ស្រីលង្កា សម្រេចបន្ថយតម្លៃឱសថសំខាន់ៗ ១៦% បន្ទាប់មានភាពធូរស្រាលពីវិបត្តិសេដ្ឋកិច្ច

ឧកញ៉ាសាមញ្ញ — Tue, 06 Jun 2023 10:55:00 +0000

រដ្ឋមន្ត្រីសុខាភិបាលស្រីលង្កា បាននិយាយនៅថ្ងៃអង្គារនេះថា ប្រទេសរបស់ខ្លួន នឹងធ្វើការកាត់បន្ថយតម្លៃ ១៦% សម្រាប់ឱសថសំខាន់ៗចំនួន ៦០ ប្រភេទ ដោយគិតចាប់ពីថ្ងៃទី ១៥ ខែមិថុនាតទៅ បន្ទាប់ពីប្រទេសនេះ បានមើលឃើញពីភាពធូរស្រាលឡើងវិញ ចំពោះវិបត្តិសេដ្ឋកិច្ចដ៏អាក្រក់របស់ខ្លួន មិនធ្លាប់មាន ក្នុងរយ:ពេលជាច្រើនទសវត្សរ៍ ។ នេះបើតាមការចុះផ្សាយពីសារព័ត៌មាន CNA ។

ប្រទេសដីកោះមួយនេះ បានធ្លាក់ចូលទៅក្នុងវិបត្តិសេដ្ឋកិច្ចដ៏ធ្ងន់ធ្ងរបំផុត កាលពីឆ្នាំមុន នៅពេលដែលទុនបម្រុងបរទេសរបស់ខ្លួនបានអស់ ដែលជាហេតុធ្វើឱ្យតម្លៃស្បៀងអាហារ និងថាមពលកើនឡើងខ្លាំង ខណ:ប្រជាជនក៏បានបើការតវ៉ា បង្ខំឱ្យប្រធានាធិបតីចុះចេញពីតំណែង នៅពេលនោះផងដែរ ។

ប៉ុន្តែយ៉ាងណាក៏ដោយ ទុនបម្រុងបរទេសរបស់ស្រីលង្កា ហាក់មានភាពល្អប្រសើរឡើងវិញ ក្នុងរយ:ពេល ៩ ខែចុងក្រោយនេះ នៅពេលដែលរដ្ឋាភិបាល ទទួលបានប្រាក់ជំនួយសង្រ្គោះចំនួន ២,៩ពាន់លានដុល្លារ ពីមូលនិធិរូបិយវត្ថុអន្តរជាតិ (IMF) ដែលបានសម្របសម្រួលអតិផរណា និងបានចាប់ផ្តើមកសាងទុនបម្រុងបរទេសរបស់ខ្លួនឡើងវិញ ។

មិនតែប៉ុណ្ណោះ រដ្ឋមន្ត្រីសុខាភិបាលស្រីលង្កា លោក Keheliya Rambukwella បាននិយាយថា តម្លៃប្រាក់រូពីរបស់ខ្លួន បានឡើងថ្លៃប្រហែល ២៤% នៅឆ្នាំនេះ ដែលអនុញ្ញាតឱ្យរដ្ឋាភិបាល អាចធ្វើការកាត់បន្ថយតម្លៃឱសថសំខាន់ៗចំនួន ៦០ ប្រភេទ រួមទាំងថ្នាំ ដែលប្រើប្រាស់សម្រាប់ព្យាបាលជំងឺទឹកនោមផ្អែម ជំងឺបេះដូង និងជំងឺលើសឈាម ផងដែរ៕

The post ស្រីលង្កា សម្រេចបន្ថយតម្លៃឱសថសំខាន់ៗ ១៦% បន្ទាប់មានភាពធូរស្រាលពីវិបត្តិសេដ្ឋកិច្ច appeared first on .

ក្រុមហ៊ុនប្រេងថៃ PTT គ្រោងពង្រីកអាជីវកម្មឱសថ ដោយចុះកិច្ចព្រមព្រៀមជាមួយ Alvogen ក្នុងតម្លៃ ៤៧៥ លានដុល្លារ

ឧកញ៉ាសាមញ្ញ — Mon, 29 Nov 2021 02:48:50 +0000

ក្រុមហ៊ុនប្រេងឥន្ធន: PTT របស់ថៃ គ្រោងនឹងធ្វើការពង្រីកបន្ថែមទៀត ទៅលើអាជីវកម្មឱសថ នៅក្នុងនាមជាផ្នែកមួយនៃដៃគូសហការជាមួយក្រុមហ៊ុនផលិតថ្នាំ Alvogen ដែលជាមេរបស់ក្រុមហ៊ុន Lotus Pharmaceutical របស់តៃវ៉ាន់ ។

ជាក់ស្តែង PTT និង Icelandic Aztiq បានយល់ព្រមទៅលើកិច្ចព្រមព្រៀងទិញយកក្រុមហ៊ុន Alvogen Emerging Markets Holdings Ltd ក្នុងតម្លៃប្រមាណ ៤៧៥ លានដុល្លារអាមេរិក ដែលកាន់កាប់ភាគហ៊ុន ៥៧,៤៨% នៅក្នុង Lotus Pharmaceutical ។ យ៉ាងណានេះបើតាមការឲ្យដឹងពី Refinitiv Eikon ។

មិនតែប៉ុណ្ណោះក្រុមហ៊ុន PTT បាននិយាយថា ខ្លួននឹងមានសិទ្ធកាន់កាប់ភាគហ៊ុនដោយប្រយោលប្រមាណ ៣៧% នៅក្នុង Lotus ដែលផលិតថ្នាំ ដើម្បីព្យាបាលជំងឺមហារីក ជំងឺសរសៃឈាមបេះដូង និងជំងឺផ្លូវចិត្ត នៅពេលដែលកិច្ចព្រមព្រៀងបិទនៅត្រីមាសទីមួយនៃឆ្នាំ ២០២២ ខាងមុខ និងរួមទាំងទទួលបាន ៦០% នៃ Adalvo ផងដែរ ។

គួររំលឹកផងដែរថា កាលពីខែមេសា ក្រុមហ៊ុន PTT បានទិញយកភាគហ៊ុនរបស់ Lotus ចំនួន ៦,៦% នៅក្នុងតម្លៃប្រមាណ ៥០ លានដុល្លារ ។

ដោយឡែក ការបោះជំហានចូលអាជីវកម្មថ្មីនេះ គឺជាផ្នែកមួយនៃយុទ្ធសាស្រ្តរបស់ក្រុមហ៊ុន PTT ដើម្បីធ្វើឲ្យអាជីវកម្មរបស់ពួកគេកាន់តែងាកចេញឆ្ងាយពីឥន្ធន:ហ្វូស៊ីល ខណ:ក្រុមហ៊ុនខ្នាតយក្សរបស់ប្រទេសថៃមួយនេះ ក៏ធ្លាប់បានប្រកាសពីផែនការរបស់ខ្លួន ក្នុងការផលិតរថយន្តអគ្គិសនី និងធ្វើការពង្រីកសិទ្ធិអាជីវកម្មហាងកាហ្វេ Amazon របស់ខ្លួន នៅតំបន់អាស៊ីផងដែរ ៕

ប្រភព: CNA

The post ក្រុមហ៊ុនប្រេងថៃ PTT គ្រោងពង្រីកអាជីវកម្មឱសថ ដោយចុះកិច្ចព្រមព្រៀមជាមួយ Alvogen ក្នុងតម្លៃ ៤៧៥ លានដុល្លារ appeared first on .