរួមបើកពីប្រធានក្រុមប្រឹក្សាខេត្ត និងអភិបាលនៃគណៈអភិបាលខេត្តកណ្តាល។

ឯកឧត្តម ប៉ែន បូណា បានកោតសរសើរដល់អ្នកចូលរួមទាំងអស់ ជាពិសេសយុវជនបក្សដែលបានចំណាយពេលថ្ងៃឈប់សម្រាកមកចូលរួមក្នុងវគ្គបណ្តុះបណ្តាលនេះ និងបានបង្ហាញពីការតាំងចិត្តខ្ពស់ ក៏ដូចជាភាពសកម្ម ក្នុងការងារព័ត៌មាន និងសាធារណមតិ ដើម្បីការពារសមិទ្ធផល ស្នាដៃ កិត្តិយសនិងសេចក្តីថ្លៃថ្នូររបស់ថ្នាក់ដឹកនាំ។ ដើម្បីបំពេញការងារនេះយើងត្រូវធ្វើការងារពីរទន្ទឹមគ្នាគឺ ប្រតិកម្ម និងបុរេសកម្ម ប្រកបដោយការទទួលខុសត្រូវ ដោយផ្អែកលើសច្ចៈធម៌ប្រវត្តិសាស្ត្រ ពោលគឺត្រូវនាំការពិតទៅប្រាប់ប្រជាពលរដ្ឋឱ្យបានគ្រប់ជ្រុងជ្រោយ និងគ្រប់ទិដ្ឋភាព៕

The post ឯកឧត្តម ប៉ែន បូណា៖ «យើងរួមគ្នាធ្វើជាវ៉ាក់សាំងការពារសមិទ្ធផលរបស់រាជរដ្ឋាភិបាល» appeared first on .

នេះជាការលើកឡើងរបស់ឯកឧត្តម ប៉ែន បូណា រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានអង្គភាពអ្នកនាំពាក្យរាជរដ្ឋាភិបាល ក្នុងឱកាសអញ្ជើញជាអធិបតីក្នុងបាឋកថាស្តីពី «ការចូលរួមរបស់យុវជន ដើម្បីឆ្ពោះទៅសម្រេចចក្ខុវិស័យកម្ពុជាឆ្នាំ២០៥០» នៅវិទ្យាស្ថានពហុបច្ចេកទេសភូមិភាគតេជោសែនតាកែវ ដោយមានការអញ្ជើញចូលរួមនិងថ្លែងសុន្ទរកថាស្វាគមន៍ពីលោក ធូ សុភាព នាយកវិទ្យាស្ថានពហុបច្ចេកទេសភូមិភាគតេជោសែនតាកែវ ព្រមទាំងថ្នាក់ដឹកនាំ លោកគ្រូ អ្នកគ្រូ និងនិស្សិតមកពីវិទ្យាស្ថានពហុបច្ចេកទេសភូមិភាគតេជោសែនតាកែវ និងមជ្ឈមណ្ឌលគរុកោសល្យភូមិភាគតាកែវសរុបប្រមាណ ៥០០នាក់។

អ្នកនាំពាក្យរាជរដ្ឋាភិបាល បានសង្កត់ធ្ងន់ថា រាជរដ្ឋាភិបាលនីតិកាលទី៧ នៃរដ្ឋសភា ដឹកនាំដោយសម្ដេចធិបតី ហ៊ុន ម៉ាណែត បានដាក់ចេញយុទ្ធសាស្ត្របញ្ចកោណដែលមានមុំទី១ ផ្តោតលើការអភិវឌ្ឍមូលធនមនុស្ស ដែលជាការផ្តល់ឱកាស និងផ្តល់តម្លៃសមត្ថភាពធនធានមនុស្ស ជាពិសេសផ្តល់ឱកាសដល់យុវជនក្នុងការអភិវឌ្ឍខ្លួន។ ដូច្នេះ យុវជនគ្រប់រូបត្រូវខិតខំរៀនសូត្រ និងត្រូវចាប់យកឱកាសដ៏វិសេសវិសាលនេះឱ្យបាន ដោយត្រូវ «រៀនឱ្យលើសពីចេះ» ពោលគឺមិនត្រឹមតែចេះទ្រឹស្តីដើម្បីទទួលបានសញ្ញាបត្រប៉ុណ្ណោះទេ ប៉ុន្តែ ត្រូវមានសមត្ថភាពអនុវត្ត និងដោះស្រាយបញ្ហាតាមស្ថានភាពជាក់ស្តែងប្រកបដោយភាពបត់បែន។ ការពង្រឹងចំណេះដឹងនិងជំនាញ នឹងជួយឱ្យយុវជនមានភាពរឹងមាំ និងត្រៀមខ្លួនបានរួចជាស្រេចក្នុងការដើរចូលក្នុងទីផ្សារការងារដែលមានភាពប្រកួតប្រជែងខ្លាំង។ ដូច្នេះ អ្នកដែលមានសមត្ថភាពពិតប្រាកដ មិនត្រឹមតែអាចបង្កើតឱកាសសម្រាប់ខ្លួនឯងប៉ុណ្ណោះទេ ប៉ុន្តែថែមទាំងចូលរួមចំណែកក្នុងការអភិវឌ្ឍសង្គម និងសេដ្ឋកិច្ចជាតិផងដែរ។

ទន្ទឹមនឹងការខិតខំរៀនសូត្រ និងពង្រឹងសមត្ថភាព ឯកឧត្តម ប៉ែន បូណា បានរំលឹកថា វិន័យ សីលធម៌ និងភាពស្មោះត្រង់ គឺជាគុណតម្លៃស្នូលដែលត្រូវដើរទន្ទឹមគ្នាជាមួយចំណេះដឹង និងជំនាញ ដើម្បីកសាងយុវជនឱ្យក្លាយជាមូលធនមនុស្សប្រកបដោយគុណភាព និងការទទួលខុសត្រូវ។ ជាពិសេស ក្នុងបរិបទដែលប្រទេសជាតិកំពុងប្រឈមនឹងការឈ្លានពានទឹកដីយ៉ាងកម្រោលដូចដែលយើងបានឃើញនេះ ការបណ្តុះមនសិការស្នេហាជាតិ កាន់តែមានសារៈសំខាន់សម្រាប់យុវជនជំនាន់ថ្មី។ យុវជនត្រូវចូលរួមថែរក្សាសាមគ្គីភាព ផ្តល់ការជឿជាក់លើការដឹកនាំរបស់រាជរដ្ឋាភិបាល និងចូលរួមចំណែកក្នុងការការពារអធិបតេយ្យភាព និងផលប្រយោជន៍ជាតិ ស្របតាមតួនាទី និងសមត្ថភាពរបស់ខ្លួន៕

The post ឯកឧត្តម ប៉ែន បូណា៖ ក្រៅពីមានចំណេះជំនាញរឹងមាំ យុវជនត្រូវមានវិន័យ សីលធម៌ ភាពស្មោះត្រង់ និងមនសិការស្នេហាជាតិ appeared first on .

ការលើកឡើងបែបនេះ បានធ្វើឡើងនៅក្នុងឱកាសអញ្ជើញជាវាគ្មិនក្នុងវេទិកាពិភាក្សា ក្រោមប្រធានបទ៖ «ការប្រយុទ្ធប្រឆាំងព័ត៌មានក្លែងក្លាយ និងការលើកកម្ពស់សុច្ចរិតភាពព័ត៌មាននៅក្នុងតំបន់មេគង្គ-ឡានឆាង» ក្នុងវេទិកាប្រព័ន្ធផ្សព្វផ្សាយស្តីពីការប្រយុទ្ធប្រឆាំងព័ត៌មានក្លែងក្លាយ និងពិធីប្រកួតប្រជែងជ័យលាភីអ្នកផលិតមាតិកាប្រយុទ្ធប្រឆាំងព័ត៌មានក្លែងក្លាយឆ្នាំ២០២៦ ដែលធ្វើឡើងនៅសណ្ឋាគារ Sun and Moon កាលពីថ្ងៃទី១៧ ខែកញ្ញា ឆ្នាំ២០២៦ នៅរាជធានីភ្នំពេញ។

នៅក្នុងវេទិកានេះ ក៏មានវាគ្មិនតំណាងមកពីប្រទេសចិន ឡាវ មីយ៉ាន់ម៉ា វៀតណាម ចូលរួមពិភាក្សាយ៉ាងផុលផុសផងដែរ៕

The post ឯកឧត្តម ប៉ែន បូណា៖ ការប្រយុទ្ធប្រឆាំងព័ត៌មានក្លែងក្លាយនិងព័ត៌មានបំភ្លៃការពិតដែលធ្វើឱ្យមហាជនយល់ច្រឡំ មិនមែនធ្វើឡើងតែក្នុងប្រទេសទេ តែក៏ត្រូវធ្វើក្នុងកម្រិតតំបន់ និងអន្តរជាតិដែរ appeared first on .

បាឋកថានេះ មានការនិមន្តចូលរួមជាព្រះគណៈអធិបតីដ៏ខ្ពង់ខ្ពស់ និងព្រះថេរដីកាស្វាគមន៍ពីសម្តេចព្រះមហាអរិយវង្ស បណ្ឌិត យ៉ន សេងយៀត ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហនុរាជ រួមទាំងគណៈគ្រប់គ្រង សាស្ត្រាចារ្យ លោកគ្រូ អ្នកគ្រូ និងសមណនិស្សិត-និស្សិតសរុបជាង ៣៥០ អង្គ/នាក់។

អ្នកនាំពាក្យរាជរដ្ឋាភិបាលបន្តថា ការតាំងចិត្តយ៉ាងមុតមាំក្នុងការសិក្សានៅពេលនេះ នឹងសម្រេចបាននូវក្តីស្រមៃដែលយើងចង់បាននាពេលអនាគត។ តែសូមកុំយកក្តីស្រមៃរបស់ខ្លួនដែលចង់បានវត្ថុអ្វីមួយទៅដាក់បន្ទុកលើឳពុកម្តាយឱ្យសោះ។ ឯកឧត្តម ប៉ែន បូណា បន្តថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភា ដឹកនាំដោយ សម្តេចមហាបវរធិបតី ហ៊ុន ម៉ាណែត បានដាក់ចេញនូវគោលនយោបាយយុទ្ធសាស្ត្របញ្ចកោណ ដែលមានមុំ៥ ហើយមុំទី១ គឺការអភិវឌ្ឍមូលធនមនុស្ស។ ដើម្បីក្លាយជាមូលធនមនុស្ស យុវជនត្រូវមានចំណេះជំនាញឱ្យច្បាស់លាស់ពិតប្រាកដយ៉ាងតិចមួយ ត្រូវមានទំនាក់ទំនងល្អក្នុងសង្គមការងារនិងការរស់នៅ មានសីលធម៌ល្អ មានសុខភាពល្អ និងមានស្មារតី មនសិការស្នេហាជាតិ។ ឯកឧត្តមបន្តថា បច្ចុប្បន្នរាជរដ្ឋាភិបាលកម្ពុជាបានផ្តល់ឱកាសជាច្រើនរួចហើយ ដើម្បីឱ្យយុវជនអភិវឌ្ឍខ្លួនក្លាយជាមូលធនមនុស្ស។ ប៉ុន្តែ អ្វីដែលនៅសល់ គឺកិច្ចខិតខំប្រឹងប្រែងដោយខ្លួនឯង។

បាឋកថានេះធ្វើឡើងក្នុងគោលបំណងសំខាន់ៗចំនួន៤រួមមាន ទី១. ដើម្បីឱ្យយុវជនយល់ដឹងពីគោលនយោបាយជាតិ និងយុទ្ធសាស្ត្របញ្ចកោណរបស់រាជរដ្ឋាភិបាលកម្ពុជា អាណត្តិទី៧ នៃរដ្ឋសភា ទី២. លើកទឹកចិត្តដល់សមណនិស្សិត-និស្សិត ឱ្យអភិវឌ្ឍខ្លួនក្លាយជាមូលធនមនុស្សដ៏ពេញលេញ ដើម្បីឆ្លើយតបទៅនឹងយុទ្ធសាស្ត្របញ្ចកោណរបស់រាជរដ្ឋាភិបាល ទី៣. យល់ដឹងពីសារៈសំខាន់នៃព័ត៌មានដើម្បីជាប្រភពនៃការសិក្សាស្រាវជ្រាវ និងការសម្រេចចិត្ត និងទី៤. លើកកម្ពស់ឱ្យយុវជនចូលរួមអភិវឌ្ឍសង្គមជាតិ ដើម្បីសម្រេចបាននូវចក្ខុវិស័យកម្ពុជាឆ្នាំ២០៥០ ក្លាយជាប្រទេសដែលមានចំណូលខ្ពស់៕

The post ឯកឧត្តម ប៉ែន បូណា លើកទឹកចិត្តឱ្យយុវជនត្រូវយកការសិក្សាជាលក្ខខណ្ឌដើម្បីសម្រេចក្តីស្រមៃរបស់ខ្លួន appeared first on .

ព័ត៌មានទី១៖ ក្នុងគ្រាដ៏លំបាកដែលបណ្តាលមកពីតម្លៃប្រេងឥន្ធនៈកើនឡើងខ្ពស់នៅលើទីផ្សារអន្តរជាតិ រាជរដ្ឋាភិបាលក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានចេញវិធានការអន្តរាគមន៍បន្ថែមមួយចំនួនទៀតសំដៅជួយកាត់បន្ថយបន្ទុកចំណាយរបស់ប្រជាពលរដ្ឋ តាមរយៈការកែសម្រួលអត្រាពន្ធគយលើទំនិញនាំចូល និងអត្រាអាករលើមុខទំនិញនាំចេញមួយចំនួនដូចខាងក្រោម៖

១- បញ្ចុះអត្រាពន្ធនាំចូលពី ៧% មក ០% លើមុខទំនិញឧបករណ៍សាកអាគុយរថយន្តអគ្គិសនី, ឆ្នាំងដាំបាយអគ្គិសនី និងចង្កៀងសូឡាចំនួន ០៩ បន្ទាត់ពន្ធ។

២- បញ្ចុះអត្រាពន្ធនាំចូលពី ១៥% មក ០% លើមុខទំនិញម៉ូទ័រសម្រាប់យានយន្តអគ្គិសនី, ប្រព័ន្ធថាមពលសូឡា, អាគុយលីចូម (មានដូចជា អាគុយកុំព្យូទ័រយួរដៃ អាគុយយន្តហោះ, អាគុយយានយន្ត អាគុយសូឡា និងឧបករណ៍ផ្ទុកថាមពលដូចជា Power bank, Power station និងថ្មទូរស័ព្ទ ជាដើម), ចង្ក្រានកម្ដៅអគ្គិសនី, កំសៀវអគ្គិសនី, រថយន្តដឹកអ្នកដំណើរ និងរថយន្តដឹកទំនិញប្រភេទ HEV, PHEV និង EV ចំនួន ១៧៩ បន្ទាត់ពន្ធ។

៣- បញ្ចុះអត្រាពន្ធនាំចូលពី ៣៥% មក ៧% លើមុខទំនិញរថយន្តគ្រួសារប្រភេទ PHEV ចំនួន ៩២ បន្ទាត់ពន្ធ។

៤- បញ្ចុះអត្រាពន្ធនាំចូលពី ៣៥% មក ០% លើមុខទំនិញចង្ក្រានអគ្គិសនី ចង្ក្រានអាំងនំប៉័ង និងរថយន្តគ្រួសារប្រភេទ EV ចំនួន ១២ បន្ទាត់ពន្ធ។

៥- បញ្ចុះអត្រាអាករនាំចេញពី ២៥% មក ១០% លើមុខទំនិញរ៉ែបុកស៊ីត (រ៉ែអាលុយមីញ៉ូម) ចំនួន ០១ បន្ទាត់ពន្ធ។

អត្រាពន្ធគយនិងអត្រាអាករនាំចេញកែសម្រួលថ្មីនេះ នឹងចូលជាធរមានចាប់ពីថ្ងៃទី១ ខែមេសា ឆ្នាំ២០២៦ តទៅ។

សូមបញ្ជាក់ជូនថា វិធានការថ្មីបន្ថែមនេះ បានធ្វើឡើងបន្ទាប់ពីរាជរដ្ឋាភិបាលបានដាក់ចេញវិធានការជាច្រើនរួចហើយរយៈពេលចុងក្រោយនេះសំដៅជួយទប់តម្លៃប្រេងឥន្ធនៈនិងជួយសម្រួលជីវភាពប្រជាពលរដ្ឋមានដូចជា៖

បន្តបញ្ចុះតម្លៃប្រេងចំនួន ៦.៥ សេនដុល្លារក្នុង១លីត្រ ដែលជាការជួយឧបត្ថម្ភផ្ទាល់របស់រាជរដ្ឋាភិបាលទៅលើតម្លៃប្រេងឥន្ធនៈដើម្បីបន្ធូរបន្ទុកប្រជាពលរដ្ឋ។

បន្តបញ្ចុះតម្លៃ១សេនដុល្លារបន្ថែមទៀតក្នុង១លីត្រនៅពេលដែលប្រេងសាំងអន្តរជាតិកើនលើសពី៩០ដុល្លារក្នុង១បារ៉ែល និងប្រេងម៉ាស៊ូតអន្តរជាតិកើនលើសពី១០០ ដុល្លារក្នុង១បារ៉ែល។ បញ្ចុះពន្ធគយដល់ ០ ពោលគឺរដ្ឋមិនយកពន្ធនាំចូលប្រេងតែម្តង។ បញ្ចុះអាករបន្ថែមលើប្រេងសាំងនិងប្រេងម៉ាស៊ូតដល់ ០ (សូន្យ) ដុល្លារ។ បញ្ចុះអាករពិសេសលើប្រេងម៉ាស៊ូតពី ៤% មក ០% និងបញ្ចុះអាករលើតម្លៃបន្ថែមប្រេងសាំងនិងម៉ាស៊ូតពី ១០% មកត្រឹម ៤% តែប៉ុណ្ណោះ ដោយរាជរដ្ឋាភិបាលជាអ្នកទទួលបន្ទុកជំនួសចំពោះអាករលើតម្លៃបន្ថែមចំនួន ៦% ដែលត្រូវបានកាត់ចេញ។

ព័ត៌មានទី២៖ នៅថ្ងៃអាទិត្យ ទី២៩ ខែមីនា ឆ្នាំ២០២៦ ក្រុមសម្របសម្រួល (CLG) នៃព្រះរាជាណាចក្រកម្ពុជា បានសម្របសម្រួលដល់ក្រុមអ្នកសង្កេតការណ៍អាស៊ាន (AOT) ចុះសង្កេតការណ៍ ផ្ទៀងផ្ទាត់ និងរាយការណ៍ អំពីស្ថានភាពព្រំដែននៅតំបន់ច្រកអូរស្មាច់ ក្រុងសំរោង ខេត្តឧត្តរមានជ័យ ដោយផ្តោតលើការគោរពនិងអនុវត្តវិធានការទាំងអស់ក្នុងសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ ក្រោយបទឈប់បាញ់ចូលជាធរមាន។ កាលពីថ្ងៃសៅរ៍ ទី២៨ ខែមីនា ឆ្នាំ២០២៦ ក្រុមអ្នកសង្កេតការណ៍អាស៊ាន (AOT) ក៏បានចុះទៅសង្កេតការណ៍ ផ្ទៀងផ្ទាត់ និងរាយការណ៍ អំពីស្ថានភាពព្រំដែននៅតំបន់ច្រកបឹងត្រកួននិងតំបន់ភូមិព្រៃចាន់ ខេត្តបន្ទាយមានជ័យ។ ដោយឡែក នៅថ្ងៃអាទិត្យ ទី២៩ ខែមីនា ឆ្នាំ២០២៦ ដដែល ប្រទេសវៀតណាមបានបញ្ជូននាយទាហានបន្តវេនពីររូបកមចូលរួមជាមួយក្រុម AOT ប្រចាំកម្ពុជាក្រោមការដឹកនាំរបស់ហ្វីលីពីនក្នុងនាមជាប្រធានប្តូរវេនអាស៊ានឆ្នាំ២០២៦។

ព័ត៌មានទី៣៖ នៅថ្ងៃអាទិត្យ ទី២៩ ខែមីនា ឆ្នាំ២០២៦ លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញសួរសុខទុក្ខវីរៈកងទ័ពដែលកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្រោយបានរងរបួសអំឡុងពេលបំពេញការងារ កាលពីថ្ងៃទី២៦ ខែមីនា ឆ្នាំ២០២៦។ លោកជំទាវបណ្ឌិត ក៏បានពាំនាំនូវសារសួរសុខទុក្ខពីសំណាក់ សម្តេចតេជោ ហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត ព្រមទាំងសម្តេចមហាបវរធិបតី នាយករដ្ឋមន្ត្រី ជូនដល់សាមីខ្លួន និងក្រុមគ្រួសារ ដើម្បីជាការលើកទឹកចិត្ត និងជូនពរដល់យោធិនដែលកំពុងសម្រាកព្យាបាលឱ្យឆាប់ជាសះស្បើយ និងក៏បានស្នើឱ្យក្រុមគ្រូពេទ្យមើលថែទាំពួកគាត់ឱ្យបានដិតដល់ជាទីបំផុតដើម្បីពួកគាត់អាចត្រឡប់ទៅកាន់គេហដ្ឋានវិញឆាប់ៗ។សកម្មភាព និងវិធានការ ដូចបានលើកឡើងខាងដើម បានបង្ហាញយ៉ាងច្បាស់ពីការយកចិត្តទុកដាក់គ្រប់ជ្រុងជ្រោយរបស់រាជរដ្ឋាភិបាលនិងថ្នាក់ដឹកនាំចំពោះបូរណភាពទឹកដី និងសុខទុក្ខរបស់វីរកងទ័ពជួរមុខ ក៏ដូចជាសុខទុក្ខរបស់ប្រជាពលរដ្ឋគ្រប់មជ្ឈដ្ឋាន ជាពិសេសនៅក្នុងកាលៈទេសៈដែលពួកគេជួបការលំបាក។ សម្តេចមហាបវរធិបតី ហ៊ុន ម៉ាណែត មានប្រសាសន៍ថា «ការការពារបូរណភាពទឹកដីនិងប្រជាជន គឺជាអាទិភាពខ្ពស់បំផុតរបស់រាជរដ្ឋាភិបាល»។ ចំណែកសម្តេចតេជោ ហ៊ុន សែន ក៏បានមានប្រសាសន៍ថា «គោលដៅឆ្ពោះទៅមុខរបស់កម្ពុជា គឺការបញ្ចប់ទុក្ខលំបាករបស់ប្រជាពលរដ្ឋ និងដើរលើមាគ៌ាសន្តិភាព តែមិនអាចធ្វើសម្បទានបូរណភាពទឹកដី និងសេចក្តីថ្លៃថ្នូររបស់ជាតិបានឡើយ»៕ 

The post អ្នកនាំពាក្យរាជរដ្ឋាភិបាល៖ ក្នុងគ្រាដ៏លំបាកបណ្តាលមកពីតម្លៃប្រេងឥន្ធនៈកើនឡើង រាជរដ្ឋាភិបាលចេញវិធានការអន្តរាគមន៍បន្ថែមមួយចំនួនទៀត សំដៅជួយកាត់បន្ថយបន្ទុកចំណាយរបស់ប្រជាពលរដ្ឋ appeared first on .